MARKUS 4
4
Papinintu singkatau mananawuhi
(Mat. 13:1-9; Luk. 8:4-8)
1 #
Luk. 5:1-3
I Yesus nusau nanintiro su apeng u Rano Galilea. Maul᷊i kahingang taumata nuhumbung si Sie. Ual᷊ingu e'e I Sie natamai nukumangiang su l᷊al᷊ung u sakaeng singgisa ko kawawal᷊ango, dang taumata maul᷊i e'e kararisi su wiwihi u rano. 2Mbuhue I Yesus nanintiro ngu hal᷊i maul᷊i si sire dingang nupake papinintu. Ko kiri'i I Sie nanintiro si sire.
3“Pundaringihiko! Pia singkatau manganganseri natarai nanawuhi sasuang. 4Su tempo i sie kapunawuhi, pia sasuang nanawo su l᷊al᷊eng. Bou e'e nusumongo burung nukumang sasuang e'e sarang nasue. 5Pia l᷊ai ko nanawo su tana ko mawatu ko tanange manipi. Sasuang e'e maehong nutumuwo maneng tanange manipi, 6arawe suapang matangutiti natei apang tuwoe e'e nal᷊obe bou e'e nahango dang nate watu'u hamue ta tumaniu mal᷊al᷊ung. 7Pia l᷊ai sasuang ko nanawo su tal᷊oara u ghal᷊umu ko makasusu. Ghal᷊umu ko makasusu e'e nutumuwo dang nangumpisi apang tuwoe e'e hakiu ta nuwua. 8Kateho pia l᷊ai sasuang ko nanawo su tana ko matawa. Sasuang e'e nutumuwo, bou e'e nal᷊abo dingang nuwua, pia ko tilumpul᷊o, pia ko nungupul᷊o, dang pia ko mahasu su sul᷊enge.”
9Suapang bou nuwuke ngu papinintu e'e I Yesus nangul᷊i, “I kumu ko pia tul᷊i, pundaringihi!”
Nakura I Yesus nupake u papinintu
(Mat. 13:10-17; Luk. 8:9-10)
10Su tempo I Yesus sisanenge, manga taumata ko seng nakaringihi tatintiro-E nusumongo si Sie singkahindo dingang i sire mapul᷊odua tumatuhu-E. I sire nundo si Sie tadeau mupakal᷊ahe mangal᷊eng u papinintu e'e. 11Kuteu I Yesus nangul᷊i si sire, “I kumu seng ninggilenang u l᷊aonggo tadeau makahingang rahasia hal᷊i u kirapa Mawu Ruata mamarenta. Arawe manga taumata ngu l᷊ikuri nitintiro dingang u papinintu, 12#Yes. 6:9-10tadeau
‘I sire sarung turusi mutuhung pakapia-pia
kateho wugha ngu apang ko nariadi,
i sire sarung turusi mundaringihi
kateho ta makahingang,
i'i mariadi tadeau i sire kumbahang makawua l᷊au makahingang
dang tadeau kumbahang sumongo su Mawu Ruata
dang Mawu Ruata mangampung si sire.’ ”
I Yesus nul᷊ahe u papinintu singkatau mananawuhi
(Mat. 13:18-23; Luk. 8:11-15)
13Bou e'e I Yesus nangul᷊i si sire, “Boko i kumu ta makahingang papinintu e'e, kirapawe i kumu makahingang manga papinintu ko wal᷊inge? 14Mananawuhi e'e ko taumata mul᷊ahabari u habari bou Mawu Ruata. 15Sasuang ko nanawo su l᷊al᷊eng, isul᷊ung su manga taumata ko mundaringihi habari kirapa Mawu Ruata mamarenta. Suapang nakaringihi, setang nusumongo mangal᷊a apang ko seng nisawuhi su l᷊al᷊ung u naung i sire. 16Sasuang ko nanawo su tampa ko mawatu musul᷊ung u manga taumata ko nundaringihi habari e'e, dang turusi nanarima dingang u kal᷊al᷊uasi naung. 17Kateho habari e'e ta nuhamu su l᷊al᷊ung u naung i sire, hakiu ta natahang mal᷊iwue. Kere'e i sire nakapundang susange arako papahang ual᷊ingu habari e'e i sire turusi nusunial᷊i. 18Sasuang ko nanawo su tal᷊oara u ghal᷊umu ko makasusu e'e isul᷊ung su manga taumata ko nakaringihi habari e'e, 19Kateho ghumagha ngu puwawiahi sire l᷊au mo muwiahi sanang. Kao u watangeng mul᷊al᷊ahaghi nasu su naung i sire. Ual᷊ingu e'e habari bou Mawu Ruata nahumping su l᷊al᷊ung u naung i sire, hakiu ta nuwua. 20L᷊au sasuang ko nanawo su tana ko matawa e'e isul᷊ung su manga taumata ko nundaringihi habari e'e dang nanarima, i sire nuwua maul᷊i pia ko tilumpul᷊o, pia ko nungupul᷊o, dang pia ko mahasu su sul᷊enge wuange.”
