MATYE 11
11
Jan wí ma hɛɛn pèè tun wa Jesu ma we
(Luk 7:18-35)
1Jesu wi gâ wi ploʔofɛɛ kɛ̂ mà kɛ syɛn krɛʔɛ we kɔ ge, wɔ̀ɔ jɛ be mà kɛri bì yàá hɛɛn krɛʔɛ be bì da kayotanʔa jari ge wa kyɛ̀rɛ̀ da ni tí nyɛ wa ki klɛnmɛ ni me. 2Jan pɔɔ da gâ bo wa kaso nî we mâ Krisi wi kahranʔa kayoʔo loʔo ge, wɔ̀ɔ wi ploʔofɛɛ tun be. 3À pe yɔ́ɔ̀ po: «Mo wi yo ŋa pe dá yo wí na pan wa ge, dee di, wo nì wo da wà hanni nɛ wì yɛ?»
4Jesu wɔ̀ɔ pé po: «Yee sye ye yaʔa tyɛʔɛ Jan na we ga yé ma loʔo ní ga nì yé ma nya ge. 5Fyoon pé na nyaʔa. Lemloʔomoo à pe na tanri. Yanyɛʔɛ fɛɛ à pe na pori. Gbeeyee à pe na nuru. Kuu à pe na nyɛni. Fyomo fɛɛ à pe na kayotanʔa nuru ge.#11:5 ma wèle wa Esa 35:5-6; 61:1 ni wè.
6Na kala li ìn bi hɛn ŋa bɛn ge, wí nyɛ frɛmɛ ní.»
7Jan wi tunbee pe gâ hru ná sye ge, Jesu wɔ̀ɔ ki hli mà na nyu janma ní me Jan wi namyɛʔɛ na ge mà yo: «Ye da gɛrí mà yâ nyaʔa wele wa sinbriʔi ni ge? Nya kanla là li la tiflɛʔɛ kí na kpoʔoro ge yo? Ayo. 8Dee di, nyaʔa gi ye da gɛrí mà yáa wele ge? Naŋa wà wi ŋa wí ma kpasyokmara le wì na ge yo? Di bee pé na kpasyokmara ni ge, pé na kori wa klo fɛɛ goro ni. 9Dee di, nyaʔa gi ye da gɛrí bi ya welé ge? Nyɛʔɛlɛ leyoo wà wi yo? Ee, ɛɛn di, mí biʔi yo ye ma bì yo, ki woo ŋa we wí ma kpɔʔɔ mà toro Nyɛʔɛlɛ leyoo na we. 10Jan wi kala na, ki da nyoŋó wa Nyɛʔɛlɛ li sɛbɛ ni we mà yo:
‹Welé, mì Nyɛʔɛlɛ mí bi na pitunŋu troʔo we wa ma yɛʔɛ̀ ma, ŋa wí bi yà ma kloʔò yɛli ge.›#11:10 ma wèle wa Mal 3:1 ni wè.
11Mí biʔi yo ye ma kanyɛmɛ na, cɛlɛ wɛ̀ ìn je hɛnwyee wà he kpɛn, ŋa wí ma kpɔʔɔ Jan Batise na we. Di ŋa wí nyɛ tatunŋu wa Nyɛʔɛlɛ masaʔa ni ge, wí ma kpɔʔɔ Jan na we. 12Mà kpe Jan Batise nyiŋi na mà bâ no alaʔa na, pèè naʔa ca bì je wa Nyɛʔɛlɛ masaʔa ni ge fanŋa na. Fanŋa fɛɛ bɛ pé naʔa ca bìʔi ta ge.#11:12-13 ma wèle wa Luk 16:16 ni wè. 13Nyɛʔɛlɛ leyoo sɛbɛɛ ní, ní furu kayoro sɛbɛɛ ní pé na masaʔa kala nyu mà bâ no Jan na we. 14Nàʔa po yé bi baʔa na ge, wiì wi ŋa Eli nì ŋa pé yo wí na pan wa ge.#11:14 ma wèle wa Mal 3:23; Mat 17:10-13; Mar 9:11-13 ni wè.
15Naakpoʔo nyɛ ŋa na ge, wi nagruʔu can, wi da nurú.
