DANYELAX 11
11
1Ka daux num jah simiang Darix pa mawh ceu pui Medix ti kwang haktiex, Aux pa mawh kawn kawn pui, cung ti ot kaux cong mai tawx riang rao Mikhelax heue. 2Yam in aux sang krai maix mhong ceu pa mawh meh, jhak heue, simiang loe kaux tak sang yaog ti koe ka daux haktiex Pasha mai simiang pon kaux tix kaux an, tak sang nie lheu mi khaing kix khawmuik heue. Mawh kheu magmi ting riang nawh tom grum naog, nawh tak so pui khankix kaoh yuh naing ka haktiex Helasax heue. 3Khaix an simiang pa kied kwa tix kaux tak sang yaog ti kaoh mai nawh tak sang kwang mai sibrawm pa ting tix mai yuh awm pa koe rhawm cao tix heue. 4Yam yaog nawh ti kaoh, meung nawh tak sang jieh mai gwieh ti hu ka plak raoma pon daog mai ang lai mawh cie doeh ru nawh mai ang lai mawh awm sibrawm ka pa hoik kwang nawh, mawh kheu meung nawh tak sang mawh pa reeig tix lih mawh son pui tang kaux khaing doeh ru nawh heue.
Tawx Satix Ka Simiang
5Khaix an simiang plak seh tak sang koe riang rao ka daux cub simiang khankix tix kaux, nawh tak koe krax ting riang rao khaing mai sibrawm pa kwang nawh tak koe sibrawm pa ting lhaong heue. 6Khaix hoik luan khix num khankix tiblah, kix tak sang ra lai yuh paox pie tau mai kawn bun simiang plak seh, tak sang hoek ti yuh sijax mukheu tau mai simiang plak laong heue. Viang mawh nan, riang rao krax pa teem kawn bun an ang kaux ang cong mai simiang an khawm doeh ru nawh tak ang lai kaux cong heue. Kawn bun an mai pui pa hoek tawx nawh khankix mai ka kawn pa hoik keh nawh mai ka mex nawh tak sang kham krax pah tix yum heue. 7Viang mawh nan, khaing num riah bun an koe pui tix kaux tak sang yaog ti lih mawh simiang, nawh tak sang hoek tau mai cub kru naing tix cub mai laig ka daux nyiex tab lhaong simiang plak laong mai yuh naing ka kix mai koe krax pex heue. 8Nawh tak sang teei ti viex siyiex riang grang kix hu ka daux meung Ejiptux mai khawm kraung khrai, mau khri pa kied ngawh cie kix mai khaix in ka daux ra loe num, nawh ang lai hoek tix puing ka simiang plak laong heue. 9Khaix an simiang plak laong tak sang bleeh tix hoek ka meung simiang plak seh, viang mawh nan, tak sang deeh ing ka haktiex cao nawh heue. 10Kawn simex simiang plak laong khankix deeh yaog kraung naing mai kraix khrawm cub pui hun khankix, mawh cub kru naing pa kied ting riang rao mai kawn simex an tix kaux tak sang preeng sivoe awm haok hwan rawm pa kheem tix laig plak daux heue. Nawh tak sang deeh jiem ti puing naing tom hoek ka tab lhaong simiang plak seh heue. 11Simiang plak seh tak sang koe krax pa song rhawm mai lih hu puing ka simiang plak laong, pa hoik kraix khrawm pui hun khankix heue. Pui hun khankix tak sang mawh pa tawx tix ka daux tawm taix pui koeng heue. 12Yam hoik pon kieh nawh pui hun khankix luan, rhawm nawh tak mawh pa yaog ti ting jhawm, viang nawh hoik pah ti tik pui kaing rheng kaing mheen yum kawx, viang mawh nan, nawh ang lai koe krax pex ka sijheeng heue. 13Simiang plak laong tak sang deeh hoek mai cub pui hun khankix, pa nie lheu ting riang khaing cub phao voe mai tak sang hoek ka daux yam sidah num pa hoik tat tix, tau mai cub kru naing pa ting tix cub mai khawm kraung naing khankix tom nie heue. 14Ka daux bawg yam an, pui tom nie tak sang yaog ti tieh feen ka simiang plak seh mai pui pa kied lang teung jhawm khankix khaing daux meung maix, tak yaog tokaux tix kaoh, sonsang kieh riang susai grum naog mai kix tak som nai heue. 15Mawh kheu nan, simiang plak laong tak hoek mai sum tab lai lawm ti puing