Lucas 15
15
Dabadëpea̧mȩ oveja pio ju̧i̧ chjiari ni̧bärëremȩdejȩrȩ Jechu judi na̧rȩrea̧ ma̧ȩmi̧ dara̧
Mateo 18:10-14
1Ado cja̧rȩmo̧ doremȩrä, pumȩ pio judiro̧ no̧i̧dërë järëreji̧ri̧dirȩ Jechu pio ju̧i̧iäpȩ, pio ju̧i̧ chjadëri̧ ta̧rëpea̧ oa. Domano ja̧ oa chëre boaji̧ri̧ pio judiro̧, ado chjai̧dë oa ji̧dë ma jape chjaoji̧ri̧ pio judiro̧borë goëdepea̧diro̧jo̧ȩ. 2Jabo Jechu judi pio ji̧ri̧ nö̧ta ëba cjiaji̧ri̧ oa irä daea̧ oaiä, goaedëri̧ ni̧bäji̧ri̧pea̧dirȩ pjaricheo judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë. Tjamo̧ davä. Jechu pio ju̧i̧ chjiari goaedëri̧ ni̧bäji̧ri̧pea̧dirȩ jibëa̧ dëbëti̧ra̧ chia. Ado ja̧di ta̧rëri ni̧bärëreji̧ri̧dirȩ:
—Danȩrȩ, pio yodëje chjadëri̧ jeadejȩrȩ chjai̧dëri̧ jape cjiaji̧ri̧ pio ji̧ri̧iäpȩmo̧ —yo̧a̧dirȩ—. Jabechji̧ pio jiro pumȩ chjadëdë pio ji̧ri̧ putu jura̧ a̧dë chami̧ dari̧ japatärea̧ ji̧, jënȩ chjai̧dë gȩrȩ chiami̧ dari̧ cjiadiächea oa putu jura̧ a̧dë chami̧ dari̧ japatärea̧ ji̧, cjäri̧ madejȩrȩ, japadë madejȩrȩ jabo ji̧dë ma ëba cjia chjaodejȩrȩ. Ado pio ji̧ri̧ nö̧ta ji̧dë ma ëba jura chade ji̧dëri̧. Ma̧i̧ dari̧ japade —yo̧a̧dirȩ, goaedëri̧ ni̧bäji̧ri̧rȩ.
3Jabo judiro̧ ja̧di ta̧rëri̧ yo̧a̧ oaiä, Jechu judi tjarari̧ na̧rȩrea̧ ma̧ȩmi̧ da oa ni̧bä chjaorëremȩdejȩrȩ. Ja̧di ta̧rëri̧ yo̧mȩrȩ ni̧bä chjaoa̧dejȩrȩ:
4—Danȩrȩ, pumȩ judi oveja oa goamȩrȩ cjo̧ro̧rä judi, oveja ji̧ra̧ tjamo̧ oa goarä judi, 100 oveja goarä judi, ¿chjadëri̧ jidadëpadejȩrȩ? Dëdë, ütëbodäräti̧ oa chjadëri jidapadejȩrȩ, 'pio judimo̧rȩ ba chiadëdida' quëna̧rea̧ decjiari̧. Pio ju̧i̧iä cja̧rȩmȩ ovejarë dabadëpe järä judi, ¿tjana̧ japapade? Tjana̧ japadë, jabechji̧ na̧e jäpadejȩ. Pio ju̧i̧iämȩrȩ jabechji̧, 99 oveja pio ji̧ri̧, dabadëpadëa̧ pio ji̧ri̧ a̧dë jäpadejȩrȩ. Chiri maearäpȩ jura