Matie 3
3
Jã ngeɗa deg baptem la mber dɨlalot
(Oo Mrk 1:2-8; Luk 3:1-20)
1Kaglot'n non Jã ngeɗa deg baptem tee ɗe, ɗa la mberta kam dɨlalot kɨ dɔning Judet, ɗa el an: 2I tɔrrɨn ndisɨ dɔ majalgt losɨ, kɨta kõɓe kɨ dɔrãgt i nderbe.
3Jã'n non la i de'n Ejai kɨ ngekelta kɨ ta Luwaht elta dan dɔa an:
Ndita mad koo kam dɨlalot an:
I ɗan go ɗob lo Bɨraɓe,
I ɗan go ngan ɗobg loa adɨn asɨna jerɨr.
4Jã la kub kɨ ɗa kɨ bĩ lukum, dɔɔ ɓon kɨ ngaland ndar, nyasaa i kɨdag kɨ tej kɨmut. 5Deg kɨ Jerusalemt, kɨ kɨ Judet tube, kɨ log tube'n gugɨn dɔ bah Jurdẽ tee awɨn roat; 6ndɨ tɔɔn tad dɔ majalgt lod, ad Jã ɗad baptem kam bah Jurdẽt.
7Na lon Jã oo Parisɨg kɨ Sadukig ngãibe ɗen lo ɗa baptemt lon ye, eld an: Ĩn li kɔka, nõ ug elsɨ kɨ ãin wong'n ndɨ ɗe a? 8I teen kɨ nyaɗag kɨ asɨ ta tɔrrndi. 9Na ot gaan kamsɨt kan: Abraham i bɔwsɨ. Kɨtɔ m'ndɨ m'elsɨ, Luwah asɨ ɓai kɨ ngang ku mbalgt'n ɗan teld ngan Abrahamt. 10Na tajigla taa, ndan kɨnga girr kaggt woi, ad kag kɨɗen a tee kɨ kand kɨmajal a ne, a gana lana kam horrt. 11Mĩ taa, m'ndɨ ɗasɨ baptem kam mant kɨta teesɨ kɨ tɔrrndit, na ngeɗe gomt, tɔim kɨ tɔg ngãi, m'asɨ kad m'ɔrr sa loa al; ĩla a ɗasɨ baptem kam Ndilt kɨkunjɗang kɨ kam horrt tɔ ye. 12Nyatonya loa i jiat kad ton nyako kɨ dɔ gaart lon, a kaw nyako kɨ dama, na a la horr tisa kɨ horr kɨ dum tɔl.
Jã ɗa baptem Jeju Krist
(Oo Mrk 1:9-11; Luk 3:21-22; Jã 1:32-34)
13Taa ne, Jeju ɓai Galilet aw ta bah Jurdẽt, aw ro Jãt kad Jã ɗan baptem. 14Na Jã ɗa kɨ n'oron, an: M'ndɨ m'ge kad m'ngaa baptem roit ye la, ĩ tã i ɗe romt yo?
15Na Jeju tura an: I nya ta loi, na i ɗam baptem tajigla; kɨta titbe la sumba kad kɨ tɔlɨn ta nya tube kɨ ɗa denesew.
Ta la Jã ndig dɔt, na ɗa baptem Jeju. 16Na lon ɗan Jeju baptem woi ye, tentenbe Jeju tee kam mant, na oon dɔrã tee tan kɨtatɔa; na oon Ndil Luwah ɗisɨ tit derrngɔt be, ɗe ndɨ dɔat. 17Goot gog ndɨ ta mad tee ko kam dɔrãt dõ, el an: Ĩn ɗan i ngonɨm kɨ ngetar lom'n rom nelɨm sia kɨdumbit.
Currently Selected:
Matie 3: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.