ka tab pa kaux cong an mai cub kru naing plak seh tak ang lai pon tiebtie nawh. Pie cub lien pa hoik laug nawh khankix kawx, ang lai pon thang heue. 16Pa hoek ti puing ka nawh, tak hoek yuh krax pa koe rhawm tix mai pui tix kaux kawx ang pon cung ka plak sivoe nawh heue. Nawh tak cung ti ot ka daux haktiex pa kied mhawm grang an mai haktiex an hoik koe ka daux taix nawh khawmuik heue. 17Nawh tak coca viex rhawm tix, sonsang hu laig tan tau mai riang rao meung haktiex tix khawmuik khawm leeing mai yuh paox pie pa rahsee tau mai kix mai hawt yuh awm an mai tawx kawn bun tix mawh moeng simiang plak seh, sonsang yuh nawh laux leeing heue. Viang mawh nan, grawng krax keud in ang tie tum mai ang mawh tidtix son nawh heue. 18Khaix in, nawh deeh veeh ti hu rhim ti teei ka klawn tiex rawm sigrit sigra khankix tom nie heue. Viang mawh nan, cao kaing naing tix kaux tak sang grai yuh lox pa salao kix mai kix ang lai pon deeh kieh lox pa salao hoek piang cao kaing naing an heue. 19Khaix an nawh tak deeh veeh ti ing ka plak nyiex tab lhaong pa koe daux haktiex cao nawh, viang mawh nan, nawh sideeing caong tix goh mai grai grup heue. 20Yam an tak koe pui tix kaux pa plud ti yuh simiang khaix nawh, tak kieh pui pa kin jhawm lailing tix koh keen ka daux haktiex pa kied mhawm grang an heue. Ka daux krax pa ang lai rheung singaix, nawh tak mawh pa laux leeing mai ang tie mawh ka daux krax pa song rhawm mai ka daux biang naing heue. 21Ka dee ot nawh, tak sang yaog ti koe, pui pa kin jhawm tix kaux, ka pui pa ang kix tawx min sibrawm simiang ka heue. Nawh jawm yam ang pui nyang khre rien rhawm tix mai pon teei meung haktiex ka daux krax pa nyaw glaw heue. 22Lien kru naing khawmuik tak sang mawh pa siman ti luan khaing ka plak sivoe nawh mai tak mawh pa laux leeing mai gumlox sijax mukheu yuh simiang tak laux heue. 23Khaix hoik yuh nawh paox pie tau mai kix, nawh tak yuh ceu pie lhen, mawh kheu nawh tak sang lih mawh pa ting lhaong tau mai pui pa koe tix ceeix heue. 24Nawh jawm yam ang pui nyang khre rien rhawm tix mai hoek ka dah dee pa kied mhawm an khankix mai nawh tak sang yuh can ceu pa ang keeing nawh yuh mai pa ang tax du nawh yuh heue. Nawh tak sang roi ti tawx kix cie kraung pa tud rhim mai kraung pa pon daux naing mai khawm krax pa magmi an khankix mai nawh tak sang keud ti deuh grawng pa sang puing tix ka veng dee pa kaux cong. Viang mawh nan, an tak mawh ngie bawg yam tivud ngie heue. 25Nawh tak yaog ti kaoh mai krax pa vao rhawm tix, viex kru naing tix khankix lih puing ka simiang plak seh heue. Simiang plak seh, tak sang yaog ka kru naing pa kied ting lhaong mai pa kied ting riang rao lih puing naing ka nawh, viang mawh nan, tak ang pon ti mawh pa kaux cong heue. Grawh grawng nawh, kix hoik yuh ti deuh krax grawng pa sang yuh tix piang simiang plak seh heue. 26Pui an kix pa ih nyum pa ih pa nyawm pa tie nawh tak sang deeh laux leeing yuh nawh mai cub kru naing nawh khankix tak sang mawh pa siman ti luan mai pui khankix tom nie tak sang goh ti yum heue. 27Rhawm simiang in kiex khawm ra, tak sang keud ceu pa caox mai kiex tak krai lox pie lhen piang pheen tau heue. Viang mawh nan, grawng an ang tie tum, grawh grawng nawh hoik hoek dee sidah bawg yam pa hoik tat tix heue. 28Nawh dee veeh ti ing ka haktiex cao tix, tau mai krax pa magmi mai kraung khrai tom nie, rhawm nawh tak sang deeh tieh khaing sijax mukheu pa singax singeh, mawh kheu nan, nawh yuh awm pa mie nawh ti yuh mai deeh ing ka haktiex cao tix heue.
