Nehemiah 12
12
Thiampite le Levi te Min Tepteena
1Shealtiel ii tapa Zerubbabel le Thiampi Lianbel Joshua taw saltanna pan a cia kik, thiampite le Levi te min tepteena a nuai a bang ahi hi:
2-7Thiampite:
Seraiah, Jeremiah, Ezra,
Amariah, Malluch, Hattush,
Shecaniah, Rehum, Meremoth,
Iddo, Ginnethoi, Abijah,
Mijamin, Maadiah, Bilgah,
Shemaiah, Joiarib, Jedaiah,
Sallu, Amok, Hilkiah le Jedaiah ahi uh hi.
Hite sia Joshua hunlai in a thiampipuite theampo sungah lampuite ahi hi.
8Levi te:
A nuai a teng sia lungdamko biakna lasakna ah lampuite veu hi: Jeshua, Binnui, Kadmiel, Sherebiah, Judah le Mattaniah.
9A kizo choir lasate a nuai a bang hi: Bakbukiah, Unno le a Levi puite.
Thiampi Lianbel Joshua ii Suan le paalte
10Joshua sia Joiakim ii pa hi a; Joiakim sia Eliashib ii pa hi; Eliashib sia Joiada ii pa hi; 11Joiada sia Jonathan ii pa hi a; Jonathan sia Jaddua ii pa ahi hi.
Thiampi Bee le phungte ii Lutangte
12-21Joiakim ii Thiampi Lianbel a sep lai in thiampi bee lutangte sia a nuai a thiampite veu hi:
| Thiampi | Bee le phung |
|---|---|
| Meraiah | Seraiah |
| Hananiah | Jeremiah |
| Meshullam | Ezra |
| Jehohanan | Amariah |
| Jonathan | Malluchi |
| Joseph | Shebaniah |
| Adna | Harim |
| Helkai | Meraioth |
| Zechariah | Iddo |
| Meshullam | Ginnethon |
| Zichri | Abijah |
| …#12:12-21 Hebrew sungah a min tepteena om ngawl hi. | Miniamin |
| Piltai | Moadiah |
| Shammua | Bilgah |
| Jehonathan | Shemaiah |
| Mattenai | Joiarib |
| Uzzi | Jedaiah |
| Kallai | Sallai |
| Eber | Amok |
| Hashabiah | Hilkiah |
| Nethanel | Jedaiah |
Thiampi le Levi Innkuante Tepteena
22Thiampi Lianbel te: Eliashib, Joiada, Jonathan le Jaddua te nuntak hun sungin Levi innkuan lutangte le thiampi innkuan lutangte tepteena khat kikoi hi. Hi tepteena sia Darius ii Persia kumpilianpa a sep lai in kizo siat hi.
23Levi innkuan lutangte tepteena lai ahile Eliashib ii tupa Jonathan hun dong bekma zumlai tepteena sungah kikhum hi.
Biakinnpi sung Nasep Hawmna
24Hashabiah, Sherebiah, Jeshua, Binnui le Kadmiel te sawlna taw Levi te a pawl a pawl veu sua hi. Pathian mi David kumpipa thupiakna taw kizui in, pawl nii veu in kilaih in Pathian pok a, lungdamko uh hi.
25Biakinnpi kongpite hui ah vanh kholna inndoi a cingte a uk biakinn cingte sia a nuai a teng hi: Mattaniah, Bakbukiah, Obadiah, Meshullam, Talmon le Akkub.
26Hi mite sia Joshua ii tapa, Jehozadak ii tupa ahi Joiakim hun, le ngamukmang Nehemiah le Thukham a he, thiampi mipil Ezra te hun lai in a omte veu hi.
Nehemiah in Khuapi Luphung Aap
27Jerusalem khuapi luphung a ki aap ciang, daakbute le tengtonghte tumin lungdamkona late taw a ki aapna poai ah a kihel thei natu in Levi te sia a teenna tek pan kikaikhawm hi. 28Levi innkuan la sate sia Jerusalem khua kiim a teenna tek pan le Netophah kiim khuate pan, 29tuaciang Bethgilgal, Geba le Azmaveth panin kikhawmtua uh hi. 30Thiampite le Levi te in amate, mipite, kongpite le khuapi luphung atu in a zeksa thiansuana seam hi.
