MATIUS 21
21
I Yesus nusumu su Yerusalem dingang u kawawantughi
(Mrk. 11:1-11; Luk. 19:28-40; Yoh. 12:12-19)
1Su tempo seng masandighi Yerusalem, i sire nurating u Betfage su Wukiri u Zaitung. Su se'e I Yesus nundoi tumatuhu-E sire rua pal᷊al᷊eng horo. 2“Dakoe sarang kampong su tingo pai,” tatanata ngi Yesus si sire rua. “I rua turusi makawua pia keledai simbau mal᷊aiki dingang anae. Wukate keledai e'e dang wawae mai. 3Boko pia ko makina, ul᷊i su tau e'e, ‘Mawu#21:3: Mawu: arako tataghuange. mupake,’ tau e'e dingang maehong mamala keledai e'e pakiwawa.”
4Hal᷊i e'e mang seng kere'e, tadeau mariadi apang ko niul᷊i u nabi kere i'i,
5 #
Za. 9:9
“Puhabari ko su Sion,
Ratu ngu seng kasongonge sarang koa i kumu.
I Sie mangkate ko masana naunge dang nusumake su keledai
simbau,
ana u keledai ko paranggang.”
6Bou e'e tumatuhu-E darua e'e natamai nukoa kere ko nitanatang I Yesus si sire rua. 7I sire rua numbawa keledai e'e dingang anae. Bou e'e i sire rua nangumpahi pal᷊uka ngu manga keledai e'e dingang u kakingkaeng i sire. Bou e'e I Yesus nusumake. 8Maul᷊i taumata su se'e namila kakingkaeng i sire su l᷊al᷊eng, kere'e l᷊ai i sire ko wal᷊inge namoto manga lelang u kau dang niantehi su tal᷊oara u l᷊al᷊eng. 9#Mzm. 118:26Taumata maul᷊i ko kal᷊al᷊enge su horo dang su l᷊ikuri Yesus nukumiha, “Kaumuri Ahusi Daud! Nial᷊amateng I Sie ko nusumongo su areng u Mawu! Pundalo ko Mawu Ruata Ko Karangetange!”
10Bou e'e, su tempo I Yesus nusumu su Yerusalem, kaul᷊i u soa nughigho. “I'i ko i sai?” kakina u taumata maul᷊i e'e.
11“I Sie Nabi Yesus, bou Nazaret su Galilea,” sasimbahi taumata maul᷊i ko katuhue si Yesus.
I Yesus nusumu su Wal᷊e ngu Mawu
(Mrk. 11:15-19; Luk. 19:45-48; Yoh. 2:13-22)
12Bou e'e I Yesus nusumu su Wal᷊e ngu Mawu, dang nanguseri kaul᷊i u taumata ko kapuwal᷊ue su se'e. I Sie nangal᷊intuing manga meda ngu mananukari doi, l᷊au manga kakangianeng u muwawal᷊u paluma. 13#Yes. 56:7; Yer. 7:11Bou e'e i Sie nangul᷊i su manga taumata e'e, “Su l᷊al᷊ung u Buki Susi kawawohe, Mawu nangul᷊i, ‘Wal᷊e-Ku sarung isigho Wal᷊e tampa u pukakal᷊iomanengang.’ Kateho nikoa i kumu tampa u tahahampasi!”
14Manga taumata ko wuta l᷊au ko kesohi nusumongo si Yesus su Wal᷊e ngu Mawu, dang I Sie nupakaul᷊e ngi sire. 15Arawe manga tumbonang u imam l᷊au manga meteri agama nuwawal᷊uang nakawua manga hal᷊i ko makal᷊aherang nikoa I Yesus. Dang i sire nuwawal᷊uang l᷊ai nakaringihi manga rario nukumiha su Wal᷊e ngu Mawu, nangul᷊i, “Kaumuri Ahusi Daud!”
16 #
Mzm. 8:3
I sire nangul᷊i si Yesus. “I Kau nakaringihi apang ko niul᷊i i sire?”
“Iya, Ia nakaringihi,” sasimbahi I Yesus. “Apa i kumu mborong ta nubasa sarang manga paghisa pia ayeti i'i su Buki Susi. Manga rario l᷊au ana ko kasusunge seng Daku nitintiro tadeau pusigho daralo ko nasuku?”
17Bou e'e I Yesus nanintang i sire, nusumuwang bou e'e nakoa sarang Betania dang natiki pai se'e.
