Taruparea̧ Ma̧ȩ 22
22
Ütë tjamo̧ judi ütarë jo̧rȩtarëremȩdejȩ Abaraa̧ ju̧i̧
1Ji̧dë duri oa Ütë tjamo̧ judi ütararëremȩdejȩ Abaraa̧ ju̧i̧. 'Aja̧, ¿napai̧rä yuro chjuari̧ quëna̧padicoada' quëna̧ jo̧rȩtamȩrȩ ëna̧diärëremȩdejȩ.
—Abaraa̧ —yo̧mȩrȩ ëna̧diäa̧dejȩ.
Ado Abaraa̧ judi dëbë yo̧mȩrȩ yo̧a̧dejȩ:
—Aja̧, pio yirequede.
2Ado Ütë tjamo̧ judi yo̧a̧dejȩ:
—Danȩ, na̧ ja pio ju̧i̧mo̧i̧ ëbarenȩ, Icha quȩmȩ oa. Pio ju̧i̧ mitëvä. Mȩnȩ cjäri̧ri̧ cjia da̧ pio ju̧i̧ mitëvä Moria quȩmȩ chiriräpȩ ëba jäpea̧ oa. Ado mȩnȩ ju̧ri̧pȩ go̧düdäräa̧rä, jabechji̧ goe gu̧rori̧ cäë yürütä earequedemȩ na̧ ja oa. Cüdë mȩa na̧rȩpea̧ ya̧mi̧räpȩ ju̧ri̧ yürütä earequedemȩ —yo̧a̧dejȩ.
3Ado dopea̧rä peadai̧rä bëdürëremȩde Abaraa̧ judi. Ado jibëa̧ buro putu juro tjae charea̧ oa jëdano̧ ëte chjarerëremȩdejȩ cjo̧do oa chia baäpea̧ oa, cäë yürüpea̧ oa. Ado jibëa̧ mu̧i̧tjoi̧ yo̧a̧ri̧ oa pio jȩa nö̧ta ëba jätä yo̧a̧ oa go̧dürëremȩde pio ji̧ri̧ nö̧ta, joja pio ju̧i̧ nö̧ta. Ado Ütërë yo̧a̧ chiriräpȩmo̧ järëreji̧ri̧dirȩ, jachi oa. 4Ado yo̧a̧ri̧ do chjätä ëte Abaraa̧ judi gatë damȩrȩ dadärärëremȩdejȩ ya̧mi̧ chiamȩ chiri oa, jachi a̧rȩmȩ oa, Ütërë yo̧a̧ chiri oa. 5Ado pio ju̧i̧ damȩrȩ yo̧a̧dejȩrȩ jibëa̧ mu̧i̧tjoi̧ ji̧ri̧:
—Danȩrȩ, pio yi cjiadiächji̧vä buro pio ju̧i̧ nö̧ta. Cüdë ca̧ jaborë jäparequede Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa. Ado ja̧di dari̧ japa ëte, jabechji̧ ma̧na̧eno̧parea̧rȩ ado chjereno̧ —yo̧mȩrȩ yo̧rëremȩdejȩrȩ jibëa̧ mu̧i̧tjoi̧ ji̧ri̧.
6Ado ja̧dëa̧ ji̧ mitërëremȩdejȩ cjo̧do oa goe gu̧rori̧ ja̧bopamȩ pio ju̧i̧ cäapea̧ oa. Ado Icha ja̧ ca̧toro are a̧ra̧dejȩ cjo̧do oa judi arapea̧ oa. Ado Abaraa̧ judi coana̧rea̧ oa mitë ëte, cjo̧dë oa mitë ëte go̧dürëreji̧ri̧dirȩ yo̧a̧ri̧rȩ, ji̧mo̧ jäji̧ri̧rȩ. 7Ado japamitë boi̧chji̧ chjätä ëte Icha judi yo̧a̧dejȩ jäja oa:
—Ama̧i̧.
Ado Abaraa̧ judi dëbë yo̧mȩrȩ yo̧a̧dejȩ:
—¿Tjana̧ eanȩ ca̧ ja?
