MATIUS 26
26
L᷊aakal᷊i si Yesus
(Mrk. 14:1-2; Luk. 22:1-2; Yoh. 11:45-53)
1Su tempo ngi Yesus nasue bou nanintiro ngu kaul᷊i u hal᷊i e'e, i Sie nangul᷊i su manga tumatuhu-E, 2#Sasu. 12:1-27“I kumu matitong kate dua l᷊ou seng L᷊ou ngu Paska, dang Ahusi Taumata sarung isarakang tadeau ighantong!”
3Su tempo e'e manga tumbonang u imam l᷊au manga pangaha tau Yahudi nukomol᷊i su istana ngi Kayafas, Imam Ko Mawantughi. 4I sire nughaghighili tadeau i sire mangono maname l᷊au mamate si Yesus. 5“Kateho,” angkung i sire, “Kumbahang hal᷊i e'e koateng su tempo l᷊ou ko mapia, ntihang makakoa gara su ana u kawanua.”
I Yesus nil᷊anisang su Betania
(Mrk. 14:3-9; Yoh. 12:1-8)
6Su tempo ngi Yesus su Betania, su wal᷊e ngi Simon ko horo nutatahang u sakie pisi ko makatataku, 7#Luk. 7:37-38pia singkatau kowawine nusumongo si Yesus. I sie numbawa wotol᷊i simbau, taho u l᷊anisi ko mal᷊ighari. Su tempo ngi Yesus kapusimokol᷊i, tau kowawine e'e naniwohi l᷊anisi su timbo I Yesus. 8Manga tumatuhu I Yesus nakawua hal᷊i e'e dang nuwawal᷊uang. “Apa mangal᷊enge kaul᷊ie i'i nipakagholo?” Angkung i sire. 9“L᷊anisi e'e botonge ikawal᷊u su hariga ko marange, dang doinge ionggo su tau ko susa!”
10I Yesus matitong naung i sire, bou e'e i sie nangul᷊i, “Nakurawe i kumu mupakasusa ngu tau kowawine i'i? I sie nukoa simbau ko mapia dang idalo su saruang-Ku. 11#Sau. 15:11Tau ko susa sintinia ene su tal᷊oara i kumu, arawe Ia tawe sintinia dingang i kumu. 12Dingang naniwohi l᷊anisi su badang-Ku, i sie nanadia si Sia guna ngu pul᷊al᷊uwingang-Ku. 13Pangimangte! Su kaul᷊i u dunia, suapang Habari Mapia bou Mawu Ruata iwombeng, kakanoa u tau kowawine i'i sarung l᷊ai iwuke makoa putatinaungang si sie.”
I Yudas nukumire musingking si Yesus
(Mrk. 14:10-11; Luk. 22:3-6)
14Bou e'e singkatau bou mapul᷊odua tumatuhu I Yesus ko nisigho si Yudas Iskariot, nakoa sarang koa u manga tumbonang u imam. 15#Za. 11:12I sie nukina si sire, “Apa ionggo i kumu si sia boko ia manarakang I Yesus si kumu?” I sire nundekeng tilumpul᷊o doi sal᷊aka, bou e'e nangonggo doi e'e si sie. 16Nanita bou tempo e'e i Yudas nundea l᷊oahi ko mapia guna ngu manarakang I Yesus.
I Yesus nukumang kang u Paska dingang u manga tumatuhu-E
(Mrk. 14:12-21; Luk. 22:7-14,21-23; Yoh. 13:21-30)
17Su l᷊ou kahimotongange su Sal᷊iwang u Boroti Takoae Raginge, manga tumatuhu I Yesus nusumongo si Sie, dang nukina, “Su apa kao I Tuang i kami manadia kang u Paska guna ngi Tuang?”
18I Yesus nusumimbahi, “Tamaite sarang koa u singkatau su soa dang habari si sie, ‘Angkung I Tuang Guru, tempo-Ku seng nurating: Ia mo mamantughi L᷊ou ngu Paska dingang u manga tumatuhu-Ku su wal᷊engu.’ ”
19Manga tumatuhu nukoate apang ko niparenta ngi Yesus si sire. I sire natamai nanadia kang u Paska e'e.
20Suapang nahuwi, I Yesus dingang u mapul᷊odua tumatuhu-E nukumangiang nukumang. 21Su tempo ngi sire kakange, I Yesus nangul᷊i, “Raringihi: singkatau bou tal᷊oara i kumu sarung muwal᷊u u Ia.”
22Nakaringihi e'e, manga tumatuhu I Yesus nasusa naung i sire. Bou e'e i sire simbau-simbau nanita nukina si Yesus, “Tantu su naung I Tuang wal᷊inge ia!”