cjiaji̧ri̧ oa a̧dë jäpadejȩrȩ, pio ji̧ri̧ a̧dë jo̧rȩtamȩmi̧ dari̧. Ado jämȩrȩ na̧e tai̧pade davä, dabadëpea̧mȩ pio ju̧i̧ chjadëri dadäräa̧rä yuro. 5Ado pio ju̧i̧ dadäräa̧rä, jabechji̧ ma̧ chiadëri̧ cjiamȩrȩ mitëpadejȩ. Ado jibëa̧ ca̧toro idë gatë ëte, 6jabechji̧ i̧a̧ baäpadejȩ. Aja̧, ja̧di dari̧ japapadejȩ jibëa̧ oveja ba chia oa. Ado baädärä ëte, ëna̧diäpadejȩrȩ jibëa̧ pumȩ ji̧ri̧, jibëa̧ bë queri̧ cjo̧ro̧ji̧ri̧ pio ji̧ri̧bo. Ado yo̧padejȩrȩ, "Danȩrȩ, ëba ma̧ chiadëri̧ cjiachji̧coe" yo̧padejȩrȩ. "Jabechji̧ dabadëpea̧ oa cjiaremȩ oveja pio ju̧i̧ dadäräa̧recuni̧quȩ. Pio ju̧i̧ mitëa̧recuni̧quȩ ado chjereno̧ chjadëri̧ jidapea̧ oa. Pio ju̧i̧iä jabechji̧, ma̧ chiadëri̧ cjiaji̧ri̧rȩ ëba a̧dopatäreji̧ri̧rea̧rȩ. Jaeibe!" yo̧mȩrȩ yo̧padejȩrȩ.
7Ado danȩrȩ —yo̧a̧dejȩrȩ Jechu judi—. Peaja̧dimi̧ dari̧ ma̧ chiadëri̧ cjiadirȩ a̧dëräpȩji̧ri̧ judiro̧. Jabechji̧ eami̧ pumȩ üdë cja̧rȩmȩrȩ chjere jo̧rȩtarä judi, jënȩ chjai̧dëri̧ japea̧ pio ju̧i̧ chjiari chjere jo̧rȩtarä judi, jabechji̧ a̧dë chjäte ma̧ chiadëri̧ cjiadirȩ. Ado o ji̧ri̧iä, 99 pumȩ pio ji̧ri̧iä, jabechji̧ coëma cjiari̧ cjo̧ro̧ji̧ri̧ pio ji̧ri̧iä, peaja̧di ma̧ chiadëri̧ cjiadirȩ. Jabo eami̧ pumȩ üdë chjere jo̧rȩta̧ pio ju̧i̧iä, Ütë tjamo̧ ja̧ no̧mi̧ darä ado chjereno̧ cjo̧ro̧pea̧ oa chjere jo̧rȩta̧ pio ju̧i̧iä, jabechji̧ ji̧dë u̧i̧ ma̧ chiadëri̧ cjiapadirȩ —yo̧mȩrȩ ni̧bä chjaorëremȩdejȩrȩ Jechu judi.
Dabadëpea̧ chëre boi̧chji̧ pio ju̧i̧ chjiari ma̧ȩ oa ano̧ mire ni̧bä chjaorëremȩdejȩrȩ na̧rȩrea̧ ma̧ȩmi̧ dara̧
8Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Danȩrȩ, iei̧ jini̧ chëre bori̧ goarä judi, ichi chjö̧na̧i̧ chëre bori̧ goarä judi, parata quȩmȩ chjiparari chiamȩ chëre oa goarä judi, jabechji̧ chjadëri̧ boeapanȩjȩ. Ba chia tjamo̧ oa chjadëri boeapanȩjȩ. Jabo cja̧rȩmȩ chëre üdë dabadëpea̧rä judi, jibëa̧ jo̧ro dabadëpea̧rä judi, ¿tjana̧ japapanȩ? Tjana̧ japadë, jabechji̧ tataparea̧ pio ju̧i̧ chjaodëri̧ cjitëparȩ ëte, chja̧oë ana̧panȩ oëra̧ti̧ oa, darea̧mi̧dëräbo. Järi tjamo̧yi̧rȩ na̧panȩjȩ chjadëri̧ dadäräa̧rä yuro. 9Ado jini̧ dadäräa̧rä, jabechji̧ ëna̧dieno̧panȩjȩrȩ jibëa̧ pumȩ ji̧ri̧, jibëa̧ bë queri̧ cjo̧ro̧ji̧ri̧ pio ji̧ri̧bo. Ado yo̧panȩjȩrȩ, "Danȩrȩ, ëba ma̧ chiadëri̧ cjiachji̧coe. Dabadëpea̧ oa cjiaremȩ chëre boi̧chji̧ pio ju̧i̧ dadäräa̧recuni̧quȩ. Ado chjereno̧ goarecuni̧quȩ. Pio ju̧i̧iä ma̧ chiadëri̧ cjia tjamo̧requede" yo̧panȩ. 10Ado peaja̧dimi̧ dari̧ ma̧ chiadëri̧ cjiapadirȩ Ütë tjamo̧ ja̧ mu̧i̧tjoi̧ pio judiro̧ a̧dëräpȩ ju̧ri̧. Tjamo̧ davä. Eami̧ pumȩ judi, cja̧rȩmȩrȩ, chjai̧dëri̧ cjo̧ro̧mȩ pio judi chjere jo̧rȩta̧ oaiä, jabechji̧ ma̧ chiadëri̧ cjiapadirȩ —yo̧mȩrȩ ni̧bä chjaorëremȩdejȩrȩ Jechu judi chëre boi̧chji̧ pio ju̧i̧ chjiari.
Dabadëparemȩ joja pio ju̧i̧ chjiari ano̧ mire ni̧bä chjaorëremȩdejȩrȩ Jechu judi na̧rȩrea̧ ma̧ȩmi̧ dara̧
11Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ. Ja̧di ta̧rëri̧ a̧de yo̧a̧dejȩrȩ:
—Cja̧rȩmȩrȩ cjo̧ro̧rëremȩde pumȩ judi —yo̧a̧dejȩrȩ—. Yo̧a̧ri̧ ja ëbamȩrȩ cjo̧ro̧rëremȩde. 12Ado durimȩ pio judi yo̧a̧dejȩ jäja pio ju̧i̧iäpȩmo̧: "Dane ama̧i̧, na̧ea̧remȩ pio ju̧i̧, mȩnȩ pio coaiäpȩmo̧ yürüpea̧ oa goë boea̧ pio ju̧i̧ yürütä earequedemȩ pio yaba̧" yo̧a̧dejȩ. "Jabechji̧ mȩnȩ ja̧boa̧ duri oa mitëtärea̧ ji̧, jabechji̧ pio yaba̧ eareconȩ jo̧ȩra̧pe. Yürücoe" yo̧a̧dejȩ. Ado jäja judi pio ju̧i̧ ta̧rëa̧ oaiä, chjarapë yürürëremȩdejȩrȩ jibëa̧ u̧ri̧ yo̧a̧ri̧ pio ji̧ri̧iäpȩmo̧, jibëa̧remȩ pio ju̧i̧. Ütara̧mi̧ yürüchärëremȩdejȩrȩ. Baca oa, oveja oa, cameyo oa, buro oa, chëre oa, dami̧ti̧ oa, yürüchäa̧dejȩrȩ o oa.
