A Zakari 14
14
Yaoolem zabre, Sẽn-Ka-Saab waoongo
1Ade, daar n wat sẽn yaa Sẽn-Ka-Saab daare,
tɩ b na n dɩk yãmb paoongã n pʋɩ yãmb nifẽ.
2Mam na n tigma buudã fãa
Zeruzalɛm pʋgẽ zabr yĩnga.
B na n deega Zeruzalɛm tẽngã,
n sãam a rotã, la b gãand a pagbã ne pãnga.
Tẽngã nebã pʋɩ-sʋk na n kẽe yembdo,
la b ka na n menes neb nins sẽn kell
tẽngã pʋgẽ wã ye.
3Dẽ, Sẽn-Ka-Saab na n yiime n zab ne bu-zẽmsã.
Bãmb na n zaba ne bãmba,
wa b sẽn zabd to-to zabr wakatã.
4Badaare, bãmb na n tabga oliiv tɩɩs
tãngã sẽn be yaang Zeruzalɛmã neng taoorã zugu.
Oliiv tɩɩs tãngã na n pãrga yaang n tãag
nin-taoore, tɩ lebg lon-kãsenga.
Tãngã pʋɩ-sʋk a yembr na n targ n leba
nug-rɩtg sẽnẽ,
tɩ pʋɩ-sʋk a yembrã targ n leb nug-goabg sẽnẽ.
5La yãmb na n zoe n kẽe mam tãmsã longẽ,
bala, mam tãmsã lond na n tɩ tãaga Atsalle.
Yãmb na n zoee wa y yaab-rãmbã
sẽn dag n zoe n na n põs tẽn-digimdgã,
Zʋʋda rĩm a Oozɩyaas wakatã.
Dẽ, Sẽn-Ka-Saab sẽn yaa mam Wẽnnaamã
na n waame,
la pʋ-peelem dãmbã fãa na n tũu bãmb n wa.
6Badaare, vẽenem ka na n zĩndi,
la waood ne galaas na n zĩndame.
7Ra-kãng na n yɩɩ toor zalle,
la yaa Sẽn-Ka-Saab bal n mi daarã,
wĩndg ne yʋng ka na n zĩnd ye,
la zaabr sã n ta, vẽenem na n zĩndame.
8 #
Eze 47.1, Zã 7.38, Vẽn 22.1 Badaare, koom n na n pusg Zeruzalɛm,
koomã pʋɩ-sʋk na n zoee n teesa
ko-kãseng ning sẽn be yaang sẽnẽ wã,
tɩ pʋɩ-sʋk a yembrã zoe n tees ko-kãseng
ning sẽn be nin-taoor sẽnẽ.
A na n yɩɩ woto sẽoog la sɩpaolgo.
9Sẽn-Ka-Saab na n yɩɩ dũniyã fãa rĩma.
Badaare, Sẽn-Ka-Saab na n yɩɩ b yembre,
la yaa bãmb yʋʋrã bal n na n zĩndi.
10Tẽngã fãa na n lebga tẽn-nabd-koɛɛnga, sẽn sɩng ne Geba n tãag Rimon sẽn be Zeruzalɛm goabgã. B na n zẽka Zeruzalɛm yĩngr t'a kell n pa a zĩigẽ wã, sẽn sɩng ne Benzame rig-noorã n tãag no-kʋdgã zĩigẽ, hal n tãag rignoor ning sẽn be lal-gõdrẽ wã, la sẽn sɩng ne Hananeyɛll gãosgã n tɩ tãag rĩmã reezẽ rãam wẽkr kogendã zĩigẽ.
11 #
Vẽn 22.3
Neb na n leb n zĩnda beenẽ,
la sãoong kõn leb n zĩnd ye.
La Zeruzalɛm tẽngã na n gãanda bãane.
12Ad toog ning Sẽn-Ka-Saab sẽn na n tall n sɩbg buud nins sẽn zab ne Zeruzalɛmã: b na n kɩtame tɩ bãmb ned kam fãa põog n ket n vɩ. Bãmb ninã na n põoga b bogdẽ, tɩ b zɛlmã wã põog b noyã pʋse.
13Badaare, Sẽn-Ka-Saab na n kɩtame
tɩ pelen-yɩg-kãseng zĩnd bãmb sʋka.
Bãmb ned kam fãa wẽnemd n gãda a to,
la b na n zaba ne taaba.
14Zʋʋda na n zĩnda Zeruzalɛm pʋgẽ n zabe,
la b na n wʋka bu-zẽms nins fãa sẽn gũbg
bãmbã arzegse,
yaa sãnem, wanzuri ne fut hal wʋsgo.
15To-kãng me na n yõka wed-moosã, bõn-weesã, yʋgma wã, bõensã, ne rũms nins fãa sẽn be bãmb tãb-sigsẽ wã. To-kãng na n yɩɩ wa a to wã bala.
16 #
Mk 23.39-43
Dẽ, buud nins fãa sẽn wa n zab ne Zeruzalɛmã,
neb nins sẽn põsã na n wata
yʋʋmd-yʋʋmd n waoogd rĩmã
sẽn yaa Saasẽ-Pãng-Soabã,
la b maand zãn tigrã.
17La buud nins sẽn be dũniyã zugã sã n ka kẽng Zeruzalɛm n tɩ wõgemd n waoog rĩmã sẽn yaa Saasẽ-Pãng-Soabã, saag ka na n ni bãmb tẽngẽ wã ye. 18Ezɩpt buudã neb sã n ka kẽnge, saag ka na n ni b tẽngẽ wã ye. Yaa to-kãng la Sẽn-Ka-Saab na n tall n sɩbg buud ning sẽn ka na n kẽng-a n tɩ maan zãn tigrã. 19Sɩbg-kãng la b na n sɩbg Ezɩpti, ne buud nins fãa sẽn ka kẽng n tɩ maan zãn tigrã.
20Badaare, b na n gʋlsa wiidã loamba wã zut woto: «Welga toor Sẽn-Ka-Saab yĩnga!» La rʋgdã sẽn be Sẽn-Ka-Saab roogẽ wã na n yɩɩ wa zɩɩm mesb laasã sẽn be tẽn-kugrã taoorã. 21Rʋgd nins fãa sẽn be Zeruzalɛm ne Zʋʋda wã na n welga toor Saasẽ-Pãng-Soabã yĩnga. Neb nins fãa sẽn na n wa maan maoong na n talla rʋg-bãmb n dʋg maoongã nemdo. La toandb kõn leb n zĩnd Saasẽ-Pãng-Soabã roogẽ wakat-kãng ye.
Currently Selected:
A Zakari 14: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.