Matayo 26
26
Kyama kya iwaa Yesu
(Mar 14:1-2; Luk 22:1-2; Yoh 11:45-53)
1Kyikava elyi Yesu ammarisya marero alya moose, nalyo kavia valya vakiloshyony kyakwe, 2“Mwamanya mmbo kushiraa-u mikonu ivii, kufike yeto wa Pasaka. Llyo Mwana yeto wa nndu ashendaa irambikyo-fo nandekapyo nsalabeny.” 3Nalyo vakohani valya vaniini vakakuumbya ando amwi na masiingo a vandu kulya mmba ikee shaakare ya nkohani ulya nniini avaangwaa ni Kayafa. 4Vakafisha shila shaasa vashetiraa Yesu na ntambo vammbwae. 5Naasa vakaamba, “Nkyivaa elyi lya nkonu yeto nniini-fo. Mmbo kusheshaa mwaaluko-luko wa vandu.”
Yesu aambwa mafura Betania
(Mar 14:3-9; Yoh 12:1-8)
6Naasa Yesu akee kulya Betania, kulya mmba kwa Simon, yeto etirwa ni ivave, 7kasheywa ni nndu nka arie kipete kitiri mafura eekwaamba a wuuru uniini. Kalletya efo nrueny akee rembo eelyaa shoonga. 8Naasa valya vakiloshyony vakalolya, vakasswa. Vakaamba, “Nkyiki elyi kindo ekyo kyareka indo? 9Kindo ekyi mmbo kyeevaa ikumba wuuru uniini kindeavyo vakyiva.” 10Naasa Yesu kamanya kavavia, “A ekyo mwaatarya nka yeu nkyoki? Mmbo ashitannya ekyo kisha! 11Shamashika vandu vakyiva mmbo mukee nawo kyeeri kyoose. Indi yeny mmukee neeny kyeeri kyoose-fo! 12Nawe elyi aletya mwiili wakwa mafura yoo, mmbo atana indo kya yuudesya underikwa. 13Nkya dede shamuvia, ‘Kundo kwamoongoywa nrumi yeyo ya nsia kunu ulaniny koose, na ekyo kyakwe atana mmbo kishekumbuwaa.’ ”
Yuda ariingya Yesu
(Mar 14:10-11; Luk 22:3-6)
14Nalyo ulya umwi wa valya ikumi na vavii avaangwaa ni Yuda Iskariote, kandefika kulya kwa vakohani vaniini. 15Kaamba, “Kindo musheshiniingaa nkyokyi neeny shindenrambikya maakony any?” Nawo vakamweesya misasarwe ya fesa makumi araru. 16Nalyo nng'u alepookya isia mwaanya nsha weenrambikya efo maakony awo.
Yesu alya sukukuu ya Pasaka amwi na vakiloshyony kyakwe
(Mar 14:12-21; Luk 22:7-14, 21-23; Yoh 13:21-30)
17Naasa elyi lya nkonu wa mbee weelyiwa mikate ilatiri ntarang'o, valya vakiloshyony vakakuumbya yoo Yesu akai, vakaamba, “A kundo kukundye lundesongosya eelyiya Pasaka ni nkwi?” 18Nawe kaamba, “Endeny efo muriny kwa ng'anya mundemmbia, ‘Llori akuvia-le vai, Kyeeri kyakwa kyamfika kufii. Ni efo kwafo shikundye yuutya-fo nndumwa yeu wa Pasaka, amwi na vakiloshyony kyakwa.’ ” 19Na valya vakiloshyony vakandetana indo-da, shaasa Yesu avavasya. Vakandesongosya Pasaka ilya. 20Naasa elyi kwamfika nkwaany, kasha nau ishekaa-fo rembo nalye shoonga aryani na valya vakiloshyony ikumi na vavii. 21Veefo valyaa kavavia, “Nkya dede shamuvia, ‘Nnang'ani yaany umwi waany asheshiriingyaa.’ 22Nawo vakasokywa mfyoova finiini. Vakapooka immbia kwi umwi umwi, ‘A ndesa ni yeny Nndumi?’ 23Nawe kavavia, ‘Yeto loolota nawe maako marama efo kideeveny mmbwe asheshiriingyaa. 24Kya Mwana yeto wa nndu yeenda mmbo asheendaa shaasa kyikee kireiye kyakwe. Indi nndu yeto Mwana wa nndu asheriinngyaa mmbwe, oshiny lwakwe!’ Nndu yeto kyakwe mmbo kyekee kisha kwee eraa nalairwa! 25Naasa Yuda yeto mwiinndiinngya kaamba, ‘A ndesa ni yeny-ro llori?’ Nawe kammbia, ‘Kwankyaamba kumuni!’ ”
Kilaayo kya Nndumi
(Mar 14:22-26; Luk 22:14-20; 1Vak 11:23-25)
26Naasa elyi veefo valyaa Yesu kaipoo nkate. Kaarafuma Iruva. Kaufisha-fisha fyenga. Kaavya valya vakiloshyony kyakwe kaamba, “Nngeny, lyeny! Yeu ni mwiili wakwa.” 27Kaveipoo na upata kaana Iruva. Kavaniingya kaamba, “Niny-fo moose!” 28Yei ni samu yakwa yeevika nkundanu, iifoo ishiiritwaa kimaruma kya vandu veengyi vakooye ifwaayo ngyulyamari. 29Indi yeny shamuviany, “Kyipookya ulaalu nshishekinaa-se ekyo kyavikwa ni nsabibu-fo, na shifike nkonu yeto shana lya wuiya ando amwi neeni efo umangyi ny lwa Nde-yaakwa.” 30Naasa elyi vamiimba fiimbo vakakwiipoo. Vakaenda kulya ifumbuny lya miri ya mafura.