13Ado do ji̧ra̧ tjamo̧dë chjätä ëte, durimȩ pio judi jibëa̧remȩ pio ju̧i̧ gatë tänȩchärëremȩdejȩ chjö̧na̧i̧ oa. Jibëa̧ ama̧i̧ judi pio jȩaiäpȩmo̧ yürüa̧ pio ju̧i̧ gatë tänȩchäa̧dejȩ chëre boapea̧ oa. Ado ja̧di dari̧ japa ëte, baärëremȩde. Chëre ji̧ra̧ri̧ goamȩrȩ baäa̧de. Jachi tjamo̧räpȩ baäa̧de ado cja̧rȩmo̧ chiriräpȩ. Ado ju̧ri̧pȩ go̧düdärä ëte, jabechji̧ jënȩ jo̧rȩtami̧ japamȩpea̧de chji̧ cotomȩmi̧ dari̧. Eami̧ oa ja̧bepadëa̧de jabomo̧ ji̧dë ma chjaocjiami̧ dari̧ cjo̧ro̧rëremȩde japëtaramȩmi̧ darë. Chjadëri̧ japatärea̧ ji̧, ütara̧mi̧ japatärea̧ ji̧, jabechji̧ dami̧ti̧ chjai̧dë oa goaramȩpea̧de, jibëa̧ chëre oa badëri̧ aeno̧ chjaomȩrȩ. 14Ado pio ju̧i̧iä chjaodëri̧ goarijärëremȩde jibëa̧ chëreremȩ üdë. Jibëa̧ ama̧i̧ pio judi pio jȩaiäpȩmo̧ yürüa̧ chjö̧na̧i̧rȩ, jabechji̧ japamitë chjätä ëte yuropea̧de. Ado pio ju̧i̧iä bë mapea̧de. Ado pio jiro japamitërä, jibëa̧ chëre üdë chjö̧na̧i̧rȩ goarijäa̧rä, jabechji̧ pio jiro chiri üdë jurarea̧ yürüdëmȩpea̧de. Chjadëri̧ yürürërea̧ ji̧, jurarea̧ yürüdëmȩpea̧de. Jabechji̧ jurarea̧ decjiapea̧de. Ado judi chjadëri̧ juramȩrȩ cjo̧ro̧rërea̧ ji̧, mö̧na̧ tjamo̧mȩrȩ ano̧ mire cjiadiäa̧de, chjö̧na̧i̧ti̧ oa cjäri̧ ja̧bo tjamo̧mȩrȩ. Acä queo queo eari̧ chiamȩpea̧de. 15Ado pio ju̧i̧iä tarupea̧de ja̧bepapea̧ ji̧. Ado pio jiro chiriräpȩ cjo̧ro̧mȩ pio judi jida tänȩa̧ oa ja̧bepamȩpea̧de, aboea oa jidamȩrȩ.#15:15 Aboea üdë judio pio ji̧ri̧iä juradërea̧de. China̧chjade ji̧dëri̧. Aboea pio ji̧ri̧ ea tjamo̧dëdiro̧jo̧ȩ. Ado aboea pio ji̧ri̧ jida̧ üdë, peaja̧di a̧dë chjäte goaedëti̧täremȩdejȩ. Jabo pio jiro judio üdë ta̧mȩcho̧ ja̧bo tjamo̧mȩrȩ cjo̧ro̧a̧ oaiä, ado mö̧na̧ tjamo̧mȩrȩ cjo̧ro̧a̧ oaiä, jabechji̧ ja̧beparea̧ chjadëdë pio ju̧i̧ ja̧bepamȩpea̧de, a̧dë chjäte cjäri̧ ja̧bomȩrȩ cjo̧ro̧rërea̧ oaiä. 16Jabo ja̧bepamȩborë chjadëri̧ cjo̧ro̧dërëremȩde jabo. Jabechji̧ ta̧mȩcho̧ ja̧bo tjamo̧mȩrȩ cjo̧ro̧rëremȩde. Pio ju̧i̧iä aboea ja̧ jurarea̧ pio ju̧i̧bo jura̧täremȩdejȩ. Tjamo̧ davä. Cho chiamȩ joë pio ju̧i̧bo jura̧täremȩdejȩ, jabo cjäri̧ madiro̧jo̧ȩ, tjamo̧ ja̧bepaji̧ri̧ pio judiro̧ jura tänȩdëa̧diro̧jo̧ȩ.
