1 SIANGPAHRANG 11
11
Solomon Tlaunak le A Ral Hna
1Siangpahrang Solomon nih cun miphun dang minu tampi a duh hna: Faro fanu tehna, Moab mi tehna, Ammon mi tehna, Edom mi tehna, Sidon mi tehna, Hit mi tehna kha a duh hna; #Deu 17.17 2Bawipa nih Israel mi sinah, “Nannih nih nan ṭhi hna in nan la hna lai lo i annih zong nih in ṭhi hna in, in la ve hna hlah seh, zeitintiah annih nih nan lung kha an pathian hna leiah an in mer hrimhrim ko hna lai,” tiin a rak chimmi miphun hna nu kha a duh hna i aa tlaih peng hna. #Exo 34.16; Deu 7.3-4 3Nupi za sarih, bawi fanu, le nuchun za thum a ngei hna i a nupile nih cun a lung cu an pialter. 4Zeitintiah Solomon cu a hung tar tikah a nupi hna nih cun a lung cu pathian dang hna leiah an pialter i a pa David lung bang khan cun a lung cu a dih umnak in a Pathian Bawipa sinah khan a hmun lo. 5Zeitintiah Solomon nih cun Sidon mi hna khuazingnu Ashtoreth le Ammon mi hna pathian fihnung Milkom kha a zulh hna. 6Cucaah Solomon nih Bawipa mithmuh i thil ṭhalo a simi kha a tuah i a pa David bantukin Bawipa kha a lung dihlak in a zul lo. 7Cun Solomon nih Jerusalem nichuahlei tlang ah khan Moab mi khuazing fihnung Khemosh le Ammon mi pathian fihnung Molek caah khan khuahrum bo a ser. 8Cu bantuk ṭhiamṭhiam in ramdangmi a nupi vialte hna caah khan a tuah i annih nih an pathian hna sinah khan zihmui an khangh i rai an thawi.
9Cun Bawipa cu Solomon cungah a thin a hung, zeicahtiah Bawipa, Israel Pathian, a sinah voi hnih a rak lang i 10hi thil kongah nawl a rak pe i pathian dang kha na zul hna lai lo tiin a titu sin khan a lung cu aa mer cang i Bawipa nih nawl a pekmi cu a zul lo. 11Cucaah Bawipa nih Solomon cu a thawh i, “Mah hihi na lungthin a si i nawl kan pekmi ka biakamnak le ka nawlbia kha na zulh hna lo caah, nangmah sin hin pennak hi ka thleh hrimhrim lai i na sinum sinah ka pek lai. 12Sihmanhsehlaw na pa David ruangah nangmah chan chungah cun ka tuah lai lo, na fapa kut chung tu in ka thleh te lai. 13Asinain ram cu a dihlak in ka thlek lai lo, ka sal David le ka thimmi khua Jerusalem ruangah hin hrin khat cu na fapa cu ka pek lai,” tiah a ti.
14Cu Solomon caah Bawipa nih dohtu pakhat, Edom mi Hadad kha a thawhter, amah cu Edom ram i an bawi phun a si. 15Zeitintiah David kha Edom i a um lio i a ralkapbu haotu Joab kha thahmi hna vui awk i a hung kal tikah khan, Edom i pa vialte kha a thah dih hna, 16(Zeitintiah Joab le Israel mi vialte cu khika ah thla ruk chung, Edom ram i pa vialte a thah hna hlantiang, an cam); 17sihmanhsehlaw Hadad cu Izipt ah, a pa sinum Edom mi a cheukhat hna he tiah an zam, Hadad cu ngakchiate a rak si. 18Midian in an i thawh i Paran an phan, cun Paran cun mi an i kalpi hna i Izipt ah, Izipt siangpahrang Faro sin an phan; amah nih cun inn a pek i rawl kha a rak damhkhanpiak i ram zong a pek. 19Hadad nih cun Faro cu a lung a ton ngaingai i cucaah a nupi, Siangpahrang Tahpenes i a unaunu kha ṭhit awkah a pek. 20Cun Tahpenes unaunu nih khan a fapa Genubath kha a hrinpiak i amah cu Faro inn ah khan Tahpenes nih hnuk a thlahter; Genubath cu Faro fapa hna lakah khan Faro inn ah cun a um ve. 21Sihmanhsehlaw Hadad nih Izipt ram in David cu a pupa hna sinah a it cang i ralkapbu haotu Joab kha a thi cang ti a theih tikah, Hadad nih cun Faro sinah khan, “Ka ram ah ka va kal nakhnga, ka kalter tuah,” tiah a ti. 22Sihmanhsehlaw Faro nih cun amah cu a thawh i, “Na ram i kal naa timh cu keimah sin i na um ah hin zeidah na bau?” tiah a ti. Cun anih nih, “Zei kan ti hnga, ka kalter ko,” tiah a ti.
