Hágya 2
2
Bunong ḿbú Kiǐtí-Kyise-Kyifen-Osówo echi ńkyí Kyifyîfî
1Ké ací bujam ne din, ké etukáku káchâtkányi, ké dyije ándyi dyibónge, Óburúkpâbí o/chîraa ne Hágya mú mkpábé mú odasét byiraa emen. 2O/sét Hágya o/fu, osét Zerubábel ne Jóshwa ne kángkáng banet o/fu, 3onet mu kô ké burwám enen mú o/tôong o-zîim m eringe nyí kiǐtí-kyise-kyifen-Osówo echi kyi/mû kyi-nwa ng? Nkyi běn nǎ ké achi kántîk. Kyi-man kyi-kyú běn ké achi dángé 4Nké asa a*dachi a-jwâa onet nang obónge*. Chi n̂g bǎmkpóngé ba-ca kashú, ké nǎ, me mu ne ben. 5Ké nkéré ben ba/byí ba-mîng Éjip, me n/ryí ocím n/fu, n-kyú u kángkáng nkéré ne ben. Me n/tôong ne ben, ké bubwô ámbu, *da n̂g echi ba-shî*.
6Kii*ba/chi kyi-chîbwon ne n-chînáng bubóng ne esí* ne ecing ne buce*. 7Me n/chi m-kpógê kángkáng eshê, ne ba/chi ba-kúng kángkáng efang ebe ba-bâ ne nyǐ nyín, ne kiǐtí-kyise-kyifen ejí echi kyi/chi kyi-sú ne akpuga. 8Kángkáng akpuga nyí ké ejíí a/já mě. 9Kiǐtí-kyise-kyifen ejí echi ńkyí kántîk kyi/chi kyi-nwa kyi-shwôm ńkyí kyi/mû kpákpá, ne ké nkyí nké n/chi n-kye banet ejí bunyîn-dyityém. Óburúkpâbí mú o/rêe o-shwôm nké n/raa.
Hágya o/pem ne Banchi Kyifen-Osówo
10Ké ací bujam ne anyii nyí etukáku kátángekányi, ké nnyinyěng-dyije mú Otu Daráyas o/ryí butu, Óburúkpâbí mú o/rêe o-shwôm o/chîraa ne Hágya mú mkpábé mú odasét byiraa-Osówo. 11O/sét ǎ o/fu, bí banchi kyifen ejí eringe nyí ḿbím mún o/byí. 12Â onet o/yip kaǎnyín-enyam-kyifen, o-kúng kánké o-fút o-fé ké kyídí emen. Â o/mîng kyídí emen ánkyi kyi-ta berêt nang byiryíng ḿbyí baa/rám nang bato nang bakút-ólif nang byiryíng nang byirá, kaǎnyín-enyam ánke ka-chi i kámbyí to byi-firi chwǒm-ociring?
Ké nkéré mú Hágya o/bí ḿbím ámu, banchi kyifen-Osówo ba/faa ba/fu, aa*wááng*.
13Ne Hágya o-bí kámbé kâng o/fu, â onet o/bên byiko emen, ké nǎ, o/ta okúsí. Â onet ámu o/ta byiryíng ḿbyín nang byibónge, kyi-chi i byiryíng ámbyi byi-bên to?
Banchi kyifen-Osówo ba-faa ǎ ba/fu, byi-bên n.
14Ne Hágya o-raa kâng o/fu, Óburúkpâbí o/fu, nkyi eringe ebónge to ne banet-oshê mún ne kángkáng byěm ḿbyí mbe ba-chi i. Ne ké bubwô ámbu, kángkáng byěm ḿbyí mbe ba-kúng ng ba-chi i kyifen ké kyikit-kyifen echi bii/bên.
Óburúkpâbí o/ryí Ocím mú Ojware Emen
15Óburúkpâbí o/raa o/fu, ben ba*fí ba-man n eri ńkyí nkyi kyi-chi i běn? Ne ba-kpet ebwât kiǐtí-kyise-kyifen-Osówo echi ebi, 16ben ba/mû ba-câ ké dyizu-esang-byichí, ba-tî ng achi ba/fu, ba-já ng esang-byichí chwóó, nké ba/já kyicê nké nke. Ben ba/mû ba-câ ba/fu, ba-da ng ekpong bato chwóó ké byiféng-bato, nké ba*da/ri nang kyicê*. 17Me n/twóm biǐjínjwóm-afú ne abíp byi-bên kángkáng byěm ḿbyí ba/kwón, nké ben ba*da/saa byiko ba-mîng byibî echi*. 18Kurún, ací bujam ne anyii, ké etukáku kátángekányi, dyicí ńdyí ba/man kyikû-ekpe ńkyí kiǐtí-kyise-kyifen ejí echi. Ben ba/chi ba-ri ńkyí kyi/chi kyi-chi, kyi-fím kántîk kyi-ca kashú. 19Nang ké esang-byichí e*fí to* ne nang ké byichí ḿbyí byidazím byirim byi*da/zím ne* kyi-fím kántîk kyi-ca kashú, ne n/chi n-jware běn.
Ocím mú Óburúkpâbí o/ryí Zerubábel
20Ké dyicí ányi dyibónge, ké ací bujam ne anyii, ké otukáku ámu, Óburúkpâbí o/kye Hágya kyitwóm kyikíri 21kyi-kâm Zerubábel o/fu, me n-kú m-bâ enáng bubóng ne esí, 22m-kpógê bukyúng-batu, m-man busa ebe. N/chi n-chi bamútu ḿbé bubyî-orá budatut ba-myii ne banet ḿbé mbe ba-tut ng kámbé. Bubyî-orá bu/chi bu-kpú, ne banet ḿbé ba/yú kámbú ba/chi ba-ju barî. 23Ké dyicí ándyi, me n/chi n-kúng ǒ wo, Zerubábel mú ḿgbán ejí, n-chi ǒ otu mú odatún banet ejí. Wo nké amu onet mú nn/cá ǎ. Óburúkpâbí mú o/rêe o-shwôm nké n/raa.
Currently Selected:
Hágya 2: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985