Habákuk 3
3
Nshwam mú Habákuk o/fé
1Nyín nshwam mú Habákuk o/fé, o/fu,
2Ô Óburúkpâbí, me nn/jwo ńkyí wo aa/chi
ne bushî boo/róng mě.
Kántîk, chîchi ké nkéré mú eten biǐtí-akat ḿbyí a/mû a-chi i.
Ri banet bafip nang kafâ nke ka-sa ng ǒ.
3Osówo mu o-chî ng efím Édom o-bâ.
Osówo mú mu kanong mu o-fím m ké eku nyí Páran o-bâ.
Busan emen ḿbú ragerage mbu bu-cít ng bubóng,
ne ejíí ee/sú ne akpee emen.
4Nyǐ o-bâ ne kiinwángé ńkyí kasabang.
Kasabang ka-kédê ng ké bubwô emen,
ányi ké kyikit ńkyí o/rôo busa emen.
5O-twóm m byirwóm byi-bwóp ǎ kashú,
o-kye bukyû busa bu-bâ ǎ ké kyikû.
6Â o/bwom, esí e-náng,
â o/bírî achi, eshê e-tím banê.
Eku nyí e/fím kpákpá e-bú ng e-róng kyísí.
Eku nyí o/mû o-cen n ké nyǐ ké bankéré ḿbé ba/shwôm ké esim chwóó.
7Me n/ri ké banet ḿbé Kúshan ba-kú ba-shî ng,
banet ḿbé Médyan ba-tím m banê.
8Óburúkpâbí, buce nké bu/chi ǒ ne a-sa kafâ?
baya nké ba/chi ne kafâ ka-bírî ǒ?
Wo a/yú a-cen ké éfíbí.
Bubóng ḿbú boo/jîi nké bu/mû mútu eyên
ké nkéré mú a/chi banet eyên ba-kpógê.
9Wo a/kpá byiko ḿbyí adakúng búre eyên,
[a-kpá byiko ḿbyí adaché abán eyên.]
Buce eyên bu/ját esí byicê byifee.
10Nkéré mú eku e/ri ǒ, e/tím banê,
omu o-fím kyíbóng o-róng kyísí.
Baya ḿbé ké kafâ-esí ba-náng ng
bunâng emen bu-ribi kyíbóng.
11Ńdyí kasabang ńké abán eyên nyí adakwáng,
ne ńké kyíbye eyên ńkyí kyidasan ka/kédê,
óbyísû ne otukáku byi/bwom kyikit kyibónge.
12Wo a/cen a-nyáng ejíí ké busa-dyityém,
ké kafâ esa eyên, wo a/cím eshê a-fé kyísí.
13Wo a/dim a/fu, wo a-da ng enyii banet eyên,
a/fu, wo a-da ng enyii otu eyên mú a/cá ǎ.
Wo a/kpet onet-dyishí-banchi byibî a-twóp kyísí,
[a-ju kángkáng banet ḿbé ba/mû ǎ ké kyikû.]
[ 14Abán eyên a/tím onet-dyishí-basúja emen,
ké nkéré mú ba/bê bě epwó byiryibyiryi wǎ afú nyí aryên,
ba-jwó bě wǎ banet ḿbé mbe ba-cít ng banet-byikpu,
banet baa*nyît*.]
15Wo a/yú ké bubyî-orá eyên a-cím baya ḿbé baryên a-fé kyísí,
omu mú mu ne busa o-fám biimpún.
16Me n/jwo kángkáng byěm ḿbyín n-tím banê,
byibî-ocím ejí byi-náng ne bushî.
Enyam-byiko ejí e/nyîim,
[byiká ejí byi-kpet ekpán] barî kyísí.
Me n/chi n-kyú degere m-bám nkéré mú a/chi a-kye banet ḿbé mbe ba-kyâ bě bunwa busông.
17Nang byichí-fyîk ne ḿbyí gerêp ne ḿbyí ólif byi*da/chîzím byirim*
nang byifát byi*da/chîbát byiryíng* nang ebû e-kpú kángkáng,
byise-bampong byi/waa kafâ dyikáá,
18me n-chî ng ejêe n-kyú ké bunyîn-dyityém,
ké nǎ, Osówo Óburúkpâbí mu Onet-Onyii ejí.
19Óburúkpâbí mu o-kyâ mě busa.
Mu o-chi i byiká ejí byi-shwane wǎ ḿbyí ekún,
ne o-chi i chwǒm kii*ta mě kyíbóng-eku*.
Currently Selected:
Habákuk 3: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985