31Luphung tungah Judah lampuite ka khawmtua a, Pathian tungah lungdamko in, khuapi a kiimkot tu pawl lian niite ka uksak hi.
A masa pawl sia luphung tung ziatsang Ninthuk Kongpi sang manaw in pai uh hi. 32La sate nung pan Hoshaiah pai a, Judah lampuite a lang in zui uh hi. 33-35A zom kik a nuai a thiampi teng in lemle tumin pai uh hi: Azariah, Ezra, Meshullam, Judah, Benjamin, Shemaiah le Jeremiah. Tua zawkciang Jonathan ii tapa Shemaiah ii tupa ahi, Zechariah in zui hi. (A taanghpupite sungah Asaph bee le phungte ahi Mattaniah, Micaiah le Zaccur te zongh kihel hi.) 36Zechariah sia a bee le phung sung pan a dangte — Shemaiah, Azarel, Milalai, Gilalai, Maai, Nethanel, Judah le Hanani — a vekpi in Pathian mi David kumpipa ii a tum thei music vanh namte keng uh hi. Hi pawl sia a pai ciang laithiam mipil Ezra in lampui hi. 37Tuinaak Kongpi pan David Khuapi sangah kaato in, David kumpi inn kaantan a, khuapi nisuana sang Tui Kongpi luphung ah heak kik uh hi.
38Lungdam a ko pawldang khat sia luphung tung a veisang tawnin pai a, keima le mipite a lang in ka zui uh hi. Meikhukte Tausaang kaantan in Luphung Zai sia ah pai in, 39tua mun pan Ephraim Kongpi, Jeshanah Kongpi, Ngasa Kongpi, Hananel Tausaang le Zakhat Tausaang te kaantan in Tuu Kongpi ah ka pai uh a, Biakinnpi kongpi hui ah ka tawp uh hi.
40Tuabangin Pathian tung lungdam a ko tua pawl niite biakinn suumsung theng uh hi.
Keima taw a omkhawm lampuite ban ah 41ka pawl sungah lemle tum a nuai a thiampite: Eliakim, Maaseiah, Miniamin, Micaiah, Elioenai, Zechariah le Hananiah te kihel a; 42tuaciang amate nung pan Maaseiah, Shemaiah, Eleazar, Uzzi, Jehohanan, Malchijah, Elam le Ezer te in zui uh hi. Jezrahiah ii lampui lasate in a aw neiza taw lasa uh hi.
43Tua ni in sangaw biakpiakna tam mama kipia a, mipite lungdamna taw kidim uh hi, banghang ziam cile Pathian in amate lungdamsak mama hi. Numeite le patangte tua poai ah kihel in, amate ii awngingte a khualana pan kiza kawkoai thei hi.
Biakinnpi ah Biak natu A piakna
44Tua hunlai in sawm a khat sumpite, kum sim anpalte le a minciil thingngate a kihel Biakinnpi atu a kipiate kikepna vanh kholna inndoite a uk tu in pasalte kikoi hi. Hi mite in Thukham sungah a om bangin khuapi tuatuam naina ah a om lote pan thiampite le Levi te atu a kipiate, kaikhop tu vaipuak nei uh hi. Judah mi theampo thiampite le Levi te tungah lungkim uh hi, 45banghang ziam cile amate in Pathian thupiakna bangin kithiansuana poaite le a zeksa dangte vawtsak hi. David kumpipa le a tapa Solomon ii zui tu ngeina a piakte bangin biakinn music thiamte le biakinn cingte zongh in pha takin a sep tute seam uh hi. #1 Khang 25:1-8; 1 Khang 26:12 46Nidang lai, David kumpipa le music thiam Asaph hun pan kipan lasate in Pathian pokna late le lungdamkona lasaknate lampui uh hi. 47Zerubbabel le Nehemiah hun ciang zonghin biakinn music thiamte le biakinn cingte kivaak natu in Israel mi theampo in ni simin letsong pia uh hi. Mipite in Levi te tungah a thiangtho biakpiaknate pia a, Levi te in a kisamh za thiampite pia uh hi.
Currently Selected:
Nehemiah 12: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016