Zefanyâ 1
1
1Nyín byiraa ḿbyí Óburúkpâbí o/sét Zefanyâ wǎ mkpábé emen, mú wǎn-Kúshi, mú wǎn-Gedalyâ, mú wǎn-Amaryâ, mú wǎn-Hezekyâ, ké nkéré mú Otu Josáya mú wǎn-Ámon o/mû otu mú Júda.
Dyicí-Mpan mú Óburúkpâbí
2Óburúkpâbí o/fu, me n/chi m-bên kángkáng byěm ḿbyí ké ejíí. 3N/chi n-ju banet ne enyam. N/chi n-ju bunurung ḿbú mbu bu-byí i kyíbóng ne ekworê nyí nyi ké kace. [N/chi n-twóp bambên atyém kyísí.] N/chi n-ju kángkáng banet ḿbé ké ejíí nang onet obónge oo*waa*. Me Óburúkpâbí nké n/raa.
4N/chi n-tan bubwô ejí m-bên Júda ne kángkáng banet ḿbé mbe ké Jerúsélem, ne n/chi n-ju onet nang orá mú mu o-fâ orím-bukye-Bâl ne dyizîn ńdyí banchi kyifen emen dyi/chi dyi-tánê. 5N/chi m-man to ne banet ḿbé mbe ba-tíngê e kyísí ba-kyâ mě ofê ké bambwôm-byise, ba-kyâ óbyísû ne otukáku ne ékpére ofê, ne ḿbé mbe ba-tíngê e kyísí to ba-sem m mě, ba-bwa esim ba-da-sem dyizîn ńdyí orím-bukye-Myíkom, 6ne banet ḿbé baa/mîng ecen ne me ké kyikû, ḿbé ba*fí ba-kyé ng mě* ba-fé nang nshwam ba-kye mě*.
7Zefanyâ o/fu, cíbî n̂g pyêp ké bushú ḿbú Osówo Óburúkpâbí, ké nǎ, dyicí ńdyí Óburúkpâbí dii/fárâng. Óburúkpâbí oo/kpá byiko-kyifen echi ńkyí odaju banet emen. 8Óburúkpâbí o/fu, ké dyicí ńdyí kyifen ejí, me n/chi n-kye banet-ashí ne bwǎn-otu ne kángkáng banet ḿbé mbe ba-chi i édúú nyí banet ḿbé baa*nyît mě* busông. 9Ké dyicí ándyi, n/chi n-kye nang yeě busông, mú mu o-sháng ng bakye ne banet ḿbé mbe ba-jii ng bujii, ba-ju ng banet eringe nyí badawuri esang ba-fé ké [kyise ńkyí bonchí ebe.]
10Óburúkpâbí o/fu, ké dyicí ándyi, ba/chi ba-jwo bukyû ké dyifyi-Jerúsélem ńdyí badakó Dyifyi-Ekworê, ba-jwo dyiwonge ké kyicê-oshê ńkyí kyifyîfî ne kiimbâng-kyicoge ńkyí ekpe nyí e/bûu e-myii ké kafâ-oshê. 11Ben banet ḿbé bamu ké Móta, tii n̂g, ké nǎ, kángkáng bancen busî ba*fí to*.
12Ké nkéré ámu, n/chi n-kúng otyuryíkáng n-kûkyé banet ké Jerúsélem, n-kye kámbé busông, ḿbé ba/fé dyityém ne byiko ebe, ḿbé mbe ba-raa ng ké atyém ebe ba/fu, Óburúkpâbí oo*ba/chi o-chi kanong* nang kyibî to oo*chi*. 13N/chi n-wuri esang ebe, m-bên byise ebe. Nang ké mbe ba-bi ng byise, baa*ba/chi ba-kyú ké mbyí*. Nang mbe ba-kwón n byichí ḿbyí badayip byirim emen ba-chi bato, baa*ba/chi ba-jwáp bato ḿbé byirim-byichí ámbyi*.
14Zefanyâ o/fu, kiǐtí-dyicí ńdyí Óburúkpâbí dii/fárâng, ne ndyi dyi-bâ ochéé óchee. [Kyicoge ńkyí dyicí ńdyí Óburúkpâbí kii*nyîn ejwo*.] Nang basúja ba/chi ba-tii kakânkakân ké ndyí. 15Dyicí ándyi dyi/chi dyi-kyú ńdyí kafâ esa, dyicí ńdyí bafip ne busông, dyicí ńdyí okwâ eshí ne byěm ebên, dyicí ńdyí kyifip ne gbimaa, dyicí ńdyí ófíbí ne kiǐkpîn-kyifip, 16dyicí ńdyí biintán-byití ejwá ne dyiwonge ńdyí byití ḿbyí badanwa ne eshê nyí ba/bi ekpe ba-wáp kányí, ne ńdyí badanwa ne biǐnyáám-byikit-mbâm.
17Óburúkpâbí o/fu, me n/chi n-kye banet busông eringe nyí badakûcen wǎ bansêe achi, ké nǎ, mbé baa/chi mě kyibî. N/chi m-pwó baróng ebe kyísí wǎ omu, n-twóp byikwóm ebe kyísí wǎ abîng.
18Zefanyâ o/fu, ké dyicí ándyi ńdyí kafâ esa ńké Óburúkpâbí, nang kángkáng akpuga ebe aa*ba/chi a-man echwáp kámbé*. O/chi o-shí kángkáng ejíí ké okwâ mú kafâ esa emen. O/chi o-man ké abe ányi ne nang yeě nang yeě mú mu o-kyú u ké ejíí.
Currently Selected:
Zefanyâ 1: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985