MATIUS 7
7
Hal᷊i u muhukung u taumata
(Luk. 6:37-38,41-42)
1“Kumbahang muhukung u taumata ko wal᷊inge, tadeau i kumu l᷊ai ta ihukung u Mawu Ruata. 2#Mrk. 4:24Watu'u kirapa i kumu muhukung u taumata ko wal᷊inge, kere'e l᷊ai Mawu sarung muhukung si kumu. Dang ukurang ko nipake i kumu su taumata ko wal᷊inge, sarung ipake u Mawu l᷊ai si kumu. 3Nakurawe i kumu mutuhung tahuwu su mata u ana u gheu, arawe balaki su matau ta nituhungang i kumu? 4Kirapa i kumu mangul᷊i su ghe i kumu, maiko ia mangoi monta su matau, kuteu su matau pia balaki? 5Ei tau pal᷊antikari! Al᷊ako horo balaki su matau sisane, mbuhue i kau makawua mal᷊ahe, bou e'e i kau mbuhue botonge mangoi tahuwu bou mata ngu gheu.
6Kumbahang mangonggo barang ko susi su kapuna, tadeau i sie ta manumbou si kau. Kumbahang l᷊ai mangonggo mutiara su wawi, tadeau ta l᷊inda-l᷊indakenge mutiara e'e.”
Pundo, pundea l᷊au panengkohi
(Luk. 11:9-13)
7“Pundoete, i kumu sarung manarima. Pundeate, i kumu sarung makarea. Panengkohite, tukari sarung iwuka. 8Watu'u i sai ko mundo, sarung manarima; i sai ko mundea sarung makarea, dang i sai ko manengkohi, tukari sarung iwuka. 9Su tal᷊oara i kumu pia taumata ko maghurang mangonggo u watu su anae, boko i sie mundo boroti? 10Arako mangonggo katoang, boko i sie mundo kina? 11Maning we i kumu ko l᷊al᷊ai, i kumu l᷊ai matitong mangonggo u ko mapia su manga anau. Nangilembo I Yamangu su sorga! I Sie sarung mangonggo ko kapiange su taumata ko mundo si Sie.
12 #
Luk. 6:31
Pukoa ko su taumata ko wal᷊inge, kere kao i kumu si sire mukoa si kumu. E'e tataho u torati Musa l᷊ai tintiro ngu manga nabi.”
Tukari mahepo
(Luk. 13:24)
13“Sue bou tukari ko mahepo, watu'u tukari ko mal᷊oahi l᷊au l᷊al᷊eng ko mawunahi, mahumpa sarang naraka, dang maul᷊i taumata l᷊umiu bou e'e. 14Arawe tukari ko mahepo l᷊al᷊enge, masusa pul᷊iunge, mumbawa taumata sarang puwawiahi. Dang mahal᷊i taumata makarea e'e.”
Kau l᷊au wuange
(Luk. 6:43-44)
15“Pakaingati su manga mahang nabi. I sire sumongo si kumu mutingkakoa kere domba, kateho i sire e'e musul᷊ung u sarigala ko wahani. 16I sire ikakiral᷊ang i kumu bou kakanoa i sire. Ngudae mal᷊ahoro ta mupasuwang wua ngu anggori, dang ghal᷊umue ko makasusu ta mupasuwang wua ngu ara. 17Bou kau tatuwonge ko masuburi i karea wuange ko masidada, arawe bou kau tatuwonge ko kinsihi wuange l᷊ai ko dal᷊ai. 18Kau tatuwonge ko masuburi ta muwua ngu wua ko dal᷊ai, dang kau tatuwonge ko dal᷊ai ta muwua ngu wua ko mapia. 19#Mat. 3:10; Luk. 3:9Apang kau ko ta muwua ngu wua ko mapia, mapiang tuwangeng l᷊au tutungang. 20#Mat. 12:33Kere'e l᷊ai dingang mahang nabi. I kumu hindo makakil᷊al᷊a si sire bou suke ngu kakanoa i sire.”
Kakanoa, wal᷊ingewe didato
(Luk. 13:25-27)
21“Wal᷊ingewe kaul᷊i u taumata ko mukui si Sia, Mawu, Mawu, ko sarung makoa umati Mawu Ruata, kitang u taumata ko mukoa kao I Yamang-Ku su sorga. 22Su L᷊ou Kiamati sarung maul᷊i taumata muhabari si Sia, Mawu, Mawu, wal᷊ingewe dingang areng-U i kami seng nanurusi tatanata ngu Mawu Ruata? Dang l᷊ai dingang areng u Mawu i kami seng nanguseri apang roh ko dal᷊ai, dingang u maul᷊i tatia ko makal᷊aherang seng nikoa i kami? 23Arawe Ia sarung sumimbahi, ‘Ia wugha ngi kumu! Pangal᷊ingte bou i'i, i kumu tahakoa ko l᷊al᷊ai!’ ”
Base ko pande l᷊au base ko bodoki
(Luk. 6:47-49)
24“Taumata ko mundaringihi wisara-Ku i'i, l᷊au tuhukange, musul᷊ung u taumata ko pande ko nupararisi u wal᷊enge su wawo u watu. 25Su tempo ngu rasehange, dang pia l᷊uwange l᷊au anging mauha nutumiu su wal᷊e e'e, wal᷊e e'e ta nahaka watu'u nipararisi su wawo u watu.
26Dang taumata ko mundaringihi wisara-Ku i'i, kateho ta tuhukange, i sie musul᷊ung u tau ko bodoki, ko nupararisi wal᷊enge su wawo u nei. 27Su tempo ngu rasehange, dang pia l᷊uwange l᷊au anging mauha nutumiu su wal᷊e e'e, wal᷊e e'e nahaka. Dang ko l᷊abo rusange!”
Kawasa ngi Yesus
28 #
Mrk. 1:22; Luk. 4:32 Samuringe I Yesus nasue tintironge, manga taumata su se'e naherang nakaringihi tintiro-E. 29Watu'u i Sie nanintiro dingang u kawasa, mutatintang dingang u manga meteri agama ngi sire.
Currently Selected:
MATIUS 7: PLT
Highlight
Share
Copy
Want to have your highlights saved across all your devices? Sign up or sign in