17Ado ja̧dëa ji̧ chjadëri̧ jo̧rȩtadërërea̧ ji̧, coëma cjiari̧ jo̧rȩtadërërea̧ ji̧, poë cürë jo̧rȩtamȩpea̧de. Jënȩ cjo̧ro̧rërea̧räpȩ jo̧rȩtamȩpea̧de. 'Cjäri̧ maquëda, conȩgapea̧quëda, ma̧ jürümi̧ cjiaquëda, jabo ca̧ ama̧i̧ ja̧ mu̧i̧tjoi̧ pio judiro̧ mairi̧ juradiro̧da, goarijärea̧mi̧dëri̧ juradiro̧da, ta̧mȩcho̧ ja̧bodë madiro̧da, jabo ta̧mȩcho̧ ja̧boa̧ pio ju̧i̧iä quȩ ma cjiari̧ ja̧bopai̧ daquëda' quëna̧ jo̧rȩtamȩpea̧de ja̧di dari̧ jo̧rȩtadërërea̧ ji̧. 18'Aja̧, cjitëno̧ ëte baätäremȩquëda, ca̧ ama̧i̧ pio ju̧i̧iäpȩ baäpea̧ chiaquëda, ado cüdë pio ju̧i̧ dadäräa̧rä, irä ni̧bä chjaotäremȩcuni̧da, cüdë Ütë tjamo̧ pio ju̧i̧iäpȩmo̧ chjai̧dëri̧ japea̧ pio ju̧i̧ chjiari ni̧bä chjaotäremȩcuni̧da, ado coa nö̧rimȩ pio ju̧i̧iäpȩmo̧ chjai̧dëri̧ japea̧ pio ju̧i̧ chjiaribo ni̧bä chjaotäremȩcuni̧da' quëna̧ jo̧rȩtamȩpea̧de, ana̧ri̧ jo̧rȩtamȩrȩ. 19'Aja̧, coa nö̧rimȩ pio ju̧i̧ ni̧bäpacuni̧da, "Aja̧, na̧ jamȩrȩ cjo̧ro̧pea̧ ji̧ nö̧tadë marequede" yo̧pacuni̧da, jabo jabechji̧ na̧ mu̧i̧tjoi̧mi̧ da oa dacoe" yo̧pacuni̧da' quëna̧ jo̧rȩtamȩpea̧de, ana̧ tjamo̧ri̧ jo̧rȩtamȩrȩ.
20Ado ano̧ mire jo̧rȩtamȩrȩ cjitëno̧a̧de. Ado taruparëremȩde jibëa̧ ama̧i̧ pio ju̧i̧iäpȩ baäpea̧ oa, jachi tjamo̧ a̧rȩmȩ chiriräpȩ baäpea̧ oa, jënȩ cjo̧ro̧rërea̧räpȩ baäpea̧ oa. Ado japamitë ana̧ chjätä ëte, jäja ja̧ chiriräpȩ go̧düdäräa̧de. Ado jabë jachi ma̧na̧mȩ oa jibëa̧ ama̧i̧ pio judi darëremȩdejȩ. 'Ca̧ jadica̧da, pio coa a̧dë baärëremȩ pio judidica̧da' quëna̧ jo̧rȩtamȩrȩ cjäri̧ri̧ cjia darëremȩdejȩ. Ado chjaodëri̧ jäcjieno̧a̧dejȩ ma̧na̧mȩ oa dëbëdiäpea̧ oa. Ado pio ju̧i̧iäpȩ go̧düdäräa̧mȩrȩ ida̧dejȩ. Chjuari̧ ida̧dejȩ. Ida chjaoa̧dejȩ. Ado chamachoro i̧bua̧dejȩ peaja̧di. 21Ado joja üdë yo̧a̧dejȩ jibëa̧ ama̧i̧ ju̧i̧iäpȩmo̧: "Cjäri̧ marequede ama̧i̧, Ütë tjamo̧ pio ju̧i̧iäpȩmo̧ chjai̧dëri̧ japea̧reconȩ. Ado pio mȩaiäpȩmo̧bo chjai̧dëri̧ japea̧requedemȩ ama̧i̧. Jabo cjäri̧ri̧ cjia dacoe. Na̧ jarequede jabo na̧ jamȩrȩ cjo̧ro̧pea̧ ji̧ nö̧tadërequede" yo̧a̧dejȩ.
22Jabo cjäri̧ madejȩ, jäja pio judi jibëa̧ ja pio ju̧i̧ ni̧bädärärea̧ yürütärea̧ ji̧, a̧dë chjäte ma̧ chiadëri̧ cjiamȩrȩ tuti ëna̧diäa̧dejȩrȩ jibëa̧ mu̧i̧tjoi̧ ji̧ri̧: "Jo̧ȩra̧pechji̧vä" yo̧a̧dejȩrȩ. "Chjibo chjacjiamȩ tjamo̧ oa goa janeno̧chji̧vä pio ju̧i̧ chjadëri̧ ina̧ tänȩpea̧ oa. Jabechji̧ mu̧i̧tjoi̧mi̧ dari̧ ina̧rea̧mi̧dëde ca̧ ja üdë. Ado danȩrȩ, ichi chaärea̧ ba chiara̧ pio ju̧ri̧ra̧ chaä tänȩchji̧jo̧ȩ peaja̧di. Ado pio ju̧i̧ uëri ta joë oa a̧de goa jana̧chji̧vä chjadëri̧ go̧iopea̧ oa. Jabechji̧ ma̧na̧diquȩ ca̧ ja üdë. Jo̧ȩra̧pechji̧vä" yo̧mȩrȩ ëna̧diärëremȩdejȩrȩ. 23Ado a̧de yo̧mȩrȩ pio yoa ma̧ȩbo ëna̧diäa̧dejȩrȩ: "Ado danȩrȩ, baca boi̧ oa, yo̧ cjiamȩ oa gunȩno̧chji̧vä. Airi̧ cjia airi̧ cjia juraji̧ri̧rȩ a̧dopapea̧ chiarea̧rȩ. 24Jabechji̧ ca̧ ja pio judi ja̧boa̧mi̧ dari̧ cjiarërea̧ ji̧, bëdüa̧ oa cjiami̧ dari̧ cjiadiquȩ yaba̧. Dabadëpea̧ oa cjiami̧ dari̧ cjiarërea̧ ji̧, dadäräa̧ oa cjiami̧ dari̧ cjiamȩpea̧de yaba̧. Irä ëbareconȩ ado chjereno̧. Pio ju̧i̧iä a̧dopapea̧ chiarea̧rȩ airi̧ cjiaji̧ri̧rȩ. Jo̧ȩra̧pȩchji̧vä" yo̧a̧dejȩrȩ. Ado bë ana̧mȩ pio judi jibëa̧ mu̧i̧tjoi̧ pio ji̧ri̧ yo̧a̧mi̧ japeno̧a̧dirȩ chjaodëri̧. Ado chjö̧na̧i̧ oa jëdano̧ ëte, taruparëreji̧ri̧dirȩ airi̧ cjia airi̧ cjia a̧dopapea̧ ji̧.
