MI CILIMA 19
19
1Bi malekiliediba den pundi Sodoma ku yenjuogu. *Loto den kaa Sodoma yaa buliñoabu kani. Loto n den laa ba yaa yogunu o den fii ki tuogi ba ki gbaani ki pugi ba.
2Lanwani o den yedi: «N canbaanba diidi n mia yi yin kua mani yi naacemo dieli nni ki nigidi yi taana ki duani lankani ku ñiagu, li yaa fii ki faa ku tiŋaapanpangu yin suagi yin caa naani.» Bi den goa ki yedi: «Yen kaa, ku ñiagu ti baa duani ki daaga nne.»
3Loto den tigini tigini ba hali ke bi gedi o deni ki kua o dieli nni. O den ŋanbi bipo mi jeŋanma ki teni ke bi tieni bipo yaa dupen n kaa pia *dabinli. Bi den dini.
4Ban daa den duani yaa yogunu u dogu nni yaaba, li bila leni li nikpela kuli den ñani i kaani kuli ki gaani ki cebini Loto diegu. 5Bi den yini Loto ki yedi o: «Yaa niba n kua a diegu nni dinla ñiagu yeni bi ye le? Teni ban ña ti kani tin taani leni ba.»
6Loto den ñani ki gbagi ki luoni bu buliñoabu o puoli po ki sedi bikani. 7O den yedi: «N mia yi n kpiiba, yin da tieni mi biadima. 8Diidi n pia bisiaba lie yaaba n daa bani jaba, n baa ñani ba niinpo yin tieni ba yin bua yaala. Ama bonyenla bebe n ye yin da tieni laa niba pu kuli kelima bi cani nni ki ye n diegu nni.»#Buj 19.22-24 9Bi den yedi: «Fuadi!» Bi go den yedi: «O ne n cua o cangu ki bua ki jia ti buudi! Ti baa tieni a yaala n bia ki cie tin baa tieni ba yaala.» 10Bi jaba den tandi bi nii ki kuani Loto bikani o diegu nni ki luoni bu buliñoabu. 11Bi den ŋa yaaba n den se bu buliñoabu kani ti juandi, ki cili li bila ki yaa caa hali li nikpela, ki teni ke bi duoliti bi yula fanma fanma ki lingi bu buliñoabu.#2Bad 6.18
12Laa jaba den yedi Loto: «A go pia ŋme yo nekanba? Bi cuadiba, a bijaba leni a bisiaba leni yaaba n tie a yaa yaaba kuli u dogu nni, teni ban ña u naa kaanu. 13Ti baa bolini u naa kaanu kelima ban mua u naa dogu biadima maama pundi Li Miali Diedo nintuali. Li Miali Diedo soani ti ke tin bolini u.»
14Loto den ñani ki maadi leni o cuadiba yaaba n den kubi o bisiaba: «Moandi mani ki ña u naa kaanu kelima Li Miali Diedo baa bolini u dogu kuli.» Ama o cuadiba yaa po li den tie nani ke o jeli leni ba.
15Landaali lan yendi yaa yogunu malekinba den tigini Loto ki yedi o: «Fii ki taa a pua leni a bisaliediba yaaba n ye ne ke ŋan da ti taani leni u dogu ki bodi.»
16Ama kelima wan den waagidi maama, laa jaba den cuo o nuu wani leni o pua leni o bisaliediba kelima Li Miali Diedo den bua ki ciadi o. Bi den dadi ki ñani ba u dogu nni.#2Pie 2.7
17Ban den ñani ba yaa yogunu, bi siiga nni yendo den yedi: «Sani ki cia ki ga a miali. Ŋan da diidi a puoli po ki da sedi mi fanma nni. Sani ki gedi li juali po ke ŋan da bodi.»
18Loto den yedi ba: «O n Diedo, 19a pali mani leni nni ke a waani a niñima n yaba npo maama ke a ciadi n miali. Ama n kan fidi ki sani ki gedi hali li juali kani ki cia ke mi bolinma daa nandi nni, n baa bodi. 20Min baa mia ŋa yaala n tie na, u naa dogu wa, n bua ki mia ŋa ŋan pa nni min wuoni lankani lan tie min da kpe.» 21O den yedi o: «Diidi n puni a laa sanu, n kan bolini ŋan maadi yaa dogu yaa maama yeni. 22Jaligi ki sani tontoni ki kua ki wuoni u niinni kelima n kan fidi ki tieni pu se a pundi likani.» Li tie lani yaa po ke bi den yini laa dogu Tisoala.#19.22 Tisoala: Bua ki yedi yaa dogu n wa.
23U yienu den pudi Loto n den kua Tisoala dogu nni yaa yogunu. 24Lanyogunu Li Miali Diedo den teni ke li cidibili leni mi fantama ñani Li Miali Diedo kani ki mini nani ki taaga yeni ki baa Sodoma leni *Gomola po.#Mat 10.15; 11.23-24; Luk 10.12; 17.29; 2Pie 2.6; Jud 7
25O den bolini laa dogi kuli leni mi fanma leni yaa niba n den ye i dogi nni kuli ki go bolini ki tinga tiidi leni ti muadi kuli. 26Loto pua den gbegi ki diidi puoli po ki kpandi ki tua yaabunbunli.#Luk 17.32
27Abalahama den yagidi ki fii ki baa gedi yaa kaanu ke o den se Li Miali Diedo nintuali. 28O den nua Sodoma leni Gomola yaa kaanu leni mi fanma bianu kuli ki laa ke i muñii fii ki ña ki tinga nni nani ki buaga yaa muñii yeni.
29U Tienu n den bolini laa diema yaa dogi yaa yogunu, o den tiadi Abalahama po ki teni ke Loto sani ki ciadi mi bolinma niinni.
Loto leni o bisiaba
30Loto den fii Tisoala ki doni ki ban ye li juali yuli po wani leni o bisaliediba kelima o den jie ki naa bua ki kali Tisoala po. O den kua ki baa ye ku tanlongu nni wani leni o bisaliediba. 31O bisakpelo den yedi o waalo: «Ti baa kpeligi, ja mo kuli naa go ye ti diema nni yua n baa cua tikani nani mi diema kuli nibuoli n tiendi maama. 32Ŋan cua tin ñuni o mi daama ke tin duani leni o lan tie ti baa buolu n da bodi.»
33Lanwani bi den teni ke bi baa ñuni mi daama laa ñiagu o bisakpelo den kua ki duani leni o baa. Waa den bandi wan den duani yaa yogunu bi wan den fii yaa yogunu. 34Yaa daali n ŋua o bisakpelo den yedi o waalo: «Diidi wonli nni yaa ñiagu n den duani leni n baa. Tin go teni wan ño mi daama dinla yaa ñiagu ke a mo n gedi ki duani leni o lan tie ti baa buolu n da bodi.»
35Bi go den teni ke bi baa ñuni mi daama laa ñiagu goga ke o waalo den kua ki duani leni o. Waa den bandi wan den duani yaa yogunu bi wan den fii yaa yogunu.
36Loto bisaliediba kuli den punbi bi baa po. 37O bisakpelo den mali bonjaga ki cili o yeli Moabi. Wani n tie Moabi yaaba yaa baa hali dinla. 38O waalo moko den mali bonjaga ki cili o yeli Beni-Ami. Wani n tie Amoni yaaba yaa baa hali dinla.
Abalahama leni Abimeleka
Currently Selected:
MI CILIMA 19: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.