Hágya 1
1
Óburúkpâbí o/kye Busa o/fu, babwât Kiǐtí-Kyise-Kyifen Emen echi ba-bi
1Ké nnyinyěng-dyije mú Otu Daráyas o/mû otu mú Pésha, ké mbwôp kashú-dyicí, ké etukáku nyâchât, Óburúkpâbí o/pem ne mkpábé mú odasét byiraa emen, mú odabángê Hágya. Kyitwóm ánkyi kyi/mû kyi/já Zerubábel mú wǎn-Shátyel, mú o/mû onet-dyishí mú Júda, ne Jóshwa, mú wǎn-Jehózádak, mú o/mû otu-nchi kyifen-Osówo.
2Óburúkpâbí mú o/rêe o-shwôm o/raa ne Hágya o/fu, banet ḿbén mbe ba-raa ng ba/fu, nyín *chí nkéré mú onong* mú badabwât kiǐtí-kyise-kyifen-Osówo echi ba-bi*. 3Ne Óburúkpâbí kâng o-kye kyitwóm ńkyín ké bubwô ḿbú Hágya mú mkpábé mú odasét byiraa-Osówo kyi-kâm banet ḿbé Júda o/fu, 4banet ejí, ebóng ben bayén bamu ba-kyú u ké byise ḿbyí byinong byinong, ba-mîng kiǐtí-kyise-kyifen ejí echi bûubûu. 5Ben ba*fí ba-ri ng ńkyí nkyi kyi-chi i běn dí*. 6Ben baa/kwón esang-byichí chwóó, nké nyí e/zím e*da/jê*. Ben bamu ne byiryíng ḿbyí badaryí, nké byi*da/jê ḿbyí ben badazût*. Ben bamu ne bato ḿbé badajwáp, nké ba*da/jê ḿbé bada běn echi ba-bwóm*. Ben bamu ne byídí, nké byi*da/kwárê ḿbyí badacít ké dyibyi*. Onet mú mu o-chi i bǎmkpóngé o*fí o-ryí i akpuga-otukáku nyí ada ǎ ekwárê*. 7Ben ba*fí ba-nyît ng ńkyí kyi/chi ne byěm ḿbyín byi-chi*? 8Kántîk, ca n̂g kyíbóng-eku, ba-da-ját byichí ba-bwât kiǐtí-kyise-kyifen ejí echi ba-bi. Â ba/chi éné, kyi/chi kyi-nyîn mě, ne ben ba/chi ba-kye mě ofê wǎ eringe nyí ba/mû ba/chi ba-fé mě.
9Ben ba/tî achi ba/fu, ba-fuu ng byiryíng chwóó, nké ba/bwa ba-fuu boǒnyín. Ne ké nkéré ba/kúng ḿbyí ba/fuu éné ba-fyi ne mbyí, [me n/tugi kámbyí m-pwó kú.] Ebóng kyi/chi ne n-chi éné. Ké nǎ, nang yeě mu o-nwa ng o/fu, nyǐ o-bi ng kyise emen, ba-mîng kiǐtí-kyise-kyifen ejí echi bûubûu. 10Ńkyín nké kyi/chi ne omu o*fí o-na ng* nang chwǒm to kyi*fí kyi-kán n*. 11Me mm/bê ne kyibî-burwom ké esí, ké eku emen ne ké byifát-esang-byichí emen ne ké byichí-byirim emen ne ké kángkáng byíkwôn ḿbyí esí nyi e-kyâ ne ké kángkáng banet ne enyam ne ké chwǒm nang kyirá ńkyí bamu ba-kwón n.
Banet ḿbé Júda ba/chi ńkyí Óburúkpâbí o/sét Kámbé
12Ne Zerubábel ne Jóshwa ne kángkáng banet ḿbé áku, [ḿbé ba/fím Bábyílon ba-fyi,] ba/chi kâng ńkyí Osówo Óburúkpâbí o/sét kámbé o/fu, bachi. Mbé ba/mû ba-shî ng, ne ba/chi ńkyí Hágya mú mkpábé mú Óburúkpâbí o/sét kámbé, ké nǎ, Óburúkpâbí oyén nké o/mû o/twóm ǎ. 13Ne Hágya o-kúng ńkyí Óburúkpâbí o-sét ǎ, o-sét banet ḿbé Júda o/fu, Óburúkpâbí o/fu, me n/ryí ocím n/fu, me n/chi n-kyú ne ben. 14Ne Óburúkpâbí kâng o-fé nang yeě nang yeě busa o-chi bǎmkpóngé ké kiǐtí-kyise-kyifen-Osówo echi. O/fé Zerubábel ne Jóshwa ne kángkáng [banet] busa. Mbé ba-kpet bǎmkpóngé echi ké kiǐtí-kyise-kyifen echi ńkyí Osówo Óburúkpâbí ebe mú o/rêe o-shwôm, 15ké ací bujam ne anyii, ké etukáku nyâchât, ké nnyinyěng-dyije mú Otu Daráyas o/mû otu.
Currently Selected:
Hágya 1: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985