Shuzana 1
1
Abaramuzi babili nibaligira Shuzana
1Omuli Babiloni akaba alimu omuntu nayetwa Yoakimu. 2Ashwera omukazi eibaralye Shuzana, muhara wa Hilikia. Akaba ali mukazi murungi muno mara yatinaga Ruhanga. 3Abazairebe bakaba bali bagorogoki, mara bamwegesa amateka ga Musa. 4Yoakimu akaba ali mutungi muno, aina n'ebusitani nungi omwa wenene. Abayahudi bamukyaliraga kuba bona yabakizaga obushongore.
5Omwaka gumoi baija baronda Abayahudi babili kuba baramuzi. Nibo bonene ab'Omukama yabaire agambireho ati, “Abantu ba Babiloni babi. Abaramuzi tibalikuhabura bantu kurungi.” 6Abashaija aba tibayoshaga mwa Yoakimu. Bona abashangwaga baina entoija babonaga wenene.
7Orwo abantu barugaga omwa Yoakimu omw'ihangwe kugya kwegagura, Shuzana yagyaga omu bustani ya iba, agendagenda omwo. 8Abagurusi abo bombili bamubonaga batyo buli kiro, babanza kumuligira. 9Kwema aho balekera kwijuka Ruhanga, kandi baba batakiramuza mazima. 10Bombili bamwegomba, kyonkai taliho yagambire mutahiwe. 11Okutagira batyo bakaba baina enshoni kweshurura okwo balikumwegomba. 12Buli kiro baikaraga bamulebeleize, kumuleba okwo ayemire.
13Omuntu ata kugambira mutahiwe ati, “Tugye omuka twegagure.” 14Kumara kuturuka bataishukana; kyonkai bagaruka lita niligwanganamu. Ahanyuma bakomekangana okwo balikugonza Shuzana, balemwa baikiliza okwo mazimakwo nibamwegomba. Aho bategeka mbali baramukwasiza ali wenkai.
Abaramuzi nibafumoza Shuzana
15Ekiro kimoi baramiliize eibanga lirungi, Shuzana agya omu bustani nk'okwo yakagiraga; akaba aina abazana babili bonkai; agonza kwoga kuba omushana gukaba guli gungi. 16Abagurusi abo bombili bonkai nibo babaire baliho, beshelekire nibamulinguliza. 17Agambira abazanabe kumuletera amajuta g'okwesiga n'obukonchakoncho obundi. Abaragira n'okusiga bakinga orwigi akaba nayoga. 18Bagira okwo yagamba, baturukira omu milyango y'omu mbaju kugya kuleta ebyo yabaragira. Abagurusi ababaire beshelekire tibababoine.
19Kabamazire kuturuka, abagurusi bombili bajumbukayo bagenda bairukire, bamugambira bati, 20“Emilyango y'ebusitani ekingire, ow'okutubona taliho, kandi ichwe nitukugonza. Oikilize tubyame naiwe. 21K'olikwanga turakugamba okwo waba oina omusigazi, nikyo kyakusindika kushubyayo abazana bawe.”
22Shuzana aikya omwoyo gurai agamba ati, “Natangwa embaju zona. Kandaikiliza, nafakara; kandi kandayanga, nimunyita timulikunkiza. 23Hakili munyite ntakikozire, kushaga okufakalira Omukama.” 24Aho ayana. K'ayana abagurusi abo bombili bamutelera enduru. 25Omoi airuka akingura emilyango y'ebusitani. 26Abairu kabema omu nju bakahulira eyombo omu bustani, bairuka bagya aha mulyango ogw'omu rubaju kuleba ekyo Shuzana yaba. 27Abagurusi kababagambira ekyo baramura kuhangilira Shuzana, bakwatwa enshoni zingi, aha rw'okuba ekyab'eki bakaba batakakimuhulizagaho.
Abaramuzi nibahangilira Shuzana
28Bukeire bunu, orwo abantu baizire omwa Yoakimu, mushaijawe, n'abagurusi abo bombili baija bamalilize kulimira Shuzana obwina kumwisa. 29Bagamba omu maisho g'embaga bati, “Mutume Shuzana muka Yoakimu, muhara wa Hilikia.” 30Shuzana bamutuma, aija n'abazairebe, n'abanabe, n'abanyaruganda bona.
31Shuzana akaba ali mukazi omukunirwa muno, kandi ali murungi. 32Akaba aina ekihundwi aha mutwe, nikwo abantu babi abo ababili kuragira kabakimwiyaho, bagondize kumubona oburungi. 33Kyonkai aba wenene na batahibe n'abamuhondeire bona balira.
34Abagurusi ababili bemelera omu mbaga, bamukwata aha mutwe. 35Shuzana alira, araramira eiguru, aha rw'okuba yayesigaga Omukama. 36Abagurusi bagira bati, “Katubaire tuli chwenkai omu bustani nitugendagenda, omukazi ogu atahamu n'abazana babili, kyonkai abashubyayo, amara agaruramu enyigi. 37Nikwo omusigazi kuruga mbali abaire ayeshelekire, akabyama nawe. 38Ichwe tubaire tuli omu bustani omu nshonda. Katubona eihano elyo twiruka tubagoba. 39Tubaboine bafumbataine. Kyonkai omusigazi atushagize amani yakingura enyigi, yatuntira aheru. 40Nikwo kukwata omukazi ogu, tukamubaza omusigazi, kyonkai tatugambire abaire ali ohai. Ebyo tulikugamba tubiboinekwo.”
41Embaga ebaikiliza, aha rw'okuba bakaba bali bagurusi omw'ihanga, kandi bali baramuzi. Aho bamuramura kumwita.
Danieli nashara Shuzana aha muguha
42Aho Shuzana ataga, agamba ati, “Waitu Ruhanga ow'eirai lyona, iwe omanya ebishelekire, omanya n'ebitakabaireho, 43nomanya okwo abashaija aba bampangilira. Leba, mbwenu baija kunyita! Kyonkai ebyo bampangilira timbikozire!”
44Omukama asinga ahulira okutakakwe. 45Nibamutwara kumwasha, Ruhanga akyanulira omusigazi Danieli. 46Danieli agamba n'eiraka lihango ati, “Omukazi ogu bamwite, kyonkai inye timbulimu.”
47Abantu bona bahinduka, bamubaza bati, “Nogonza kugamba ebi?” 48Okwo akabemeleiremu agamba ati, “Inywe Baisiraeli, muli bafera mutyo? Mwaramura kwita Omwisiraeli mutabalize bigambo okwo bili? 49Mugaruke omw'iramuliro. Abashaija aba omukazi ogu bamuhangilira.”
50Abantu bagaruka bwangu bwangu. Abagurusi bagambira Danieli bati, “Ija tushuntame hamoi otugambire, kuba Ruhanga akakutunga.” 51Danieli abagambira ati, “Mubataishurane bagyangane harai, nyije mbabaze.”
52Kabamara kubataishurana, Danieli ayeta omoi ati, “Iwe mushaija mukuru n'omutima gubi gwawe, mbwenu zalemwa zakulya, aha rw'amafu gawe ag'otura nokora. 53Otura noramura kubi emishango. Abataina ntambara nibo bakwatwa omushango, kandi abainazo obataishura, mara okwo Omukama akagamba ati, ‘Otalita muntu ataina ntambara.’ 54Mbwenu k'oraba obaboinekwo ongambire omuti ogwo babaire babyamireho!” Omugurusi ati, “Aha muti gw'omusandarusi.” 55Danieli ati, “Wakora muno! Ebishuba byawe byakwisa, kuba Ruhanga yaragiire omumalaikawe kukutemaho omutwe, naija kukutemaho omutwe aho n'aho.”
56Kabamara kumuteka aha rubaju, aragira kabaleta n'owa kabili. Amugambira ati, “Iwe oli Mukanani, toli Muyahudi. Wagwa aha burungi bw'omukazi ogu, obusiyani bwakugobya ahabi. 57Inywembili ebi nibyo mutura nimugira Abaisiraeli, mara babaikiliza aha rw'okubatina. Kyonkai Omuyahudi yabalema. 58Mbwenu ongambire ni mutiki ogwo obakwete babyamireho?” Amushubamu ati, “Aha muti gw'omukwaju.” 59Danieli ati, “Wakora muno! Naiwe kutyo ebishuba byawe byakwisa, kuba omumalaika w'Omukama akwete embanda, akulinzire kukutemaho omutwe. Inywembili nabaita limoilimoi.”
60Aho embaga yona etamu orusharo, esima ruhanga, arokora abamushuubira. 61Barwanisa abagurusi abo bombili, aha rw'okuba Danieli akabaramulira aha bishuba ebyo bonene bagambire. 62Ebyo babaire bagondeize Shuzana nibyo abantu babakoleire. Bakabaita nk'okwo amateka ga Musa galikugenda. Oku nikwo omuntu ataina ntambara yarokokire atyo kir'ekyo.
63Hilikia na mukaziwe basingiza Ruhanga aha rw'okurokoka kwa muhara wabo Shuzana. Yoakimu, iba, nawe kutyo, n'abanyarugandabe bona, enshonga tibamuboineho kigoko kyona kyona. 64Kuruga kir'ekyo Danieli yagiraga eiranga omu bantu.
Currently Selected:
Shuzana 1: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.