Sol᷊o ko nitaka u bunsari
(Luk. 8:16-18)
21 #
Mat. 5:15; Luk. 11:33 Tuhue I Yesus sau nangul᷊i, “Apa seng pia taumata ko mbuae nundiko sol᷊o mbuhue nitaka u bunsari arako namilo su l᷊ungang u l᷊al᷊okang? Apa i sie ta namilo sol᷊o e'e su tampa pamilonange? 22#Mat. 10:26; Luk. 12:2Takoae ko kawawuni ko sarung ta ikawua, l᷊au takoae ko ipuwawurung ko sarung ta masongkahi. 23Ual᷊ingu e'e boko pia tul᷊i, pundaringihi!”
24 #
Mat. 7:2; Luk. 6:38 Bou e'e I Yesus nangul᷊i l᷊ai, “Putuhung ko pakapia apang ko nikaringihi kumu i'i ukurang ko ipangukuri kumu su taumata ko wal᷊inge mang sarung l᷊ai ipangukuri u Mawu Ruata si kumu dang mborong lebe maul᷊i l᷊ai. 25#Mat. 13:12, 25:29; Luk. 19:26Watu'u su taumata ko seng pia sarung sau onggol᷊ang lebe maul᷊i l᷊ai, arawe su taumata ko takoae, singkodo ko mborong pia si sie e'e sarung al᷊akeng l᷊ai.”
Papinintu ngu sasuang ko nutumuwo
26I Yesus sau l᷊ai nanurusi didato-Nge, “Boko Mawu Ruata seng mamarenta kere Ratu, kakakoae musul᷊ung u papinintu kere singkatau mananawuhi sasuang su l᷊al᷊ung u anseri. 27Huwi i sie matiki, l᷊ou i sie muwangung. Dang su tempo e'e sasuang seng katuwonge dang kal᷊al᷊aboe. Arawe kirapa sasuang e'e tumuwo dang mal᷊abo, tau e'e wugha. 28Tana e'e sisane mupasuwang u wuange; kahorokange pongol᷊ie, tuhue wul᷊ihie, mbuhue wuange. 29#Yl. 3:13Dang boko gandung e'e seng nasasa tau e'e manita namoto watu'u seng temponge manipo.”
Papinintu sasuang sawi
(Mat. 13:31-32,34; Luk. 13:18-19)
30“Boko Mawu Ruata seng mamarenta ikasul᷊ung dingang u apa?” I Yesus sau l᷊ai nukina. “Apa sul᷊unge ko ikaal᷊a i kite guna ngu mupakal᷊ahe e'e? 31Boko Mawu Ruata seng mamarenta, kakakoae musul᷊ung u papinintu i'i. Kere watu ngu sawi#4:31: sawi: Sawi i'i sasuang ko botonge tumuwo range'e patehang botonge manga tilu meteri. simbau nial᷊a u singkatau taumata bou e'e nisuang su tana. Watu ngu sawi e'e ko sasuang kadiokange su dunia. 32Kateho boko seng nutumuwo, i sie makoa kal᷊abokange su tal᷊oara u apang sasuang. Lelange kaul᷊ie matubung hakiu manga burung susongo dang musal᷊ehi su naue.”
33Ko kere'e I Yesus nanintiro taumata nupake papinintu maul᷊i, sarang i sire makahingang. 34I Yesus sintinia mang mangal᷊a papinintu boko I Sie manintiro manga taumata e'e. Boko kitang sisanenge, dingang u manga tumatuhu-E, I Sie mupakal᷊ahe kaul᷊ie e'e si sire.
I Yesus nupakal᷊enehi u anging mauha
(Mat. 8:23-27; Luk. 8:22-25)
35Su singkawawul᷊aeng e'e l᷊ai, I Yesus nudidato su manga tumatuhu-E, “Maite i kite musenggo sarang simbuka ngu rano.”
36I Yesus naawi su sakaeng, dang manga tumatuhu-E nanintang u taumata maul᷊i su wiwihi u rano, bou e'e i sire naawi su sakaeng. Su se'e pia l᷊ai sakaeng ko wal᷊inge. Bou e'e I Yesus dingang u manga tumatuhu-E nuwua. 37Ta nal᷊iwue bou e'e nutumiu anging mauha, l᷊ua nanita namungkusi sakaeng dang ake nusumu sarang l᷊al᷊unge hakiu sakaeng seng napene u l᷊imasi. 38I Yesus katikie mal᷊uma su petonge nanguleleng su lalengang. Manga tumatuhu-E namuko si Sie. I sire nangul᷊i, “Tuang, I Tuang ta mupandung, i kite seng masilaka?”
39I Yesus nuwangung, bou e'e nuheang anging e'e dang nangul᷊i su rano, “Karumasi, kal᷊enehe!” Anging nangiro dang rano dingang nutingkal᷊enehi. 40Bou e'e I Yesus nangul᷊i su manga tumatuhu-E, “Apa makataku si kumu? Nakurawe i kumu ta mangimang si Sia?”
41Kuteu i sire mbuhue nataku dang kapudidatonge i sire l᷊au i sire, “Ko i sai inau taumata i'i, hakiu anging l᷊au l᷊ua tumuhu si Sie.”
Currently Selected:
MARKUS 4: PLT
Highlight
Share
Copy
Want to have your highlights saved across all your devices? Sign up or sign in