E MATIU 28
28
1 Oku fakaha ae toetuu a Kalaisa e he agelo ki he ogo fefine. 9 Oku ne fakaha eia kiate kinaua. 11 Oku foaki ae gaahi baaga e he kau taulaeiki lahi ki he kau tau, ke nau tala nae kaihaaji ia mei he fonualoto. 16 Koe fakaha a Kalaisa ki he ene kau akoga, 19 o ne fekau atu akinautolu ke nau babitasso, mo akonaki‘i ae gaahi buleaga kotoabe.
1BEA kuo hili ae sabate, bea kamata hoko ae uluaki aho oe uike, mo ene omi a Mele Makitaline, moe Mele e taha, ke vakai ki he fonualoto. 2Bea iloage, nae mofuike lahi: he nae alu hifo ae agelo ae Eiki mei he lagi, bea ne filifilihi ae maka mei he mataba, bea hekeheka ai. 3Nae tatau hono mata moe uhila, bea hinehina hono kofu o hage koe uha hinehina. 4Bea nae tetetete ae kau leo i he manavahe kiate ia, o nau liliu o hage koe kau mate. 5Bea lea ae agelo ki he ogo fafine, o beheage, Oua naa mo manavahe akimoua: he oku ou ilo oku mo kumi a Jisu, aia nae tutuki ki he akau. 6Oku ikai i heni ia: he kuo toetuu, o hage ko ene lea. Mo omi, o mamata ki he botu nae tokoto ai ae Eiki. 7Bea mo o ke vave, o tala ki he ene kau akoga kuo toetuu ia mei he mate; bea vakai, oku alu muomua ia iate kimoutolu ki Kaleli: te mou mamata kiate ia i ai: vakai, kuou tala ia kiate kimoua. 8Bea ne na o leva mei he fonualoto, i he manavahe moe fiefia lahi, o na felele‘i ke fakaha mai ki he ene kau akoga.
9Bea i he e na alu ke tala ki he ene kau akoga, iloage, kuo fakafetaulaki mai a Jisu kiate kinaua, o ne behe, Jiotoofa. Bea naa na omi o buke hono va‘e, o hu kiate ia. 10Bea toki behe ai e Jisu kiate kinaua, Oua e manavahe: alu o tala ki hoku gaahi kaiga ke nau alu ki Kaleli, bea te nau mamata ai kiate au.
11Bea i he e na o, vakai, nae ha‘u ki he kolo ae niihi oe kau leo, o fakaha ki he kau taulaeiki lahi ae gaahi mea kotoabe kuo fai. 12Bea kuo fakataha akinautolu moe kau mātua, bea hili e nau fakakaukau, naa nau atu ae gaahi baaga lahi ki he kau tau, 13O nau behe, Mou lea, o behe, Nae ha‘u ene kau akoga i he bo, o kaihaaji ia lolotoga e mau mohe. 14Bea kabau e ogo atu ae mea ni ki he bule, te mau fakaloto‘i ia, kae malu‘i akimoutolu. 15Koia naa nau too ai ae gaahi baaga, o nau fai o hage ko hono akonekina akinautolu: bea oku ma‘u ae tala ni i he kakai Jiu o a‘u ki he aho ni.
16Bea nae alu ai ae kau akoga e toko hogofulu ma toko taha ki Kaleli ki he mouga aia nae fakaha e Jisu kiate kinautolu. 17Bea kuo nau mamata kiate ia, bea nau hu kiate ia: ka nae fakataetaetui ae niihi. 18Bea ha‘u a Jisu o lea kiate kinautolu, o behe, Kuo tuku kiate au ae malohi kotoabe i he lagi mo mamani. 19Koia ke alu akimoutolu, o fakalotu‘i ae gaahi buleaga kotoabe, o babitaiso akinautolu i he huafa oe Tamai, moe Alo, moe Laumalie Maonioni: 20O akonaki atu kiate kinautolu ke nau tokaga ki he gaahi mea kotoabe aia kuou fekau kiate kimoutolu: bea vakai, oku ou iate kimoutolu mau ai be, o a‘u ki he gataaga o mamani. Emeni.
Currently Selected:
E MATIU 28: TWB
Highlight
Share
Copy
Want to have your highlights saved across all your devices? Sign up or sign in