Nehemiah 11
11
Jerusalem ah A teang Mihingte
1Jerusalem ah lampuite teang in, a taanglai mite sung pan innkuan sawm ciang innkuan khat veu, Jerusalem khuapi thiangtho sungah teang tu in lai meetang sawkin teal a, a dang teng sia khuapi le khua dangte ah teangsak hi. 2Jerusalem ah ama uk thu in a teang nuam dang pawpo mipite in pok uh hi. 3A dang khua te le khuapi te sungah Israel mite, thiampite, Levi te, biakinn naseamte le Solomon naseamte ii suan le paalte sia amate khua tek, amate leitang tung tek ah teang uh hi. #Neh 7:73
Judah ngam Jerusalem khua sungah a teang lampuite min tepteena a nuai a bang ahi hi:
4Judah nam teng:
Uzziah ii tapa le Zechariah ii tupa Athaiah. A taanghpupi dangte sungah Amariah, Shephatiah le Mahalalel kihel a, Judah ii tapa Perez ii suan le paalte veu hi.
5Baruch ii tapa le Colhozeh ii tupa Maaseiah. A taanghpupi dangte sungah Hazaiah, Adaiah, Joiarib le Zechariah kihel a, Judah ii tapa Shelah ii suan le paalte veu hi.
6Perez ii suan le paal sung pan pasal kiciantuam 468 te, Jerusalem ah teang uh hi.
7Benjamin nam teng:
Meshullam ii tapa, Joed ii tupa ahi Sallu. Ama taanghpupi dangte sungah Pedaiah, Kolaiah, Maaseiah, Ithiel le Jeshaiah kihel uh hi.
8Sallu ii mealheak kuungte ahi Gabbai le Sallai.
Benjamin mite a vekpi 928 pha in Jerusalem ah teang uh hi. 9Zichri ii tapa Joel sia amate lampui hi a, Hassenuah ii tapa Judah sia tua khuapi sungah ulianbel a niina ahi hi.
10Thiampite:
Joiarib ii tapa Jedaiah le Jachin.
11Hilkiah ii tapa, Meshullam ii tupa ahi Seraiah. A taanghpupite sungah Zadok, Meraioth le Thiampi Lianbel Ahitub kihel uh hi. 12Hi bee le phung sung pan a vekpi 822 pha in Biakinnpi sungah naseam uh hi.
Jeroham ii tapa, Pelaliah ii tupa ahi Adaiah. A taanghpupite sungah Amzi, Zechariah, Pashhur le Malchijah kihel hi. 13Hi bee le phung sung pan a vekpi 242 te sia innkuan lutangte veu hi.
Azarel ii tapa, Ahzai ii tupa ahi Amashsai. A taanghpupite sungah Meshillemoth le Immer kihel uh hi. 14Hi bee le phung sung pan ngalkap mindok tuam 128 om hi. Amate lampui sia Zabdiel hi a, bangkua kician sung pan ahi hi.
15Levi te:
Hasshub ii tapa, Azrikam ii tupa ahi Shemaiah. A taanghpupite sungah Hashabiah le Bunni kihel uh hi.
16Levipa Shabbethai le Jozabad sia Biakinnpi puasang nasep uk a kiciante ahi uh hi.
17Asaph suan, Mica ii tapa, Zabdi ii tupa ahi Mattaniah. Ama in lungdamko thungetna ah biakinn lasa pawlte lampui hi.
Mattaniah nasep a huu pa Bakbukiah.
Jeduthun suan, Shammua ii tapa, Galal ii tupa ahi Abda.
18Levite a vekpi in 284 pha a, Jerusalem khuapi thiangtho sungah teang uh hi.
19Biakinn cingte:
Akkub, Talmon le a mealheakte a vekpi in 172 pha hi.
20A taanglai Israel mite le a om lai thiampite le Levi te sia Judah khuate le a dang khuapi te ah amate ii neisa leitang tungah teang uh hi. 21Ophel a kicina mun Jerusalem ah biakinn naseamte teang in, Ziha le Gishpa khutnuai ah naseam uh hi.
22Uzzi sia Jerusalem a teang Levi te nasep a ukpa hi a, Bani ii tapa, Hashabiah ii tupa ahi hi. A taanghpupite sungah Mattaniah le Mica kihel a, ama sia biakinn biak kikhopna ah music vaipuak a nei Asaph bee le phung pan hi. 23Bee le phung tuatuamte kilaih in ni simin biakinn music lampuina ah a sep zia taw kisai in a zui tu kumpi ngeinate om hi.
24Judah nam, Zerah bee le phung. Meshezabel ii tapa Pethahiah in Persia te ii thukhenzum ah Israel mite taang in ding hi.
A dang Khuate le Khuapite ah A teang Mite
25Mihing tam mama sia a lo thawna paam khuate ah teang uh hi. Judah namte sia Kiriath Arba, Dibon le Jekabzeel le hi khuapite ii nai khuanote ah teang uh hi. 26Amate Jeshua, Moladah, Bethpelet, 27le Hazarshual khuapi te tuaciang Beersheba khuapi le a kiim a om khuanote zongh ah teang uh hi. 28Amate sia Ziklag khuapi, Meconah le a khuanote sungah, 29Enrimmon, Zorah, Jarmuth, 30Zanoah, Adullam khua te sung le hi khua te ii a kiim a paam khuanote ah teang uh hi. Amate Lachish le a naina lote sungah le Azekah khua le a khuanote ah teang uh hi. Judah mite teenna ngam sia thangsang ah Beersheba le saksangah Hinnom Kuam kilaklaw teng kici thei hi.
31Benjamin nam pan mite Geba, Michmash, Ai, Bethel le a nai na khuano te, 32Anathoth, Nob, Ananiah, 33Hazor, Ramah, Gittaim, 34Hadid, Zeboim, Neballat, 35Lod le Ono le Khutthiamte Kual sungah teang uh hi. 36Judah ngamsung a teang Levi mi pawlkhatte sia Benjamin mite taw teang khawmsak hi.
Currently Selected:
Nehemiah 11: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016