Lud Simiang Plak Laong
29Ka daux bawg yam pa hoik tat ti deuh, nawh tak dee hoek ka plak seh. Viang mawh nan, bawg khaix in ang lai awm bawg phao voe heue. 30Grawh grawng nawh, reu naing khaing haktiex Khettem tak sang hoek ti puing nawh, mawh kheu nan, nawh koe krax pa laux rhawm mai deeh ing ka daux pa song rhawm tix ka sijax mukheu pa singax singeh an mai yuh pa simie nawh ti yuh heue. Mawh kheu nan, nawh tak deeh ing mai sitoe ti tau mai pui pa hoik tik vud ka sijax mukheu pa singax singeh an heue. 31Nawh tak kraix khrawm kru naing khankix mai kix tak seeing yuh dee pa singax singeh nyiex tab lhaong an heue. Kix tak sang teei ti tik krax tan pa appong ku singaix mai yaog ti deuh ceu pa seeing krax pa laux leeing tan heue.#Dan 9:27, 12:11; Mat 24:15; Mak 13:14 32Can pui an kix pa yuh krax pa caox pa lud ka sijax mukheu an, nawh tak nyaw glaw ka kix heue. Mawh ngie pui pa tawng ka Siyiex Cao kix, tak koe krax pa kaux cong mai yuh kaing heue. 33Pui pa koe pingnya cuyi ka daux sinax pui khankix, tak sang sidiex gau ka pui tom nie heue. Viang mawh nan, daux singaix pa rheung kix tak goh ti yum ka lawm vaig mai rao ngu mai ka krax pa giex laung mai ka pa tud rhim heue. 34Yam goh kix, kix tak sang pon krax pa joh jhan teem ceeix ngie heue. Mai pui plak nie tak sang nyaw glaw kix, yam dex dawd mai kix heue. 35Pui pa koe pingnya cuyi tiblah tak sang goh sonsang deeh ciied ti yaox mai sonsang deeh kieh kix singax mai deeh paing tom hoek bawg yam sidah heue. Grawh grawng nawh, bawg yam pa hoik tat ti deuh hoik sidah heue. 36Simiang an tak yuh awm pa mie nawh ti yuh mai yaog tokaux cao tix ting lhaong piang siyiex khawmuik mai ah lox pa ang ceu cak ka Siyiex piang Siyiex heue. Nawh tak sang koe krax haok hwan tom hoek bawg yam hoik naog krax pa song rhawm Nawh heue. Grawh grawng nawh, can ceu pa hoik tat tix, tak sang lih ti mawh heue.#2The 2:3-4; Jhi 13:5-6 37Nawh tak ang lai koe rhawm pa sang dex dawd ka siyiex krub keeing nawh khankix mai ang lai koe rhawm ka bun khankix mai ang lai dex dawd mai siyiex tang kaux pie tix kaux kawx. Mawh kheu nawh tak yaog tokaux cao tix ting lhaong piang khawmuik heue. 38Nawh tak yaog min plakngai siyiex nyiex tab lhaong mai ka siyiex pa ang keeing nawh khankix tawng mai nawh tak yaog min bwan siyiex an ka khri, ka mau mai ka siang simaox pa laoh lie mai khawm ka ceu pa mhawm khankix heue. 39Nawh tak een rhawm tix ka siyiex pui tang ceu mai yieh laux ka nyiex tab lhaong pa kaux cong an, can pui pa rieb ti teei nawh mai nawh tak sang baox tawx min plakngai ka kix mai kieh kix kwang piang pui tom nie mai gwieh ti tawx haktiex son pa sang koe rao kix ka heue.
Krax Pex Simiang Plak Laong
40Ka daux bawg yam hoik hoek dee sidah, simiang plak seh tak sang hoek ti puing ka nawh mai simiang plak laong tak viex ling lawx naing brung, pui naing brung khankix mai reu naing tom nie awm phlu bhaung ting mai hoek ti puing ka nawh mai tak laig ka daux haktiex an khankix awm kheem rawm ti hu heue. 41Tak baox deeh laig ka daux haktiex pa mhawm grang an mai haktiex khankix plak nie, tak sang kham krax pa som nai heue. Viang mawh nan, pui haktiex Edom, pui haktiex Mawbax mai pui haktiex Amon pa ting lhaong an khankix tak sang mawh pa luad luan khaing daux tawm taix nawh heue. 42Nawh tak nyeu taix tix piang haktiex an khankix mai meung Ejiptux tak ang pon tix luad luan heue. 43Nawh tak kwang piang sinngao khri mai mau mai piang can ceu pa koe ngawh jum meung Ejiptux khankix, pui haktiex Libia mai pui haktiex Ethiopia, khankix tak sang hawt khaix nawh heue. 44Viang mawh nan, lox satang pa kaoh khaing plak lih singaix mai plak laong, tak tawx krax pa khi rhawm ka nawh. Mawh kheu nan, nawh tak sang lih hu mai krax pa song rhawm tix, sonsang yuh krax laux leeing mai grai yuh pui tom nie heue. 45Nawh tak sang sum nyiex gox man pa awm nyiex haw nawh ka daux sinax rawm sigrit sigra mai gawng singax singeh pa mhawm grang an heue. Viang mawh nan, yam hoek dee sidah nawh mai pui tix kaux tak ang lai teem ka nawh heue.
Currently Selected:
DANYELAX 11: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012