Lucas 16
16
Tjamo̧ jidamȩ pio ju̧i̧ chjiari, oëadëmȩ tjamo̧ pio ju̧i̧ chjiari ni̧bä chjaorëremȩdejȩrȩ Jechu judi
1Ja̧di ta̧rëri̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi na̧rȩrea̧ ma̧ȩmi̧ dara̧:
—Danȩrȩ, chëre ji̧ra̧ri̧ goamȩ pio judi, bë ano̧mȩ pio judi cjo̧ro̧rëremȩde, jibëa̧ bë jidamȩ pio ju̧i̧ goamȩrȩ. Ado bë jidamȩ pio judi jabechji̧ chjö̧na̧i̧ oa jidamȩrȩ cjo̧ro̧rëremȩde bë ano̧mȩ ja̧ oa, chëre ji̧ra̧ tjamo̧ pio ju̧i̧bo. Jabo bë ano̧mȩ pio judi pumȩ pio ji̧ri̧iä goë ta̧rëa̧ oaiä, bë jidamȩ pio ju̧i̧ chjiari goë ta̧rëa̧ oaiä, 'ä, garümȩdida, ca̧ chëreremȩ pio ju̧i̧ ji̧dë ma baë mitëdiji̧da, chjadëri̧ jidatärea̧ ji̧ chjadëri̧ jidadëdiji̧da, ji̧dë ma baë mitëdiji̧da' quëna̧ jo̧rȩtamȩpea̧de bë jidamȩ pio ju̧i̧ chjiari goë ta̧rëa̧ oaiä. 2Ado pio ju̧i̧iä pio jȩaiäpȩ jätä yo̧ chjadüa̧dejȩ jibëa̧ bë jidamȩ pio ju̧i̧. Ado pio jȩaiäpȩ go̧düdäräa̧rä, jabechji̧ cuchu chiadëri̧ iëno̧ë ta̧rëa̧dejȩ: "Danȩ, mȩnȩ ji̧dë u̧i̧ baë mitëa̧ pio ju̧i̧ chjiari ta̧rëa̧requedemȩ" yo̧a̧dejȩ. "Jabechji̧ ca̧ chëre oa chjadëri̧ jidatärea̧ ji̧, cüdë goa̧ pio ju̧i̧ chjadëri̧ jidatärea̧ ji̧, cjäri̧ marenȩ, chjadëri̧ jidadëmȩrenȩ jabo ji̧dë u̧i̧ baë mitëa̧renȩque ji̧dëri̧. Ado pio ju̧i̧iä jabechji̧ aeno̧parequedemȩ yaba̧, mȩnȩ ca̧ea̧ oa ja̧bepë yürürea̧mi̧dëpe bagari̧. Jabechji̧ mȩnȩ chjadëri̧ jidadë tara, baä tänȩparequedemȩ. Jabo mȩnȩ baäbea yaboi̧, jabechji̧ mȩnȩ ja̧bepea̧ pio ju̧i̧, mȩnȩ jida̧ pio ju̧i̧ chjadëri̧ ütarë go̧ȩpatä earequedemȩ chjö̧na̧i̧ oa. Aja̧, mȩnȩ pumȩ pio ji̧ri̧iä mitëa̧ chëre pio ju̧i̧, mȩnȩ pumȩ pio ji̧ri̧iäpȩmo̧ ba ano̧a̧ chëre pio ju̧i̧ ado mȩnȩ baë mitëa̧ chëre pio ju̧i̧ chjadëri̧ ütarë go̧ȩpatä earequedemȩ, a̧dë cjiadiärea̧ decjiari̧. Jabechji̧ ca̧ea̧remȩ pio ju̧i̧ jidadëparenȩque yaba̧" yo̧mȩrȩ yo̧rëremȩdejȩ bë ana̧mȩ judi tjamo̧ jidamȩ pio ju̧i̧iäpȩmo̧.
