Abasigazi bashatu 1

Enshara ya Azaria

1Abashatu abo bagendagenda omu muliro, nibahoya, nibasingiza Ruhanga, nibahaisiliza Omukama. 2Ahanyuma Azaria ayemelera omu muliro omwo, ashoma enshara ati, 3“Waitu Mukama Ruhanga wa batatenkurw'ichwe,

osaine abantu bakusingize;

eibara lyawe lisingizibwe eirai lyona.

4Ebyo watukolera byona by'amazima,

omu by'otukolera byona oba mwesigwa,

n'eiramu lyawe ahali ichwe liba ly'amazima.

5Okakora ekyabaire kili omw'iteka,

orwo wateize Yerusalemu ekibundo,

Yerusalemu ekigo ekitakatifu kya batatenkurw'ichwe.

6Tukakufakalira, twakushenga,

entambara eyo tutakozire teliho,

titwahuliire mihango yawe.

7Ebyo watuhangire titwabikozire,

katwakuba twahuliire amateka gawe twakuramukire.

8Mbwenu eiramu ely'otutaireho

n'ekibonabonyio eky'otuhaire tubisainekwo.

9Otunagire omu mikono y'ababisha

abatamanya mateka gawe, abakushenga kubi,

watunagira omukama entwagu,

omubi atakazokaga mu nsi yona.

10Kanya aka titwina kya kugamba,

abairu bawe abakufukamira

enshoni zibemire kubi.

11Oliho eibara lyawe,

singa otatunagira kimoi,

osingire otachwa ndagano yawe.

12Otuganyire okwo okatuganyira,

ijuka Aburahamu endonkwa yawe,

na Isaka omwiru wawe,

na Isiraeli omutakatifu wawe.

13Abashatu aba okabaraganisa,

okwo baijukuru babo baliba bangi nk'enyanyinyi,

bakanye nk'omushenye gw'omwaro gw'enyanja.

14Waitu Mukama,

ichwe tubaire bake kushaga amahanga gona,

omu nsi yona twaba bantu abataina nshonga,

nituzira amafu gaitu.

15Kanya aka takiliho mukama,

anga murangi, anga mutwazi.

Ebihongo by'okwokibwa tibikiliho,

n'ebitambo chei, n'obunuma chei.

Titukiina mbali turakutambilira kitambo,

titukina bwemo bwa kutonganaho okatugarulira.

16Kyonkai singa otulebe okwo tulikwechuza nitwetohya,

otukunde, okw'obon'oti twakutambira ebitambo

by'empaya z'entama n'enumi ez'okwokibwa,

n'obukumi bw'emyana y'entama eshaire.

17Okwechuza kwaitu nikyo kitambo kyaitu,

ekyo twakutambira mbwenu, basinge bakiboneke.

Kandi tube bawe emalimali,

aha rw'okuba abakwesiga tibashonahara.

18Tuli bawe n'emitima yaitu yona,

mara tukutine kandi tushabe ahali iwe.

19Waitu otatushonaza,

okwo otutekanisa,

okashuba okatugilira obuganyizi bungi muno,

na mbwenu obe nikwo otukolera.

20Singa oturokore

kuhonderana n'ebitangazo byawe eby'amani,

waitu Mukama, ohe eibara lyawe ekitinwa!

Bona abalikushasa abairu bawe bashonire.

21Obashonaze, obake obushobora bwona n'obukuru,

obamare amani.

22Bakumanye okwo niwe wenkai,

niwe oba Mukama,

Ruhanga ow'ekitinwa mushai omu nsi yona.”

23Abairu ba Nebukadineza ababanagire omu muliro tibalekeire kwinegeza tanuru. Bagisimbikamu enkwi, bagitamu amajuta n'ebishwayaga. 24Omuliro gutumuka gushaga etanuru emikono makumi ganai na mwendai. 25Orwo gwayakire n'amani gwayokya Abakalidayo ababaire bailire haihi n'etanuru. 26Omumalaika w'Omukama aruga omwiguru, ataha omu tanuru kushanga Azaria na batahibe. Akachweka ako babaire balimu omutanuru akaraza omuliro, 27hashusha oti alimu akayaga ak'amabeho. Kityo omuliro tigwabagobireho nakake, tigwabokize anga kubashasa.

Oruhoya rw'abasigazi bashatu

28Nirwo Azaria, Anania na Mishaeli bagambire n'eiraka limoi, bakasingiza Ruhanga omu tanuru egyo, bakamuhaisiliza nibamwebugira, bakwese:

29“Waitu Mukama Ruhanga wa batatenkurw'ichwe osingizibwe

ohaisilizibwe mara otinwe muno eirai lyona.

30Eibara lyawe elitakatifu ly'ekitinwa,

lisaine kutinwa muno n'okuhaisilizibwa eirai lyona.

31Oli w'ekitinwa omuli Rwensinga mbali osingire,

osaine kusingizibwa n'okuhaisilizibwa muno eirai lyona.

32Oli w'ekitinwa iwe,

obandaire aha bakerubi nobona ebili omu nyanja okuzimu,

osingizibwe mara ohaisilizibwe eirai lyona.

33Bakusingize osingire omu nketo yawe,

bakuhaisilize nibakwebugira muno eirai lyona.

34Bakusingize osingire omw'iguru,

bakuzinire, bakuhaisilize eirai lyona.

35Inywe bitondwa inywena musingize Omukama,

mumuhaisilize, mumukunise muno eirai lyona.

36Iwe iguru osingize Omukama,

omuhaisilize, mara omukunise muno eirai lyona.

37Musingize Omukama, inywe bamalaikabe,