23 #
Mzm. 41:10
I Yesus nusumimbahi, “Taumata ko manuno boroti su l᷊al᷊ung u wohosi dingang-Ku, i sie seng sarung manarakang u Ia. 24Tingari Ahusi Taumata sarung mate kere mawawohe su Buki Susi. Kateho kasasilaka su taumata ko musingking Ahusi Taumata! Mapiang su taumata e'e boko i sie seng tilahu ta nipuhana!”
25Bou e'e i Yudas ko musingking e'e nangul᷊i, “Tantu wal᷊inge ia su naung I Tuang Guru?”
I Yesus nusumimbahi, “Kere'e didatongu!”
Parjamuang u Mawu
(Mrk. 14:22-26; Luk. 22:14-20; 1Kor. 11:23-25)
26Su tempo ngi sire kakange, I Yesus nangal᷊a boroti, nukal᷊iomaneng nuhengke u tarima kase. Bou e'e i Sie nangangompeng boroti e'e dingang u l᷊imange, mbuhue nangonggo su manga tumatuhu-E, l᷊au nangul᷊i, “Al᷊ae, dang kangte, i'i ko badang-Ku.”
27Nasue e'e i Sie nangal᷊a wohosi anggori simbau, nutarimakase su Mawu Ruata. Bou e'e i Sie nangonggo wohosi e'e su manga tumatuhu-E, l᷊au nangul᷊i, “Panginungte, i kumu kaul᷊ie. 28#Sasu. 24:8; Yer. 31:31-34Watu'u i'i ko daha-Ku ko ipanoghasi pudadiandi ngu Mawu Ruata – daha ko seng nipatudo guna ngu taumata maul᷊i tadeau pangampung dosa ngi sire. 29Pangimangte: Ia seng sarung ta sau manginung anggori i'i sarang tempo Ia manginung anggori ko wuhu dingang i kumu su Dunia ngi Yamang-Ku ko Wuhu.”
30Bou e'e i sire nusamperi u samperi simbau dadalo. Dang mbuhue i sire natarai sarang Wukiri u Zaitung.
I Petrus sarung musunial᷊i Yesus
(Mrk. 14:27-31; Luk. 22:31-34; Yoh. 13:36-38)
31 #
Za. 13:7
Bou e'e I Yesus nangul᷊i su manga tumatuhu-E, “Su huwi i'i i kumu kaul᷊ie l᷊ai sarung mutumal᷊ang manintang u Ia; watu'u su Buki Susi mawawohe: Mawu Ruata nuhabari, ‘Ia sarung mamate gembala e'e, dang ghapang u domba nge sarung mukaesi.’ 32#Mat. 28:16Kateho suapang Ia seng ipuwangung, Ia sarung muhoro si kumu makoa sarang Galilea.”
33I Petrus nangul᷊i si Yesus, “Maneng i sire ko wal᷊inge manintang I Tuang, arawe Ia ta!”
34“Putinaung,” angkung I Yesus si sie, “Su huwi i'i l᷊ai, suhoro manu kumuku, i kau seng pakatilu musunial᷊i u Ia.”
35I Petrus nusumimbahi, “Manengwe ia mambeng mate dingang I Tuang, ia ta sarung mangul᷊i ia wugha ngi Tuang!”
Dang kaul᷊ie manga tumatuhu-E ko wal᷊inge nangul᷊i l᷊ai kere'e
I Yesus nukal᷊iomaneng su Getsemani
(Mrk. 14:32-42; Luk. 22:39-46)
36Bou e'e I Yesus natamai dingang u manga tumatuhu-E sarang tampa simbau arenge Getsemani. Pai se'e I Sie nangul᷊i si sire, “Kaiangte su si'i tintal᷊a Ia tamai mukal᷊iomaneng.” 37Bou e'e I Sie namaringang i Petrus l᷊au manga ana i Zebedeus sire rua tamai singkatamai dingang-E. I Sie nanita nakapundang naung-E nasusa l᷊au naghagha. 38I Sie nangul᷊i su manga tumatuhu-E, “Naung-Ku masusa kahingang, pundangeng musul᷊ung mate. Katanae i kumu su si'i, pundiaga dingang-Ku”
39Bou e'e I Yesus natamai naghea singkodo, nusuba dang nukal᷊iomaneng. “Yamang,” angkung-E, “Boko botonge, pakarau ko bou Ia singsara ko mambeng Daku ipupasaruang i'i. Kateho kumbahang mariadi su kao-Ku, piange kariadi tuhu su kao I Yamang sisane.”