3Ado bë jidamȩ judi pio ju̧i̧ ta̧rëa̧ oaiä, ana̧ tjamo̧ri̧ jo̧rȩtamȩpea̧de. 'Chia chia, bë ano̧mȩ pio judi aeno̧padicoada yaba̧, ¿tjana̧ oa ano̧ mire japatäremȩquëda, cjäri̧ maquëda, ado cja̧rȩmo̧ oa ano̧ mire ja̧beparea̧mi̧dëquëda, palara̧ jäerea̧mi̧dëquëda, ado chëre ji̧ra̧ri̧ goaji̧ri̧ pio ji̧ri̧iä cjo̧dëdëri̧ cjiaquëda, jabechji̧ pio ji̧ri̧iä eoparea̧mi̧dëquiji̧ri̧da, ¿tjana̧ oa ano̧ mire ja̧bepatäremȩcjivaquë, japarea̧ decjiaquëda' quëna̧ jo̧rȩtamȩpea̧de, idëri̧ cjiamȩrȩ, bücjüri̧ cjia tjamo̧mȩrȩ. 4Ja̧dëa ji̧ judi ana̧ri̧ jo̧rȩtarërea̧ ji̧, jabechji̧ chjaodëri̧ idëpea̧dejȩ jibëa̧ chji̧rä jo̧rȩtarea̧ üdë, o judiro̧ pio jȩaiäpȩmo̧ cjäri̧ cjia dapea̧ jo̧rȩtarea̧ üdë. 'Aja̧, ja̧di dari̧ japatäremȩquëda, chja ja̧di ca̧ ano̧mȩ pio ju̧i̧iäpȩmo̧ bacjiaji̧ri̧ pio ji̧ri̧ pio coaiäpȩmo̧ ano̧ mire bacjiami̧ dari̧ cjiapea̧ oa japatäremȩquiji̧ri̧da, jabechji̧ judiro̧ pio coa cjäri̧ri̧ cjia dapea̧ oa, ca̧ ano̧mȩ pio judi coa aeno̧a̧ duri oa pio coa cjäri̧ri̧ cjia dapea̧ oa, ado pio coa nö̧ta chjadëri̧ ëba cjo̧ro̧pea̧ oa japatäremȩqui̧ji̧ri̧da' quëna̧ jo̧rȩtamȩpea̧de, järi tjamo̧mȩpea̧mȩrȩ.
5Ja̧dëa ji̧ jibëa̧ ano̧mȩ pio ju̧i̧ bacjiaji̧ri̧ pio ji̧ri̧ ütëbo oa goadi ma̧ȩ chjadürëremȩdejȩrȩ pio jȩaiäpȩ jana̧tä. Ja̧dëa ji̧ yabo jana̧mȩ pio judi jana̧rä, ja̧di ta̧rëri̧ yo̧mȩrȩ iëno̧ë ta̧rëa̧dejȩ: "Danȩ, ¿napai̧ bacjiaremo̧nȩ ca̧ ano̧mȩ pio ju̧i̧?" yo̧a̧dejȩ. 6Ado yabo jana̧mȩ pio judi dëbë yo̧a̧dejȩ: "Napai̧dë, jabechji̧ yo̧ ji̧ra̧ tjamo̧ oa bacjiareconȩ, 100 tambor ji̧ra̧ oa bacjiareconȩ" yo̧a̧dejȩ. Ja̧dëa ji̧ bë jidamȩ pio judi yo̧a̧dejȩ: "Danȩ, mȩnȩ gatërërea̧ go̧ȩ i pio ju̧i̧ mitëvä. Ado cha ëte, chjaodëri̧ ano̧ mire go̧ȩpeno̧jo̧ȩ 50. Jabechji̧ yo̧ ji̧ra̧ oa bacjiarërea̧ ji̧, mȩnȩ 100 tambor oa bacjiarërea̧ ji̧, jabechji̧ duridëparȩjo̧ȩ. Aja̧, 50 pio ju̧i̧ ano̧ mire go̧ȩpajo̧ȩ. Jabechji̧ ja̧di dari̧ japea̧ oaiä, jabomo̧ tjomo̧ bacjiarenȩjo̧ȩ yaba̧" yo̧mȩrȩ yo̧rëremȩdejȩ cja̧rȩmȩ oa. 7Ado ja̧dëa ji̧ ji̧dë duri oa jana̧mȩ pio ju̧i̧ peaja̧di yo̧a̧dejȩ: "Danȩ, ¿napai̧ bacjiarenȩjo̧ȩ ca̧ ano̧mȩ ju̧i̧" iëno̧ë ta̧rëa̧dejȩ. Ado jana̧mȩ judi: "Napai̧dë, jabechji̧ tirigo cho ji̧ra̧ tjamo̧ oa bacjiareconȩ, 100 saco oa" dëbë yo̧a̧dejȩ. Ja̧dëa ji̧ tjamo̧ jidamȩ pio judi yo̧a̧dejȩ: "Danȩ, mȩnȩ gatërërea̧ go̧ȩ irä ano̧ mire go̧ȩpajo̧ȩ. Jabechji̧ 80 ütararea̧ra̧ ano̧ mire go̧ȩpavä. Jabechji̧ mȩnȩ ca̧ ano̧mȩ pio ju̧i̧ 100 saco oa bacjiarërea̧ ji̧, 80 saco maea oa bacjiarenȩjo̧ȩ yaba̧" yo̧a̧dejȩ. Aja̧, judiro̧ bë ano̧mȩ pio ju̧i̧ ji̧ra̧ tjamo̧ oa bacjiarërea̧ ji̧, jabechji̧ ba cjatäpa tänȩrëremȩdejȩrȩ judiro̧ ütëbo bacjiachea oa, judiro̧ o oamo̧ bacjiapea̧ oa. Aja̧, ja̧di maeari̧ japarëremȩde bë tjamo̧ jidamȩ judi pio jȩaiäpȩmo̧ cjäri̧ri̧ cjia dapea̧ oa.