25Jabo judiro̧ a̧dopea̧ nö̧ta, jojadi pio judi ja̧beparëremȩde tjadoräpȩ. Ado ja̧dëa ji̧ judi baäa̧rä, bë queri̧räpȩ go̧düdäräa̧rä, mai̧ ta̧rëri̧ gürë ea cjiaji̧ri̧ oa ta̧rëa̧dejȩrȩ pumȩ ji̧ri̧. Care care guarea̧ra̧ japaji̧ri̧ oa, bochegua bochegua cjiaji̧ri̧ oa ta̧rërëremȩdejȩrȩ. 26Ado '¿tjana̧ japacjivadi?' quëna̧ jo̧rȩtamȩrȩ iëno̧ë ta̧rëa̧dejȩ jibëa̧ mu̧i̧tjoi̧ ju̧i̧: "Danȩ" yo̧a̧dejȩ, "chjadëri̧ yo̧coe. ¿Tjana̧pea̧ oa gürë ea cjiadirȩ? ¿Tjana̧ japadirȩ? "iëno̧ë ta̧rëa̧dejȩ. 27Ado jibëa̧ mu̧i̧tjoi̧ pio judi dëbë yo̧a̧dejȩ: "Tjana̧ japadë, jabechji̧ ma̧na̧de na̧ ayi̧ma̧i̧ judi, dabadëparëremȩ pio judi. Chjadëri̧ ma̧na̧de, gito ja̧bodëmȩrȩ. Pio ju̧i̧iä na̧ ama̧i̧ judi baca boi̧ pio ju̧i̧ gu̧nȩno̧a̧dejȩ yo̧ tjamo̧ oa. Ado pio ju̧i̧iä airi̧ cjia airi̧ cjia juraji̧ri̧rȩ a̧dopadirȩ, ma̧ chiadëri̧ cjia tjamo̧ji̧ri̧rȩ" yo̧a̧.
28Jabo jojadi pio judi pio ju̧i̧ ta̧rëa̧ oaiä, cjäri̧ madejȩ, goëdëri̧ cjia tjamo̧pea̧de, ma̧ cjüëtü tjamo̧mȩrȩ. Bëräpȩ chjadëri̧ yu̧a̧tärea̧ ji̧, joji̧ri̧ ja pio ju̧i̧ chjadëri̧ jeatärea̧ ji̧, cjäri̧ made, dairäpȩ cjiadiäa̧de yu̧a̧dëri̧ cjiamȩrȩ. Ado jäja pio judi dairäpȩ cjiadiäa̧mȩ pio ju̧i̧ chjiari ta̧rëa̧ oaiä, go̧deno̧a̧de pio ju̧i̧ ni̧bä chjaopea̧ oa. Chjadëri̧ yu̧a̧tä yo̧tarëremȩdejȩ. Japamitë chi̧dëeatarëremȩdejȩ jabo cjäri̧ madejȩ, ta̧rë ja̧bodëa̧dejȩ. Jäja pio ju̧i̧ chjuari̧ jiade ta̧rëa̧dejȩ. 29Ado ja̧dëa ji̧ jäja pio ju̧i̧ dëbë yo̧dërërea̧ ji̧, ja̧di ta̧rëri̧ dëbë yo̧a̧dejȩ: "Danȩ, ui ji̧ra̧ tjamo̧ri ja̧ na̧ mu̧i̧tjoi̧mi̧ dari̧ ja̧bepe cjiarequede na̧ea̧ pio ju̧i̧" yo̧a̧dejȩ. "Chjadëri̧ ja̧bepë yürürëremȩrequedemȩ peadëri ja̧. Cja̧rȩmȩ co jiadadëa̧requedemȩ jabo mȩnȩ yo̧a̧mi̧ japadäräa̧reconȩ cjiadiädëri̧. Jabo cjäri marenȩ" yo̧a̧dejȩ. "Mȩnȩ pio coaiäpȩmo̧ chjadëri̧ yürütärea̧ ji̧, eami̧ chivo pëi̧ chja oa chjadëri̧ yürütärea̧ ji̧, cüdë ca̧ pumȩ pio ji̧ri̧ nö̧ta airi̧ airi̧ cjia airi̧ cjia juraji̧ri̧rȩ ëba a̧dopapea̧ oa yürütärea̧ ji̧, cjäri marenȩque, yürüdëa̧renȩque. Na̧ea̧ pio ju̧i̧ chjadëri̧ ja̧bepë yürüa̧mȩbo oa, yürüdëa̧renȩque. 30Jabo ma̧i̧ dari̧ japarëremȩ pio judi ma̧na̧rä, na̧ ja pio üdëje ma̧na̧rä, cjäri marenȩ, baca boi̧ pio ju̧i̧ chjaodëri̧ gu̧nȩno̧a̧renȩ yo̧ cjia oa. Ado na̧ ja judi, cjäri̧ madejȩ, mȩnȩ yürüa̧ chëre pio ju̧i̧ chjadëri̧ jidatärea̧ ji̧, mȩnȩ boa̧ chëreremȩ pio ju̧i̧ chjadëri̧ jidatärea̧ ji̧, cjäri̧ made, oari goaraji̧ri̧ pio ji̧ri̧iäpȩmo̧ ma badëri̧ aeno̧rëremȩ jirodejȩ idi̧ dari̧ japapea̧ oa, oari goaraji̧ri̧ pio ji̧ri̧ ëba mo̧a̧ chjaopea̧ oa. Ado ja̧dëa ji̧ pio judi, ma̧i̧ dari̧ japamȩ pio judi ma̧na̧rä, ä, chjaodëri̧ gu̧nȩno̧a̧renȩ baca boi̧ oa. Cjäri̧ marenȩ. Japarea̧mi̧dë pio ju̧i̧ japeno̧a̧renȩ ama̧i̧" yo̧mȩrȩ dëbë yo̧rëremȩdejȩ jäja pio ju̧i̧iäpȩmo̧ joja yabomȩ pio judi.
31Jabo jäja pio judi dëbë yo̧a̧dejȩ jibëa̧ ja pio ju̧i̧iäpȩmo̧: "Danȩ ca̧ ja, ji̧dë ma ëba cjo̧ro̧renȩque no̧mȩ tjamo̧ri ja̧" yo̧a̧dejȩ. "Ado jabechji̧, ji̧dë ma ma̧ chiadëri̧ cjiamȩrȩ darequedemȩ. Eadë eadë dadërequedemȩ jabo pio mȩabo ba chia darequedemȩ. Ado ca̧ea̧remȩ pio judi, cüdë mȩa yürürërea̧ chjö̧na̧i̧rȩ jabechji̧ na̧ea̧ maeade. 32Ado yaba̧ na̧ ayi̧ma̧i̧ pio judi ma̧na̧ tara, jabechji̧ chjadëde a̧ro̧rȩ pio ju̧i̧di airi̧ cjia airi̧ cjia ëba a̧dopapea̧ ji̧. Na̧ ayi̧ma̧i̧ pio judi ja̧boa̧mi̧ dari̧ cjiarërea̧ ji̧, jabechji̧ bëdüa̧ oa cjiami̧ dari̧ cjiade yaba̧. Ado dabadëpea̧ oa cjiami̧ dari̧ cjiarërea̧ ji̧, jabechji̧ dadäräa̧ oa cjiami̧ dari̧ cjiade. Ado pio ju̧i̧iä jabechji̧, airi̧ cjia airi̧ cjiaji̧ri̧rȩ ëba a̧dopapea̧de" yo̧mȩrȩ yo̧rëremȩdejȩ joja oa jäja pio judi.#15:32 Ja̧di ta̧rëri̧ yo̧mȩrȩ dëbë ni̧bä chjaorëremȩdejȩrȩ Jechu judi pio jȩa chjiari goaedëri̧ ni̧bäreji̧ri̧ pio ji̧ri̧iäpȩmo̧, pjaricheo pio ji̧ri̧iäpȩmo̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧. 'Dabadëpea̧ oa cjiami̧ dari̧ cjiamȩ pio ju̧i̧ na̧pea̧ üdë ba chiadida, eami̧ pumȩ chjai̧dë oa na̧pea̧ üdë ba chiadida, ado cja̧rȩmȩ pumȩrȩ ano̧ mire jo̧rȩtapea̧ üdë peaja̧di a̧dë chjäte ba chia tjamo̧dida' quëna̧ jo̧rȩtapea̧ oa dëbë ni̧bä chjaorëremȩdejȩrȩ Jechu judi. Ado judiri cjiadiäa̧de.
Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ pjaricheo ji̧ri̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ Jechu judi.
Currently Selected:
Lucas 15: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved