Baruku 4
4
1Bumanyi ogwo n'iwe kitabo ky'emihango ya Ruhanga,
n'iwe iteka eliikaraho eirai lyona.
Bona abamwekwata muno balirora,
kandi abatamwetaho balifa.
2Iwe Yakobo garuka omutware,
ogye mbali omushanagwe gulikujwa.
3Ekitinwa otakiha ondijo,
anga kuleka mugisha gwawe kutwarwa banyamahanga.
4Abaisiraeli, twina omugisha,
ahakuba nitumanya ebishemelera Ruhanga.
Okumaramarwa kwa Yerusalemu
5Bantu bange mugume,
inywe abalikwijukirwaho Isiraeli.
6Timwaguziibwe mu mahanga kuchweka,
shana mukanagwa omu mikono y'ababisha banyu,
aha rw'enshonga mukanigaza Ruhanga.
7Mukatamisa ayabatonzire,
orwo mwatambiire amajini ebitambo,
mukaburwa kubitambira Ruhanga.
8Mukebwa Ruhanga ow'eirai lyona ayabalezire,
mwatamisa Yerusalemu, mara nawe akabalera.
9Yerusalemu akabona okwo Ruhanga yabanigalira muno,
yabagambira ati,
“Hulira, inywe bigo ebyataine Sioni,
Ruhanga yanjunaza muno.
10Kuba nabona okwo abana bange
balikwija kutwarwa endore,
Ruhanga ow'eirai lyona yabanaga omu buzahe.
11Nkabalera ninshemelerwa,
kyonkai babatwara, nasigara njunaire nindira.
12Hatabaho muntu wa kumbona ninshasha akashemelerwa,
inye entumbwa ayafeleirwe abange bangi.
Nsigaire kigo endara aha rw'amafu g'abaana bange,
bakachwa Amateka ga Ruhanga.
13Tibayetaireho biragirobye,
n'emihango ya Ruhanga tibagigobesheleize;
bayanga kubolekelera kukora kurungi.
14Bigo inywena ebyataine Sioni mwije,
mwijuke okwo abana bange batwetwe endore,
Ruhanga ow'eirai lyona akabanaga omu buzahe.
15Akaihya eihanga harai lyabatabalira,
eihanga elitagira nshoni, ely'orulimi orutalikumanyika,
elitakuniraga mugurusi,
anga kuganyibwa mwana.
16Bakakukumba batabani bange abagonzibwa,
na bahara bange babatwara,
inye entumbwa ekigo endara.
17Mbwenu bana bange, mbajune ntai.
18Ayabasindikiire enaku ezo,
n'iwe alibaihya omu mikono y'ababisha banyu.
19Bana bange, inywe iroko,
inye nkasigara ekigo endara.
20Ebijwaro ebyo njwara nyina emilembe mbijwire,
najwara orugunia kweshasa.
Oburora bwange bwona ndatakiraga Ruhanga ow'eirai lyona.
21Bana bange mugume, mutakire Ruhanga,
arabajuna abaihye omu mani g'omubisha.
22Ninshubira okwo Ruhanga ow'eirai lyona
alibarokora,
mara inye Omutakatifu antungire ebyera,
enshonga Omurokozi wanyu ow'eirai lyona
ali haihi kubaganyira.
23Nkabaraga njunaire nindira,
kyonkai Ruhanga alibangarulira,
nshemelerwe nshanduke ebiro byona.
24Nk'okwo ebigo ebyataine Sioni byaboine
nimutwarwa endore,
nikwo bali haihi kubona Ruhanga nabarokora.
Ruhanga ow'eirai lyona naija kwija omu kitinwa kingi
abarokore.
25Bana bange mwegumisilize ekibonabonyio
ekyo Ruhanga abahaire.
Ababisha banyu babakilize amani,
kyonkai muli haihi kubona nibasilika,
mara nimwija kubakandagilira ebikya.
26Abana bange ebinyalyana bakaraba omu mihanda
eyemire kubi;
bakabafunya okwo omubisha afunya obuhyo bw'entaama.
27Bana bange mugume, kandi mutakire Ruhanga,
kuba wenene ayabahahiire ekibonabonyio alibaijuka.
28Nk'okwo mwarugire kyere ahali Ruhanga,
mugaruke n'ekihika kingi muno mumuhige.
29Ayabahaire ebibonabonyio ebyo n'iwe alibarokora
abahe n'ebyera eby'eirai lyona.”
Yerusalemu elijunwakwo
30Ogume iwe Yerusalemu,
kuba ayakwesire eibara n'iwe alikumaramara.
31Balishasha abakushasize,
bakashuba bakashemelerwa enaku zikuteire.
32Bilishusha ebigo ebyahindwire
abana bawe bairu babyo,
n'ekigo kyatahize abana bawe kilishasha.
33Nk'okwo ekigo ekyo kyashemeleirwe enaku zikuteire,
kikagira ebyera okambukire,
nikwo na kyonene kilikambuka kikashasha muno.
34Ekigo ekyo ndikichwa eishaija,
orwo kyesiima kugira abantu bange,
eikuru lyakyo lilikirugiramu obujune.
35Ruhanga ow'eirai lyona alikisindikira omuliro
ogulihya ebiro bingi,
kandi kiliturwamu amajini amakiro garai.
36Iwe Yerusalemu naga amaisho oburugaizoba,
obone ebyera ebyo Ruhanga alikukutwekera.
37Leba, abana bawe abo bakwakire nibaija,
bahikaine kwema oburugaizoba n'obugwaizoba, nibaija;
aha rw'okuba nikwo Omutakatifu yabagambira,
nibeshanda aha rw'ekitinwa kya Ruhanga.
Currently Selected:
Baruku 4: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.