Marko 14
14
Kyama kyewaa Yesu
(Mat 26:1-5; Luk 22:1-2; Yoh 11:45-53)
1Naasa mikonu yeiyo ivii kufike Pasaka na kyeeri kya mikate ilatiri ntarang'u. Nalyo Vakohani valya vaniini vakasanga na veelosha mavavaso vakasia mwaanya wa itira Yesu na ntambo vambwae. 2Mashika nyelyi vaamba, “Nta lulakitani kwiikee nkonu nniini-fo vandu valakooye yaanta kituuru.”
Yesu aambwa mafura Betania
(Mat 26:6-13; Yoh 12:1-8)
3Naasa, Yesu akee kulya Betania, efo mmba kwa Simion ulya eelwee ivave elyaa-fo shoonga. Kukasha nau nndu nka arie kishupa kya iwe yaa kitiri mafura eekwaamba afwaamaa nisha nnu, akee maa akava a uuru uniini. Kafisha kishupa kilya kaletya Yesu nrweny. 4Naasa kukakaa-fo vandu vasua vakarera wo veni na veni, “A kimaruma mafura yaa akatavanywa indo nkikyi? 5Mafura yaa mmbo eevaa ikumba dinari mayana araru na mmwasi na indeavya vakiva.” Vakasakira nka ulya. 6Naasa Yesu kaamba, “Kunreeyeny-te! A ekyo mwamwaatarya mmbo ashitannya ishora isha! 7Kya vandu vakiva mmbo mukee nawo nkonu simu, na wo kyeeri mwankunda mushiidimaa ivatannya mesha. Indi yeny mmukee neeny kyeeri kyoose-fo. 8Ekyo aidima nkyo atana. Mmbo alava yaamba mwiili wakwa mafura elyi wiifo urikwaa. 9Nkya dede shamuvia, wo kundo kushoongoywaa Nrumi ya Nsia kunu ulaniny, na ekyo kyakwe atana kiveva nng'u kyaambaywa kya inkummbwa.”
Yuda airikya iriingya Yesu
(Mat 26:14-16; Luk 22:3-6)
10Nalyo Yuda Iskariote umwi wa valya ikumi na vavii kakwiipoo, keenda kwa vakohani valya vaniini akundye irambikya Yesu efo maakony awo. 11Nawo elyi vaita indo vakafura. Vakandeerya kyaasa vanniinge fesa. Nalyo kava mwikusara shaasa asheonisaa mwaanya weendenrambikya-fo.
Yesu alya Pasaka na Vakiloshyony vakwe
(Mat 26:17-25; Luk 22:7-14; Yoh 13:21-30)
12Naasa kwiikee nkonu wa mbee weelyiwa mikate ilatiri ntarang'o, kyeeri vashishaa ngurana ya Pasaka nalyo vakiloshyon vakwe vakashemmbia, A kundo kukundye lweende indedeesya-fo Pasaka nkwi? 13Nalyo karuma vakiloshyony vakwe vavii kavavia, “Endeny kulya muriny nafo mushekwaanannyaa na nndu arie mura na nungu. Mmbwe mushellatyaa numa. 14Na efo kundo ashangaa nafo, vyieny yeto muni kyeny, ‘Llosha akuvia-le vai, ando a imuuya nkwi, kundo alyiiyaa Pasaka na vakiloshyony vakwe?’ 15Nawe muni ashemooraa kirya kya mmba ya uwe. Nafo kukee kwaale kukakwaana piti mfo kundo musheludeesyaa.” 16Nalyo valya vakiloshyony vakakwiipoo vakafika kulya muriny, vakavekooya indo-da shaasa Yesu avavia. Vakadeesya-fo Pasaka. 17Nalyo elyo kwamfika nkwaany kasha nang'u aryani na valya ikumi na vavii. 18Na elyi vefo velyaa shoonga Yesu kaamba, “Nkya dede shamuvia, umwi waany nawe shikeelya nawe shoonga mmbo asheshiriingyaa.” 19Vakapooka isokywa mfyoova na immbia ku umwi umwi, “A ni yeny mbee?” 20Nawe kavavia, “Ni umwi waany yeni ikumi na vavii, we nndu loolota nawe maako marama efo kideeveny. 21Lyo Mwana yeto wa nndu yeenda mmbo asheendaa shaasa kikee kyireiye kyakwe. Indi oshiny nndu yeto Mwana yeto wa Nndu asheriingywaa mmbwe. Nndu yeto kyakwe mmbo kyekee kisha kwee era nalairwa.”
Kilaayo kya Nndumi
(Mat 26:26-30; Luk 22:14-20; 1Vak 11:23-25)
22Nalyo elyi veefo valyaa shoonga, kaipoo nkate; kaana Iruva, kaufisha-fisha kavaavya kaamba, “Waryeny ekyi nto mwiili wakwa.” 23Kawuya kaipoo upata kaarafuma Iruva, kavaniingya, vakana woose. 24Nalyo kavavia, “Ekyi nnyo samu yakwa yeevika nkundanu, iifo ishiiritwaa kimaruma kya vandu veengyi. 25Nkya dede shamuvia, nshikikaa-se shini ekyo kyivikwaa ni nsabibu-fo, na shitani shafika nkonu yeto shikinaa lya wiiya efo umanginy lwa Iruva.” 26Nalyo vakaimba fiimbo, vakakwiipoo-fo, vakafika alya ifumbuny lya miri ya mafura.
Yesu asongwa imanya sheelyi Petro ashenkana
(Mat 26:31-35; Luk 22:31-34; Yoh 13:36-38)
27Nalyo Yesu kavavia, “Mmbo musheonisaa nsindara moose, kimmba kikee kireiye kyeamba, ‘Nshekapaa mwiisi yeto, na mburu tindenyanyaka.’ ” 28Indi elyi numa shammaa iruka llyo nshemusongoyaa ifika kulya Galilaya. 29Naasa Petro kammbia, “Naakwa vashewonisa nsindara woose, yeny nshi indo-fo.” 30Nalyo Yesu kammbia, “Nkya dede shakuvia, kio ekyi kya inu kulaore nguku yankapa kavii mmbo kukooyaa kwanshikana kararu!” 31Nawe kakaarya irera deny kaamba, “Na shalollya kuti shiwaawa shisandwa neewe, nshishekukanaa nta-fo.” Nawo woose vakaverera indo.
Yesu atereva kulya Getsemane
(Mat 26:36-46; Luk 22:39-46)
32Nalyo vakafika ando a nnda uvaangwaa ni Getsemane. Nawe kavia vakiloshyony vakwe, “Kaeny rembo yaa shindetereva alya.” 33Nalyo kaipoo Petro na Yakobo na Yohane vakeenda veryani nawe. Nawe kapooka isavaa na yeerera. 34Kavavia, “Nrima wakwa mmbo usokywa mfyoova deny shafika kufii neefwa. Kaeny yaa mulale shoovi!” 35Keenda mbee kinnywa, kaoloka si na itereva Iruva ashambaa, “Kwakooya kivaa, saa yeyo ishiire.” 36Kaamba, “Aba, Nde efo kwafo findo fyoose mmbo fyaidimika. Naasa ita-ny upata yelu mbai lushuukea, indi nta kilaende shaasa shakunda yeny-fo, ni shaasa kwakunda yewe.” 37Nalyo kasha kakooya valele rony, kavia Petro, “Simion, a mmbo kulele-da, nta kulaidimi ilala shoovi neeny ando a saa imwi nsi?” 38Kyelaleny shoovi-te musande na itereva mulakooye yaanga kyeesyony. Nrima to ulangye indi mwili ukava nnana. 39Nalyo keenda lyingyi kandetereva Iruva arera marero alya meni. 40Nalyo kawuya nang'u kakooya valele rony. Neelyi miso awo eefummbye rwe. Nawo valamanyi nta kindo varouwa. 41Nalyo kasha nau lya kararu, kavavia, “A ni indo mwalunga ilala tupu na iimuya na kyeeri ekyi kyoose! Kikufiiyeny! Kyeeri kyamfika. Mwana yeto wa Nndu akakau eefo arambikywaa maakony a vandu valyamari. 42Kwiipoony-te lweende! Akakau, yeto mwiishiriingya ansha kufii.”
Yesu atirwa
(Mat 26:47-56; Luk 22:47-53; Yoh 18:3-12)
43Nalyo yeni elyi eefo areraa indo Yuda Iskariote akee umwi wa valya ikumi na vavii, kasha nang'u aryani na vandu nkuka varie ngyusu na mariinga, varumwa ni vakohani na veelosha mavavaso na vamiku va vandu. 44Na ulya anrambikya-fo emmbadeerya wende kaamba, “Nndu yeto shimmimindaa mmbwe mushentiraa mweende munrie.” 45Naasa elyi asha nau nalyo yeni kafika yoo akai kaamba, “Shakwiidikira llori wakwa.” Kammiminda. 46Vakamoroya maako vakantira. 47Naasa ulya umwi wa valya vasalali-u kasommwa usu lwakwe kakapa nalo ishinga lya nkohani ulya nniini, kammaswa kuri. 48Nalyo Yesu kavavia, “Mmbo mwakwiipoo kyeny murie ngyusu na mariinga sheelyi mwaenngya nndu mwaala shia musheshitira. 49Na nkonu simu mmbo shekee neeni shiloshaa efo mmba ya Iruva, nta mulashitire. Indi kimaruma kikaenda indo ni filya fikee fireiye naambo fikooye iinukya-u fyoose.” 50Nalyo woose vakanreeya vakarisha. 51Nalyo kweeyo mwana nkoo wa womi eefo ellatyaa eree soori ya yeerya ya lasi, nawo vakakunda intira. 52Kavareeya soori ilya lasi, karisha eefo mbereto.
Yesu arawa ikwaanuny lya masiingo a vandu
(Mat 26:57-68; Luk 22:54-55, 63-71; Yoh 18:13-14, 19-24)
53Nalyo vakaenda varie Yesu, vakamfita kulya kwa nkohani nniini. Nafo kwenkuummbya-fo vakohani valya vaniini woose na masiingo na veelosha mavavaso. 54Na Petro kaengya kwaasha ellatyaa, katana afika efo poo kwa nkohani ulya nniini. Kakooya vasero va efo poo vakee-fo rembo kasanga nawo ashoraa muro. 55Naasa vakohani valya vaniini vasasangyi na ngyama toose vakasia ukureeki lweevinga Yesu naambo vambwaa, lyo valaonise. 56Nyelyi veengyi veefo vavikaa ukureekyi lwa wongo vammbinge, na efyo fya ukureekyi lwawo filave fimwi. 57Nalyo vandu vaangu vakasalala-u vakavika ukureekyi lwa wongo vammbinge, vakaamba, 58Yese mmbo luleita ashambaa, “Yeny mmbo nshewundwaa mmba yei ya Iruva ikee shitani na maako, shitani ingyi ilakee shitani na maako ando a mikonu iraru shimaa.” 59Nta elyi varera indo ukureekyi lwawo lulave lumwi. 60Nalyo nkohani ulya nniini kakwiipoo, kashesalala yoo nnang'ani. Kavesa Yesu, kaamba, “A mmbo kulashaambaa kyafo kyeerouwa efyo vakureekyi yeva vaamba-u fyeekukumba?” 61Nawe kamalallya-sau, nta nalarouwe kindo. Nkohani nniini kammbesa lya kavii, “A nnyewe Kristo we Mwana wa yeto Mwiirumishwa?” 62Naasa Yesu kaamba, “Yeny mmbwe. Neeni mushelollyaa Mwana yeto wa Nndu akee rembo yoo taari ya woko usha lwa Mwaafinya, nashe eeriwa mmafishi a efo nginiiu.” 63Naasa nkohani ulya nniini karanndwa soori takwe ta yeerya kaamba, “A ekyo luruuyaa-se vakureekyi vengyi nkyo-kyi-se nyira? 64Akakakyo mwamiita aruma Iruva-te! A mwarummbwa inda?” Nawo woose vakamweekerya uvingo veshambaa kindo kinsumanyi ni indewaawa. 65Nalyo maata vakapooka imweeselya minyiiri na insikya kisangu na inkapa na ng'unde na immbia, “Kyeluvie kisuku-te!” Na vasero va efo poo vakankamara venkapaa ngyoyi.
Petro akana Yesu
(Mat 26:69-75; Luk 22:56-62; Yoh 18:15-18, 25-27)
66Nalyo Petro akee rembo kulya poo alya si. Kukasha nau mwana wa kyika umwi akee umwi wa fishinga fya nkohani ulya nniini. 67Kalollya Petro ashooraa muro. Kammbikya miso swaa kaamba, “Na yewe-da kweeriani na nndu yeto wa Nasareti, we Yesu.” 68Nawe kalema-fushu kaamba, “Kindo ekyo kwaamba nshakimanya-fo, nta shakiitumuso-fo.” Nalyo kakwiipoo alya poo kafika yoo ngiriny. Na nguku ikakapa. 69Kishinga kilya kya kyika kyikallollya kyikapooka lyingyi-se ivia lyingyi valya woorokye yoo mbai, “Yeu mmbwa efo nnang'ani yaawo.” 70Nawe kalemafushu lya kavii. Elyi numa kinnywa valya vasalalyi yoo kufii, vakawuya ivia-se Petro, “Nkya dede kukee wa efo nnang'ani yaawo mashika neewe-da ni wa kulya Galilaya.” 71Nawe kapooka ikudenga we muni na ilya mboo, “Nshiishi nndu yeu mwamwaamba-fo.” 72Nalyo yeni nguku ikakapa lya kavii. Petro kawuya ikummbwa kirero kilya Yesu emmbia, “Kulaore nguku yankapa kavii kukooyaa kwanshikana kararu. Nalyo akummbwa indo kaiya nnu deny.”
Currently Selected:
Marko 14: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.