MI CILIMA 18
18
1Li Miali Diedo den doagidi Abalahama kani ke o ye Mamile yaa sena tiidi kani wan den kaa o gbandieli buliñoabu nni u yensicocolu. 2Abalahama den yaadi ki diidi, ki laa niba taa ke bi se o nintuali. Wan den laa ba yaa yogunu o den fii ki sani ki tuogi ba ki gbaani ki pugi ba.#Ebl 13.2 3O den yedi bi siiga nni yendo: «N Diedo, li yaa tie ke a pali mani npo, n mia ŋa ŋan da pendi ki foagidi leni a naacemo. 4Cedi min yini ban cuani yipo mi ñima waamu yin nigidi yi taana ki fuodi bu naa tibu tinga. 5N baa gedi ki baa mi jiema waamu ki pugini yi fidu. Li yaa pendi yi baa fidi ki suagi liiga, lan tie yin da ña yi naacemo kani fanma.» Bi den goa ki yedi o: «Tieni nani ŋan yedi maama.»
6Abalahama den gedi tontoni ki kua o gbandieli nni Sala kani ki yedi o: «Tontoni ŋan taa mi yonŋanma yiemu taa ki buuni ki ŋanbi mi jiema.» 7Abalahama go den sani ki gedi o yankulu po ki taa ki naabiga yua n ŋaani ki pia mi kpama ki teni o naacemo ke o ŋanbi o tontoni. 8O go den taa mi naaŋankpama leni mi naaŋanma ki taa ban den ŋanbi yaa naabiga yaa nandi ki sieni likuli bi nintuali. O den ye leni ba bu tibu tinga ban den di yaa yogunu. 9Lanwani bi den yedi o: «A pua Sala ye le?» O den goa ki yedi ba: «O ye li gbandieli nni.» 10Yendo bi siiga den yedi, n go baa cua a kani binli po u naa yogunu. Diidi a pua Sala baa maa bonjaga. Sala den ye o puoli po li gbandieli buliñoabu kani ki cengi.#Lom 9.9 11Abalahama leni Sala den kpeligi ki podi. Sala naa go den daani ke o baa baa biga. O den laa ti laadi o pali nni ki yedi: 12«Moala ke n podi boncianla naani n go baa pia laa bonbuakaala buolu bi? N diedo moko kpeligi.»#1Pie 3.6 13Li Miali Diedo den yedi Abalahama: «Be yaa po ke Sala laa ti laadi ki yedi: ‹Naani li tie i moamoane ke min podi boncianla maama ne n go baa baa ki biga bi?› » 14Naani li pia Li Miali Diedo n kan fidi ki tieni yaala? Binli po lan bili yaa yogunu yaa cua, n baa cua a kani Sala baa maa bonjaga.#Luk 1.37
15Sala den pua mi faama ki yedi: «Mii laa ba.» Kelima o den jie. Li Miali Diedo den goa ki yedi o: «Moamoani a laa.»
16Laa niba den fii ki baa suagi liiga, bi den pegidi ki noanli Sodoma po. Abalahama den yegi leni baa ki piadi ba. 17Lanwani Li Miali Diedo den yedi: «Naani n baa wuoni Abalahama min baa tieni yaala? 18Li tie i moamoani cain ke Abalahama baa tua yaa nibuolu n yaba ki pia u paalu. Ki tinga nibuoli kuli baa baa li seli kelima o yaa po. 19N den gandi wani ke wan bili li ñoabonli o bijaba po leni o diegu yaaba po, yaaba n baa ŋua o puoli ke baa kubi Li Miali Diedo yaa sanu ki go tieni yaala n tiegi ki yaa kubi mi *teginma. Li tie lani yaa po ke Li Miali Diedo baa tieni Abalahama po wan den niani o yaala kuli.» 20Lanwani Li Miali Diedo den yedi: «Bi niba mua Sodoma leni *Gomola yaaba biadima, bi *tuonbiadi yaba hali ke li pendi. 21Lani n teni ke n baa jiidi ki le ban tieni yaala yaa naani nani min gba maama. Li yaa tie yeni mo n baa bandi.»
22Bi jaliediba den fii ki suagi Sodoma po. Ama Li Miali Diedo wani den sedi leni Abalahama. 23Abalahama den nagini ki yedi: «Naani a baa teni bi niteginkaaba n taani ki bodi leni bi nibiadiba? 24Daalinba niteginkaaba piimuu n ye u dogu nni, naani a baa bolini ba ki kan tieni sugili laa dogu po kelima niteginkaaba piimuu yeni po? 25Ki teni o niteginka n kpe leni o nibiado ke o niteginka n tua yenma leni o nibiado, laa tuonli buolu foagi leni a. Li foagi leni a cain. Naani yua n ja ti buudi leni ki tinga yaaba kuli, o kan tieni mi teginma?»
26Li Miali Diedo den yedi: «N yaa laa niteginkaaba piimuu Sodoma dogu nni n baa tieni u dogu kuli po sugili kelima bani yaa po.»
27Abalahama go den goa maadi ki yedi: «Diidi, n ñigini ki maadi leni n Diedo mini yua n tie mi wagima leni mi fantanpienma bebe. 28Daalinba niteginkaaba piimuu yeni siiga niba muu bebe n baa poadi. Naani a baa bolini u dogu kuli kelima bi nimuudiba yaaba n poadi yeni po?» Li Miali Diedo den goa ki yedi o: «N yaa laa niteginkaaba piinaa n niba muu u niinni n kan bolini laa dogu.»
29Abalahama go den maadi leni o ki yedi: «Daalinba bi yaa ye niteginkaaba piinaa bebe te?» Li Miali Diedo den yedi: «N kan tieni pu kelima laa nipiinaadiba yaa po.»
30Abalahama den yedi: «N Diedo n da bieni o pali ke n go baa maadi. Daalinba bi yaa ye niteginkaaba piitaa bebe mo te?» Li Miali Diedo den yedi: «N kan tieni pu n yaa laa niteginkaaba piitaa.»
31Abalahama go den yedi: «Diidi n paagi n pali ki maadi leni n Diedo. Daalinba bi yaa ye niteginkaaba piilie bebe te?» Li Miali Diedo den yedi: «N kan bolini u kelima laa nipiiliediba yaa po.»
32Abalahama go den yedi: «N Diedo n da bieni o pali n go baa maadi yenma bebe. Daalinba bi yaa ye niteginkaaba piiga bebe mo te?» Li Miali Diedo den yedi: «N kan bolini gu kelima laa nipiiga yaa po.»
33Li Miali Diedo den gedi wan den maadi ki gbeni leni Abalahama yaa yogunu. Abalahama den guani o denpo.
Loto sani ki cia Sodoma bolinma yogunu
Currently Selected:
MI CILIMA 18: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.