8Ado ji̧dë duri oa bë ana̧mȩ pio judi dabamȩpea̧rä, jibëa̧ bë jidaremȩ pio judi japea̧ pio ju̧i̧ chjiari dabamȩpea̧rä, jabechji̧ ana̧ri̧ jo̧rȩtamȩpea̧de. 'Chia chia, ca̧ mu̧i̧tjoi̧remȩ üdë pio coaiäpȩmo̧ chjai̧dëri̧ japea̧räbo, pio coa u̧i̧pea̧räbo, 'jabechji̧ na̧e chia tjamo̧mȩrȩ japea̧dida, pio coaiäpȩmo̧ bacjiareji̧ri̧ pio judiro̧ pio jȩaiäpȩmo̧ ano̧ mire cjäri̧ri̧ cjia dapea̧ oa japea̧diji̧ri̧da, jabechji̧ judiro̧ pio coaiäpȩmo̧ bacjia̧ pio ju̧i̧ cjatäpami̧ dari̧ japea̧diji̧ri̧da, jabechji̧ jënȩ ji̧dë duri oa chjadëri̧ cjo̧ro̧rea̧ dapea̧ oa järi tjamo̧mȩpea̧dida, jabechji̧ judi ji̧dë duri oa cjo̧ro̧rea̧räpȩ dadëmȩrȩ cjiadiächea oa oëadëmȩ tjamo̧dida' quëna̧ jo̧rȩtamȩpea̧de bë ana̧mȩ judi pio ju̧i̧ chjiari —yo̧mȩrȩ ja̧di ta̧rëri̧ ni̧bä chjaorëremȩdejȩrȩ Jechu judi.
Ado Jechu judi, jënȩ pea yo̧a̧ pio ju̧i̧ chjiari ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧a̧dejȩrȩ:
—Aja̧ ca̧ pumȩ, dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧, dëdë, oëadëji̧ri̧dirȩ —yo̧a̧dejȩrȩ—. Järi tjamo̧ji̧ri̧pe bagarea̧ chiadirȩ. Jabechji̧ pio yoa chirirä chjadëri̧ cjo̧ro̧pea̧ ji̧, ji̧dë duri oa ma̧na̧pamȩ japamitërä chjadëri̧ cjo̧ro̧pea̧ ji̧, dëdë, järi tjamo̧dirȩ davä. Jabechji̧ tata u̧ri̧ pio ji̧ri̧iä ji̧dë u̧i̧ na̧e chiadirȩ pio jënȩro̧ cjäri̧ ja̧boji̧ri̧rȩ cjo̧ro̧chea oa, pumȩ judiro̧ pio jibëiäpȩmo̧ ji̧dë ma cjäri̧ri̧ cjia dapea̧ oa. 9Ado pio ju̧i̧iä yo̧requededibe —yo̧a̧dejȩrȩ—. Danȩrȩ, mȩnȩro̧ pio yoa chirirä cjo̧ro̧a̧ nö̧ta, jabechji̧ järi tjamo̧täreji̧ri̧nȩrȩ dibëa̧ra̧ pio ju̧ri̧ra̧ chjadëri̧ a̧dopea̧ ji̧ o ji̧ri̧iäpȩmo̧, pio judiro̧ dibëa̧ jadüpe bagarea̧mi̧ dari̧, pio dibë cjäri̧ri̧ cjia dape järea̧mi̧ dari̧. Ado ja̧dëa ji̧ mȩnȩro̧ ja̧boa̧rä, mȩnȩro̧ goarërea̧ra̧ pio ju̧ri̧ra̧ eami̧ oa japarea̧ dadërä, jabechji̧ mȩnȩro̧ a̧dorërea̧ pumȩ pio judiro̧ ano̧ mire cjäri̧ri̧ cjia daji̧ri̧rȩ jeapadiro̧dibe. Tjamo̧ davä. Mȩnȩro̧ a̧dëräpȩ ju̧ri̧ go̧düdäräa̧rä, jabechji̧ cjäri̧ri̧ cjia daji̧ri̧rȩ chjadëri̧ jeapadiro̧dibe mȩnȩro̧ bucho ana̧ cjo̧ro̧pea̧ bëräpȩ —yo̧mȩrȩ ni̧bä chjaorëremȩdejȩrȩ Jechu judi.