Yesu aamba sheelyi Petro ankanaa
(Mar 14:27-31; Luk 22:31-34; Yoh 13:36-38)
31Nalyo Yesu kavavia, “Kio yekyi kyeni moose mushesukyoo ni yeny! Kimmba kyikee kyireiye kyeamba, ‘Nshekapaa mwiisi na ironda lya mburu lyindenyanyaka.’ 32Indi elyi numa shammaa iruka nshemusongoyaa indefika kulya Galilaya. 33Petro kaallwa kaamba, ‘Naakwa woose vasukyo ni yewe, yeny nta nshishesukyoo-fo.’ 34Yesu kammbia, ‘Nkya dede shakuvia, kio yekyi kyeni kulaore nguku yankapa kukooyaa kwanshikana kararu.’ 35Petro kammbia, ‘Naakwa shalollya kuti shifwe shisandwa neewe, nshishekukanaa-fo. Na valya vakiloshyony vengyi vakaveamba indo woose.’ ”
Yesu akeeterevya kulya nndeny wa Getsemane
(Mar 14:32-42; Luk 22:39-46)
36Nalyo Yesu keenda aryani nawo. Kafika ando ukee nnda uvaangwaa Getsemane. Kavia valya vakiloshyony vakwe, “Kaeny yaa sheende alya indeterevyau Iruva.” 37Kakamara Petro na vana valya va Sebedayo vavii. Kapooka isokyo mfyoova na yeereve. 38Nalyo kavavia, “Nrima wakwa wiifo usokywaa mfyoova deny, wafika kufii na ifwa. Kaeny yaa mulale shoovi neeny.” 39Kaenda na mbee kinnywa. Kawa si na kisangu katereva Iruva kaamba, “Woi Nde, kwakooya kikuviiyaa, upata yelu lushiire shire shilaluna! Indi kilave shaasa shikundye yeny-fo, kiveva shaasa kukunndye yewe!” 40Naasa kasha na alya vakiloshyony vakai, kakooya valele rony. Kavia Petro, “A niinda, nta mulashiidimaa ilala shoovi neeny ando a saa imwi nsi? 41Kyelaleny shoovi mwiterevaa mulakooye iira kyeesyony! Nrima to ulangye indi mwiili ukava mfwafwa.” 42Kaenda lyingyi lya kavii, kandetereva. Kaamba, “Woi Nde-yaakwa, kwakooya kivaa upata yelu lushiire shire shilaluna, lyo kikuviiyeny shaasa kwankunda!” 43Kasha nangu lyingyi, kakooya velele rony. Mashika miso awo akee marovye nrwe. 44Naasa kavara-u, keenda lyingyi katereva lya kararu. Kaamba marero alya meni. 45Nalyo kasha na yoo vakiloshyony vakwe vakai, kavavia, “A niindo mwalunga ilala na iimuya! Llen-te kyeeri kyamfika, na Mwana yeto wa nndu eefo anderambikywaa maakony a vandu valyamari. 46Kwiipony-te, lweende. Akakato yeto mwiishiriingyaa amaafukya!”
Yesu atirwa
(Mar 14:43-50; Luk 22:47-53; Yoh 18:3-12)
47Na elyi eefo areraa indo, Yuda kasha nau, akee umwi wa valya ikumi na vavii, aryani na nsemu mwiingyi wa vandu varie ngyusu na mariinga vauka kwa vakohani vaniini na masiingo a vandu. 48Na nndiingyi yeu eevavikye kiringisyo kavavia, “Nndu yeto nshemmimindaa mmbwe mushentiraa!” 49Nalyo yeni kafika yoo Yesu akai, kaamba, “Shakwiidikira llori! Kammiminda.” 50Naasa Yesu kammbia, “Mbuya yakwa kyakweende na yaa nkyokyi?” Nalyo vakaserikya na yoo akai, vakaleesya Yesu maako vakantira. 51Nalyo akakau umwi wa valya vavandami na Yesu kaorwa woko, kasommwa usu lwakwe, kamanya nalo ishinga lilya lya nkohani ulya nniini, kammaswa kuri. 52Nalyo Yesu kammbia, “Viira usu efo kipony kya vayo. Kimmba yewo vamiipoo usu, ni usu lushevaretaa. 53A mmbo shilashiidimaa ifuuya Nde-yaakwa, nawe nashirikye vasu va efo iruveeu maronda ikumi na avii na kilanya?” 54A efyo fikee fireiye fyeamba, “Mmbo kyikee kirummbwe kyeende indo, mmbo fyeeshiinukyaa indaany?” 55Naasa kyeeri kilya kyeni Yesu kavia nsemu ulya wa vandu, “Mmbo mwooka kyeny mukasheshisheya sheelyi nkee mwaala shia, murie ngyusu, na mariinga musheshitira. A kyera shekee rembo ando amwi neeni mikonu myoose shiloshaa efo mmba ya Iruva, neeni mulashitire! 56Indi kimaruma kyikaenda indo, ni kilya kyikee kyireiye ni veawuya fisuku, naambo kyikooye iinukya-u.” Nalyo valya vakiloshyony vakanreeya vakarisha.
