MARKUS 5
5
I Yesus nupakaul᷊e ngu taumata ko nikasukang u roh ko dal᷊ai
(Mat. 8:28-34; Luk. 8:26-39)
1Bou e'e I Yesus l᷊au manga tumatuhu-E nurating u simbuka ngu rano Galilea, su wanua ngu tau Gerasa. 2Kere'e suapang I Yesus nal᷊intu bou sakaeng, I Sie nisongong u ko ese singkatau ko nusumuwang bou manga l᷊ohang u kubul᷊i. 3Tau e'e niwanting u roh ko dal᷊ai dang natana su manga kubul᷊i. I sie seng ta ikaiki maneng l᷊ai hanteng. 4Seng masau kahingang l᷊aeri l᷊au l᷊imange hapusang, kateho hante e'e sintinia ibusue, dang uase su l᷊aeri ibabarenge. I sie kere'e katoghasi, hakiu takoae sarang singkatau ko makatahang si sie. 5L᷊ou huwi i sie kal᷊uhunge apang kubul᷊i dang su manga wul᷊uri, dang ghumaesi turusi l᷊au u mupakal᷊esi badange dingang u watu.
6Su tempo bou raunge i sie nakawua si Yesus kasongonge, i sie nutumal᷊ang mbuhue nusuba su saruang I Yesus. 7Dingang u tingihi mauha i sie nughumaesi, “Yesus, Ahusi Mawu Ruata Ko Karangetange! I Kau mukoa apa si sia? Su areng u Mawu Ruata, ia mukal᷊iomaneng ariwe singsarai ia.” 8(Tau e'e nangul᷊i kere'e watu'u I Yesus nangul᷊i si sie, “Roh ko dal᷊ai, suwangte bou taumata i'i!”)
9Bou e'e I Yesus nukina si sie, “I sai arengu?”
Tau e'e nusumimbahi, “Arengku i ‘Legion’ – watu'u i kami i'i maul᷊i kahingang.” 10Mangkate masau i sie mundo singapang botonge I Yesus kumbahang mupasuwang manga roh ko dal᷊ai bou tampa e'e.
11Masandighi u tampa e'e pia wawi maul᷊i kapundeae kang, su l᷊engehi. 12Manga roh ko dal᷊ai e'e nundo si Yesus, “Roiko i kami pangal᷊ing su manga wawi tarai e'e.” 13Ndo i sire nituhukang I Yesus. Inau apang roh ko dal᷊ai e'e nusumuwang bou tau e'e mbuhue nanumbou su manga wawi e'e. Kaul᷊i u ghapang u wawi e'e nahuntal᷊ang nutumumpa bou wiwihi u towae sarang l᷊al᷊ung u rano bou e'e nawontol᷊i – kaul᷊i u wawi e'e patehang manga duahiwu
14Manga mundadiaga wawi e'e kaul᷊ie nutumal᷊ang, dang nuwawuke ngu habari e'e su kanandu u soa l᷊au kampong masandighi. Bou e'e manga taumata nusumuwang nutuhung apa ko seng nariadi. 15I sire nusumongo sarang koa I Yesus, bou e'e nakawua tau ko l᷊inau bou nisukang u roh ko dal᷊ai e'e, kakangiang su se'e. I sie seng pia l᷊akue, dang naunge seng natilang. Kateho i sire kaul᷊ie nataku. 16Kaul᷊ie apang ko nakawua hal᷊i ko seng nariadi su taumata e'e dang su manga wawi, nuwawuke ngu hal᷊i e'e. 17Bou e'e tataho tampa e'e nundo tadeau I Yesus panintang u tampa e'e.
18Su tempo ngi Yesus naawi su sakaeng, tau ko l᷊inau niwanting u roh ko dal᷊ai e'e nundo si Yesus, tadeau i sie mutumuhu dingang.
19Kateho I Yesus ta nupakawala, angkung-E, “Kapul᷊e'e dang puhabari su manga ana u simbau'u apang ko nikoa u Mawu si kau dang wal᷊inge gampang piange si kau.”
20Tau e'e tamai nul᷊umal᷊eng, dang nanita nuwuke su kanandu Soa Mapul᷊o apang ko seng nikoa I Yesus si sie. Manga taumata kaul᷊ie naherang nakaringihi.
Ana i Yairus – Tau kowawine ko nanuhung juba ngi Yesus
(Mat. 9:18-26; Luk. 8:40-56)
21I Yesus sau nusul᷊e sarang simbuka ngu rano. Su wiwihi u rano e'e napene u taumata nusumongo nul᷊ahumbung su sindihang I Yesus. 22Pia taumata singkatau arenge i Yairus nusumongo. I sie singkatau pangaha su wal᷊e pukakal᷊iomanengang su soa e'e. Suapang i sie nakawua si Yesus, i sie dingang nusuba su saruang-E, 23dang nundo singapang botonge, “Tuang, anaku kowawine masaki maturu. Kere wotonge songoko maning kitang panuhung si sie, tadeau i sie maul᷊e dang kumbahang sarang i sie mate!”
24Bou e'e I Yesus natamai dingang i Yairus. Maul᷊i taumata tamai nutumuhu dang nanise si Sie, bou apang tampa.
25Su tal᷊oara i sire pia l᷊ai singkatau kowawine ko seng mapul᷊odua su taunge nil᷊al᷊engang u kotori. 26Rarotonge seng nasue nipake, nipamaehi manga dokter, kateho mang takoae ko nakaul᷊e, katewe sakie nanamba. 27Tau kowawine e'e seng nakaringihi maul᷊i wuke ngi Yesus, inau su komol᷊ang u taumata maul᷊i e'e i sie nusumandighi si Yesus bou l᷊ikuri, 28Watu'u su naunge, “Asal᷊i seng nakasuhung juba-Nge, ia seng maul᷊e!”
29I sie nanuhung juba ngi Yesus, dang su tempo e'e l᷊ai kotori napoto. I sie nakapundang sakie naul᷊e. 30Su tempo e'e l᷊ai I Yesus nakapundang musul᷊ung u pia uha nasawu bou badang-E. Inau I Sie nuwihu su taumata maul᷊i e'e dang nukina, “I sai nanuhung juba-Ku?”
31Manga tumatuhu-E nangul᷊i, “I Tuang sisane seng nakawua kere'e kaul᷊ie taumata nusasise. I Tuang mang mborong l᷊ai makina, ko i sai nanuhung si Tuang?”
32Kateho I Yesus mang katuhunge tamai namai mundea taumata ko nakasuhung si Sie. 33Tau kowawine e'e matitong apa ko nariadi si sie, kakendenge nataku nusuba nangaku patiku hal᷊i e'e su saruang I Yesus. 34Bou e'e I Yesus nangul᷊i su tau kowawine e'e, “I kau ana-Ku watu'u i kau mangimang si Sia, i kau maul᷊e! Tamaite dingang u sal᷊amati, i kau tinga-tingari seng naul᷊e.”
35Su tempo I Yesus mborong kapudidatonge, pia pirangkatau raroi bou wal᷊e ngi Yairus nasongo, i sire nangul᷊i si Yairus. “Ana i tuang mahua seng nate,” kuhaete i tuang mborong l᷊ai mupakasusa ngi Tuang i kite.
36I Yesus ta nundia#5:36: Ta nundia: arako mundaringihi. apang ko niul᷊i u manga taumata e'e, I Sie nangul᷊i si Yairus, “Ari kataku, pangimangte!” 37I Yesus turusi nul᷊umal᷊eng, kateho I Sie ta nupakawala ngu singkatau tumuhu dingang-E, su l᷊ikuri Petrus dingang i Yakobus l᷊au i Yohanes sire rua tamahuari. 38Suapang i sire nurating u wal᷊e ngi Yairus, I Yesus nakawua su se'e tumaniu magara, l᷊au nakaringihi tingihi u sangi dang l᷊al᷊ungkang mauha. 39I Yesus turusi nangul᷊i si sire, “Ko apa nakagara dang nakasangi si kumu? Rario e'e ko ta nate, i sie kitang katikie!”
40I sire kaul᷊ie nul᷊umighei ngi Yesus, inau I Sie nuparenta si sire pasuwang kaul᷊ie. Bou e'e I Sie namadingang ghaghurang u ana e'e l᷊au tumatuhu-E tatilu nusumu sarang l᷊al᷊ung u kamari u ana e'e. 41I Yesus nuhinggo l᷊ima ngu ana e'e mbuhue nangul᷊i si sie, “Talita kum,” mangal᷊enge, “Ndio, Ia mangul᷊i si kau wangungte!”
42Ana mahua e'e dingang nuwangung dang nul᷊umal᷊eng. (Umurie seng mapul᷊odua su taunge). Kaul᷊ie ko nakawua hal᷊i e'e naherang! 43Arawe I Yesus nularang kumbahang i sire mul᷊ahabari u hal᷊i e'e si sai-sai. Bou e'e I Yesus nangul᷊i, “Pakang ko ana e'e.”
Currently Selected:
MARKUS 5: PLT
Highlight
Share
Copy
Want to have your highlights saved across all your devices? Sign up or sign in