Náhum 3
3
1Kyi/bên kanong kanong ne oshê mú mu o-ju ng banet,
mú mu o-sét ng byisédéng,
mú mu ne esang nyí banet badawuri ba-dim ne nyǐ.
2Fwôo n̂g atông ba-jwo buchí ḿbú mbe ba-díp ng,
ne kyicoge ńkyí bandam-bamútu mbe ba-chi i,
ne dyipyiryi ńdyí bubyî-orá mbu bu-pyiryi ng,
ne kyicoge ńkyí bamútu ḿbé bubyî-orá budatut.
3Banyû bubyî-orá ba-kú ba-kyâ bunwa.
Bushwám ne byíbye byi-kú byi-két ng kasabang ké esû.
Byikwóm-banet bii/sú dyizu ḿbyí bii*nwa epan*.
Banet ba-kú ba-kpán n ké mbyí.
4Ba-kú ba-kyâ Nyínyíve mú mu onet-akpara busông.
Oshê mú o/kúng akpara ne bakye emen o-nîm eshê,
[o-chi kámbé básóng.]
5Óburúkpâbí mú o/rêe o-shwôm o/raa ne Nyínyíve o/fu,
n/chi n-kye ǒ busông.
N/chi m-pii ǒ osíndyíbang,
eshê emúmú e-ri ǒ ké éshwân eyên.
6Mm*ba/chi n-kúng ǒ wǎ chwǒm*
n-cít ng ǒ ne babat.
Banet ba/chi ba-kû ǒ etún fúú.
7Kángkáng banet ḿbé ba/chi ba-ri ǒ,
ba/chi ba-bwa kyikû esim ésim.
Ba/chi ba-raa ba/fu, Nyínyíve oo/shí kpók.
Yeě oda ǎ eri bafip.
Yeě oda ǎ efé dyityém.
8Nyínyíve, wo amu kanong a-shwôm Tébes mú o/mû dyityém-oshê mú Éjip? Tébes to o/mû ne kace ńké kada ǎ eku wǎ ekpe. Kace ńké Nâl nké ka/mû ka-ku ng ǎ. 9Sudân ne Éjip ba/mû ké bubwô emen. O/mû ne busa ḿbú boo*nwa ekan*. Lyíbya nké o/mû onet-kyikwáré emen. 10Nang ké kyi/mû éné, ba/kúng banet ḿbé Tébes ba-dim ne mbé wǎ bamgbokobá. Ba/mín bwǎn ebe ké kángkáng byiká-oshê ba-ju. Ba/bwá banet-ashí ebe bamgbokobá ba-dim ne mbé, ba-kyii kámbé ba-kye banet ḿbé ba/kám kámbé.
11Nyínyíve, wo to a/chi a-róng wǎ enyam-mbwôm bato. Wo to a/chi a-kan a/fu, wo a-chêe ng banet-bushwôn eyên. 12Kángkáng byikit eyên ḿbyí amu a-bwom m a-nwa ng byití byi/chi byi-firi wǎ asín-kyifem nyí aa/zím esang nyí ee/kán. Â a/ninge kányí, esang e-zûu e-róng ǒ ké ocím. 13Basúja eyên mbe wǎ banyinyi, ne onet o*fí mú mu o-bám m oshê eyên ké bushú-banet-bushwôn eyên*. Okwâ o/chi o-shí byichí ḿbyí a/fín afyi eyên. 14Tó omu a-kpá byiko ḿbyí bada ǒ ewâng ba-fé ké kafâ, a-bwât byikit ḿbyí amu a-bwom m a-nwa ng byití a-bi. Cím ecing nyí adabi ekpe, a-tî bamkpukpu ḿbé adabîi ekpí-ecing. 15Nang a-bwa a-chi ebóng, â ba*da ǒ eshí oshǐng* ba-ju ǒ ké byití. Ba/chi ba-bên ǒ kángkáng wǎ byíkwôn ḿbyí agurubí adaryí.
Wo a/fwon wǎ agurubí. 16Bancen kasî eyên ba/mû ba/jê ba-shwôm ékpére nyí nyi kyíbóng. Nké kántîk, baa/rím kpók wǎ agurubí nyí adapaam abyibabang a-byí a-dim. 17Banet-ashí eyên mbe wǎ dyibóng-agurubí ńdyí dyidawaa ké ekpe-kyise ké dyicí-dyibyi. Nké â esû e/byí, dyi-byí dyi-dim, onet oo*nyît kyicê ńkyí dyidajá*.
18Otu mú Asyírya, banet-ashí-oshê eyên baa/kpú. Banet eyên baa/pwôo byiryibyiryi ké eku, ne onet o*fí mú odakpî kámbé ba-bwa dyijê*. 19Bukye bu*fí ḿbú budaju byinêm eyên* ne byibáp eyên bii*kpú to*. Kángkáng banet ḿbé ba/jwo kyi-kim ne eringe nyí baa/bên ǒ mbe ba-shwóm m akwâ ké bunyîn-dyityém. Onet mu kô mú o/fem dyityém ebên eyên ńdyí dii*man*?
Currently Selected:
Náhum 3: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985