16Di mí bi gban bì ki nyiŋi ga hɛɛn tonli be nyaʔa ní? Pé nyɛ nɛ pa pii nyɛ be bee pé nyɛ wa klɛnhaʔa caan dala na le. À pe na taʔara na wa wa pe nibyee ma be mà yo: 17‹Wó ma pan mà bâ maʔala wyeri ye kan, di ye ìn yɔ. À wo ní mà kumu ŋuʔu ŋu, di ye ìn da gbele.› 18Jan wi dá ban, wi ìn baa lí bì da jo, à pe yo: ‹Gbosyo fɔlɔ wi.› 19Hɛn Pyɔ wí ma pan mà báa li na jo. À pe yo: ‹Welé, wí nyɛ fungbɔʔɔ fɔlɔ mà nì mà po hunjɔɔ wi wí ni. Wí nyɛ misari syɔfɛɛ ní, kapere hanrifɛɛ ní pe nagoro wi.› Di Nyɛʔɛlɛ li ticlimi mí ma tanʔa ta mi kahranʔa fanŋa ni ge.»
Jesu wí ma cɔlɔʔɔ kayoro yo
(Luk 10:13-15)
20Ki nyiŋi na, wɔ̀ɔ ki hli naʔa nyu gbanʔa kyɛ̀rɛ̀ da ni wi dá kafonŋoo fafaʔa hanri wa ge, di ti hɛɛn pe ìn kruʔu wa pe kapere ma de, wɔ̀ɔ yo: 21«Cɔlɔkpɔʔɔ nyɛ má na dɛ, Korasɛn kàʔà. Cɔlɔkpɔʔɔ nyɛ má na kpo Bɛtisayida kàʔà. Mɛjɛn nàʔa po kafonŋoo gee ke dá hanri wa ye ni ge, ke dá hanri wa Tire kàʔà ni, ní Sidon kàʔà nì, ti hɛɛn pa pe da kasyara drere ni bì tyonʔo krugu pè na jango bìʔi tyɛʔɛ hɛɛn na be, peʔe cɛn pe yo pé ma kruʔu wa pe kapere ma de.#11:21 ma wèle wa Esa 23:1-18; Esek 26:1 - 28:26; Jow 4:4-8; Amo 1:9-10; Sak 9:2-4 ni wè.
22Mí biʔi yo ye ma bì yo Tire kàʔà nì, Sidon woʔo ní pi kiti wí bi ba jɛrɛ bì doro yè woo na we kiti konwlɛʔɛ na ge. 23Mo we Kapɛrinamu kàʔà, má yo má bi jɛ fɔ bì ba no wa namuru ni de yo? Nyɛʔɛlɛ lí bi ma trigi fɔ bì ba no wa kuu kaʔa na ge. Mɛjɛn kafonŋoo gee ké ma hanri wa ye ma ge, nàʔa po ke dá hanri wa Sodɔmu kàʔà kiì ni ge. Paʔa bo ki dá go be fɔ bì ba no alaʔa na we.#11:23 ma wèle wa Esa 14:13-15; Hli 19:24-28 ni wè. 24Mí biʔi yo ye ma Sodɔmu kàʔà kiti wí bi jɛrɛ bì doro yè woo ŋa na wí na pan wa kiti konwlɛʔɛ na ge.»#11:24 ma wèle wa Mat 10:15; Luk 10:12 ni wè.
Yee ban nà krugu, ye ba fyonriʔi ta
(Luk 10:21-22)
25Ki nyiŋi na, Jesu wɔ̀ɔ kí yo mà yo: «To, mí na ma syeri, mo ŋa namuru ní, tra ní ti fɔlɔ we, mɛjɛn ma dá ki kaʔa hra ge ticlimi fɛɛ na be, ní kaʔa cɛnfɛɛ ní be mà ke tyɛʔɛ pii na. 26Ee, To Nyɛʔɛlɛ, ki dá hanri ban, mɛjɛn ki da ma glán.
27Na To wí ma kaʔa kè bɛfu le wa na kyɛʔɛ ni ge. Wà nigbe ìn Pyɔ cɛn we, nà ki ìn bo To wiì wi ge. Wà nigbe ìn To cɛn we, nà ki ìn bo Pyɔ wiì wi ge, ní ŋa nì Pyɔ wí ma cori buu cɛʔɛ́ wí na ge.#11:27 ma wèle wa Jan 3:35; 1:18; 10:15 ni wè.
28Yee ban nà krugu, yèé bee yè bɛfu yé na teʔe ge mâ po yè tuʔuru tí nyɛ tiluʔuru ge. Mí bi ba fyonriʔi kan ye ma. 29Ye na tungɔyraʔa tugu ge nɛ pa pe hîn niri ca flaʔa tiʔi pwɔ ti na pomo ma na ge, ye po na ploʔofɛɛ. Mɛjɛn mí nyɛ lagunmu ní, ní lagmama nì. Yé bi fyonriʔi ta wa yè lama ni me.#11:29 ma wèle wa Jer 6:16 ni wè.
30Mɛjɛn na tungɔyraʔa kí nyɛ kmaʔa. Na tuʔuru à ti po tifaʔara.»
Currently Selected:
MATYE 11: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire