Matayo 27
27
Yesu arawa kwa Pilato
(Mar 15:1; Luk 23:1-2; Yoh 18:28-32)
1Naasa elyi kwamfika ikya Vakohani vaniini woose vasasangyi na masingo a vandu vakafisha kyama kikee kya kisuuya naambo vakooye iwaa Yesu. 2Vakankamara vandenrambikya kwa nshilyi ulya wa Kaisari, we Pilato.
Ufu lwa Yuda
(Mav 1:18-19)
3Nalyo Yuda ulya alenndiingya elyi allolya Yesu ameekerywa uvingo lweewaawa nawe kakuria. Kaipoo misasarwe ilya ya fesa makumi araru kandeiviirya Vakohani valya vaniini na masiingo a vandu. 4Kaamba, “Mmbo shiletana ukasha elyi shariinngya samu ilatiri kiteve.” Nawo vakaamba, “A mmbo kiluwore-kyi yese? Lola kyafo kumuni!” 5Nawe kandeera misasarwe ilya ya fesa kulya mmba ya Iruva. Kawara shia, kandekuvanika. 6Naasa vakohani vaniini vakaipoo misasarwe ilya ya fesa, vakaamba, “Nkwiifo mumu wa iivika efo mbolokony ya mmba ya Iruva-fo, kimmba ni wuuru lwa samu.” 7Naasa vakafisha shila vakaura nayo irema lya uteri lwa muumba nungu lyive ando eerika veny. 8Nkyo kimaruma irema lilya lyikavaangwa ni irema lya samu kufike inu. 9Nalyo kilya kyikee kirere na kana ka nkisuku ulya Yeremia kikakooya iinukya-u kyeamba, “Na yeny shileipoo misasarwe ilya makumi araru ya fesa, ni wuuru lwa nndu alererywa wuuru, yeto vana va Israeli valenrerya wuuru. 10Shaivika yeeura irema lilya lya uteeri lwa muumba nungu, shatana shaasa Nndumi avavasye.”
Pilato avesa Yesu
(Mar 15:2-5; Luk 23:3-5; Yoh 18:33-38)
11Naasa Yesu kandesaleeswa mbee ya nshilyi ulya wa Kaisari. Nshilyi wa Kaisari kammbesa kaamba, “Yewe mmbo kukee mangyi ya Vayuda?” Na Yesu kaamba, “Kwankyaamba kumuni.” 12Na elyi eefo akumbwaa ni Vakohani vaniini na masiingo a vandu, nta nalarouwe kindo. 13Nalyo Pilato kammbia, “A mmbo kulaitye efyo vakureeka-u fyeekuutya uvingo shaasa fifye?” 14Nawe nta nalarouwe nta kyimwi ammbesa. Nshilyi ulya wa Kaisari katana afulukywa deny.
Yesu autywa uvingo lwa iwaawa
(Mar 15:6-15; Luk 23:13-25; Yoh 18:39–19:16)
15Naasa elyi lya nkonu nniini nshilyi ulya wa Kaisari eeshivie iporomuya vandu nndu mfinge umwi ulya vankunda. 16Naasa meendi alya alekooya atiri nndu mfinge umwi aenngye usutu avaangwaa Baraba. 17Naasa elyi vakuummbye-u indo nkuka Pilato kavavia, “A nndu mwankunda shimuporomuye ni ungau ndesa, ni Baraba ao ni Yesu yeto avaangwa ni Kristo?” 18Neelyi aishi kyavaniinga vakankumba ni kyinying'u. 19Naasa elyi akee rembo yoo kitiminy kya ushilyi, nalyo nka wakwe kanrummya nrumi. Kammbia, “Kulasange mbony ta nndu yeu wa usumanu! Mmbo shilelya ukiva wiingyi kimaruma kyakwe nshooryaa kyio kya inu.” 20Naasa Vakohani valya vaniini vasasangyi na masiingo a uruka vakaaya vandu valya vakuummbye-u nkuka, naambo vakunde Baraba, na Yesu nawaawa. 21Naasa nshilyi ulya wa Kaisari kaallwa kavavia, “A yeva vavii ni ungau mukunndye shimuporomuye-u ndesa? Nawo vakaamba, Ni Baraba.” 22Pilato kavavia, “A shatana inda na Yesu yeu avaangwa ni Kristo?” Woose vakaamba, “Nandekapywa nsalabeny!” 23Naasa kaamba, A ukasha alelutana llo kyi-ro? Nawo vakakapa kisangelele na kamwi, vakaamba, “Nandekapywa nsalabeny!” 24Naasa Pilato kalollya kulaifo kindo kyikyivaa, kyoorongye kyilya kyikaenda kyiing'anaa tupu. Kawarya mura kasangya maako yoo kisanguny kya vandu valya vakuummbye-u mamwiingyi. Kaamba, “Loleny yeny nshitiri ukasha na samu ya nndu yeu-fo. Loleny yeni muveni!” 25Na vandu vakaallwa woose vakaamba, “Samu yakwe iluwuiye yese na vana veru!” 26Nalyo kavaporomuya Baraba. Na Yesu kanrambikya-u nandekapo na ngova numa nandekapyony nsalabeny.
Vasikari vatatala Yesu
(Mar 15:16-20; Yoh 19:2-3)
27Nalyo vasikari va nshilyi ulya wa Kaisari vakakamara Yesu. Vakanrwaa mmba ya ushilyi. Vakaende nang'u siri shoose ya vasikari. Ikasha inkuummbya. 28Vakamuuta soori takwe muni vakammbika soori ifwani nsoru. 29Vakaoka ureto lwa miinga vakammbika nrueny. Vakanniinngya irere efo wokony lwakwe usha. Vakafiiryandi vakanteenda, vakaamba, “Lwakwiidikira mangyi ya Vayuda!” 30Vakamwiisellye minyiiri. Vakawarya irere lilya vakankapa nalyo nrwe. 31Na elyi vammaa inteenda indo vakamuuta soori ilya vakawuya immbika soori tilya takwe muni, vakankamara nandekapyo nsalabeu.
Yesu akapywa nsalabeny
(Mar 15:21-32; Luk 23:26-43; Yoh 19:17-27)
32Naasa elyi vankwiipoo veefo vasheendaa, vakakooya nndu wa Krene avaangwaa Simion, vakamwiitikya nantare nsalaba ulya wakwe. 33Vakafika ando avaangwaa ni Golgota, kyikee sheelyi kyaambawa, “Nkisharongony.” 34Vakanniinga mfinyo ukee nsande na nri weenangisa. Ashosha nalakunde ina. 35Naasa vakankapya nsalabeu. Vakaavana soori takwe veetikapyaa kura. 36Vakakaa-fo rembo vakanringa. 37Na yoo nrweny wakwe vakavika ngumbwa ikee shireiye ule, “YEU MMBWE YESU AKEE MANGYI YA VAYUDA.” 38Nalyo veala shia vavii vakakapyo nsalabeny vakasandwa nawe. Umwi kavikwa woko usha na ungyi woko umuso. 39Naasa valya vairau vakanruma, vesisikaa mirwe, 40vakaamba, “Yewe mwiwundwa mmba ya Iruva ando a mikonu iraru kuwuye iitana lyingyi, nkyekukyireeny kumuni, kwakooya mmbo kukee mwana wa Iruva! Kuveolokany nsalabeny!” 41Na Vakohani valya vaniini vakaventeenda kiwo vasasangyi na veelosha mavavaso na masiingo a vandu. 42Vakaamba, “A elyi alekyira vengyi, nalaidimi ikukyira we muni! Mmbo akee mangyi ya Israeli, noolokeny nsalabeny ulaalu indi, neese lumwiirikye! 43Mmbo akusirye na Iruva, naasa we namwaauweeny kwakooya ankunndye. Kyimmba aleamba mmbo akee mwana wa Iruva.” 44Naasa na valya veala shia vakapyo nsalabeny ando amwi nawe, nawo-da vakavemmina.
Yesu afiiya nsalabeny
(Mar 15:33-41; Luk 23:44-49; Yoh 19:28-30)
45Naasa uruka loose lukawoywa ni ireema lupookya saa irindaru lukafika saa keenda. 46Naasa elyi kwamfika saa keenda Yesu koonisa unyanga waasha kaamba, “Eli, Eli lama sabaktani.” Nakyo kyikee sheelyi kyaambawa, “Woi Iruva wakwa, Woi Iruva wakwa, nkyikyi elyi kwashira?” 47Naasa vandu vasalali-u maata vaita indo vakaamba, “Nndu yeu mmbo avaanga Elia.” 48Nalyo yeni umwi waawo kanderisha, kandeende kivikaa mura, kakyiishura mfinyo utarang'aa. Kavika irereeny, kanrita. 49Naasa valya vengyi vakaamba, “Ra lulole kwakooya Elia ashaa imwaauwa-u.” 50Naasa Yesu kafua lyingyi na unyanga uniini kakumba muu. 51Nalyo akakalyo isullya lyilya lyaavanisye mmba ya Iruva lyikavambuka nnang'ani kavii lyipookya yo si lyikavambukya uwe. Na uruka lukarerema. Na ngereko ta mawe tikaparika-parika. 52Na mbanga ta vafu tikariika, minying'a miingyi ikaruka ya vandu veele. 53Vakaruka vauka efo mbangeny, na elyi numa we ammaa iruka vakafika kulya muriny mweele, vakakoora na vandu veengyi. 54Naasa nshilyi ulya wa vasikari na valya akee nawo veeringaa Yesu, elyi valollya kidinasi kilya na filya fyautika fyoose vakatirwa mmbweerei wiingyi. Vakaamba, “Nkya dede yeu mmbo ekee mwana wa Iruva.” 55Naasa kweefo na vaka veengyi velolaa vekee kikwaasha. Nawo mmbo valya valelatya Yesu vauka kulya Galilaya vemfurukanyaa. 56Nawe efo nnang'ani yaawo kusangyi-fo Maria Magdala na Maria ulya akee maye wa Yakobo na Yosefu, na maye wa vana valya va Sebedayo.
Irikwa lya Yesu
(Mar 15:42-47; Luk 23:50-56; Yoh 19:38-42)
57Naasa elyi kwiifo kushiilaa kukasha nafo nndu isimba wa kulya Arimataya, avaangwaa Yosefu. Nawe muni avealukye Yesu kava nndu wa kiloshyony kyakwe. 58We kafika kulya kwa Pilato kantereva nnying'a ulya wa Yesu. Nalyo Pilato kavavasya nandeniingywa. 59Na Yosefu kaipoo nnying'a ulya kawoososya sooriny shaa pyai. 60Kandewaara mbangeny yakwe shiiya adoshye efo iweny. Kapirimitya iwe iniini yoo mwaangony wa mbanga ilya, kakweengya. 61Naasa na Maria Magdala mfo kundo eekai, na Maria ulya ungyi vakakaa rembo yoo usumanu na mbanga ilya.
Vasikari vakeeringa kifu
62Naasa elyi lya ndesi ukee nkonu ulatye nkonu weekudeesya llyo Vakohani valya vaniini vakandekuummbya kulya kwa Pilato varyani na Vafarisayo. 63Vakaamba, “Ale Nndumi! Lwawuya ikummbwa kyilya llembi ulya alerera ekee na muu eeshaambaa, kushiiraa-u mikonu iraru shirukeny.” 64Naasa vavasyany mbanga yeyo indevikywa kiringisyo kufike nkonu yeto wa kararu naambo yewo vakiloshyony kyakwe valashe nau vamwiive-fo, vandeviany vandu, “Annduka auka kwa vafu, na ulembi yelo lweefurummya luilanyi lulya lwa mbee.” 65Pilato kavavia, “Varingyi vawonikaa. Kweengyeny munderinga shaasa mwaidima.” 66Naasa vakakweengya vakandevikya mbanga ilya uringyi vevikaa iwe lilya kiringisyo kyawo na varingyi valya vakakaa-u.
Currently Selected:
Matayo 27: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.