40Bou e'e I Yesus nusul᷊e mai sarang koa u tumatuhu-E tatilu dang nakahombang i sire katikie. I Sie nangul᷊i si Petrus, “Kitang singkaorasi i kumu tilu mang ta makadiaga dingang-Ku? 41Pudiagako, dang pukal᷊iomanengko, tadeau i kumu ta kasal᷊ukateng u setang. Tingari naungu ko l᷊abo mo mukoa ko mutatahino, kateho ta makatanggong, ual᷊ingu tabieti u taumata e'e ko l᷊ome.”
42Paghisa l᷊ai I Yesus sau natamai nukal᷊iomaneng, angkung-E, “Yamang, boko singsara i'i mambeng Daku ipasaruangeng, dang seng ta marau, walate kariadi tuhu kao-U.” 43Nasue e'e I Yesus sau nusul᷊e dang mang sau nakahombang manga tumatuhu-E mborong katikie, ual᷊ing i sire seng patikilang kahingang.
44Paghisa l᷊ai I Yesus nanintang i sire dang su katilunge sau nukal᷊iomaneng dingang u didato ko musul᷊ung. 45Nasue e'e i Sie sau nusul᷊e sarang koa u manga tumatuhu-E dang nangul᷊i, “Mang mborong katikie dang kapangindul᷊enge i kumu? Tuhungete, seng nurating temponge Ahusi Taumata isarakang su kawasa ngu manga taumata ko bardosa. 46Puwangungte, intate i kite matamai. Tuhungete! Taumata ko musingking u Ia seng nasongo!”
I Yesus nisame
(Mrk. 14:43-50; Luk. 22:47-53; Yoh. 18:3-12)
47Su tempo I Yesus mborong kadidatonge, i Yudas, singkatau bou tal᷊oara i sire mapul᷊odua tumatuhu-E e'e, nusumongo. Nusingkahindo i sie, nusumongo l᷊ai maul᷊i taumata ko numbawa pera l᷊au papukul᷊i. I sire niroi u manga tumbonang u imam l᷊au manga pangaha u taumata Yahudi. 48I musasingking e'e seng nupakatitong si sire tatiange i'i. “Taumata ko daku imbung, seng i Sie taumatange. Same'e I Sie!”
49Suapang nurating u tampa e'e, i Yudas turusi nusumandighi si Yesus dang nangul᷊i, “Sal᷊amati, Tuang Guru!” Bou e'e i sie nangimbu si Yesus.
50I Yesus nusumimbahi, “Anu, i kau sumongo mukura su si'i?”#26:50: Anu, i kau sumongo mukura su si'i?: arako Koae pakaehong apang ko sarung koateng u.
Bou e'e taumata kaul᷊i e'e nusumandighi, dang naname si Yesus. 51Singkatau tumatuhu-E ko ene su se'e dingang I Yesus nanawu perange namili l᷊ang u imam ko l᷊abo sarang tul᷊inge nasahing. 52I Yesus nangul᷊i su tumatuhu-E e'e, “Taho sau perangu su homange, watu'u kaul᷊i u taumata ko mupake perange sarung mate dingang u pera. 53Su naungu Ia ko ta makando tul᷊ung si Yamang-Ku, dang i Sie dingang mundoho lebe bou mapul᷊odua pasukang sordado malaikati? 54Kateho boko kere'e, mariadiwe kirapa hal᷊i ko kere niul᷊i su Buki Susi himoneu mang mambeng mariadi kere ko su orasi i'i?”
55 #
Luk. 19:47, 21:37 Bou e'e I Yesus nangul᷊i su taumata maul᷊i e'e, “Apa Ia i'i singkatau taumata ko dal᷊ai, hakiu i kumu nusumongo dingang u pera l᷊au papukul᷊i guna ngu paname Sia? L᷊ou-l᷊ou Ia kapanintironge su Wal᷊e ngu Mawu, i kumu ta naname si Sia! 56Kateho mang seng hinonge kere'e tadeau mariadi apang ko niwohe u manga nabi su Buki Susi.”
Bou e'e, manga tumatuhu-E nasue nutumal᷊ang nanintang I Yesus.
I Yesus su tingo ngu Pangadilang u Agama
(Mrk. 14:53-65; Luk. 22:54-55,63-71; Yoh. 18:13-14,19-24)
57Manga taumata ko naname si Yesus numbawa si Sie sarang wal᷊e ngi Kayafas, Imam Ko Mawantughi. Su se'e manga meteri agama l᷊au pangaha u tau Yahudi seng nukomol᷊i. 58I Petrus nutumuhu bou raunge si Yesus sarang nurating u lilahi u wal᷊e ngu imam ko mawantughi. Bou e'e i Petrus nusumu su lilahi e'e, dang nakumangiang dingang u mundadiaga. I sie mo matitong kirapa sueng u kaul᷊ie e'e. 59Manga tumbonang u imam dang kaul᷊i u Pangadilang u Agama kaputawakal᷊inge mundea salakie manuturi l᷊eo tadeau mamonesi hukumang papate si Yesus. 60Kateho i sire mang ta nakarea punguange sarang simbau, maning maul᷊i ko nusumongo kere saksi l᷊eo. Panginsuenge pia dua ngkatau nutingkaandaghi su saruange. 61#Yoh. 2:19I sire nangul᷊i, “Taumata i'i nangul᷊i, ‘Ia makarusa Wal᷊e ngu Mawu Ruata, dang sau Daku i pararisi su l᷊al᷊ung u tilu l᷊ou.’ ”
62Bou e'e imam ko mawantughi nurumarisi, dang nangul᷊i si Yesus, “I sire seng nangantang si Kau, I Kau ta musumimbahi?” 63Kateho I Yesus mang marumasi. Nusau paghisa l᷊ai imam ko mawantughi nangul᷊i si Sie, “Su saruang u Mawu Ruata ko wiahi, ul᷊iko si kami apa i Kau Ratu Mananal᷊amati, Ahusi Mawu Ruata?”
64 #
Dan. 7:13
I Yesus nusumimbahi, “Kere ko nihabariu. Kateho, pangimangte: manita bou orasi i'i, i kumu sarung makawua Ahusi Taumata kumangiang su simbuka kuaneng u#26:64: kumangiang su simbuka kuaneng: Putuhung 22:44. Mawu Ruata ko napal᷊iu kawasa, dang sumongo su wawo u winawa su l᷊angi!”
65 #
Im. 24:16
Ual᷊ingu e'e imam ko mawantughi e'e munggehe-gehe pakeange,#26:65: munggehe-gehe pakeange: kakakoa u tau Yahudi boko nuwawal᷊uang. dang nangul᷊i, “I sie nuhinakang Mawu Ruata! Seng tawahal᷊uasi pia saksi. I kumu seng nakaringihi wisara ko nipuhinakang su Mawu Ruata.
66Orasi i'i kirapa su sipirang i kumu?”
I sire nusumimbahi, “I Sie nunsal᷊a, dang mambeng pateng.”
67 #
Yes. 50:6
Bou e'e i sire nanguru su pahesi Yesus, l᷊au namukul᷊i si Sie. 68Dang nangul᷊i, “Kenang tika dang ul᷊i si kami, ei Kau Ratu Mananal᷊amati! I sai nameru si Kau?”
I Petrus nusunial᷊i Yesus
(Mrk. 14:66-72; Luk. 22:56-62; Yoh. 18:15-18,25-27)
69I Petrus kakaiang su l᷊ikuri, su lilahi. Pia singkatau paparentang kowawine nusumongo, dang nangul᷊i si Petrus, “Wal᷊ingewe i kau simbau dingang I Yesus tau Galilea e'e?”
70Kuteu i Petrus nusunial᷊i su tingo ngi sire kaul᷊ie. “Ia wugha apa pandungu,” nisimbahi Petrus, 71bou e'e i sie natamai sarang tukari u lilahi. Singkatau paparentang kowawine ko wal᷊inge nakawua si Petrus, dang nangul᷊i su tingo ngu manga taumata su se'e, “Taumata i'i kanini l᷊ai kapuhundingang I Yesus tau Nazaret e'e.”
72Bou e'e i Petrus sau nusunial᷊i, dang nutewa. “Tinga-tingari ia wugha ngu taumata e'e!” angkung i Petrus.
73Ta nal᷊iwue bou e'e, manga taumata ko kararisi su se'e nusumandighi si Petrus, dang nangul᷊i, “Tingari mang i kau simbau bo i sire. Kakil᷊al᷊a kahingang su didatongu.”
74Bou e'e i Petrus nusunial᷊i singapang botonge dingang nangul᷊i, “Ia wugha ngu taumata e'e!”
Singkatempo e'e l᷊ai manu nukumuku. 75Dang i Petrus nakatinaung I Yesus seng mbuae nangul᷊i si sie, “Suhoro u manu kumuku, i kau seng pakatilu nusunial᷊i u Ia.” Bou e'e i Petrus nusumuwang, numpal᷊ehe dingang nasusa.
Currently Selected:
MATIUS 26: PLT
Highlight
Share
Copy
Want to have your highlights saved across all your devices? Sign up or sign in