I Yesus nangane kau ara
(Mrk. 11:12-14,20-24)
18Ndai mal᷊ou mal᷊uka-l᷊ukari, su tempo kal᷊al᷊enge mapul᷊e sarang soa, I Yesus nakapundang nahutung. 19I Sie nakawua pia kau ara singkau su wiwihi u l᷊al᷊eng. I Sie nusumandighi sarang pung u kau e'e, kuteu ta nakarea wuange sarang manga simbau, kitang raunge sisane. I Yesus nangul᷊i su kau e'e, “I kau sarung ta muwua!” Kau e'e ringang nahango.
20Suapang manga tumatuhu I Yesus nakawua apa ko nariadi e'e, i sire naherang. “Kirapa nariadi sarang kau ara e'e turusi nahango?” kakina i sire.
21 #
Mat. 17:20; 1Kor. 13:2 “Tingari” sasimbahi Yesus, “Boko i kumu mangimang kahingang, i kumu makakoa apa ko Daku nikoa su kau i'i. Dang wal᷊inge kitang e'e, kateho i kumu sarung makapuhabari su wul᷊uri i'i, kasapuae dang karume'e sarang l᷊auri; hal᷊i e'e mang mariadi. 22Apang l᷊ai ko ipundokang i kumu su l᷊al᷊ung kal᷊iomaneng, mang sarung ikatarima i kumu, asal᷊i i kumu mangimang.”
Kakina hal᷊i u haki I Yesus
(Mrk. 11:27-33; Luk. 20:1-8)
23Bou e'e I Yesus nusul᷊e sarang Wal᷊e ngu Mawu, nusumu dang nanintiro su se'e. Su tempo ngu I Sie kapanintironge, manga tumbonang u imam l᷊au tumbonang u tau Yahudi nusumongo si Yesus dang nukina, “Apa dasarie i Kau nukoa kaul᷊ie tamai e'e? I sai nangonggo haki e'e si Kau?”
24I Yesus nusumimbahi, “Ia l᷊ai makina si kumu. Boko i kumu sumimbahi, Ia sarung mangul᷊i si kumu dingang u haki i sai Ia mukoa hal᷊i tamai e'e. 25I Yohanes nanahani dingang u haki i sai? Mawu Ruata arako taumata?”
Bou e'e manga tumbonang u imam l᷊au tumbonang u tau Yahudi e'e nanita nughaghighili. “Boko i kite mangul᷊i, ‘Dingang u haki u Mawu Ruata,’ i Sie mangul᷊i, ‘Boko kere'e apa sabapie i kumu ta mangimang si Sie?’ 26Arawe boko i kite mangul᷊i, ‘Dingang u haki u taumata’ i kite mataku su taumata maul᷊i, watu'u su naung i sire kaul᷊ie i Yohanes nae ko singkatau nabi.” 27Inau i sire nusumimbahi, “I kami wugha.”
Bou e'e I Yesus nangul᷊i si sire, “Boko kere'e, Ia l᷊ai ta mangul᷊i si kumu dingang u haki i sai Ia nukoa kaul᷊i u hal᷊i i'i.”
Papinintu ana darua
28“Kirapa su sipirangu hal᷊i i'i?” Angkung I Yesus tuhue. “Pia singkatau iyamang pia anae ko ese darua. Tau e'e natamai nakoa sarang koa u anae ko iyakang, dang nangul᷊i, ‘Yamang, taraiko silou i'i puhal᷊i su awuhi anggori.’ 29‘Ia mandiri,’ angkung u ana e'e. Kateho samuringe sipirange nuwal᷊u dang natarai nakoa sarang awuhi e'e. 30Bou e'e i yamange e'e tamai nakoa sarang anae karuange nangul᷊i pandung ko musul᷊ung. ‘Kere'ete wue, Pa,’ angkung u anae karuange e'e. Kateho i sie ta natarai. 31Inau, bou tal᷊oara u ana darua e'e, sude'e ko nukoa kao i yamange?”
“Ko iyakang,” nisimbahi manga tumbonang u imam dang manga tumbonang u tau Yahudi e'e.