Ado Icha judi yo̧a̧dejȩ:
—Danȩ, cjo̧do oa goarea̧rȩ. Ado cjo̧dëbo goarea̧rȩ. Jabo cäë yürürea̧ decjiade ama̧i̧. ¿Tjana̧räpȩde oveja judi? —iëno̧ë ta̧rëa̧dejȩ jäjäa oa.
8Ado Abaraa̧ judi dëbë yo̧a̧dejȩ:
—Jabechji̧ Ütë tjamo̧ pio judi dabami̧ tuti yürüpadejȩ oveja oa ca̧ ja, a̧ro̧rȩ pio ju̧i̧iäpȩmo̧ chjadëri̧ cäë yürüpea̧ oa.
Aja̧, ja̧di ta̧rëri̧ yo̧mȩrȩ dëbë yo̧rëremȩdejȩ joja oa Abaraa̧ judi. Ado judiro̧ yo̧a̧ri̧rȩ ji̧mo̧ jäji̧ri̧rȩ järëreji̧ri̧dirȩ. 9Ado ja̧dëa ji̧ judiro̧ go̧düdäräa̧rä, Ütërë yo̧a̧rea̧räpȩ go̧düdäräa̧rä, jabechji̧ gu̧na̧rea̧ mechja oa jëdano̧a̧dejȩ Abaraa̧ judi. Ado ju̧i̧ jëdano̧ ëte are a̧ra̧dejȩ cjo̧do oa gu̧na̧rea̧ mechja uëmo̧. Ado ja̧di dari̧ japa ëte mitëa̧dejȩ joja oa. Ado tabüa̧dejȩ. Ado ja̧dëa ji̧ are a̧ra̧dejȩ gu̧na̧rea̧ mechjarä, cjo̧do uëmo̧. 10,11Ado coana̧rea̧ oa mitëmȩrȩ mitëa̧dejȩ joja pio ju̧i̧ gu̧na̧pea̧ oa, joja pio ju̧i̧ cäë yürüpea̧ oa. Jabo jabërä guatäremȩ oa, coana̧rea̧ oa goamȩrȩ ichi oa tjätjäpë cjiaremȩ oa, Jeova ja̧ mu̧i̧tjoi̧ pio judi a̧dëri pio judiri ëna̧diäa̧dejȩ Abaraa̧ ju̧i̧ chjaodëri̧:
—Abaraa̧, Abaraa̧ —ëna̧diäa̧dejȩ.
Ado Abaraa̧ judi:
—Aja̧, pio yirequede —yo̧a̧.
12Ado Jeova ja̧ mu̧i̧tjoi̧ judi yo̧a̧dejȩ:
—Jabëdëchja, ja̧bo tänȩdëvä na̧ ja oa. Jabechji̧ goe chiari̧ japadëjo̧ȩ. Pio mȩa chjiari chjadëri̧ dabarequede yaba̧. 'Aja̧, Ütë tjamo̧ ju̧i̧ uapai̧ ta̧rëri̧ jo̧rȩtamȩdida, joja oa, jënȩ nö̧ria̧ pio ju̧i̧ nȩmȩpadëa̧dicoada, pio ju̧i̧mo̧ ëbamȩborë yürüparemȩdicoada' quëna̧ dabarequede yaba̧ —yo̧mȩrȩ yo̧rëremȩdejȩ Abaraa̧ ju̧i̧ Ütë tjamo̧ ja̧ mu̧i̧tjoi̧ judi.
