DANYELAX 12
12
Lox Jhai Bawg Yam Sidah
1Ka daux bawg yam an, simiang ting Mikhelax, pa pau pui maix tak sang yaog ti kaoh cung, mai bawg yam pa kha rhawm tak sang koe pa mawh ceu pa ang sax koe jah tom kaw haktiex tix koe tom hoek ka daux bawg yam in, can pui maix khankix pa hoik koe ceu kaux ka daux phuk lai tak sang hoek krax taoh heue.#Mat 24:21; Mak 13:19; Jhi 7:14, 12:7 2#Mat 25:46 Pui pa laig it daux phawng tiex tom nie, tak siduad heue. Pui tiblah tak pon krax pa im ju leeing ju mai pui tiblah tak pon krax pa kaig tua mai krax pa laux min plakngai leeing ju heue.#Isa 26:19; Mat 25:46; Yo 5:29 3Pui pa koe pingnya cuyi khankix, tak jhan riang awm pa pruh riang plak raoma mai pa kieh pui tom deeh veeh tix ka plak pa rahsee, tak jhan riang awm simuing khankix leeing ju heue. 4“Danyelax eue, nyeep ti priex gumlox an khankix mai tawk ti priex cum ka phuk lai an tom hoek bawg yam sidah heue. Pui tom nie tak to jee to blaong mai sawg ti yaox mai krax pa tawng tak sang baox naok ti koe kah heue.” #Jhi 22:10 5Khaix an aux pa mawh Danyelax jhak mai yaox pui tang kaux ra kaux cung ti ot tan heue. An tix kaux cung ti ot ka praok rawm klawng plak in mai an tang kaux cung ti ot ka praok rawm plak an heue. 6An tix kaux chawk ah nin ka pui pa ceep kraung man rhi pa ot piang rawm klawng. “Ceu pa daox deng inkix tak sang rheung miex grheung lie?” 7Khaix an aux mhong lox pui pa hoik ceep kraung man rhi pa ot ka piang rawm klawng an, yam yaog nawh taix khawn dawm mai khawn gwiex tix ka plak raoma mai tiextu ka Nawh Cao pa im ju leeing ju ah nin, tak sang mawh bawg yam tix baux, bawg yam ra baux mai bawg yam tix plak mai yam hoik sidah rairuat sibrawm pui pa singax singeh an khankix, ceu inkix khawmuik tak sang mawh pa hoik yuh ti heue.#Jhi 10:5, 12:14 8Viang aux mhong ka lox an kawx aux ang tawng, khaix an aux chawk ah nin, “Cao Simiang aux eue, yuh ka mawx lie? Yam sidah ceu inkix tak sang mawh yuh ka mawx lie?” 9Nawh ah nin “Danyelax eue, hu maix heue. Grawh grawng nawh, gumlox inkix mawh pa hoik nyeep tix mai pa hoik tawk ti priex cum, tom hoek bawg yam sidah heue. 10Pui khankix tak sang mawh pa kieh ti singax mai paing mai pa hoik ciied ti tom mawh meh heue. Viang mawh nan, pui caox tak grham kix yuh ceu pa caox mai pui pa caox khankix tix kaux kawx tak ang pon ti tawng, mawh ngie pui pa koe pingnya cuyi pa pon tawng heue.#Jhi 22:11 11Jah khaing daux bawg yam hoik tik krax tan pa appong ku singaix an mai yam hoik yuh kix ti deuh krax laux leeing pa seeing an, tak sang koe tix rheng ra yieh tixdim singaix heue.#Dan 9:27, 11:31; Mat 24:15; Mak 13:14 12Pui pa pau tom hoek tix rheng loe yieh tixngoe phwan singaix an khankix koe bwanson heue. 13Phan mawh maix, hu tom hoek dee sidah heue. Grawh grawng nawh maix tak pon laux lee tix. Maix tak sang yaog ti kaoh mai pon sinngao maix ka daux singaix sidah sidu heue.
Currently Selected:
DANYELAX 12: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012