Lucas 14
14
Jechu judi pumȩ üi̧ oa chjaparȩdejȩ cjiadiärea̧ doro
1Ado cja̧rȩmo̧ doremȩrä, cjiadiärea̧ doro, Jechu pio judi jurerëremȩde tjamo̧ yo̧mȩ pjaricheo ja̧ bëräpȩ. Ado pjaricheo judiro̧ orë järi tjamo̧ji̧ri̧rȩ a̧dë darea̧ decjiari̧ ütarë garë dae chjaorëreji̧ri̧diro̧jo̧ȩ Jechu ju̧i̧ tjamo̧ yo̧mȩ ja̧ bëräpȩmȩ oa. 2Ado pio ju̧ri̧pȩrëremȩde gito ja̧bomȩ judi peaja̧di. Jabechji̧ jibëa̧ ichi ju üdë, jibëa̧ yai juborë a̧dë chjäte ma̧ri̧ tjamo̧pe bagarëremȩde, chjadëri̧ cjo̧ro̧rea̧mi̧dëri̧. 3Ado Jechu judi pio ju̧i̧ daea̧ oaiä, iëno̧ë ta̧rëa̧dejȩrȩ pjaricheo pio ji̧ri̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧. Ja̧di ta̧rëri̧ yo̧mȩrȩ iëno̧ë ta̧rëa̧dejȩrȩ:
—Danȩrȩ, eami̧ pumȩ oa cjiadiärea̧ doro chjaparȩpea̧ üdë ¿jabechji̧dëde? ¿Chjadëde jabo chjadëdëde? Chjadëri̧ yo̧chji̧coe —yo̧a̧dejȩrȩ.
4Jabo judiro̧ Jechu pio ju̧i̧iäpȩmo̧ dëbë yo̧dëri̧ cjia̧ oaiä, jabechji̧ ga̧re tara̧dejȩ gito ja̧bomȩ ju̧i̧. Ado chjaodëri̧ chjapea̧ oa cjiadiäa̧de. Ado ja̧dëa ji̧ Jechu judi baätä yo̧a̧dejȩ. 5Ja̧dëa ji̧ pio ju̧i̧ baä tänȩa̧ duri oa, pjaricheo pio ji̧ri̧iäpȩmo̧ ano̧ mire mȩmȩrȩpe cjiadiäa̧mȩrȩ iëno̧ë ta̧rëa̧dejȩrȩ, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧bo:
—Danȩrȩ, ¿chjia tjamo̧dirȩ järätä chjaparea̧ doro ja̧bepadëji̧ri̧ judiro̧? —iëno̧ë ta̧rëa̧dejȩrȩ—. Danȩrȩ, dibëa̧ ja üdë puë urëdiräpȩ cjiadiärea̧ doro choë cjatärä judi, ¿jäcjieno̧dëpanȩrȩ pio ju̧i̧ mu̧i̧ go̧dü tänȩpea̧ ji̧? Ado dibëa̧ baca üdë puë urëdiräpȩ cjiadiärea̧ doro choë cjatärä judi, ¿chjaodëri̧ mu̧i̧ go̧dü tänȩdëparenȩro̧jo̧ȩ? Dëdë, chjaodëri̧ mu̧i̧ go̧dü tänȩparenȩro̧jo̧ȩ järätä chjaparea̧ dorobo —yo̧mȩrȩ yo̧rëremȩdejȩrȩ.
6Jabo judiro̧ chjadëri̧ dëbë yo̧tärea̧ ji̧, cjapi maearë cjiadiäa̧dirȩ, dëbë yo̧dëri̧ cjiaji̧ri̧rȩ.
