1 SIANGPAHRANG 10
10
Sheba Siangpahrangnu A Ra Tlawng
(2Cha 9.1-12)
1Sheba siangpahrangnu nih Bawipa min kong i Solomon minthannak kha a theih tikah, amah cu a harmi biahalnak in hneksak awkah a ra. #Mat 12.42; Luk 11.31 2Jerusalem ah cun mizul tampi he, zihmui a phormi kalauk hna le sui tampi le lungvar hna he a ra i Solomon sinah a phak tikah a lung chung i a ummi vialte cu a chimh dih. 3Solomon nih a biahalnak vialte cu a leh dih; siangpahrang nih a sullam a chimh khawh lomi, a hngalh lomi zeihmanh a um lo. 4Cun Sheba siangpahrangnu nih Solomon fimnak vialte le inn a sakmi le 5a cabuai i rawl le a bawi pawl an ṭhut-umning le a sinum hna nih mi an tuammuai hna ning le, an hnipuan le an hrai putu hna le Bawipa inn i a pekchanhmi a khangh thawinak hna kha a hmuh tikah, a chungah thlarau a taang ti lo.
6Cun siangpahrang cu a thawh i, “Ka ram chungin, na rian ṭuan ning le na fimnak kong ka rak theihmi kha bia dik a si ko, 7sihmanhsehlaw an chimmi cu keimah hrim ka rat i keimah mit hrim nih a hmuh hlanah cun ka zum lo; cun zohhmanh, a cheu hmanh an rak ka chimh ṭung lo; na fimnak le na rumnak nih ka rak theihmi bia cu a lonh diam. 8Na nupi hna hi an van a va ṭha dah! Hi na sinum hna nangmah hmaiah a dir zungzal i na fimnak a theimi hna hi an van a va ṭha dah! 9Bawipa na Pathian, nangmah chungah lawmhnak a ngei i Israel mi bawi ṭhutdan cungah an ṭhuttertu cu thangṭhat si ko seh. Bawipa nih Israel cu zungzal in a dawt caah, nangmah nih biading le dinnak cu na tuah nakhnga, siangpahrang ah an ser,” tiah a ti. 10Cun siangpahrang cu sui talen za khat le kul le zihmui tampi le lungvar man sung hna kha a pek; Sheba siangpahrangnu nih Siangpahrang Solomon a pekmi tluk tam hin zihmui a lut ṭhan bal ti lo.
11Cuhleiah Hiram sangphawlawng rual, Ofir in sui a rak phortu nih khan Ofir in almuk thing tampi le lungvar mansung tampi an rak phorh hna. 12Cun siangpahrang nih almuk thing cun Bawipa inn dohnak tung hna le siangpahrang inn dohnak tung hna le hlasatu hna caah tingtang le ruakhuang hna zong a ser hna; cun nihin tiangin cu bantuk almuk thing cu a ra bal ti lo i hmuh zong a si bal ti lo.
13Cun Siangpahrang Solomon nih Sheba siangpahrangnu cu a duhmi vialte, Siangpahrang Solomon nih amah siannak in a pekmi hleiah a halmi vialte zong kha a pek dih. Cucaah amah ram ah khan a sinum hna he khan an tlung ṭhan.
Solomon Rumnak le Minthannak
(2Cha 9.13-24)
14Solomon sinah kum khat ah a lutmi sui a rih lei cu talen za ruk, sawm ruk le paruk a si; 15mah hihi chawlet hna le chawdawr hna lam in le Arabia ram siangpahrang vialte hna le, cu ram uk bawi hna sinin a lutmi lengah a si. 16Solomon nih phaw a nganmi za hnih, denmi sui in a ser hna, phaw pakhat ah sui shekel za ruk cio a lut. 17Cun denmi sui in phaw za thum a ser hna; phaw khat ah sui mina#10.17 mina pakhat cu shekel sawm ruk tluk a si. pathum cio a lut; cun siangpahrang nih Lebanon Tupi Inn ah khan a chiah hna. 18Cun siangpahrang nih cun vui ho bawi ṭhutdan nganpi zong a ser i a thiang bikmi sui khan a hut. 19Bawi ṭhutdan ah cun lamhbak paruk an um i bawi ṭhutdan a hnulei kap ah cun cawfa lu a um, cu ṭhutdan kam veve ah cun ban chiahnak an um i ban chiahnak pawng veve ah cun chiandeih pahnih an dir, 20lamhbak kamkip ah khan a lamhbak paruk in, chiandeih hleihnih an dir. Cu bantuk cu khuazei ram hmanh ah an ser bal lo. 21Siangpahrang Solomon hrai vialte cu sui an si i Lebanon Tupi Inn umkheng vialte cu sui thiang an si; pakhat hmanh ngun an um lo, Solomon chan ah cun ngun cu zeihmanh ah an rak rel lo. 22Zeitintiah siangpahrang nih cun rili ah khan, Tarshish sangphawlawng rual khat, Hiram sangphawlawng rual sinah khan a ngei. Kum thum ah voi khat lengmang Tarshish sangphawlawng rual nih cun sui, ngun, vui ho, zawng le awtaw kha an rak phorh tawn hna.
23Cuticun Solomon Siangpahrang nih vawleicung siangpahrang vialte cu rumnak le fimnak ah a lonh dih hna. 24Cun Solomon cu a lung chung i fimnak Pathian nih a chiahmi theih awkah khan vawleicung mi dihlak nih khan an fuh. 25Cun an dihlak khan kum khat ah cu zat cio ah tiin amah cu laksawng, ngun umkheng hna le sui umkheng hna, hnipuan le zihmui le rangtum hna le laa hna kha an rak phorh lengmang.
Rang le Rangleng In Chaw A Let
(2Cha 1.14-17; 9.25-28)
26Cun Solomon nih rangleng le rang cit thiam kha a pumh hna; rangleng thong khat le za li le, rang cit thiam sang khat le thong hnih a ngeih hna i rangleng chiahnak khua hna le Jerusalem khua i siangpahrang umnak ah khan a chiah hna. #1Sia 4.26 27Cun siangpahrang nih cun Jerusalem ah khan ngun cu lungtekem tlukin a tamter i sidar thing cu Shefelah i saikamor thing zat khan a tamter. 28Cun Solomon nih a cawkmi rangtum hna cu Izipt le Kue in an si; siangpahrang chawlettu hna nih khan a man aa khat in Kue ah khan an cawk tawn hna. #Deu 17.16 29Izipt ram in rangleng pakhat cu shekel za ruk in, rangtum pakhat cu za le sawm nga in, tlunpi khawh a si; cucaah siangpahrang chawlettu hna sin cun Hit mi siangpahrang vialte hna le Siria mi siangpahrang vialte hna sinah zuarh chin an si.
Currently Selected:
1 SIANGPAHRANG 10: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006