Matayo 25
25
Kyaaso kya vana va kyeny ikumi
1“Nalyo llyo umangyi lwa iruveeu lushekaa-fo lufwanani na vana va kyeny ikumi valeipoo taa tawo, vakauka kyeny, vandeammbya muni walyi. 2Nawo valya varaanu varung'ani, na valya varaanu varango. 3Naasa valya varung'ani vakaipoo taa tawo valakiipoo mafura. 4Na valya varango vakaipoo mafura na fiiya fyawo ando amwi na taa tawo. 5Naasa muni walyi kakyeeywa. Vakarengeya woose vakalala rony. 6Naasa elyi kio nnang'ani kavii kukaitiwa kyoorongye, ‘Akakato muni walyi! Kwiipoony-te mundemwaammbya!’ 7Naasa vana valya va kyeny vakakwiipoo woose vakasongosia taa tilya tawo. 8Valya varung'ani vakavia valya varango, ‘Mafura yoo any lwaavyeny-ng'u kidu! Mashika taa teru tiifo tirumikaa.’ 9Valya varango vakarouwa vakaamba, ‘Ode, nnyalumaa yese neeni-fo. Nkisha mweende kwa yewo veekumba, mundekuurya-fo any muveni!’ 10Naasa varie shia yeenda, muni walyi kasha. Na valya vakooya vekudeesye vakaenda nawe efo walyiny. Mwaango ukaraywa. 11Elyi numa vana valya va kyeny vengyi vakasha nau, vakaamba, ‘Woi Nndumi! Woi Nndumi! Luruye mmba!’ 12Nawe kaamba, ‘Nkya dede shamuvia, nshimwiishi yeni-fo.’ 13Kimmba ni indo, veny velala shoovi shamashika elyi mulaishi nta nkonu yeto na saa yeyo.”
Kyaaso kya varundi vararu
(Luk 19:11-27)
14“Mmbo kyava sheelyi nndu eekunndye yeenda kyaaro, kapooka ivaanga mashinga akwe muni. Kavaarya masaa akwe. 15Ulya umwi kaniinngya talanta isaanu, na ungyi ivii, na ungyi imwi. Wo nndu kanniinngya kisumani na mwiina wa wiidimi lwakwe. Naasany kaipoo kyaaro. 16Ameenda, nalyo yeni ulya wa talanta isaanu katiipoo, kandekapa nato mbusha. Kalyima-u talanta tingyi isaanu. 17Na ulya wa talanta ivii kavetana kiwo. Kauta-u mbusha ya tingyi ivii. 18Naasa ulya wa talanta imwi kaiipoo. Kandeisummya si. Kasuruma-fo talanta ilya ya nndumi wakwe. 19Naasa kwamiira-u kyeeri kyaasha, nalyo nndumi ulya wa mashinga alya kasha. Kakundany vamweekennyi. 20Ulya alewarya talanta tilya isaanu, kasha nau, kaende talanta isaanu tingyi. Kaamba, ‘Nndumi talanta kuleshyaarya ni isaanu. Akati talanta isaanu tingyi shilelyima-u.’ 21Nndumi ulya wakwe kammbia, ‘Aika ishinga isha kwaveva nsaari. Kwekee mwiikallya findo fyaangu kikee kya usaari. Nkuvikaany mwiikallya findo fiingyi. Anga na efo nsieny wa nndumi wafo!’ ” 22Na ulya alewarya talanta tilya ivii kavesha nau. Kaamba, “Nndumi talanta kuleshyaarya ni ivii. Akati talanta tingyi ivii shilelyima-u.” 23Nndumi ulya wakwe kammbia, “Aika ishinga isha kwaveva nsaari! Kwekee mwiikallya findo fyaangu kikee kya usaari. Nkuvikaany mwiikallya findo fiingyi. Anga na efo nsieny wa nndumi wafo.” 24Naasa ulya alewarya talanta ilya imwi kavesha nau. Kaamba, “Nndumi shilekumanya mmbo kukee nndu muumu, mmbo kwailula ando kulasuye mbeu, kwavesanyirya ando kulanyanyatye. 25Neeny shairyaa, shandesummya talanta ilya yafo efo si.” 26Naasa nndumi ulya wakwe kaallwa kammbia, “Yewe ishinga yeesi kwaveva mpeere! 