'Ba chia tjamo̧mȩmi̧ dari̧ cjiaquëda, o pio ji̧ri̧iä ji̧dë u̧i̧ ba chiamȩquëda' quëna̧dëpea̧de
7Ado Jechu judi darëremȩdejȩrȩ pumȩ ji̧ri̧, charea̧ ba chia tjamo̧räpȩ chatämi̧ cjiaji̧ri̧ oa. Aja̧, judiro̧ mechjaräpȩ jurera̧pea̧rä, judiro̧ eami̧ charea̧räpȩ chjadëri̧ chatärea̧ ji̧, jabechji̧ ba chia tjamo̧räpȩ chatämi̧ cjia marëreji̧ri̧dirȩ. Ado pio ju̧i̧iä na̧rȩrea̧ ma̧ȩ oa ni̧bä chjaoa̧dejȩrȩ, ja̧di ta̧rëri̧ yo̧mȩrȩ:
8—Danȩrȩ, pumȩ judiro̧ airi̧ cjia airi̧ cjia a̧doparä, jabechji̧ charea̧ ba chiaräpȩ ju̧ri̧ chadëchji̧vä —yo̧a̧dejȩrȩ—. Danȩrȩ, üi̧ pio judi jibëa̧ iei̧ pio ji̧ pea ëba̧ oaiä airi̧ cjia airi̧ cjia juraji̧ri̧rȩ a̧doparä, ado pio dibëbo ëba a̧dopapea̧ oa yabërä judi, jabechji̧ charea̧ ba chiaräpȩ ju̧ri̧ chadëchji̧vä. Jabechji̧ pio dibë u̧i̧ ba chiamȩ pio judibo oa ëba a̧dopera̧tä yabëa̧rä judi, 9cjäri̧ manȩrȩ, idëri̧ cjiaji̧ri̧rȩ cjiadiäpai̧ danȩrȩ. Jabechji̧ tjamo̧ a̧dopamȩ pio judi pumȩ ba chiamȩ pio ju̧i̧ charea̧ ba chiaräpȩ cha tänȩtämi̧ cjia oaiä, jabechji̧ pio dibë cjitë tänȩpai̧ dadidibe pumȩ ba chiamȩ pio judi ano̧ mire chapea̧ oa. Ado mȩnȩro̧ idëri̧ cjiaji̧ri̧rȩ cjiadiäpai̧ danȩrȩ. Ado ja̧dëa ji̧ ba chiadëräpȩ ano̧ mire cha tänȩpai̧ dadidibe. 10Ado pio ju̧i̧iä yo̧requededibe ca̧ pumȩ —yo̧a̧dejȩrȩ—. Jabechji̧ mȩnȩro̧ a̧dopapea̧ oa järä, jabechji̧ ba chiadëräpȩ chachji̧vä. Ado ja̧dëa ji̧ tjamo̧ a̧dopamȩ judi pio dibë yo̧rä judi, "Aja̧ ca̧ pumȩ, pio yi ano̧ mire chachji̧vä ji̧dë u̧i̧ ba chiaräpȩ ju̧ri̧" yo̧rä judi, jabechji̧ ba chiaräpȩ ano̧ mire chapai̧ danȩrȩ. Ado judi dibë ja̧di dari̧ japea̧ oaiä, jabechji̧ ba chiaparȩa̧ oa cjiami̧ dari̧ cjiadiäpanȩrȩ ütëbo ja̧ dachoro. 11Ado pio ju̧i̧iä yo̧requededibe. Eami̧ pumȩ judi pio jȩa ba chiaparȩmi̧ dari̧ japamȩ pio judi, jabechji̧ badëparȩa̧ oa cjiami̧ dari̧ cjiadiäpade. Jabo jibëa̧ ma̧na̧ri̧ badëparȩmi̧ dari̧ japamȩ pio judi, jabechji̧ ba chiaparȩa̧ oa cjiami̧ dari̧ cjiadiäpade —yo̧mȩrȩ ni̧bä chjaoa̧dejȩrȩ Jechu judi.
12Ja̧dëa ji̧ Jechu judi ja̧di ta̧rëri̧ ni̧bä chjao ëte, ano̧ mire daea̧dejȩ tjamo̧ ëba juramȩ pio ju̧i̧iäpȩmo̧. Ado yo̧a̧dejȩ:
—Danȩ, mȩnȩ pumȩ ji̧ri̧ ëba jurapea̧ oa yabërä, na̧ pumȩ pio ji̧ri̧ nö̧ta ëba jurapea̧ oa yabërä judi, jabechji̧ japamitë chjätä ëte ëba jura̧ ba oa ba dëbë ëba jurapadiro̧mȩ. Pio ju̧i̧iä na̧ pumȩ pio ji̧ri̧mo̧i̧ yabëdëtäremȩrenȩjȩrȩ. Na̧ jadü pio ji̧ri̧mo̧i̧ yabëdëtäremȩrenȩjȩrȩ. Tjamo̧ davä. Na̧ pumȩ pio ji̧ri̧mo̧i̧, na̧ bë queri̧räpȩ cjo̧ro̧ji̧ri̧ pio ji̧ri̧mo̧i̧, chëre ji̧ra̧ oa goaji̧ri̧ pio ji̧ri̧mo̧i̧ yabëdëtäremȩrenȩ mȩnȩ ji̧dë duri oa badëri̧ cjiadiächea oa. Jabechji̧ mȩnȩ pio jiro pumȩ maea oa ëba jurarä judi, jabechji̧ ëba jura̧ ba oa ba dëbë ëba jurapadiro̧mȩ ado chjereno̧, jabo mȩnȩ a̧dëräpȩbo ba ano̧a̧ oa cjiatärea̧ ji̧, cjäri̧ marenȩ, ba ano̧a̧ oa cjiadëparenȩ. 13Ado pio ju̧i̧iä yo̧requedemȩ —yo̧a̧de—. Danȩ, chjö̧na̧i̧ti̧ oa cjäri̧ ja̧boji̧ri̧ pio ji̧ri̧bo jurera̧tä yabëjȩrȩ. Aja̧, ta oëra̧ baäji̧ri̧ pio ji̧ri̧, tai̧rea̧ chiadëji̧ri̧ pio ji̧ri̧, da cotoji̧ri̧ pio ji̧ri̧ ano̧ mire yabëtäremȩrenȩjȩrȩ, ba dëbë ëba jurarea̧mi̧dë pio ji̧ri̧. 14Jabechji̧ mȩnȩ ja̧di dari̧ japarä judi, chjadëri̧ ba ano̧padimȩ Ütë tjamo̧ judi. Tjamo̧ davä. Pio mȩa ba dëbë ëba jurarea̧ chiadëji̧ri̧ pio ji̧ri̧ yabëa̧ oaiä, jabechji̧ chjadëri̧ ba ano̧padimȩ. Jabechji̧ ütara̧ doro coëma cjiari̧ cjo̧ro̧rëreji̧ri̧ pio judiro̧ daburi pio judiri bëdü tänȩa̧ oa cjiarä, jabechji̧ chjadëri̧ ba ano̧padimȩ Ütë tjamo̧ judi —yo̧mȩrȩ ni̧bä chjaorëremȩdejȩ tjamo̧ ëba juramȩ ju̧i̧iäpȩmo̧.
Pumȩ judiro̧ jurarea̧ goae tjamo̧ oa jurapea̧ oa a̧dope jätärea̧ ji̧, ado cja̧rȩmo̧räpȩmo̧ jo̧rȩta marëreji̧ri̧dirȩ, tjamo̧ri̧ jädëri̧ cjiaji̧ri̧rȩ
Mateo 22:1-10
15Ado pumȩ üdë ta̧rëa̧rä, Jechu pio ju̧i̧ nö̧ta mechjaräpȩ ëba chamȩ pio judi pio ju̧i̧ ta̧rëa̧rä, ja̧di ta̧rëri̧ yo̧rëremȩde:
—Chia chia, a̧dë chjäte goae tjamo̧padiibe judio pio ji̧ri̧ a̧ro̧rȩ Ütërë yo̧a̧ chja̧oerä jurapea̧ oa airi̧ cjia a̧doparä —yo̧a̧de.
16Ado Jechu judi na̧rȩrea̧ ma̧ȩmi̧ dara̧ dëbë ni̧bä chjaorëremȩdejȩ. Aja̧, judio judiro̧ noi̧dërë yabëa̧ oa cjiaräbo, a̧dope jädëpea̧ pio ju̧i̧ chjiari daba tänȩpea̧ oa ja̧di ta̧rëri̧ yo̧rëremȩdejȩrȩ:
—Danȩ, cjo̧ro̧rëremȩde pumȩ judi —yo̧a̧dejȩ—. Ado pumȩ ji̧ra̧ oa a̧dopa tänȩtämi̧ cjia̧ oaiä, pio ji̧ri̧ chjadëri̧ ëba juratämi̧ cjia̧ oaiä, pio ji̧ri̧ nö̧ta airi̧ cjia airi̧ cjia ëba a̧dopatä ea̧ oaiä, jabechji̧ pumȩ no̧i̧dë tjamo̧ oa ma̧ȩ go̧ȩpe chjadürëremȩdejȩrȩ. 17Ja̧dëa ji̧ ütara̧ doro jurarea̧ üdë chjadëri̧ jëdano̧a̧ oa cjia̧rä, chjadüa̧dejȩ jibëa̧ mu̧i̧tjoi̧ oa ma̧ȩ yüre jäpea̧ oa jana̧paji̧ri̧ pio ji̧ri̧iäpȩmo̧, judiro̧ jurera̧tä, jurarea̧ üdë chjoeapea̧ tara. "Aja̧, jävä. Jëdano̧a̧ oa cjiade" yo̧emȩrenȩjȩrȩ yo̧a̧dejȩ. 18Ado pio ju̧i̧iä järëremȩde mu̧i̧tjoi̧ üdë pumȩ pio ji̧ri̧iäpȩ. Jabo cjäri̧ madiro̧jo̧ȩ. Mu̧i̧tjoi̧ pio judi chjadëri̧ ma̧ȩ yürepea̧räbo, jabechji̧ ado cja̧rȩmo̧räpȩmo̧ ma jo̧rȩtareji̧ri̧dirȩ, tjamo̧ri̧ jädëri̧ cjiaji̧ri̧rȩ. Jabechji̧ judiro̧ chjaodëri̧ jätärea̧ ji̧, jibëa̧ maea oa jo̧rȩtaji̧ri̧rȩ cjiadiärëreji̧ri̧dirȩ, jibëa̧ ja̧beparea̧ pio ju̧i̧mo̧i̧ jo̧rȩtaji̧ri̧rȩ. Cja̧rȩmȩ üdë yo̧a̧de. "Aja̧, pea gatëa̧requede tjado oa. Ado goëde jäpea̧ chiareconȩ. Ado pio ju̧i̧iä a̧doparea̧räpȩ järea̧mi̧dërequede" yo̧a̧de. "Chja jabechji̧ tja̧reparȩdëcoe. Jädëri̧ cjiarequede" yo̧a̧dejȩ, ado cja̧rȩmo̧räpȩmo̧ jo̧rȩtamȩrȩ. 19Ado cja̧rȩmo̧ üdë: "Aja̧, pea gatëa̧requede ichi chjö̧na̧i̧ baca oa, ja̧bepaji̧ri̧ baca maea oa. Ado pio jiro baca oa cja̧rȩmȩ co ja̧bepadërërea̧ ji̧, jabechji̧ pio ji̧ri̧ ja̧bepë taratämi̧ cjiarequede. Pio ju̧i̧iä a̧doparea̧mi̧dërequede. Chja jabechji̧ a̧dopa tänȩdëcoe" dëbë yo̧mȩrȩ yo̧a̧dejȩ, ado cja̧rȩmo̧räpȩmo̧ jo̧rȩtamȩrȩ. 20Ado cja̧rȩmo̧ üdë, "Aja̧, pea ëbarequede ca̧ iei̧ pio ji̧, ado pio ju̧i̧iä a̧doparea̧räpȩ jädëri̧ cjiarequede" yo̧a̧dejȩ. 21Ado pio ju̧i̧ ta̧rëa̧ oaiä, mu̧i̧tjoi̧ pio judi jibëa̧ ana̧mȩ ja̧ bëräpȩ baädäräa̧rä, chjö̧na̧i̧ oa yo̧a̧dejȩ jȩa chjadüa̧mȩ pio ju̧i̧. Jabo ana̧mȩ judi pio ju̧i̧ ta̧rëa̧ oaiä, ërecjia tjamo̧mȩpea̧de. Ado pio ju̧i̧iä yo̧a̧dejȩ jibëa̧ mu̧i̧tjoi̧ oa: "Danȩ, oëra̧ti̧ oa jävä bë ma̧ri̧räpȩ ju̧ri̧ järea̧ no̧ chjö̧na̧i̧ oa jämȩrȩ. Jabechji̧ chjö̧na̧i̧ti̧ oa cjäri̧ ja̧boji̧ri̧ pio ji̧ri̧, tai̧rea̧ chiadëji̧ri̧ pio ji̧ri̧, ta piruji̧ri̧ pio ji̧ri̧, da cotoji̧ri̧ pio ji̧ri̧ ma̧ȩ yüre jäjȩrȩ jurera̧tä. Aja̧, oëra̧ti̧ oa jävä, cja̧rȩmȩ järea̧ no̧ boi̧chji̧ oa a̧dë cjiadiärea̧ decjiari̧" yo̧a̧dejȩ. 22Ja̧dëa ji̧ mu̧i̧tjoi̧ judi oëra̧ti̧ oa jämȩrȩ jäa̧ ji̧, jabechji̧ pumȩ ji̧ra̧ tjamo̧ oa ëba ma̧na̧rëremȩdejȩrȩ. Jabo mu̧i̧tjoi̧ judi yo̧a̧dejȩ jibëa̧ ano̧mȩ ju̧i̧. "Danȩ, jabë pjärämȩde. Jabë nö̧tadäräri̧ cjiadëde a̧doparea̧ jo̧ tjo üdë. Jabë jurera̧pea̧ji̧ri̧ pio judiro̧ jabë nö̧tadëdirȩ. Jabë cjara ma cjiade" yo̧a̧dejȩ. 23Ado ju̧i̧iä ana̧mȩ judi ado yo̧a̧dejȩ: "Jabechji̧ ado chjereno̧ jävä ado ja̧di. Danȩ, bë ma̧ri̧ dairäpȩ ano̧ mire jävä yaba̧. Jabechji̧ eami̧ järea̧ no̧räpȩ jävä, tjadoräpȩmo̧ järea̧ no̧bo. Jabechji̧ pumȩ ji̧ri̧ chjadëri̧ yabëpea̧ oa ado chjereno̧ jävä, a̧doparea̧ bë tjo üdë nö̧tadäräri̧ a̧dopea̧ oa cjiapea̧ oa. 24Jabo cüdë pearä ma̧ȩ chjadüa̧ pio judiro̧ jana̧dëri̧ cjia̧ oaiä, jabechji̧ ca̧ jurarea̧ oa jabëtari̧mi̧ oa jurarea̧ dadëpadirȩ —yo̧mȩrȩ ni̧bä chjaorëremȩdejȩrȩ Jechu judi. Jabechji̧ pumȩ judiro̧ noi̧dërë a̧dopapea̧ oa yabëa̧ oa cjiaräbo, 'cjäri̧ madiro̧da, o judiro̧mo̧rȩ a̧doparea̧ dapadiro̧da' quëna̧ dabapea̧ oa, dëbë yo̧rëremȩdejȩ "a̧dë chjäte goae tjamo̧padiibe judio pio ji̧ri̧iä" yo̧mȩ pio ju̧i̧iäpȩmo̧.
Chjao tjamo̧de Jechu pio ju̧i̧ cho̧rë jäpea̧ üdë
Mateo 10:37-38
25Pumȩ no̧i̧dërë cho̧rë järëreji̧ri̧diro̧jo̧ȩ Jechu ju̧i̧. Ado mȩmȩrȩpe cjiadiäa̧mȩrȩ ja̧di ta̧rëri̧ ni̧bä chjaorëremȩdejȩrȩ, pio ji̧ri̧iäpȩmo̧ dëbë damȩrȩ:
26—Danȩrȩ, mȩnȩro̧ ca̧ jadütämi̧ cjiarä judi, jabechji̧ o ji̧ri̧iä ji̧dë u̧i̧ eapea̧ chiarenȩro̧coe coa —yo̧a̧dejȩrȩ—. Pumȩ ütëbo pio ji̧ri̧ u̧i̧ eapea̧ chiarenȩro̧coe. Aja̧, pio dibë nö̧rimȩ pio ju̧i̧iä, dibë arayi̧ pio ji̧iä, dibëa̧ iei̧ pio ji̧iä, dibëa̧ u̧ri̧ pio ji̧ri̧iä, dibëdi ja̧ji̧ri̧ pio ji̧ri̧iä ji̧dë u̧i̧ eapea̧ chiarenȩro̧coe. Jabechji̧ mȩnȩro̧ pio yoa chiri oa cjo̧ro̧pea̧ pio ju̧i̧ u̧i̧ eapea̧ chiarenȩro̧coe, dibëa̧ icjara oa ja̧bopea̧ oa chjaodëri̧ yürürea̧mi̧ dari̧. Ado mȩnȩro̧ ja̧di dari̧ japadëri̧ cjiarä judi, jabechji̧ ca̧ jadüpe bagarea̧mi̧dënȩrȩ —yo̧a̧dejȩrȩ—. 27Tjamo̧ davä. Mȩnȩro̧ pio coa cho̧rë jana̧dëri̧ cjiarä judi, mȩnȩro̧ ja̧bopea̧ to pio ju̧i̧ araji̧ri̧mi̧ dari̧ cjo̧ro̧dëri̧ cjiarä judi, pio dibëiäpȩmo̧ ja̧bo tänȩpai̧ daräbo ta̧rëdiädëri̧ cjiarä judi, jabechji̧ nö̧tadënȩrȩ ca̧ jadüpe bagapea̧ ji̧ —yo̧a̧dejȩrȩ.
28Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Aja̧ ca̧ pumȩ, mȩnȩro̧ ca̧ jadüpe bagabea yaboi̧, jabechji̧ coëma cjiari̧ jo̧rȩtapea̧ chianȩrȩ pio dibë chjiari. Ado pio ju̧i̧iä yo̧ë ta̧rërequededibe —yo̧a̧dejȩrȩ—. Danȩrȩ, pumȩ judiro̧ dibë ja̧bo tänȩräbo ¿cho̧rë jana̧parenȩro̧coe? ¿Dibëa̧ pumȩ pio ji̧ri̧iä ji̧dë u̧i̧ tjamo̧ri̧ eaparenȩro̧coe? Jabechji̧ jabërä chjadëri̧ ütarë jo̧rȩtatäreji̧ri̧nȩrȩ. Danȩrȩ, bë oa cji̧däpamȩ pio judimi̧ dari̧ jabërä chjadëri̧ ütarë jo̧rȩtatäreji̧ri̧nȩrȩ. Danȩrȩ, bë oa cji̧däpamȩ pio judi tarupabea yaboi̧, jabechji̧ jabërä chjadëri̧ ütarë jo̧rȩtapea̧ chiade. 'Aja̧, bë uë tjamo̧ oa cji̧däpea̧ üdë, 'aja̧, ja̧di ba chiadida, pio jiro oa gatëpea̧ chiaquëda, ja̧di bapa jirodicoada, ja̧di chëre ji̧ra̧ oa aeno̧pea̧ chiaquëda, jabo dëdë, nö̧tadäräri̧ goaquëda, jabechji̧ cji̧dädäräpea̧ oa nö̧tadida' quëna̧ ütarë jo̧rȩtapea̧ chiade jabërä, judi jibëa̧ bë oa jabë tarupë cji̧dädëa̧rä. 29Jabechji̧ jabërä chjadëri̧ ütaradërä judi, ado jibëa̧ chëre üdë nö̧tadërä judi, cjäri̧ made, taru a̧rȩmȩ pio ju̧i̧mo̧i̧ japa ëte, goarijäpai̧ dade davä jibëa̧ chëre üdë. Ado pio ju̧i̧iä no̧i̧dërë airi̧ cjiaji̧ri̧rȩ dapai̧ dadiro̧jo̧ȩ judi taruparërea̧ pio ju̧i̧ japadärärea̧ dadëa̧ pio ju̧i̧iä. 30"Aja̧, pio judide bë uë tjamo̧ oa chjadëri̧ taruparëremȩ judi jabo cjäri̧ madejȩ, japadärärea̧ dadëa̧dejȩ" yo̧ji̧ri̧rȩ airi̧ cjiapai̧ dadiro̧jo̧ȩ —yo̧mȩrȩ yo̧rëremȩdejȩrȩ Jechu judi, judiro̧ jabërä chjadëri̧ ütarë jo̧rȩtapea̧ oa jibëa̧ jadüpe bagapea̧ pio ju̧i̧ chjiari.
31Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dejȩrȩ ado cja̧rȩmo̧ na̧rȩrea̧ ma̧ȩmi̧ dara̧ jabërä chjadëri̧ ütarë jo̧rȩtapea̧ pio ju̧i̧ chjiari:
—Danȩrȩ, eami̧ ütë üdë, chiri ütë cjo̧ro̧mȩ pio judi jibëa̧ guadia buba oa acji jä tänȩrea̧ jo̧rȩtarä judi, jibëa̧ chiri oa acji jana̧paji̧ri̧ pio ji̧ri̧ dëbëpe chjaopea̧ oa acji jä tänȩrea̧ jo̧rȩtarä judi, jabechji̧ jabërä chjadëri̧ ütarë jo̧rȩtatäremȩde pio jȩa chi̧dëeaji̧ri̧ pio ji̧ri̧ nö̧ta —yo̧a̧dejȩrȩ—. Jabechji̧ judi jabomo̧ 10 mil guadia oa goarä judi, jabo acji jana̧paji̧ri̧ pio judiro̧ 20 mil guadia oa goarä judi, jabechji̧ coëma cjiari̧ ütarë jo̧rȩtatäremȩde jabërä judi oëra̧ japachea oa, judi chjadëri̧ jo̧rȩtadëmȩrȩ japachea oa. 32Ado danȩrȩ, judi chjadëri̧ ütarë jo̧rȩta ëte, ja̧di dari̧ jo̧rȩtapai̧ dade. 'Jabo cjäri̧ maquëda, ji̧dë u̧i̧ ji̧ra̧diro̧da, jabomo̧ 10 mil guadia oa goaquëda, jabo acji jana̧paji̧ri̧ pio judiro̧ 20 mil guadia goadiro̧da, ado pio ju̧i̧iä boadärärea̧mi̧dëa̧ro̧ji̧ri̧da, chjao tjamo̧täremȩdiibëda, a̧dë chjäte ji̧ra̧ oa boadäräpea̧ ji̧ chjao tjamo̧täremȩdiibëda' quëna̧ jo̧rȩtarä judi, jabechji̧ pio jȩa chjiari goë tuti ni̧bäji̧ri̧ pio ji̧ri̧ jabërä chjaodëri̧ chjadütäremȩdejȩrȩ acji jana̧paji̧ri̧ pio ji̧ri̧ goë tuti ni̧bäpea̧ oa. Tjamo̧ davä. Judiro̧ jabë queri̧na̧ra̧dëa̧rä, judiro̧ jabë jachi tjamo̧ro, chjaodëri̧ chjadütäremȩdejȩrȩ chjadëri̧ goë tuti ni̧bäpea̧ oa judiro̧ ma̧ȩ goaera̧ chjadëri̧ tuti ni̧bäpea̧ oa acji jana̧ji̧ri̧ pio ji̧ri̧ nö̧ta. Jabechji̧ pumȩ judiro̧ ütëborë chjadëri̧ ëba cjo̧ro̧rea̧ dapea̧ oa, jibëa̧ dëbëti̧ra̧ chia acji järea̧ decjiari̧ cjo̧ro̧rea̧ dapea̧ oa, judiro̧ chji̧ goae maeara̧ jo̧rȩtaji̧ri̧rȩ cjo̧ro̧rea̧ dapea̧ oa, jabechji̧ chjadütäremȩdejȩrȩ jabërä acji jana̧ji̧ri̧ pio ji̧ri̧ ja̧ ütë pio ju̧i̧ nö̧ta chjadëri̧ ni̧bä chjaopea̧ oa —yo̧mȩrȩ ni̧bä chjaorëremȩdejȩrȩ Jechu judi.
33Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ, jabërä chjadëri̧ ütarë jo̧rȩtapea̧ pio ju̧i̧ chjiari:
—Ado pio ju̧i̧iä mȩnȩro̧ ca̧ jadütämi̧ cjiarä judi, jabechji̧ jabërä chjadëri̧ ütarë jo̧rȩtapea̧de. Jabërä coëma cjiari̧ jo̧rȩtapea̧de. Ado mȩnȩro̧, 'Aja̧, Jechu pio ju̧i̧ ji̧dë u̧i̧ eacuni̧da, o ji̧ri̧iä ji̧dë u̧i̧ eacuni̧da, ado o judiro̧ coa ja̧bo tänȩräbo ji̧dë ma ta̧rëdiätämi̧ cjiacuni̧da, jabechji̧ ca̧ea̧remȩ pio ju̧i̧ a̧dë jo̧rȩtami̧ dari̧ cho̧rë jätämi̧ cjiacuni̧da' quëna̧ jo̧rȩtarä judi, jabechji̧ ca̧ jadüpe bagachji̧vä ca̧ pumȩ —yo̧mȩrȩ ni̧bä chjaorëremȩdejȩrȩ.
Jechu judi yagoemȩ oa jo̧rȩtamȩrȩ a̧ra̧ano̧rëremȩde na̧rȩrea̧ ma̧ȩmi̧ dara̧ quëna̧ji̧ri̧ pio ji̧ri̧ chjiari
Mateo 5:13; Marco 9:50
34Ado Jechu judi ji̧dë u̧i̧ a̧ra̧ano̧mȩrȩ ja̧di ta̧rëri̧ a̧de ni̧bärëremȩdejȩrȩ:
—Danȩrȩ, yagoemȩ üdë chjadëde jurarea̧ oa mirepea̧ üdë —yo̧a̧dejȩrȩ—. Jabechji̧ goae tjamo̧parȩdejȩ jurarea̧ oa. Jabo yagoemȩ üdë goaedëpe baga̧rä judi, ütama̧i̧pea̧ oaiä jurarea̧ oa goaeparȩrea̧mi̧dëpea̧rä judi, chjadëdëpe baga̧rä judi, ¿yö̧ta dari̧ japapea̧de ado chjereno̧ chjadëparȩpea̧ oa? 35Jabo cjäri̧ made, ado chjereno̧ chjadëparea̧mi̧dëde. Tjamo̧ davä. Yagoemȩ üdë chjadëdëpe baga̧rä judi, jurarea̧ oa goaeparȩrea̧mi̧dëpea̧rä judi, jabechji̧ ado chjereno̧ chjadëparȩrea̧mi̧dëde. Ado peaja̧di tjadoräpȩmo̧ aeno̧rea̧mi̧dëpea̧de. Jabechji̧ dabu oa a̧dorea̧ chiadë maeade. Baca a üdë dabu oa mire ëte, dëdë, a̧dodejȩ dabu oa. A̧dorea̧ chia oaiä, jabechji̧ chjadëpe bagadejȩ dabu oa. Jabo yagoemȩ üdë chjadëdëpea̧rä judi, cjäri̧ madejȩ, a̧dodë madejȩ. Ado pio ju̧i̧iä aeno̧pea̧ maeade. Daburo puri cjarapea̧ maeade. A̧dorea̧ chiadë ma tara, jabechji̧ aeno̧pea̧de —yo̧mȩrȩ ni̧bä chjaorëremȩdejȩrȩ Jechu judi, yagoemȩ pio ju̧i̧ chjiari na̧rȩrea̧ ma̧ȩmi̧ dara̧. Jabechji̧ yagoemȩ chjadëdë üdë jurarea̧ oa a̧dodëmi̧ dari̧ cjo̧ro̧dëpea̧de jabo yagoemȩ chjadëmi̧ dari̧ cjo̧ro̧pea̧de, o ji̧ri̧ chjadëri̧ a̧doji̧ri̧rȩ.
Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ:
—Aja̧ ca̧ pumȩ, ba chia tjamo̧de cüdë dibë ni̧bä chjaoa̧ üdë. Jabechji̧ chjadëri̧ ta̧rëchji̧coe, ta̧ra̧ cotomi̧ dari̧ ta̧rërea̧ decjiari̧ —yo̧mȩrȩ ni̧bä chjaorëremȩdejȩrȩ.
Currently Selected:
Lucas 14: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved