A Nahum 3
3
Tẽn-kũum paama tẽng ning sẽn daagd-a zɩɩmã
1Ade, tẽng ning sẽn daagd-a zɩɩmã na paam toogo!
Yẽnda pida ne zãmb la fãabo,
la a ka basd a fãabã ye.
2Tẽngã pʋga, b wʋmda kalwaas-rãmb sẽn fɩɩnde,
ne saar-dãmb nao rãamde,
la wiid nao-kida,
la zabr saar-dãmb bʋrgo.
3Zabrã yikame,
Zab-zabdbã sʋʋs pɩndame,
tɩ kãnã pɩʋʋmd wa sa-yãgbo.
Kũumã rʋra zĩigã fãa,
kũumã zama taaba.
B sõorã ka tar tɛk ye.
Naoor sẽn tabgdẽ fãa yaa kũum.
Niniiv na n paama yãnde
4La rẽ fãa yaa pʋg-yoodrã yoobã yĩnga.
Yẽnda maana yoob naoor ka tɛka,
la yẽnda rɩka a neermã n belg buud a taabã.
Yẽnda maana sɩlem n tus buud a taabã,
n kẽes yembd pʋga.
5Rẽ n kɩte, tɩ Saasẽ-Pãng-Soabã yetẽ yaa:
Mam na n zaba ne foom!
Mam na n pilga f fuugã n tãag f nengã,
tɩ buud a taabã yãnd f sẽn yaa zaalã,
tɩ soolem-dãmbã yã f yãndã.
6Mam na n vu-f-la begdẽ,
n ning f yãnd nebã nifẽ.
7Woto, ned ning sẽn yãnd-a foom fãa,
a na n loba a neng kɛɛng n yeele:
«Niniiv tẽnga, fo sãamame.
Ãnda n na n yãb-fo?
M na n yãnda bɛlsd yɛɛnẽ n kõ-fo?»
Niniiv na n paama sɩbgr wa Tɛɛb tẽngã
8Niniiv tẽnga,
fo sãoo No-Amon#3.8 No-Amon: Sɛb kẽer pʋse, b yetame tɩ Tɛɛb tẽnga. tẽngã Nill kʋɩlgã sẽn dag n gũbgã la?
Ko-kãseng n dag n yaa yẽnda lal-gũbri.
9Kuus ne Ezɩpt n dag n kõt yẽnda teegre,
la Put ne Libi n dag n sõngd yẽnda zabr wakate.
10La ne rẽ fãa, b yõga No-Amon tẽng nebã,
n tall-b n tɩ kẽes yembdo.
Bãmb bɛɛbã neema bãmb kom-pogdã so-tiisẽ,
la b yõg a nanambsã n sẽb ne bãense.
Gãndaadã yõga bãmb kãsem-dãmbã,
n pʋɩ taab n maan-b yembse.
11Niniiv tẽnga,
fo me neng na n yilma wa ned sẽn tɩg rãam,
la fo na n baoo zĩig sẽn na soonde,
sẽn na yɩl n paam n põs f bɛɛbã.
Niniiv lʋɩɩse
12Fo lalsã fãa yaa wa kankang bi-rẽems sẽn bɩ,
tɩ b sã n miimd-a bɩ a kankamã lʋɩt
sẽn dat-a n dɩ fãa noorẽ.
13Ade, fo tãb-biisã yaa nin-saan-pagb gilli.
Fo rignoyã pagsa b toore,
tɩ f bɛɛbã tũud be n kẽedẽ.
Bugum dɩta fo rignoyã kʋɩlen-kũyã.
14Niniiv tẽnga,
Wi koom n bĩng zabrã yĩnga!
Maneg f lalsã n me!
Kẽ begdẽ n tab tãndo,
La f rɩk f tãn-koeem-wamã!
15La baa ne rẽ fãa,
bãng tɩ bugum n na n dɩ-fo.
Fo na n paa tãpẽ!
Bugmã na n dɩ-f-la
wa kalwaar sẽn dɩt koodo.
Bɩ fo nebã zama taab wa kalwaare!
Bɩ b zam taab wa sʋyã!
16Niniiv tẽnga,
fo lɛɛbdbã sõor dag n lebga wʋsgo,
tɩ b sõorã yɩɩd yĩngr ãdse,
n yẽnegd wa kalwaar sẽn dɩ bɩle n sɛ n bas n yɩke.
17Fo rigno-gũudbã rag n yaa wʋsg wa sʋyã,
tɩ fo tʋmtʋmdbã rag n yaa wʋsg wa kalwaare,
tɩ zĩig sã n maage,
bɩ b rʋʋgd tuud zutu.
La sõorã sã n puki,
b yɩkdame tɩ ned ka mi b sẽn teesẽ ye.
18Asiiri rĩma,
fo kombɛɛmbã gõeeme.
Fo gãndaadã ka leb n maand rãamd ye!
Fo nebã sãeegame n be tãmsã zutu,
tɩ ned ka be n na n tigim-b ye.
19Fo poglgã ka tar tɩɩm ye,
Fo nodrã na n tũu ne f yõore.
Neb nins fãa sẽn na n wʋm tɩ b gomd
fo yellã na n maana sũ-noogo,
bala, ãnda n be tɩ fo ka maan-a wẽnga?
Currently Selected:
A Nahum 3: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.