I Yesus nangul᷊i si sire, “Pangimangte: Mananuntu balasteng l᷊au manga kowawine ko nawuang sarung makahoro si kumu mariadi umati u Mawu Ruata bo i kumu.#21:28-31: Su l᷊al᷊ung u pira mbau wohe horo pia pal᷊uhe kiri'i: 28 “Su orasi i'i kirapa tumuhu sipirang u hal᷊i i'i?” angkung I Yesus tuhue. “Pia singkatau iyamang ko pia anae ko ese darua, i sie nakoa sarang anae ko kahimotongange dang nangul᷊i. ‘Yamang tamai ko puhal᷊i su anseri u anggori silou i'i.’ 29 Ana e'e nusumimbahi, ‘Ho, papa!’ Kateho i sie ta natamai. 30 Bou e'e iyamang e'e nakoa sarang anae ko karuange dang nangul᷊i hal᷊i ko musul᷊ung. Anae nusumimbahi, ‘ia mandi,’ kateho bou e'e sipirange nuwal᷊u bou e'e mang natamai. 31 bou tal᷊oara u ana darua e'e, ko sude nukoa kao i papange?” “Ko karuange,” nisimbahi manga tumbonang u imam l᷊au manga pangaha u tau Yahudi e'e. 32#Luk. 3:12, 7:29-30Watu'u i Yohanes Mananahani nusumongo dingang nupakal᷊ahe si kumu kakakoa u muwiahi su kao u Mawu, kateho i kumu mandiri mangimang tintironge; arawe mananuntu balasteng dingang u manga kowawine ko nawuang mangimang si sie. Kateho maneng i kumu seng nakawua kaul᷊ie e'e, i kumu l᷊ai mang ta namal᷊u sipirang i kumu l᷊au ta mangimang su Mawu.”
Papinintu mul᷊ahal᷊i awuhi anggori
(Mrk. 12:1-12; Luk. 20:9-19)
33 #
Yes. 5:1-2
“Raringihi ko papinintu simbau i'i l᷊ai,” angkung I Yesus. “Pia singkatau tataghuang tana namuka awuhi anggori. Nipagarenge nal᷊iku, dingang nukoa l᷊ohang u pamamuhukang anggori, bou e'e nupararisi u manara pudadiagateng. Nasue e'e nipakisewae su mul᷊ahal᷊i, mbuhue i sie nakoa sarang wanua ko wal᷊inge. 34Suapang seng nurating tempo ngu manipo wua ngu anggori, tataghuange nundoi su manga paparentange sarang koa u mul᷊ahal᷊i awuhi e'e, panarima bahageange. 35Arawe mul᷊ahal᷊i awuhi e'e naname manga paparentang u tataghuang tana e'e: Singkatau nidudu, ko wal᷊inge nipate, dang ko wal᷊inge l᷊ai nipal᷊o u watu. 36Tataghuang u tana e'e sau nundoi paparentang ko wal᷊inge, nangilebe maul᷊i bou ko horo. Kateho i sire e'e mang l᷊ai nikoa kere'e. 37Panginsuenge tataghuang u tana e'e nundoi anae sisane. ‘Nal᷊ahe anaku mang adateng,’ su sipirange. 38Kateho suapang mul᷊ahal᷊i awuhi e'e nakawua ana u tataghuang tana e'e, i sire nudidato simbau dingang ko wal᷊inge, ‘Seng i sie i'i muhinggo rarotong. Maite pateng i kite, tadeau i kite makarea pusakae!’ 39Kuteu ana e'e nisame, nirume sarang l᷊ikuri, mbuhue nipate.”
40I Yesus nukina, “Ho, boko tataghuang u awuhi anggori e'e musul᷊e, apa sarung koatenge su mul᷊ahal᷊i e'e?”
41I sire nusumimbahi, “Seng nal᷊ahe i sie mamate manga taumata ko dal᷊ai e'e, mbuhue awuhi anggori e'e i sewange su taumata ko wal᷊inge ko mo mamahia bageang bou l᷊uang u tana e'e si sie su temponge.”
42 #
Mzm. 118:22-23
Kuteu I Yesus nangul᷊i si sire, “Mborong ta paghisa i kumu nubasa ko mawawohe su Buki Susi?
‘Watu ko ta napake su manga base u wal᷊e
seng nakoa watu Kahimotongange.
I'i hal᷊i ko nikoa u Mawu;
wal᷊inge gampang kasidadae!’ ”
43“Inau tinaungete,” angkung I Yesus, “kaul᷊i u haki kere umati Mawu Ruata sarung al᷊akeng bo i kumu, dang inggile su simbau bangsa ko sarung mupal᷊al᷊eng u parenta ngu Mawu Ruata. 44[Taumata ko manawo su watu e'e, sarung mal᷊al᷊ul᷊e; dang taumata ko kaumpisangu watu e'e sarung makoa awu.]”
45Su tempo ngu manga tumbonang u imam dang manga tau Farisi nakaringihi manga papinintu Ngi Yesus e'e i sire natitong himoneu I Yesus mul᷊uhabari u hal᷊i i sire. 46Kuteu i sire kapundeae l᷊al᷊eng maname si Sie. Kateho i sire mataku su taumata maul᷊i, watu'u su naung u kaul᷊i u taumata maul᷊i e'e I Yesus ko singkatau nabi.
Currently Selected:
MATIUS 21: PLT
Highlight
Share
Copy
Want to have your highlights saved across all your devices? Sign up or sign in