23Pathian nih Elaida fapa Rezon, a bawipa Hadadezer, Zobah siangpahrang sinin a zammi zong kha a ral ah a thawhter. 24David nih Zobah khuami kha a thah hna hnuah, amah nih cun mi kha a sinah a pumh hna i mi ramhtu bu lu ah aa ser i Damaskas ah an kal i khika ah an um i siangpahrang ah an ser. 25Solomon chan chung vialte amah cu Israel mi ral a si i Hadad nih a tuah bantuk khan hnahnawhnak a tuah ve; amah nih cun Israel mi cu a huat hna i Siria ram kha a uk.
26Zeredah khuami Efraim mi Nebat i a fapa Jeroboam, Solomon sinum a simi, a nu nuhmei a si i a min ah Zeruah a simi zong nih khan, siangpahrang cu a kut a lekhnawh. 27Siangpahrang cung i a kut a hun leknak cu mahtihin a si: Solomon nih cun Millo kha a hun sak i a pa David khua a pemnak zawn kha a remh. 28Jeroboam cu thil ti kho ngai a si i Solomon nih tlangvalpa cu miteima a si ti kha a hmuh tikah, Josef hrin nih an ṭuan awk hnekmi rian vialte cung i haotu ah khan a chiah. 29Cun khi caan ah khan Jeroboam cu Jerusalem in a chuah tikah, profet Ahijah, Shilon mi nih khan lampi ah a hmuh. Ahijah cu puan thar aa aih i an pahnih cun ramlak sawhsawh ah anmah lawngin an um. 30Cun Ahijah nih aa aihmi puan thar kha a lak i cheu hleihnih ah a thleh. 31Cun Jeroboam cu a thawh i, “Cheu hra kha i lak hna, zeitintiah hi bangin Bawipa Israel Pathian nih, ‘Zohhmanh, pennak hi Solomon kut chungin ka chuh dengmang cang. 32(sihmanhsehlaw ka sal David le Israel mi phun vialte chungin ka thimmi khua Jerusalem ruangah hin phun khat hi cu amah nih a co lai), 33amah nih a ka hlawt i Sidon mi khuazingnu Ashtoreth le Moab mi pathian Khemosh le Ammon mi pathian Milkom kha a biak hna i ka lam kha a zul hna lo i a pa David bantukin ka mithmuh ah a dikmi a tuah lo i ka nawlbia le ka phunglam kha a zulh hna lo caah, phun hra hi nangmah kan pek lai. 34Asinain pennak cu a ning piin a kut chungin ka la lai lo; sihmanhsehlaw ka thimmi ka sal David ka nawlbia hna le ka phungbia hna a zultu ruangah khan a chan chung paoh cu uktu ka siter ko lai; 35sihmanhsehlaw a fapa kut chung khan pennak cu ka lak lai i nangmah cu kan pek lai, phun hra hna cu. 36Sihmanhsehlaw ka sal David nih ka min chiahnak caah ka thimmi khua Jerusalem ah ka hmaiah mei inn a ngeih zungzal nakhnga, a fapa cu phun khat cu ka pek lai. 37Cun nangmah cu kan lak lai i na lungthin nih a duhmi vialte cungah uknak na ngei lai i Israel mi cungah siangpahrang na si lai. 38Cun nangmah nih nawl kan pekmi vialte kha na ngaih i ka lam kha na zulh hna i ka sal David nih a rak tuah bantukin ka nawlbia le ka phungbia zulhnak thawngin ka mit na tlin ahcun, na sinah ka um lai i David ca i ka sak bantuk khan, a fekmi innchungkhar kan sakpiak lai i Israel cu nangmah kan pek lai. 39Cun hi ruangah hin David tefa hna cu hremnak ka pek hna lai, asinain zungzal cun a si lai lo,’ a ti,” tiah a ti. 40Cucaah Solomon nih Jeroboam cu thah a timh; sihmanhsehlaw Jeroboam cu Izipt ram ah, Izipt siangpahrang Shishak sinah a zam i Solomon a thih hlantiang Izipt ram ah cun a um.
Solomon Thihnak
(2Cha 9.29-31)
41Cun Solomon nih a tuahmi thil a tang rihmi vialte le a fimnak cu, Solomon tuahmi thil ṭialnak cauk chungah an i ṭial a si lo mei? 42Cun Solomon nih Israel mi vialte a uk hna chung cu kum sawm li a si. 43Cun Solomon cu a pupa hna sinah a it i a pa David khua ah khan an vui; cun a fapa Rehoboam kha amah hmun ah cun a hung bawi.
Currently Selected:
1 SIANGPAHRANG 11: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006