Matie 2
2
Ngéger nyag ɗen ko lo ɓakàdt koo Jejut
1Oojɨn Jeju Betlehemt kam dɔning Judet dɔkaglot lo ngar Herod. Goot oon ngéger kɨmẽ madg ɓain ko loɓakàdt ɗen Jerusalemt na anan: 2Ngon'n oojɨna ngart lo Juipg ye i ɗa a? Kɨtɔ j'oo kɨmẽ loa ko loɓakàdt nu, na kɨ ɗe kad j'ɔsɨ dɔj ber nõat.
3Lon ngar Herod oo dɔ ta 'nten ye, kama gang ngalang kɨ deg kɨ Jerusalemt tube nat sia. 4Ngar Herod kaw ngéjanyamosɨkadkari kɨbog kɨ ngéndang maktubg tube kɨ nat, kamla ndɨjed lon a oojɨn Krist tit. 5Elɨna anan: A oojɨna Betlehemt kam dɔning Judet, kɨta titbe la ngekelta kɨ ta Luwaht ndangɨn kam maktubt ye:
6Na ĩ Betlehem, kam dɔning Judet,
ĩ kɨ du tɔi al bat ku ɓebogt kɨ Jude,
kɨta ko kamit la ngar mad a teet ye,
ĩn a i ngekul Israel girrdeg lom.
7Ad Herod la kun ngéger kɨmẽg'n non gid tilt, ndɨjed kaglo jeje'n kɨmẽ'n non tee tit. 8Kamla lad Betlehemt an: Awɨn, i ndɨjen ta lo ngon kɨɗoi nõ jeje oon, na lon i ngahna a ne, i ɗe elmɨn ad m'oo, kad mĩ kɨɓe kaa, m'aw m'ɔsɨ dɔm ber nõat.
9Lon oon dɔ ta lo ngar woi ye, son ɗobo awɨn. Na oon kɨmẽ kan oona ko loɓakàdt nu ye, a ndia nõdt, mbã ɗe duba dɔ lot'n ngon tot. 10Lon oon kɨmẽ'n non ye, ɗan ronel kɨ kamnda kɨ dumbit. 11Udɨn kuju, oon ngon kɨɗɔi'n non nat kɨ kõa Mari; ndɨn kɨ dɔgojd, ɔsɨn dɔd ber nõat. Kamla teen ta ɓɔl nyamajg lod, lan kadkarig: Lɔr kɨ dukan kɨ myrr adɨna. 12Kamla Luwah ug eld kam niit kad telɨn kɨ dɔ Herodt gog al, ad tel awɨn ɓe lod kɨ ɗob kɨɗang.
Jojep un ngon kɨ kõa ãin kɨ dɔning Ejipt't
13Lon awɨn woi ye, oon malaika mad lo Bɨraɓe tee hɔi kam niit kɨro Jojept, an: I ɓai dõ, un ngon kɨɗoi kɨ kõa, na ãi kɨ dɔning Ejipt't, i ndɨt nu mbã ka m'eli ta kad i ɗe kamtã; kɨta Herod a sah ngon kɨɗoi'n non kɨ n'tɔla.
14Ta la Jojep ɓai unɨn ngon kɨ kõa ndɔ, na tee aw sed dɔning Ejipt't. 15Ndɨt nõbe mbã koi Herod; kɨtakad tɔl ne ta ta'n Bɨraɓe el kɨ ta ngekelta kɨ tant an: M'kun ngonɨm kɨdɨngã kad tee kɔ kam dɔning Ejipt't.
Ngar Herod tɔl ngan kɨɗoi kɨdɨngãg kam ɓe Betlehemt
16Lon Herod oo kad ngéger kɨmẽg ɓoodɨn sen ye, wong tɔla sɔkɨr, ad la tɔl ngan kɨdɨngãg kɨ kasɨ ɓal joo tube, mbã kɨ ĩgɨn asɨn al ɓaitɔ, ĩgɨn ndɨn Betlehemt, kɨgo ɗɔb nin ɓet loa, ɔjɨn go kaglo'n ndɨjen ta jeje ngéger kɨmẽg nõ. 17Titbe la tɔlɨn ne ta'n Jeremi ngekelta kɨ ta Luwaht el an:
18Oon dɔ ndɨ kɔl kɨga kɨ Ramat,
wi kɨ nõ kɨna mbiting kɨ dumbit;
Rasel ndɨ nõ nganɨn;
ge gɔr al kɨta ngana oin tube.
Jojep un ngon kɨɗoi kɨ kõa, na tee Ejipt't aw dɔning Israelt gog, ndɨ Najaret't
(Oo Luk 2:39)
19Lon Herod oi taa ne, malaika mad lo Bɨraɓe tee hɔi kɨro Jojept kam niit dɔning Ejipt't ela an: 20I ɓai dõ, un ngon kɨɗoi kɨ kõa, na aw dɔning Israelt gog; ngésah tɔl ngon kaa nõ oin.
21Ta la Jojep ɓai unɨn ngon kɨ kõa, na aw dɔning Israelt gog ye. 22Na lon oo kad Arkelaws õɓe dɔning Judet got bɔwɨn Herodt ye, ɓool ɗaa kad aw nu; na tit ka'n Luwah ug ela'n kam niit ye, tel ɓa ta'n kɨ dɔning Galilet, 23aw a kɨ ndɨ kam ɓet mad'n tɔa i Najaret; i titbe kɨtakad tɔlɨn ne ta ta'n ngékeltag kɨ ta Luwaht elɨn anan: A kunɨna de kɨ Najaret't.
Currently Selected:
Matie 2: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.