MI CILIMA 34
34
1Lea n den mali yaa bonpuoga Jakobo po den ñani ki baa le u dogu nni bonpola. 2U dogu nni bado Hamola yaa bijua Sikema den laa o. O den cuo o, ki duani leni o ki biidi o. 3O yama den kua Jakobo bisalo Dina niinni. O den bua o jafaano yeni ki maadi leni o leni mi buama. 4Sikema den yedi o baa Hamola, pa nni o jafaano na wan tua n pua.
5Jakobo den gbadi ke o den biidi o bisalo Dina. O bijaba den ye ku muagu nni ki kubi li yangoli, lani yaa po Jakobo den ŋmini hali ban kpeni.
6Sikema baa Hamola den gedi Jakobo kani ki maadi leni o. 7Jakobo bijaba n den kpeni ku muagu po ki bandi yaala n tieni, laa jaba pala den beni ke li pabiencianli den cuo ba kelima Sikema den tieni ti cagindi Isalele yaaba siiga, ki duani leni Jakobo bisalo. Laa den pundi wan tieni yeni. 8Hamola den maadi yaa maama n tie na: «N bijua Sikema yama kua a bisalo niinni, lanwani n mia ŋa, pa nni wani wan tua o pua. 9Tin kuani o *ŋantaado leni tiyaba. Ti baa pa yi ti bisiaba yi mo baa taa ti yaa yaaba. 10Yi baa yaa ye leni ti, yin tieni yin bua yaala. Yin yaa kaa mani ki yaa tiendi u kpendu ki pugini yi piama.» 11Sikema den yedi Dina baa leni o kpeliba: «Yi pala n mangi leni nni, n baa pa yi yin yedi yaala kuli. 12Yin ŋa nni yaa panpaani n yaba ki go mia nni yin bua yaa paabu boncianla, n baa pa yin yedi nni yaala, die yin pa nni o jafaano wan tua n pua.»
13Jakobo bijaba den guani ki maadi leni i janbi Sikema leni o baa Hamola po, kelima o den biidi bi waalo Dina. 14Bi den yedi ba: «Li tie yaa bonla ke ti kan fidi ki tieni, lan tie ki pa ti waalo yaa ja n tie jifolo. Li baa tie tipo yaala n gundi. 15Ti kan tuo a yanbuama se ŋan tua nani tinba, ke bonjaga kuli yi siiga n kua ku koanciagu. 16Lanwani ti baa pa yi ti bisiaba, timo baa taa yi yaa yaaba. Ti baa yaa ye leni yi ke tikuli n tua nibuoyendu. 17Ama yi yaa bua ki cengi ti maama ki kua ku koanciagu, ti baa taa ti bisalo ki fii ki gedi.»
18Bi maama den mangi Hamola leni o bijua Sikema yaa pala. 19O jawaalo den tieni laa bonla ki naa waagi baa waamu, kelima o den bua Jakobo bisalo. Bi den jigini wani ki cie o baadiegu nni yaaba n sieni kuli. 20Hamola leni o bijua Sikema den gedi bi dogu buliñoabu kani ki maadi leni bi dogu yaa niba yaa maama n tie na: 21«Bi naa niba bi nua ti leni mi yanduanma, ban yaa ye mi diema nni ki tiendi u kpendu mi diema yaba ki dagidi bipo. Ti baa taa bi bisiaba ban tua ti puoba, moko bi baa taa ti bisiaba ban tua bi puoba. 22Ama laa jaba kan tuo ki yaa ye leni ti tin tua nibuoyendu se ti bonjala kuli n kua ku koanciagu nani bani biba n kua ku koanciagu maama. 23Bi yangola leni bi piama leni bi yandi kuli kan tua ti yaala kaa te? Lanwani tin tuo ban yedi yaala ke ban yaa ye leni ti.»
24Yaaba n den cua ki ye u dogu buliñoabu kani kuli den cengi Hamola leni o bijua Sikema yaa maama. A bonjala, yaaba n den cua ki ye u dogu buliñoabu kani kuli den kua ku koanciagu. 25Li dataali, lan den koani bipo yaa yogunu, Jakobo bijaliediba Simeyono leni Lefi, Dina yaa kpeliba yeni, yua kuli den taa o jugisiega ki gedi ki pua u dogu yu n den tama ke bi ye leni mi yanduanma, ki ku a bonjala kuli. 26Bi go den ku Hamola leni o bijua Sikema leni ki jugisiega, ki ñani Dina Sikema yaa diegu nni ki kuni.
27Jakobo bijaba den gedi ki landi bi tinkpiba, ki fagi u dogu kuli kelima bi den biidi bi waalo. 28Bi den taa bi yangola leni bi ne leni bi ŋunbi leni yaala n den ye u dogu nni leni ku muagu nni kuli. 29Bi den taa bi piama kuli leni bi bila leni bi puoba leni yaala n ye bi diena nni kuli ki gedini ke li tua bipo ti fagidi.
30Lan den pendi Jakobo den yedi Simeyono leni Lefi: «Yi faligi nni ki teni ke mi diema yaaba kuli nani nni ke n baa nu mi diema yaaba kuli po, baa Kanana yaaba leni Felesa yaaba kuli po. Mii pia bi niba boncianla, se waamu bebe. Bi baa taani taani ki fii npo ki pua nni. Bi baa bolini mini leni n diegu kuli.» 31Bi den goa ki yedi o: «Naani ti baa tuo ban tieni ti waalo nani o tie li poconconli yeni bi?»
Jakobo ñani Sikema ki gedi Betela
Currently Selected:
MI CILIMA 34: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.