10Ado jibëa̧ jadü ji̧ri̧ ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi:
—Danȩrȩ, mȩnȩro̧ Ütërë yo̧a̧mi̧ chjadëri̧ japarä judi, jabechji̧ ji̧dë u̧i̧ ana̧mi̧ da pio ju̧i̧bo japa tänȩpai̧ dadidibe Ütë tjamo̧ judi. Tjamo̧ davä. Mȩnȩro̧ Ütërë yo̧a̧mi̧ chjadëri̧ ja̧beparä judi, eami̧ ja̧beparea̧ boi̧chji̧mi̧ da pio ju̧i̧ chjadëri̧ japarä judi, jabechji̧ ji̧dë u̧i̧ ana̧mi̧ da pio ju̧i̧bo jabepa tänȩpai̧ dadidibe. Jabo danȩrȩ, mȩnȩro̧ Ütërë yo̧a̧mi̧ japadërä judi, eami̧ ja̧beparea̧ boi̧chji̧mi̧ da pio ju̧i̧ chjadëri̧ japadërä judi, jabechji̧ ji̧dë u̧i̧ ana̧mi̧ da pio ju̧i̧bo jabepa tänȩtärea̧ ji̧, cjäri̧ madidibe, ja̧bepa tänȩdëpadidibe. Tjamo̧ davä. Pio jiro ja̧beparea̧ ana̧mi̧ da pio ju̧i̧bo a̧de yürüdëpadidibe. 11Ado pio ju̧i̧iä yo̧requededibe ca̧ jadü —yo̧a̧dejȩrȩ—. Danȩrȩ, mȩnȩro̧ pio yoa chirirä dibëa̧ chëre oa chjadëri̧ jidadërä judi, Ütë tjamo̧ judi pio dibëiäpȩmo̧ yürüa̧ chëre pio ju̧i̧ chjadëri̧ jidadërä judi, mȩnȩro̧ dibëa̧ chërera̧ judi yo̧a̧mi̧ japadërä judi, peaja̧di a̧dë chjäte ba chiamȩ pio ju̧i̧ yürüdëpadidibe a̧dëräpȩ ju̧ri̧. 12Ado danȩrȩ, mȩnȩro̧ o ji̧ri̧ ja̧ oa chjadëri̧ jidadërä judi, jibëa̧ pio ju̧i̧ chjadëri̧ jidadërä judi, ¿tjana̧ ju̧i̧iä yürütäremȩdidibe Ütë tjamo̧ judi pio mȩnȩro̧ goapea̧ oa? Cjäri̧ madidibe, mȩnȩro̧ chjadëri̧ jidadë tara, jabechji̧ yürüdëtäremȩdidibe. 13Danȩrȩ, yo̧a̧ri̧ ütëti̧ ja̧ oa ja̧beparea̧mi̧dënȩrȩ. Jabechji̧ mȩnȩro̧ yo̧a̧ri̧ ütëti̧ pio ji̧ri̧ ja̧ oa ja̧bepë yürürä judi, jabechji̧ cja̧rȩmȩ oa ba chia daji̧ri̧rȩ eaparenȩro̧jo̧ȩ, jabo ado cja̧rȩmo̧ oa tjamo̧ri̧ eadëparenȩro̧jo̧ȩ. Cja̧rȩmȩ ja̧ oa chjadëri̧ ja̧bepë yürüparenȩro̧jo̧ȩ, jabo ado cja̧rȩmo̧ pio ju̧i̧ badë da oaiä chjadëri̧ ja̧bepë yürüdëparenȩrȩ pio ju̧i̧ ja̧ oa. Jabechji̧ mȩnȩro̧ chëre pio ju̧i̧ ana̧ri̧ jo̧rȩtaji̧ri̧rȩ ja̧beparä judi, chjadëri̧ ja̧bepaë yürüdëparenȩro̧jo̧ȩ Ütë tjamo̧ pio ju̧i̧iäpȩmo̧, jabo chëre ja̧ mu̧i̧tjoi̧mi̧ dari̧ cjo̧ro̧panȩrȩ. Ado pio ju̧i̧iä yo̧requededibe. Yo̧a̧ri̧ ja̧ oa ja̧beparea̧mi̧dënȩrȩ —yo̧mȩrȩ ni̧bä chjaoa̧dejȩrȩ Jechu judi.
Moicherea̧rȩ go̧ȩparërea̧ ma̧ȩ üdë yuropadëmȩde jabo bucho ana̧mȩde
Mateo 6:24
14Ado pjaricheo judiro̧ pio jiro ma̧ȩ oa ta̧rëa̧ oaiä, ya̧rëreji̧ri̧diro̧jo̧ȩ Jechu ju̧i̧. Tjamo̧ davä. Pjaricheo judiro̧, jibëa̧ chëre oa ea tjamo̧ji̧ri̧ pio judiro̧ Jechurë jibëa̧ jadü pio ji̧ri̧iäpȩmo̧ ni̧bä chjaoa̧ pio ju̧i̧ ta̧rëa̧ oaiä, jabechji̧ ya̧ea̧diro̧jo̧ȩ, Jechu pio ju̧i̧ badë daji̧ri̧rȩ. 15Jabo Jechu judi ja̧di ta̧rëri̧ dëbë yo̧a̧dejȩrȩ:
—Danȩrȩ, mȩnȩro̧ tai̧rä, pumȩ ütëbo ja̧ dachoro tai̧rä, jabechji̧ coëma cjiari̧ cjo̧ro̧ji̧ri̧mi̧ dari̧ tai̧nȩrȩ jabo cjäri̧ madidibe, Ütë tjamo̧ pio judi daba dae chjaodidibe —yo̧a̧dejȩrȩ—. 'Aja̧, ja̧di dari̧ jo̧rȩtadiro̧da, ja̧di dari̧ coëma cjiari̧ cjo̧ro̧cji̧ quëna̧ japaji̧ri̧rȩ cjo̧ro̧diro̧da' quëna̧ jo̧rȩtamȩrȩ cjacjarë dae chjaodidibe dibëa̧ chji̧ oa, mȩnȩro̧ goadirea̧mi̧dëri̧. Ado pio ju̧i̧iä jiadadidibe. Jabo dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧, dëdë, ba chia dadiro̧dibe. Jabo dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧ ba chia da̧ üdë, jabechji̧ ba chiadëde Ütë tjamo̧ ju̧i̧iä jabo a̧dë chjäte cjari̧dami̧ dade ji̧dëri̧ —yo̧a̧dejȩrȩ.
16Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Danȩrȩ —yo̧a̧dejȩrȩ pjaricheo pio ji̧ri̧iäpȩmo̧, —mȩnȩro̧ Juanrea̧ pio judi ma̧na̧rä yuro, uirä go̧e cjaeä chudamȩ pio judirea̧ ma̧na̧rä yuro, Moicherea̧rȩ go̧ȩparërea̧ ma̧ȩrä cjo̧ro̧ marëreji̧ri̧nȩrȩ, Ütërë ea jana̧ chjadüa̧ oa ni̧bäji̧ri̧ pio ji̧ri̧ ja̧ ma̧ȩräbo. Jabo yaba̧ a̧ra̧ano̧a̧ oa cjiade Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ üdë. Ado pio ju̧i̧iä pumȩ no̧i̧dërë ta̧rë ja̧bo chjaoji̧ri̧pea̧diro̧jo̧ȩ pio jiro ma̧ȩ oa, Ütë tjamo̧ ja̧ chja̧oerämo̧ tjamo̧ri̧ cjo̧ro̧tämi̧ cjiaji̧ri̧rȩ. 17Jabo oëra̧ jo̧rȩtadëtäreji̧ri̧nȩrȩ Moicherea̧rȩ go̧ȩparërea̧ ma̧ȩ pio ju̧i̧ chjiari. Jabechji̧ a̧ro̧rȩ Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ oa a̧ra̧ano̧räbo, Moicherë go̧ȩparërea̧ ma̧ȩ üdë ba chiadëpe bagapa ma ja̧didë. Danȩrȩ, a̧dë oa yuropa tänȩpea̧ ji̧, dabu oa goarijä tänȩpea̧ ji̧ chjao tjamo̧täremȩde pumȩ pio ji̧ri̧iä. Jabo danȩrȩ, ji̧dë u̧i̧ chjao tjamo̧täremȩde Ütë tjamo̧ ja̧ ma̧ȩ oa badëparȩpea̧ üdë. Tjamo̧ davä. Eami̧ ma̧ȩ boi̧chji̧ oa badëparȩpea̧ üdë ji̧dë u̧i̧ chjaotäremȩde. Tjamo̧ri̧ yo̧requededibe. Tüdüa̧mi̧ darä cjo̧ro̧pea̧ ma̧ȩ pio ju̧i̧ badëparȩpea̧ ji̧ ji̧dë u̧i̧ chjao tjamo̧täremȩde. Jabechji̧ badëparȩrea̧mi̧dëde —yo̧mȩrȩ ni̧bä chjaoa̧dejȩrȩ.
18Ado Ütë tjamo̧ ja̧ ma̧ȩ oa badëparȩpea̧ pio ju̧i̧ chjiari ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Jabo mȩnȩro̧ Ütë tjamo̧ ja̧ ma̧ȩ pio ju̧i̧ chjiari dabadëchea oa, jabechji̧ chjadëri̧ na̧rȩtämi̧ cjiarequededibe pio judi badëparȩpea̧ pio ju̧i̧ chjiari, cja̧rȩmȩ ma̧ȩ boi̧chji̧mi̧ da üdë badëparȩpea̧ pio ju̧i̧ chjiari. Danȩrȩ, no̧mȩ judi Moicherea̧ judi go̧ȩparëremȩde ëbarea̧ pio ju̧i̧ chjiari, üi̧ üdë jibëa̧ iei̧ ji̧ ëbapea̧ pio ju̧i̧ chjiari. Jabechji̧ ano̧rea̧ decjiari̧ ëbatä go̧ȩparëremȩde. "Cja̧rȩmȩ üdë ja̧borämo̧ jare ano̧a̧ oa cjiami̧ dari̧ cjiade cjiadiäa̧mȩ judi ano̧ mire ëbapea̧ oa" yo̧mȩ ma̧ȩ pio ju̧i̧ go̧ȩparëremȩde. Aja̧, "eami̧ üi̧ judi jibëa̧ iei̧ pio ji̧ ano̧ ëte ado cja̧rȩmo̧ iei̧ ji̧ ano̧ mire ëbarä judi, jabechji̧ chjai̧dëri̧ japadejȩ jënȩ pearä ëbarërea̧ pio ji̧iäpȩmo̧" yo̧mȩ ma̧ȩ pio ju̧i̧ go̧ȩparëremȩde. "Ado eami̧ üi̧ pio judi ëbarä judi, ado cja̧rȩmȩ üi̧rȩ ano̧rërea̧ iei̧ pio ji̧ ëbarä judi, peaja̧di chjai̧dëri̧ japade" yo̧mȩ ma̧ȩ pio ju̧i̧bo go̧ȩparëremȩde. Ado danȩrȩ, Moicherea̧ judi no̧mȩ tjamo̧ri ja̧ ëbarea̧ pio ju̧i̧ chjiari go̧ȩparërea̧ ma̧ȩ üdë jabechji̧ ba chiade. Jabechji̧ jabë ta̧rëdiäpea̧de a̧dë chiquirea̧ decjiari̧. Jabechji̧ cjiamȩde badëparȩrea̧ decjiari̧ —yo̧mȩrȩ ni̧bä chjaorëremȩdejȩrȩ Jechu judi Ütë tjamo̧ ja̧ ma̧ȩ üdë badëparȩpea̧ pio ju̧i̧ chjiari.
Na̧rȩrea̧ ma̧ȩra̧ ni̧bä chjaorëremȩdejȩrȩ pumȩ ji̧ri̧ Dacharo pio ju̧i̧ chjiari chëre ji̧ra̧ tjamo̧ oa goamȩ pio ju̧i̧ chjiaribo
19Ado Jechu judi na̧rȩrea̧ ma̧ȩmi̧ dara̧ yo̧mȩrȩ a̧de yo̧a̧dejȩrȩ:
—Danȩrȩ, cjo̧ro̧rëremȩde cja̧rȩmȩ judi, chëre oa a̧dë chjäte ji̧ra̧ri̧ goamȩ pio judi. Ado chjibo chjacjiamȩ tjamo̧ oa ina̧mȩrȩ cjo̧ro̧rëremȩde coëacoëa oa, ba chia tjamo̧ oa. Jabechji̧ jabëdiädëmȩrȩ cjo̧ro̧rëremȩde, dami̧ti̧ jurarea̧ ba chia oa goamȩrȩ, doti̧mi̧ goae tjamo̧ oa juramȩrȩ. 20Ado pio ju̧i̧ ja̧ bëräpȩ yu̧a̧rea̧ joë ya cotoräpȩ ju̧ri̧ a̧rȩrëremȩde Dacharo quȩmȩ judi, jibëa̧ icjara nö̧tai̧ oa ma̧i̧ da co chiamȩ pio judi. Jabechji̧ pumȩ judiro̧ pio ju̧i̧ ara jädiä chjaoa̧ oaiä, jabechji̧ pio ju̧ri̧pȩ a̧rȩrëremȩde doti̧mi̧. 21Ado Dacharo judi pio ju̧ri̧pȩ a̧rȩa̧ nö̧ta, aure pio judiro̧ bürü chjaorëreji̧ri̧diro̧jo̧ȩ jibëa̧ co oa. Tjamo̧ davä. Judi jurarea̧ pio ju̧i̧ jidatamȩrȩ a̧rȩa̧ nö̧ta, ji̧ra̧ri̧ goamȩ ja̧ mechjari pio judiri cjatäa̧mȩ jurarea̧ pio ju̧i̧ jidata a̧rȩa̧ nö̧ta, jabechji̧ aure pio judiro̧ go̧düdärä chjaorëreji̧ri̧dirȩ jibëa̧ co oa bürü chjaopea̧ oa.
22Jabo ja̧dëa ji̧ japamitë chjätä ëte, chjö̧na̧i̧ti̧ oa cjäri̧ ja̧bomȩ pio judi ja̧borëremȩde. Ado Ütë tjamo̧ ja̧ mu̧i̧tjoi̧ pio judiro̧ ëba baäa̧diro̧jo̧ȩ Abaraa̧rea̧rȩ cjiamȩräpȩ. Ado ji̧ra̧ri̧ go̧arëremȩ pio judiborë ja̧borëremȩde. Ado na̧ra̧diro̧jo̧ȩ. 23Ado ji̧ra̧ri̧ go̧aremȩ pio ju̧i̧ ja̧ tjo üdë baärëremȩde ja̧boa̧ji̧ri̧ pio ji̧ri̧iäpȩ. Ado a̧dë chjäte gitori̧ taramȩrȩ cjiarëremȩde. Ado gatë damȩrȩ darëremȩdejȩrȩ jachi cjiaji̧ri̧ oa. Abaraa̧rea̧ pio ju̧i̧, ado Dacharorea̧ pio ju̧i̧ darëremȩdejȩrȩ. Jabechji̧ Abaraa̧rea̧ pio ju̧i̧ ja̧ yuroro cjiamȩ oa daea̧dejȩ Dacharorea̧ pio ju̧i̧. 24Ado ji̧ra̧ri̧ goaremȩ pio judi ëna̧diäa̧dejȩ: "Ama̧i̧ Abaraa̧, jabechji̧ cjäri̧ri̧ cjia dacoe. Jabechji̧ chjadüjo̧ȩ Dacharo pio ju̧i̧, judi pio coa chjadëri̧ a̧dotä. Jabechji̧ jibëa̧ ichi chjia oa uirä chudeno̧ ëte, ca̧ tjopono̧ro cjatä tänȩtädique uira̧ pio ju̧ri̧ra̧. Jabechji̧ chjupi̧ jätämi̧ cjiarequede. Jabechji̧ ma̧i̧ dari̧ cjo̧dë gärimȩ oaiä gitoi̧ dari̧ cjiarequedequȩ. Chja jabechji̧ chjadüjo̧ȩ" ëna̧diäa̧dejȩ.
25Jabo Abaraa̧rea̧ pio judi dëbë yo̧a̧dejȩ: "Danȩ ca̧ ja, ¿jo̧rȩtadënȩ? Mȩnȩ jabë chirirä cjo̧ro̧a̧ nö̧ta, dami̧ti̧ oa goamȩrȩ cjo̧ro̧rërea̧ ji̧, jabëdiärea̧ decjiari̧ goamȩrȩ cjo̧ro̧rërea̧ ji̧, ¿jo̧rȩtadënȩ? Ado Dacharo pio judi mö̧na̧mȩrȩ cjo̧ro̧rërea̧ ji̧, taramȩrȩ cjo̧ro̧rërea̧ ji̧, ¿peaja̧di jo̧rȩtadënȩ? Dëdë, jo̧rȩta jironȩ. Jabo danȩ, pio yaba̧ domȩ oa ano̧ mire ma̧ chiadëri̧ cjiamȩpea̧de Dacharo pio judi, ado pio mȩnȩ ano̧ mire taramȩpea̧renȩ, a̧dë chjäte gito oa taramȩrȩ. 26Ado pio ju̧i̧ uëri Dacharo pio ju̧i̧ chjadürea̧mi̧dëreconȩ" yo̧a̧dejȩ. "Jabechji̧ ma̧i̧ da a̧rȩmȩ cjara urëdi tjamo̧rȩ tuti a̧rȩdiibe eami̧ pumȩrȩ chjätärea̧mi̧dëri̧. Jabechji̧ tutia̧ oa cjiarea̧rȩ a̧ro̧rȩ pio ju̧ri̧pȩ järea̧mi̧dëri̧. Ado pio mȩnȩborë tutia̧ oa cjiarenȩ, pio jauëräpȩmo̧ ma̧na̧rea̧mi̧dëri̧. Jabechji̧ ma̧i̧ da cjara üdë urëdi tjamo̧rȩ tuti a̧rȩdiibe chjätärea̧ decjiari̧" yo̧mȩrȩ dëbë yo̧rëremȩdejȩ Abaraa̧rea̧ judi ji̧ra̧ri̧ goaremȩ pio ju̧i̧iäpȩmo̧.
27Ado ji̧ra̧ri̧ goaremȩ pio judi pio ju̧i̧ ta̧rëa̧ oaiä yo̧a̧dejȩ Abaraa̧rea̧ pio ju̧i̧ ado chjereno̧: "Jabo danȩ Ama̧i̧ Abaraa̧, jabechji̧ cjäri̧ri̧ cjia ta̧rëcoe. Jabechji̧ mȩnȩ Dacharo oa pio jauëräpȩmo̧ chjadürea̧ dadëräbo, jabechji̧ ca̧ ama̧i̧rȩ cjo̧ro̧mȩ ja̧ bëräpȩ ano̧ mire chjadütäremerenȩjo̧ȩ. 28Jabechji̧ pio coadi ja̧ji̧ri̧ pio ji̧ri̧ ëbarëremȩrequedejȩrȩ cja̧rȩichimo̧ oa. Ado pio ji̧ri̧iäpȩmo̧ uapai̧ ta̧rëri̧ chi̧dëeatäremȩdejȩrȩ jabërä, pio judiro̧borë pio jauëräpȩmo̧ aeno̧a̧ oa cjiachea oa, pio judiro̧borë a a ma̧ cjiamȩräpȩ tutia̧ oa cjiachea oa. Jabechji̧ chjadëri̧ chjadüjo̧ȩ" yo̧rëremȩdejȩ. 29Jabo Abaraa̧rea̧ judi dëbë yo̧a̧dejȩ: "Cjäri̧ madejȩrȩ, jabechji̧ peadëri ja̧ uapai̧ ta̧rëri̧ chi̧dëea̧ oa cjiarëreji̧ri̧dirȩ Moicherea̧rȩ go̧ȩparërea̧ ma̧ȩ pio ju̧i̧iä, Ütërë ea jana̧ chjadüa̧ oa ni̧bärëreji̧ri̧ pio judiro̧ yo̧a̧ pio ju̧i̧iä. Jabechji̧ pio jiro ma̧ȩ oa ta̧rë ja̧boa̧täreji̧ri̧diro̧jo̧ȩ" dëbë yo̧rëremȩdejȩ Abaraa̧rea̧ judi. 30Jabo ji̧ra̧ri̧ goaremȩ pio judi bücjüri̧ cjia tjamo̧pe bagamȩrȩ ado dëbë yo̧a̧dejȩ: "Aja̧ ama̧i̧ Abaraa̧, ta̧rërequedemȩ jabo cjäri̧ madirȩ, pio jiro ma̧ȩ oa ta̧rë ja̧bodëpadiro̧jo̧ȩ jabo cja̧rȩmȩ üdë, ja̧boa̧remȩ pio judi, bëdüa̧ oa cjiamȩ pio judi pio ji̧ri̧iäpȩ go̧düdärärä judi, pio ji̧ri̧iäpȩmo̧ chi̧dëearä judi, dëdë, pio ju̧i̧ ta̧rë ja̧bopai̧ dadiro̧jo̧ȩ. Ado judiro̧ chjai̧dëri̧ japea̧ pio ju̧i̧ chjiari ano̧ mire jo̧rȩta ëte, Ütë tjamo̧ pio ju̧i̧iäpȩmo̧ quëna̧pai̧ dadiro̧jo̧ȩ. Chja jabechji̧ chjadüjo̧ȩ Dacharo pio ju̧i̧" yo̧mȩrȩ yo̧a̧dejȩ.
31Jabo Abaraa̧rea̧ pio judi ado dëbë yo̧a̧dejȩ: "Cjäri̧ madirȩ, bëdüa̧ oa cjiamȩ pio ju̧i̧ ta̧rë ja̧bodëpadiro̧jo̧ȩ. Jabechji̧ judiro̧ Moicherea̧rȩ go̧ȩparërea̧ ma̧ȩ pio ju̧i̧ ta̧rë ja̧bodërä judi, ado Ütërë ea jana̧ chjadüa̧ oa ni̧bäji̧ri̧ pio judiro̧ yo̧a̧ duri pio ju̧i̧ ta̧rë ja̧bodërä judi, peaja̧di ta̧rë ja̧bodëpadiro̧jo̧ȩ bëdüa̧mȩ ju̧i̧. Jabechji̧ ja̧boa̧remȩ pio judi bëdü ëte ni̧bä chjaoräbo, irä chi̧dëearäbo, jabechji̧ ta̧rë ja̧bodëpadiro̧jo̧ȩ" dëbë yo̧rëremȩdejȩ Abaraa̧rea̧ judi ji̧ra̧ri̧ goaremȩ pio ju̧i̧iäpȩmo̧.
Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧, pjaricheo pio ji̧ri̧iäpȩmo̧bo.
Currently Selected:
Lucas 16: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved