A Zonaase 4
4
A Zonaas zabda ne Wẽnnaam
1Sẽn-Ka-Saab sẽn maan bũmb ningã ka tol n yɩ a Zonaas noog ye. Dẽ kɩtame t'a Zonaas sũurã yiki. 2#Yik 34.6La a Zonaas pʋʋsa Sẽn-Ka-Saab n yeel yaa: «Sẽn-Ka-Saabo, ka woto la m sẽn da pĩnd n yeel mam sẽn wa n ket n be m tẽngẽ wã sɩda? Yaa rẽ yĩng la m sẽn da zoet n na n kẽng Tarsɩɩsã. Bala, mam miime tɩ yãmb yaa Wẽnnaam, y yaa sugr kõata, la nimbãan-zoɛta, la yãmb sũurã ka yikd tao-tao ye. Y tara nonglem wʋsgo, la yãmb basda sɩbgr ning y sẽn dag n tog n sɩbgã tɩ vaale. 3#1Rĩm 19.4La sẽn lebg woto wã, Sẽn-Ka-Saabo, bɩ y reeg m vɩɩmã. Bala mam sẽn kiid n são m sẽn vɩ.» 4La Sẽn-Ka-Saab leoka a Zonaas yaa: «Fo tagsdame tɩ fo tara bʋʋm la f sẽn yikd f sũurã woto wã bɩ?»
5Dẽ, a Zonaas yii Niniiv tẽngã pʋga, n kẽng tẽngã yaang n tɩ zĩndi. La a tii sẽok beenẽ n kẽ a maasmẽ n zĩ n gũud bũmb ning sẽn na n paam Niniiv tẽngã. 6La Wẽnnaam Sẽn-Ka-Saab kɩtame tɩ tɩɩg yi tẽn-gãongã zug t'a maasmã bui a Zonaase, t'a sũ-pa-noaangã tõe n sɛ. La a Zonaas sũurã yɩɩ noog wʋsg tɩɩgã yĩnga. 7La a vẽkembeoog yi-beoog pĩnda, Wẽnnaam kɩtame tɩ zũnzũur wa kẽ tɩɩgã n dɩ-a t'a zelge. 8La sõ-bɩɩmd wakate, Wẽnnaam kɩtame tɩ sob-tʋʋlg yi yaang sẽnẽ n wa, la wĩntoogã pãba a Zonaas zugã t'a pãngã sɛ t'a lʋɩ. Dẽ, yẽnda yeelame yaa: «Mam sẽn kiid n são m sẽn vɩ.» 9La Wẽnnaam soka a Zonaas yaa: «Dẽ yĩnga, fo sẽn puug f sũur tɩɩgã kũum yĩngã, fo tara bʋʋm sɩda?» La a Zonaas leoka Wẽnnaam n yeel yaa: «M sũurã sẽn puug tɩ m dat n ki wã, m tara bʋʋm.» 10La Sẽn-Ka-Saab yeela a Zonaas yaa: «Fo yãbda tɩɩgã nimbãanega, la yaool n ka foom n kɩt t'a yi, la ka foom n kɩt t'a bɩ me ye. Tɩɩgã yii yʋn-yɛnga, n lebg n ki yʋn-yɛnga. 11Niniiv yaa tẽn-kãsenga. Neb sẽn vɩ-a pʋgẽ sõor yɩɩda neb tus koabg la pisi, tɩ rũms wʋsg-wʋsg me be beenẽ. La tẽngã nebã ka tol n mi sẽn yaa sõamã ne wẽng n bak ye. Rẽ wã, mam na n yɩ a wãn n ka zoe tẽn-kãngã nimbãanega.»
Currently Selected:
A Zonaase 4: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.