Matie 4
4
Sitan ná Jeju kam dɨlalot
(Oo Mrk 1:12-13; Luk 4:1-13)
1Kamla Ndil ɔrr Jeju aw sia kam dɨlalot kɨ n'ad Sɨtan náa. 2Jeju oron nyasa ndɔ dɔsɔɔ kɨ kàd dɔsɔɔ taa ne, ɓo tɔla sɔkɨr. 3Kamla ngenãdeg ndɔt kɨ roat, ela an: Ĩla ĩ ngon Luwah a ne, el gaj mbalg 'nten ad telɨn nyasa.
4Na Jeju tur an: Ndangɨn kam maktubt anan: De a ndɨ kɨ dɔn dõ kɨtakul nyasa hã kɨɗabe al, na kɨtakul ta kɨɗen ndɨ tee ta Luwaht tã.
5Kamla Sɨtan una aw sia ɓebot kɨjaɓat, ndaa dõ dɔ kuj ndub Luwaht, 6na ela an: Ĩla ĩ ngon Luwah a ne, i kɨla i so kɨ ber, kɨta ndangɨn kam maktubt anan:
Luwah a elta malaikag lon ad a gaan dɔit,
kad laain kɨ dajid,
na ɓeta i ga njai mbalt mad.
7Jeju ela an: Ndangɨn kam maktubt anan: A i ná Bɨraɓe Luwah loi al.
8Goot gog Sɨtan ɔrr Jeju, aw sia dõ dɔ mbalt mad kɨ ngal puwuw, daa kõɓeg tube kɨ dɔningt kɨ majd ad oo, 9na ela an: Ĩla i ndɨ kɨdɔgoj, ɔsɨ dɔi ber nõmt a ne, m'a m'adi nyag'n non tube.
10Taa ne, Jeju tura an: Aw kɔ, Sɨtan. Kɨtɔ ndangɨn kam maktubt anan: A ɔsɨ dɔi ber nõ Bɨraɓe Luwaht loi; ĩ kɨɗabe la a i ɗa ɓer loa ye.
11Kamla Sɨtan tĩnyaa, na malaikag ɗen ro Jejut ɗa ɗan kɨla adɨna.
Jeju Krist mbagɨr kɨla lon Kapernawmt
(Oo Mrk 1:16-20; Luk 4:14-15; Jã 1:35-43)
12Lon Jeju oo hoi Jã kad lana dangait ye, Jeju tel aw gog dɔning Galilet. 13Nya ɓe Najaret, na ɗe ndɨ Kapernawmt; ɓe kɨ ndɨ ta bahbot kɨ Galile, kam dɔning Jabulont kɨ Neptali. 14Ɗa titbe kad tɔlɨn ta tag'n Ngekelta kɨ ta Luwaht Ejai el an:
15Dɔning Jabulon kɨ dɔning Neptali,
kokad bahbot, kɨ gid Jurdẽt ko nu,
kɨ dɔning Galile lo deg kɨ gerɨn Luwah al,
16deg'n non kɨ ngendɨ kam tilt ye,
oon kunj mad kɨbobe;
na ĩgɨn ndɨn dɔning ndil koit ye,
kunj tee kɨ dɔdt.
17Kaglot'n non la Jeju mbagɨr la mber tat lon an: I tɔrrɨn ndisɨ kɨta kõɓe kɨ dɔrãgt i nderbe.
Jeju kun nawg sɔɔ kad ĩn ngéndoog lon kɨdasa
(Oo Mrk 1:16-20; Luk 5:1-11)
18Jeju a ndia ta bahbot kɨ Galile, la oo ngankõnag joo: Simõ'n a kunɨna Pierr, kɨ Andre kɨ ngonkõa, ndɨ ũn bandbɨra kɨ bahbot; kɨta ĩn nawg. 19Jeju eld an: I ndulon gom. Na m'a mad i telɨn naw hɔ deg.
20Tentenbe tĩnyan bandbɨrag, na ndulon goa. 21Jeju tɔi kɨ kete ngonsĩ ɓaitɔ a ne, oo ngankõnag madg joo tɔ: Jak ngon Jebede, kɨ Jã ngonkõa, ĩn kam toot sed bɔwd Jebede, ndɨ dɔɔn kum bandg lod; Jeju kund. 22Na kɨtajigt, nyan bɔwd kɨ kam toot, na ndulon goa.
Kɨla lo Jeju Krist dɔning Galilet
(Oo Mrk 1:32-39; Luk 4:43-44; Luk 6:17-20)
23Jeju lago log kam dɔning Galilet tube, a ndoo deg kam kuj kawnat lo Juipg, a lamber hoita kɨmaj lo kõɓe lo Luwah, a yoot ngémõig kɨ dang dang, kɨ mootg kɨ dang dang ku degt. 24Tɔa ko kɨgolog kam dɔning Sirit kɨtaagbe, na deg ɗen kɨ ngérotog tube roat, kɨ ĩgɨn yotog kɨ nyakɨtog kɨ dang dang ndɨ ɗad, kɨ deg'n ndilg kɨmajalg ĩn kamdt, kɨ ngékilg, kɨ ngérokoinjɔrg, ad yootd. 25Bakad deg koosɨg ndulon goa ko Galilet, ko Dekapolt, ko Jerusalemt, ko Judet kɨ ko gid bah Jurdẽt ko nu.
Currently Selected:
Matie 4: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.