27Kuleshimanya-sho, mmbo shailula ando shilasuye mbeu, shavesanyirya ando shilanyanyatye? Kyasiany yewe nshi kyeekusumannyi indeera talanta ilya yakwa efo kwa vandu vekapa mbusha va fesa. Na yeny kwakooya shasha nsheviirywany efyo fyakwa ando amwi na ulyimi lwa vayo. 28Naasa nsokeny talanta yeyo mundeniinngya yeto atiri talanta yeto ikumi. 29Mashika wo nndu atiri findo mmbo asheengerywaa fiingyi katana aingifywa. Indi yeto nalatiri kindo, naakwa na kilya atiri mmbo akisokwaa. 30Na ishinga elyo lya mweelu endelyeereny efo poo. Mfo kuvaa ikapa kiiyo na irafunnya mayoo. 31Naasa elyi Mwana yeto wa nndu ashaa akee na itumbe lyakwe, aryani na vasu va Iruva woose, llyo ashekaa rembo yoo kitiminy kyakwe kya itumbe. 32Nalyo efo kisanguny kyakwe kushesanyiryou vandu va masanga moose. Nawe ashevarauwaa navaave kavii, shaasa nndu mwiisi arauwa moonri na mburu. 33Na moonri asheavikaa yoo woko lwakwe usha, na mburu yeto tivikwaa yoo woko lwakwe umuso. 34Nalyo mangyi asheviaa valya va efo wokony lwakwe usha, ‘Kusheyeny na yaa shikai, mukee vandu va Nde-yaakwa avakunndye mbora! Endekeeny efo umangyi ny, mfo ding'uny yeanga, mulesurummywa uka mapookyony a ulana. 35Shamashika shetirwa nshaa mukashiniinga shoonga. Shetirwa nnyura mukashirita. Shekee muny mukashiwarya efo kyeny kwany. 36Shekuuywa mukashivika soori. Shelwee mukashisengera. Shekee kifingyony mukasha ishisaiya.’ 37Nalyo vandu yewo va usumanu vashemwaallwa, ‘Nndumi a niindii lulelollya kutirwa nshaa lukakuniinga shoonga? Ao kutirwa nnyura neese lukakurita? 38A ni indii lulekulollya kukee muny, neese lukakuwarya efo kyeny kweru? Ao kukuuywa neese lukakuvika soori? 39Ao ni indii lulekulollya kulwee ao kukee mfinge, neese lukasha ikusaiya?’ 40Nalyo mangyi ashevarouwaa, ‘Nkya dede shamuvia, wo kindo muletannya vanavama wakwa yewo vafwafwa ya woose, naakwa ni ulya umwi nsi, ni yeny muleshitannya.’ 41Nalyo asheviaa na yewo va wokony lwakwe umuso naambe, ‘Ukeny yaa shikai mukee vandu vakee vandenge, mundefika efo murony ularumikaa, ulesurummyo Satana na vasu vakwe. 42Shamashika shetirwa nshaa, nta mulashiniinge shoonga. Shetirwa nnyura, nta mulashirite. 43Shekee muny nta mulashiwarye efo kyeny kwany. Shekuuywa nta mulashivike soori. Shelwee, shekee mfinge, nta mulashe ishisaiya.’ 44Nawo vasheverouwaa kiwo, ‘Nndumi, a niindii lulekulollya kutirwa nshaa, ao nyura, ao kukee muny, ao kukuuywa, ao kulwee, ao kukee kifingyony, neese lukara lulakufurukannya?’ 45Nalyo ashevarouwaa, ‘Nkya dede shamuvia, Wo kindo mulera mulatannya yewo vafwafwa ya woose, naakwa ni ulya umwi tupu, mmbwe yeny mulera mulashitannya.’ 46Nawo vasheendaa vandelyiswa ukiva llung'anu, na yewo va usumanu wo vandekaa na muu wa llung'anu.”
Currently Selected:
Matayo 25: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.