MAWOOKIONYI 7
7
Mfu fung'anyi
1Mndumii kawia Noe, “Henda kuidie na ipfo safinenyi iyo na wa kanyi kopfo wose; kyamba kunu kiidi kya wanduwa na iyo njikuwonyiho ui mcha sumhana na inyi.” 2Noitse napfo mando hai na moo mfungade mfungade iho hai maheṟemtsu; lya kika na lya kiumi; na kya iho halai maheṟemtsu noitse napfo hawi hawi lya kiumi na lya kika, 3na malehe ha ruwehu noitse napfo mfungade mfungade ha kika na ha kisoṟo kundu haalutse hengi iya orukenyi. 4Kipfa kukamesia mfiri mfungade njechiende mvuo iya orukenyi, mkonu makumi haana kio na mfiri na orio kindo kii na moo ndekiwumba iya isangenyi njechikirumatsa. 5Noe kawuta chandu alembawasa.
6Nao Noe nyi we mndu o maaka mahana haṟandaṟu (600) kiheri kyo mfu fung'anyi fo mṟinga fulecha orukenyi. 7 Noe kaida na kulya safinenyi o, na wana wake, na mka oke na walyi wa wana handu hamu nao kipfa kya mfu fulya fo mṟinga. 8Na kiidi kya mando maheṟemtsu, na halya halai maheṟemtsu na malehe na shose shekekukuruo wanda, 9shikaida na kulya safinenyi kundu Noe ai, na wawi wawi, mii na mka, chandu Ruwa awewawasie Noe. 10Nalyo kikawa mkonuyo mfungade yamesia mfu fo mṟinga fukacha orukenyi. 11 Nalyo maaka fo mahana haṟandaṟu ya moo fo Noe, merifo kawi, mkonu fo ikumi na mfungade fo meri fo, soka tsa mṟinga tsa mapichi hang'anyi tsikaṟuhusuka na pfinya, shiṟoṟi sha ruwehu shikaṟuhusuka. 12Mvuo ikakapa orukenyi mkonu makumi haana (40), mfiri na kio. 13Mkonu fulya Noe kaida na kulya safinenyi, o na wana wake Shemu, Hamu na Yafeti na mka o Noe, na walyi wa wana waṟaṟu handu hamu nao; 14wo na orio indo lya nja kwi mbaṟi yaho, na orio indo lya mba kui mbaṟi yaho, na orio indo lyekukuruo wanda hekekukuruo iya orukenyi kui mbaṟi yakyo, na shilya shekerunduka kui mbaṟi yasho, na orio mbaṟi yose ya malehe. 15Shileida na kulya safinenyi kundu Noe ai, shiwi shiwi sha orio kiwode mbihu kii na mumuyo fo moo ipfo kiidi. 16Shileida napfo kya kiumi na kya kika orio shiwumbe shilya Ruwa awewawasie; Mndumii kamshingia kulya mba.
17Mfu fulya fulekaa orukenyi mkonu makumi haana (40) mṟinga fukaengeṟeka fukairia safina ikakaa orukenyi. 18Mṟinga fukawada pfinya, fukaengeṟeka mnu orukenyi; safina iya ikakaa huya mṟinga. 19Mṟinga fukawada pfinya ing'anyi mnu nakamu orukenyi fukashikya mafumvu maleshe hose ha kunu orukenyi. 20Mṟinga fukawada pfinya, tane foshikya mafumvu fukaida handu ha mita mfungade na kenga. 21Shose shii na moo shekechumia shikapfa, malehe na shiuma, na mando ha nja, na orio kindo kekeafuo wanda kyose na orio mndu. 22Na orio kindo kiwode mṟufu fo moo fo mbuonyi kikawepfa, na orio kindo kiwei handu hahadutsu. 23Orio kindo kii na moo orukenyi kikaarisio kuleshe wokia mndu o wandu tane shiuma, na kekeafuo wanda, na shilehe sha ruwehu, shilekombetso kombi iya orukenyi; Noe katsuhaa amonyi handu hamu na iwo wai nao kiidi kya safina. 24Mṟinga fukawada pfinya orukenyi mkonu ihana na makumi hatanu (150).
Currently Selected:
MAWOOKIONYI 7: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.