Yesu shileny ya masiingo
(Mar 14:53-65; Luk 22:54-55, 63-71; Yoh 18:13-14, 19-24)
57Naasa valya vatira Yesu vakandenrwaa kulya kwa nkohani ulya nniini we Kayafa. Nafo mfo kweekuumbye-fo veelosha mavavaso na masiingo a uruka. 58Naasa Petro eefo allatyaa yoo numa akee kyikwaasha. Kalava ifika mmba ilya shaakare ya nkohani ulya nniini kaanga nafo, kakaa-fo rembo kasanga na vasero valya va poo nakooye ilola shaasa kivaa. 59Naasa, vakohani valya vaniini vasasangyi na ikwaanu lilya iniini lya masiingo a uruka, vakava varuuyaa ukureekyi lwa wongo naambo vakooye iwaa Yesu, 60nta valaonise, lla ndesa vakureekyi va wongo valesha nau veengyi. Elyi lyeefurummya vakasha nang'u vavii. 61Vakaamba, “Nndu yeu aleamba vai, ‘Nshiidimaa isammbwa mmba ya Iruva ando a mikonu iraru shiitani lyingyi shimaa.’ 62Kyasia nkohani ulya nniini kasalala-u kammbia, ‘A nkushaambaa nta kindo kyeerouwa ukureekyi lwa yewo vavika lweekukumba?’ ” 63Indi Yesu kamalallya sau. Nkohani ulya nniini kaallwa kammbia, “Nkulyisaany mboo, ‘Swa Iruva muni muu kuluvie kwakooya yewe ni Kristo kukee Mwana wa Iruva.’ ” 64Yesu kammbia, “Kwankyaamba kumuni. Indi shamuvia, ‘Kupookya ulaalu mushelollyaa Mwana yeto wa nndu akee rembo yoo woko usha lwa Muni itumbe na isha navesha ariwa mmafishi a efo nginiiu.’ 65Nalyo nkohani ulya nniini karanndwa soori takwe ta yeerya. Kaamba, ‘Akakyo anruma Iruva nyira!’ A ekyo lusiiyaa vakureekyi vengyi nkyeekyi-se? Mmbo mwiitye ulaalu aruma Iruva.” 66A mwarummbwa inda? Nawo vakaallwa vakaamba, “Kindo kinsumanyi ni iwaawa.” 67Nalyo vakamwiisellye minyiiri efo kisanguny. Vakankapa na ng'unde. Vengyi vakankapa na mbiiri. 68Vakaamba, “Lwaauye kisuku-te Kristo, yeto akukapa mmbi?”
Petro akana Yesu
(Mar 14:66-72; Luk 22:56-62; Yoh 13:15-18, 25-27)
69Naasa Petro ekee rembo efo poo ya mmba ilya shaakare, nka kishinga kasha na yoo akai, kaamba, “Na yewe-da kweekee na Yesu yeto wa kulya Galilaya! 70Nawe kalema-fushu mbee yaawo woose, kaamba, ‘Nshamanya ekyo kwaamba-fo.’ ” 71Kakwiipoo-fo kafika yoo ngiriny. Nka kyishinga ungyi kallollya kavia valya, “Yeu avekee nndu umwi na Yesu yeto wa kulya Nasareti. 72Nawe kalema-fushu lyingyi eelyaa mboo kaamba, ‘Nshiishi nndu yeu-fo.’ ” 73Kairisha kinnywa, valya vasalali-fo vakasha na kufii. Vakavia Petro, “N-dede-da naakwa nnyewe kukee nndu waawo, ni mirerye yafo yakwaamba.” 74Nalyo Petro kakudenga we muni na ilya mboo eshaambaa, “Nshiishi nndu yeu-fo!” Nalyo nguku ikakapa. 75Naasa Petro kakummbwa kirero kilya Yesu alemmbia, “Kulaore nguku yankapa kukooyaa kwanshikana kararu.” Kasomuka na mbengyeny kaiya kyuumu nnu.
Currently Selected:
Matayo 26: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.