Baruku 3
3
1“ ‘Waitu Mukama Rushoborabyona, Ruhanga wa Isiraeli, ichwe abajune, mara abashashe, nitukutakira. 2Waitu Mukama otuhulire kandi otuganyire, aha rw'okuba tukakufakalira. 3Eirai lyona osingiire aha nketo, kyonkai ichwe titulekeire kusilika. 4Waitu Mukama Rushoborabyona, Ruhanga wa Isiraeli, hulira enshara y'Abaisiraeli abalikushusha abafire n'ey'abaana ba balinya abakufakaliire, abatahuliire ebyo Omukama Ruhanga wabo yabaragiire, enaku zalemwa zatutera obutatutaishura. 5Otaijuka ntambara za balat'enkurw'ichwe. Shana omu kabi aka ako tulimu oijuke obushobora bwawe n'eiranga lyawe. 6Oba Mukama Ruhanga waitu, mara iwe, waitu Mukama, n'iwe tulikusingiza. 7Niwe watuhaire okukutina omu mitima yaitu tushobore kukutakira. Turakusingiza omu buzahe bwaitu obu kuba twayechulize omu mitima yaitu entambara za balat'enkurw'ichwe abakufakaliire. 8Leba kir'eki tuli omu buzahe mbali watutaatamiize; nibatujuma, nibatukeena, tuli omu kibonabonyio nituzira entambara zona za balat'enkurw'ichwe abarugire aha Mukama Ruhanga waitu.’ ”
Oburungi bw'Obumanyi
9Iwe Isiraeli hulira emihango y'oburora,
otege amatwi, oyege obumanyi!
10Iwe Isiraeli, kubaki,
kubaki oli omu nsi y'ababisha bawe,
nogurusira omu nsi y'abanyamahanga,
kuhagazibwa abafu.
11Kubaliranwa omu bali Hadesi?
12Okasigaho enchuro y'obumanyi.
13Kawakuba wakozire ebyo Ruhanga ayenda,
wakutuliire kimoi omu milembe.
14Oyege omanye mbali obumanyi buba,
mbali amani gaba,
mbali amagezi gaba,
nirwo honene honene aho
olimanya mbali oburora oburai buba,
n'omushana ogw'okukuhabura n'emilembe.
15N'ohai araboine mbali Bumanyi aikara?
Isi n'ohai aratahire omu sitoaze?
16Abatwazi b'amahanga balihai?
Isi abakozaga enyamaishwa emilimo?
17Balihai abakoraga omuhigo gw'ebinyonyi,
bakabiika efeza n'ezahabu nyingi
ezo abantu besiga,
bakazihiga obutalekera?
18Balihai abategeka okwo barabona efeza,
emitima ekabaharara, bakachwazikana ebishobeize?
19Bahoireho bagya Hadesi,
abandi baba nibo babasikira.
20Abasigazi bazairwe,
n'ensi bagituramu.
Kyonkai omuhanda gw'okubona obumanyi tibagumanyire,
tibashobokeirwe na kwo barabubona,
mara tibabuboine.
21Abana babo bakahaba muno
basiga omuhanda gw'obumanyi.
22Bumanyi takahulirwaga muli Kanaani,
kandi n'omuli Temani takabonekagamu.
23Abana ba Hagari abahiga amagezi omu nsi,
Abatunzi ba Mera na Temani,
abagani b'ebigano n'abahiga amagezi,
tibakamanyaga muhanda gwa Bumanyi,
n'okutekeleza okwo bakumubona, chei.
24Iwe Isiraeli, mpango etai ensi ya Ruhanga!
Ensi eli omu mikonoye ti mpango pai!
25Eba mpango mara tegira mbibi;
kandi tiyakulengwa.
26Abantu ebishoka abagiraga eiranga kwema karai
bakazalirwa omwo,
bagiraga ekyema kingi mara bamanyaga endashana.
27Kyonkai Ruhanga tiyabaronzire,
n'omuhanda gw'obumanyi tiyagubahaire.
28Kityo bakachweka kuba tibagiraga Bumanyi,
bakachweka bazira obufera bwabo.
29N'ohai aragiire omw'iguru akakwata Bumanyi,
akamusongora omu bichwi?
30N'ohai arashaabukire enyanja akabona Bumanyi,
akagira ezahabu enchenkure akamugura?
31Taliho alikumanya muhanda gwa kumugobaho,
anga alikufaho okwo aramugobaho.
32Kyonkai wenene amanya byona namanya Bumanyi ogwo,
akamubonesa amagezige.
Ayataireho ensi akagilinda ebiro byona,
akagijuza ebitondwa by'amaguru ganai.
33Wenene ajwisa omushana gukajwa;
n'iwe agweta gukamuhulira, nigumutina.
34Enyanyinyi zikaakira omu kanya kazo zashemelerwa.
Kayazesire zahorora ziti “Kasinge!”
Zayaka nizishemelerwa omu maisho g'ayazitonzire.
35Ogwo n'iwe Ruhanga waitu,
taliho ondijo ow'okushushanisibwa nawe!
36Akazora omuhanda gw'okugoba ahali Bumanyi,
yamara yamuha Yakobo omwiruwe,
na Isiraeli owo yagonzaga.
37Ahanyuma Bumanyi akaija omu nsi,
yatura omu bantu.
Currently Selected:
Baruku 3: RHAY01
Highlight
Share
Copy
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.