13Ja̧dëa ji̧ Abaraa̧ judi gatë damȩrȩ darëremȩdejȩ oveja üi̧ oa to boi̧chji̧rä puri cjiamȩ oa yatërä. Ado a̧dë bagurarea̧mi̧dëmȩ oa mitëa̧dejȩ. Ado goe gu̧rori̧ ano̧ mire ja̧bo tänȩrëremȩdejȩ. Aja̧, joja pio ju̧i̧ cäë yürütärea̧mi̧ ano̧ mire ja̧bo tänȩrëremȩdejȩ. 14Pio ju̧i̧iä Abaraa̧ judi quȩparëremȩdejȩ jënȩ cjiamȩräpȩ china̧mȩ ya̧mi̧ oa. "Aja̧, Jeova judi tuti yürüpade" yo̧a̧ ma̧ȩra̧ pio ju̧ri̧ra̧ quȩpea̧dejȩ pio jiro ya̧mi̧ oa, quȩ chiadërëremȩ oa. Ja̧di tara pumȩ judiro̧ peaja̧dimi̧ ta̧rëri̧ yo̧vedirȩ yaba̧mi̧rä. Abaraa̧ judi yabochjarë yo̧rërea̧ ma̧ȩ pio ju̧i̧ yo̧vedirȩ. "Aja̧, ya̧mi̧räpȩ cjiaji̧ri̧ oa yürüpadiibe Jeova judi a̧ro̧rȩ jabëdiäa̧ pio ju̧i̧" —yo̧ji̧ri̧rȩ yo̧vedirȩ pio jiro ya̧mi̧ pio ju̧i̧ chjiari.
15Ja̧dëa ji̧ Jeova pio ju̧i̧ ja̧ mu̧i̧tjoi̧ judi a̧dëri pio judiri ado ena̧diärëremȩdejȩ Abaraa̧ ju̧i̧. 16Ado ëna̧diäa̧mȩrȩ yo̧a̧dejȩ:
—Ja̧di ta̧rëri̧ yo̧mȩrȩ yo̧dimȩ Jeova judi: "Danȩ, chjadëri̧ ta̧rë ta̧rë japea̧renȩque. Jabechji̧ na̧ ja pio ju̧i̧mo̧i̧ ebaräbo, pio ju̧i̧ nȩmȩpadëa̧renȩque, jabo chjadëri̧ yürüa̧renȩque. Ja̧di tara yürürequedemȩ ma̧ȩ oa. Jabechji̧ ca̧ quȩ ba chia pio ju̧i̧ jo̧rȩtamȩrȩ, ma̧ȩ chjádë yürüdëmȩ pio ju̧i̧ ja̧ quȩ oa jo̧rȩtamȩrȩ tjamo̧i̧ cjiari̧ yo̧mȩrȩ ma̧ȩ yürürequedemȩ teracabari̧ yo̧rea̧ decjiari̧. 17Jabechji̧ mȩnȩ na̧ ja oa nȩmȩpadëa̧ tara, a̧dë chjäte chjadëri̧ japaparequedemȩ, mȩnȩ chjadëri̧ cjo̧ro̧rea̧mi̧ dari̧. Danȩ, a̧dë chjäte ji̧ra̧ri̧ cjiadiä tänȩparequedejȩrȩ na̧ea̧ri ja̧ji̧ri̧ pio ji̧ri̧. Jabechji̧ büërë ji̧ra̧mi̧ dari̧ cjiadiäpadirȩ. Ui ana̧ yuroro a̧rȩmȩ dabu nȩgȩ choi̧rȩ ji̧ra̧mi̧ dari̧ cjiadiäpadirȩ. Ado pio jibë eadëji̧ri̧ pio ji̧ri̧, jabechji̧ chjadëri̧ boadärärea̧ dapadiro̧jȩrȩ na̧ea̧ri ja̧ji̧ri̧ pio judiro̧. 18Aja̧, mȩnȩ ca̧ ma̧ȩ oa chjadëri̧ ta̧rë ta̧rë japea̧ tara, jabechji̧ chiriräpȩti̧ oa cjo̧ro̧ji̧ri̧ pumȩ pio judiro̧ chjadëri̧ cjiadiärea̧ dapadirȩ na̧ea̧ri ja̧ji̧ri̧ pio ji̧ri̧iä." Aja̧, ja̧di ta̧rëri̧ yo̧mȩrȩ yo̧dimȩ Jeova judi —yo̧mȩrȩ yo̧rëremȩdejȩ Abaraa̧ ju̧i̧ Ano̧mȩ ja̧ mu̧i̧tjoi̧ judi.
19Ja̧dëa ji̧ Abaraa̧ judi jojaborë carupë baärëremȩde jibëa̧ mu̧i̧tjoi̧rȩ jibë jida̧räpȩ. Ado ja̧dëa ji̧ baäa̧mi̧ baärëreji̧ri̧dirȩ ütëborë Becheba quȩmȩräpȩ. Ado ju̧ri̧pȩ cjo̧ro̧rëremȩde Abaraa̧ judi.
Nacoro ja̧ u̧ri̧ pio ji̧ri̧ chjiari ma̧ȩ
20Abaraa̧ judi baäa̧ duri oa ma̧ȩ ta̧rërëremȩde ja̧ omȩ pio ju̧i̧ chjiari. "Na̧ omȩ judi, Nacoro quȩmȩ pio judi jibëa̧ u̧ri̧ ji̧ra̧ oa ëbamȩpea̧de" yo̧a̧ oa ta̧rërëremȩde, ja̧di dari̧ ta̧rëdë marërea̧ ji̧. Jibëa̧ iei̧ jini̧, Mica quȩyi̧ pio jini̧ chjadëri̧ ëba ara̧ oaiä, jabechji̧ jibëa̧ u̧ri̧ ji̧ra̧ oa ëbamȩpea̧de" yo̧a̧ oa ta̧rëa̧de Abaraa̧ judi ja̧ omȩ pio ju̧i̧ chjiari. 21"Ado Nacoro joja yabomȩ judi Uchu quȩmȩde. Ado ju̧i̧ ja̧ cotoi̧rämȩ judi Buchu quȩmȩde. Ado ju̧i̧ ja̧ durimȩ judi Quemu̧e quȩmȩde. Pio judide Ara̧ quȩmȩ ju̧i̧ nö̧rimȩ judi" yo̧a̧ oa ta̧rërëremȩde. 22"Ado ji̧ri̧mo̧ nö̧ridëa̧dejȩrȩ, jabo o ji̧ri̧ peaja̧di nö̧rirëremȩdejȩrȩ Nacoro judi. Quechede quȩmȩ ju̧i̧, Jacho quȩmȩ ju̧i̧, Pidacha quȩmȩ ju̧i̧, Jidapja quȩmȩ ju̧i̧, ado Betue quȩmȩ ju̧i̧bo nö̧rirëremȩdejȩrȩ peaja̧di" yo̧a̧ oa ta̧rërëremȩde Abaraa̧ judi ja̧ omȩ pio ju̧i̧ chjiari. 23Ado Nacoro joja judi, Betue quȩmȩ pio judi Rebeca quȩyi̧ pio ji̧ nö̧rimȩde. Aja̧, Nacoro ja̧ u̧ri̧ judiro̧, jabechji̧ ca̧i̧ta̧ra̧ ichiri tjarari̧dirȩ. Nacoro judi Mica quȩyi̧ pio ji̧ nö̧ta ëba ara̧ pio judiro̧dirȩ. Pio jini̧ chjadëri̧ ëba ararëreyi̧nȩjȩ Nacoro ju̧i̧, Abaraa̧ ja̧ omȩ ju̧i̧. 24Ado Nacoro judi pio ji̧ri̧mo̧i̧ nö̧ridëa̧de, jabo ji̧dë uëri ëbarëremȩdejȩrȩ o ji̧ri̧. Erema quȩyi̧ pio ji̧ a̧de ëba̧ oaiä peaja̧di nö̧rirëremȩdejȩrȩ o ji̧ri̧ jibëa̧ iei̧ duriyi̧ pio ji̧iä. Teba quȩmȩ ju̧i̧, Gaya quȩmȩ ju̧i̧, Taja quȩmȩ ju̧i̧, Maca quȩmȩ ju̧i̧ nö̧rirëremȩdejȩrȩ peaja̧di. Aja̧, ja̧di dari̧ ëbarëremȩdejȩrȩ jibëa̧ u̧ri̧ ji̧ri̧ Nacoro judi.
Currently Selected:
Taruparea̧ Ma̧ȩ 22: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved