Marko 15
15
Yesu arwa kwa Pilato
(Mat 27:1-2, 11-14; Luk 23:1-5; Yoh 18:28-38)
1Na kyeeri kulekya vakohani vaniini vakasanga na vamiku va vandu na veelosha mavavaso, na ngyama toose vakafisha shila, vakafinga Yesu, vakankamara, vakandenrambikya kulya kwa Pontio Pilato. 2Nalyo Pilato kammbesa, “Yewe mmbo kukee mangyi ya Vayuda-ro? Nawe kaallwa kammbia, ‘Ni yewe kwakyaamba.’ ” 3Nalyo vakohani valya vaniini vakankumba kyuumu. 4Nalyo Pilato kammbesa lya kavii, “A mmbo kulashirouwa kindo? Lla-te findo efyo fiingyi vakukumba nafyo. 5Na Yesu nta nalarouwe kindo, Pilato katana afulukywa deny.”
Varummbwa Yesu nawaawa
(Mat 27:15-26; Luk 23:13-25; Yoh 18:39–19:16)
6Naasa elyi lya nkonu ulya nniini evaporomuyaa nndu mfinge umwi, ulya vankukunndya. 7Naasa kweefo nndu evaangwaa Baraba emfingwa ando amwi na vandu variingyi va uruka. Nawe Baraba efo kituuruny kilya vaanta vawaiye-fo vandu. 8Naasa mamwiingyi ulya wa vandu ukanderwa nafo. Vakapooka intereva natani shaasa eevatannyaa. 9Naasa Pilato kavavesa, “Mukunndye shimuporomuye mangyi yeyo ya Vayuda-sho?” 10Mashika elyi eishi kimaruma vakohani vakaaya vandu valya vakuumbye-fo vakunde navaporomuye Baraba. 11Naasa vakohani valya vaniini vakaaya vandu valya vakuumbye-fo vakunde navaporomuye Baraba. 12Nalyo Pilato karouwa lyingyi kavavia, “A nkyokyi ntanyaa yeu mwaamba mmangyi ya Vayuda?” 13Nalyo vakawuya ikooma, “Endenkapye nsalabeny!” 14Naasa Pilato Kavavia, “A ukasha aletana llo-kyi?” Nawo vakeengera ikooma, “Endenkapye nsalabeeny!” 15Naasa Pilato ekunndye itana kindo kyeekushiisa na vandu valya vakuumbye-fo, kavaporomuya Baraba. Na Yesu kanrambikya-fo nandekapyo nsalabeu.
Vasikari vateenda Yesu
(Mat 27:27-31; Yoh 19:2-3)
16Naasa vasikari valya vakankamara, vakanrwaa efo poo vakamfita kari. Nng'u mmba ya ushilyi ikai. Vakavaanga siri ya vasikari shoose, vakashekuummbya-u. 17Vakammbika soori ya yeerya ifwani nsoru. Vakaoka ureto lwa miinga vakammbikya nrony. 18Vakapooka imwiidikira kyeemwiinyala, “Lwakwiidikira yewe mangyi ya Vayuda!” 19Vakankapa nrwe na irere na immishia minyiiri. Vakamfiirya-ndi, vakapaana si na kisangu. 20Na elyi vammeentatala indo, vakawuya immbuta soori ilya ya king'ang'ari, vakammbika soori tilya takwe muni.
Yesu akapywa nsalabeu
(Mat 27:32-44; Luk 23:26-43; Yoh 19:17-27)
21Nalyo vakamwiipoo vandenkapya nsalabeu. Vakakooya nndu shia auka ireminy, we Simon wa kulya Krene, nawe ni ndeye wa Iskanda na Rufo. Vakamwiitikya nantare nsalaba ulya wakwe. 22Vakanrwaa Golgota, kwaallwa, ni “Kisharongony.” 23Vakeesa iniinga mfinyo ukee nsasande na nri weenanga, lyo nalakunde iwarya. 24Nalyo vakankapya nsalabeny. Vakaavana soori tilya takwe veetikapyaa kura, kimanyike wo nndu kindo ashiipoo. 25Naasa kwemfika saa isaru nalyo vakankapya nsalabeny. 26Na mwaandu wakwe ukee nreiye yoo uuwe indi, “YEU MMBWE MANGYI YA VAYUDA.” 27Na veala shia vavii vakakapyo nsalabeny ando amwi nawe, umwi taari yei na ungyi taari yeyo. [ 28Vakatana indo naambo kilya kyikee kyireiye kyiinukye kyeyaamba, “Mmbo alesandwa na varavi.”] 29Na vandu vekee iira-u vakarinyisa-rinyisa mirwe, vakamwaara vakaamba, “Akwa, yewe mwiiwundwa mmba ya Iruva na iitana lyingyi ando a mikonu iraru! 30Oloka nsalabeny-te kukukyire kumuni.” 31Na vakohani vaniini na veelosha mavavaso vakavemwiinyala indo-da; veshaambaa, “A mmbo alekira vengyi kalemwa ikukyira we muni. 32Kwakooya kukee Kristo mangyi ya Israeli, oloka nsalabeny ulaalu neese lukwiirikye.” Na valya vekapyo nsalabeny ando amwi nawe vakavemwiinyala indo.
Yesu afiiya nsalabeny
(Mat 27:45-56; Luk 23:44-49; Yoh 19:28-30)
33Na elyi kwamfika saa irindaru uruka loose lukawoywa ni ireema lukafika saa kyeenda. 34Na saa kyeenda Yesu kafua na unyanga waasha kaamba, “Eloi, Eloi, lama sabaktani!” Nakyo kwakyaallwa mmbo kyaamba, “Woi Iruva wakwa, woi Iruva wakwa nkyikyi elyi kwashira?” 35Nalyo vandu valya vasalalyi-u maata vaita indo, vakaamba, “Akakau avaanga Elia!” 36Naasa nndu umwi keenda erishaa kandeende kyoonga mura kakyiishura mfinyo utarang'aa. Kavika irereny kakunda inrita ashaambaa, “Reny, lulole kwakooya Elia asheshaa nashemoolota-u.” 37Naasa Yesu kafua lyimwi tupu na unyanga uniini, kakumba muu.
38Nalyo isullya lilya lyaavanisye efo mmba ya Iruva lyikavambuka nnang'ani kavii lyipookya yoo uwe lyikafika si. 39Naasa nshilyi ulya esalalyi yoo usumanu nawe alollya ni indo akumba muu, kaamba, “Nndu yeu mmbo ekee Mwana wa Iruva dede.” 40Naasa kweefo na vaka velolaa vakee kyikwaasha. Na efo nnang'ani ya vaka valya kwiifo Maria wa kulya Magdala na Maria we maye wa Yakobo ulya n-du, na Yose, na Salome. 41Nawo mmbo vellatyaa na imfurukannya meendi ekee kulya Galilaya. Nawo veryani na vaka vengyi-se veengyi valerwa nawe, vakafika Yerusalemu.
Yesu arikwa
(Mat 27:57-61; Luk 23:50-56; Yoh 19:38-42)
42Nalyo elyi kwamfika kyeeri kya nkwaany, na nkonu wiifo ni nkonu weekudeesya, nto usongoye sabato. 43Kukasha nau Yosefu wa kulya Arimataya akee nndu ngyama aishiwa, nawe ni nndu eevereyaa umangyi lwa Iruva. Naasa kakara yaanga na kulya kwa Pilato, kantereva nnying'a ulya wa Yesu. 44Nalyo elyi Pilato aita Yesu amfwa, kasongololo, kanderummya nshilyi ulya wa vasikari nrumi kammbesa kwakooya mmbo afwa kirambo kyaasha. 45Kasunundywa ni nshilyi ulya wa vasikari. Kaniingya Yosefu nnying'a ulya. 46Nawe kandeura soori ya lasi, kandemoolota-fo kamoososya soori tilya ta lasi. Kandemwaara mbangeny ikee shidoshe iweny. Kakunnya-u iwe lyeeraya mwaango wa mbanga ilya. 47Naasa Maria ulya wa Magdala aryani na Maria ulya maye wa Yose, wo veefo velolaa ando aarwa.
Currently Selected:
Marko 15: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.