Taruparea̧ Ma̧ȩ 21
21
Chara jini̧ ararëreyi̧nȩjȩ jibëa̧ ja oa
1Ja̧dëa ji̧ Jeova judi yo̧a̧mi̧ chjadëri̧ japarëremȩdejȩ Chara ji̧. 2Bo maiyi̧rȩ cjo̧ro̧yi̧pea̧nȩ. Ado japamitë chjätä ëte ara̧nȩjȩ üi̧ boi̧ oa. Abaraa̧ pio ju̧i̧ ja̧ joja oa, ütama̧i̧ tjamo̧pea̧mȩ pio ju̧i̧ ja̧ joja oa ëba ara̧nȩjȩ. Ütë tjamo̧ pio judi ütarë yo̧a̧mi̧ ara̧nȩjȩ. 3Ado Abaraa̧ judi quȩpea̧dejȩ joja ju̧i̧, Chara jini̧ ara̧ pio ju̧i̧. Icha quȩra̧ pio ju̧ri̧ra̧ quȩpea̧dejȩ. 4Ja̧dëa̧ ji̧ budorëremȩdejȩ. Ca̧i̧ta̧ra̧ ichiri tjarari̧ do goamȩpea̧mȩ oa chua yabi oa budorëremȩdejȩ Ütë tjamo̧ pio judi jabërä yo̧rërea̧mi̧. 5Ado Abaraa̧ judi jibëa̧ ja oa nö̧rirërea̧ ji̧, jabechji̧ 100 ui goarëremȩde. 6Ado Chara jini̧ joja pio ju̧i̧ ëba̧ oaiä, ma̧ chiadëri̧ cjiayi̧rȩ ja̧di ta̧rëri̧ yo̧rëreyi̧nȩ:
—Ütë tjamo̧ pio judi chjadëri̧ japea̧dique. Jabechji̧ airi̧ cjia airi̧ cjia cjo̧ro̧rea̧ yürüa̧dique yaba̧. Ado eami̧ti̧ pumȩ judiro̧ pio coa chjiari ta̧rëa̧ oaiä, ‘Aja̧, ütai̧pea̧yi̧borë ara̧ni̧da’ quëna̧ ta̧rëa̧ oaiä, jabechji̧ pio coadi airi̧ cjiapai̧ dadirȩ peaja̧di. 7Ado pearä judi cüdë ütai̧ tjamo̧pea̧ oaiä, jabechji̧ eami̧ti̧ pumȩ üdë yo̧dëa̧täremȩdejȩ ca̧ üi̧ oa. "Aja, na̧ iei̧ pio jini̧ chuchu yürüpea̧ chianȩjȩ na̧ ja oa" yo̧dëa̧täremȩdejȩ ca̧ üi̧ ju̧i̧, Abaraa̧ pio ju̧i̧iäpȩmo̧. Jabo danȩrȩ, a̧dë chjäte ütama̧i̧ tjamo̧pea̧mȩ pio ju̧i̧ yürüa̧reconȩ yaba̧ jibëa̧ ja oa —yo̧rëreyi̧nȩ Chara jini̧.
Aga jini̧ jojaborë bucho ana̧ baärëreji̧ri̧dirȩ
8Japamitë chjätä ëte Icha boi̧chji̧ pio judi chuchu jaradëmȩpea̧de. Jabechji̧ jurarea̧ chja maea oa ano̧ mire juramȩpea̧de. Ado judirä Icha judi chuchu jaradëmȩpea̧ domȩ ju̧i̧iä, jabechji̧ Abaraa̧ judi ëba a̧doparëremȩdejȩrȩ pumȩ buba oa. Jabechji̧ joja pio ju̧i̧ jo̧rȩta̧ oaiä, jaerira̧ ütëchjai̧pe jämȩ oa jo̧rȩta̧ oaiä, jabechji̧ ëba a̧dopea̧dejȩrȩ jibëa̧ pumȩ ji̧ri̧ ëba jurapea̧ oa, airi̧ cjiaji̧ri̧rȩ a̧dopapea̧ oa. 9Jabo judiro̧ a̧dopea̧ nö̧ta, ma̧i̧ dari̧ japarëremȩdejȩ joji̧ri̧ja oa Ichamae judi. Badë damȩrȩ goae tarari̧ ya̧ea̧dejȩ. Ado joji̧ri̧ja pio ju̧i̧ ma̧i̧ dari̧ japamȩ oa irä darëreyi̧nȩjȩ Chara jini̧. Aja̧, Abaraa̧ judi Aga pio ji̧iä nö̧ria̧ pio ju̧i̧, Ejito chiririyi̧ pio jini̧ ara̧ pio ju̧i̧ irä darëreyi̧nȩjȩ joji̧ri̧ja pio ju̧i̧ ma̧i̧ dari̧ japamȩ oa. 10Ado pio ju̧i̧iä chjaodëri̧ jäeno̧a̧nȩjȩ Abaraa̧ ju̧i̧. Ado yo̧a̧nȩjȩ:
—Danȩ, pio jiro iei̧ mu̧i̧tjoi̧ ji̧ baä tänȩtä ea tjamo̧requedemȩ, jojabo oa. Jabechji̧ yabomȩrȩ mitërea̧ pio ju̧i̧ mitërea̧mi̧dëde. Ca̧ ja pio ju̧i̧ nö̧ta mitërea̧mi̧dëde. Pio ju̧i̧iä jabërä baätä eareconȩ mitërea̧mi̧dëri̧. Jabechji̧ ca̧ ja Icha pio judimo̧rȩ mitëtä eareconȩ. Pio ju̧i̧iä jabechji̧ baä tänȩjȩrȩ —yo̧yi̧rȩ yo̧rëreyi̧nȩjȩ Abaraa̧ ju̧i̧.
11Ado pio ju̧i̧ ta̧rëa̧ oaiä gito ana̧ri̧ jo̧rȩtamȩpea̧de Abaraa̧ judi. 'Aja̧, Ichamae judi tjaoëdëdida, cüdë nö̧ria̧ pio judidida, jabo pio ju̧i̧ baä tänȩtä yo̧tani̧coada' quëna̧ jo̧rȩta̧ oaiä gitori̧ jo̧rȩtamȩpea̧de. 12Jabo Ütë tjamo̧ judi yo̧rëremȩdejȩ Abaraa̧ ju̧i̧:
—Danȩ, na̧ ja ju̧i̧ chjiari bücjüri̧ cjiadëvä. Ado mȩnȩ a̧de ëba̧ pio ju̧i̧ chjiari bücjüri̧ cjiadëvä. Jabechji̧ Chara pio jini̧ yo̧a̧mi̧ japavä. Jabechji̧ baä tänȩjȩrȩ. Jabechji̧ na̧ea̧ri ja̧ji̧ri̧ pio judiro̧ no̧i̧dë tjamo̧pe jäpadirȩ Icha pio ju̧i̧iä. Jabechji̧ Icha pio ju̧i̧ mitëa̧reconȩ. 13Jabo danȩ, Aga jini̧ ara̧ pio judiri ja̧ji̧ri̧ pio judiro̧ peaja̧di no̧i̧dë tjamo̧padirȩ. Jabechji̧ na̧ ja tara, jabechji̧ no̧i̧dë tjamo̧ tänȩparequedejȩrȩ peaja̧di —yo̧mȩrȩ yo̧rëremȩdejȩ Abaraa̧ ju̧i̧ Ütë tjamo̧ judi.
14Ado ja̧dëa ji̧ pea dopea̧rä, Abaraa̧ judi, 'Aja̧, ca̧ iei̧ duriyi̧ pio ji̧ chjadüpaquiji̧da, ca̧ ja pio ju̧i̧ nö̧ta baäpea̧ oa chjadüpaquiji̧da' quëna̧ jo̧rȩtamȩrȩ yürürëremȩdejȩ jurarea̧ oa Aga ji̧, jënȩ chia baäpea̧ oa. Uibo oa yürüa̧dejȩ chia baäpea̧ oa. I maeara̧ cara̧mȩ joërä cjiamȩ oa yürüa̧dejȩ ui oa. Ado ja̧di dari̧ japa ëte chjadürëremȩdejȩ. Aja̧, chjadüa̧ oa baärëreyi̧nȩ. Jurarea̧ oa, jararea̧ chiayi̧rȩ baärëreyi̧nȩ joja pio ju̧i̧ nö̧tayi̧rȩ. Becheba quȩmȩ chiriräpȩmo̧ baärëreyi̧nȩ dabu nȩgȩ maräpȩmo̧. Ado Aga jini̧ a̧dë chjäte gitoi̧ jo̧rȩta̧ oaiä, 'Aja̧, ja̧dira̧ baäpaquëda' quëna̧dëa̧nȩ. Jabechji̧ oëra̧ti̧ oa chjätäti̧ cjiayi̧rȩ järëreyi̧nȩ no̧ decjia oa. 15Ado japamitë chjätä ëte jënȩ chia baäa̧ ui üdë yuropea̧de. Pio ju̧i̧iä daburo a̧rȩ tänȩa̧nȩjȩ joja oa to boi̧chji̧ ëteräpȩ, chja̧oeräpȩ. 16Ado joja pio ju̧i̧ a̧rȩ tänȩ ëte a̧dë järëreyi̧nȩjȩ jachidai̧ cha däräpea̧ oa joja ja̧ dëbëräpȩ. 'Aja̧, ca̧ ja üdë ejaro cjiadida, a̧dë ja̧bopai̧ dadicoada, ja̧boa̧mȩ oa dadëri̧ cjiacuni̧da' quëna̧ jo̧rȩtayi̧rȩ ejaro cjiayi̧pea̧nȩ.
17Ado Ütë tjamo̧ judi ejaro cjiamȩ oa ta̧rërëremȩdejȩ üi̧ pëi̧ chja oa. Ado Ütë tjamo̧ ja̧ mu̧i̧tjoi̧ judi a̧dëri pio judiri chjaodëri̧ ëna̧diärëremȩdejȩ Aga ji̧. Ado yo̧a̧dejȩ:
—Aga, ¿tjana̧ japamȩ? Uapadëvä. Jabechji̧ Ütë tjamo̧ pio judi ta̧rëa̧dejȩ na̧ ja oa, ejaro cjiamȩ oa. To ëteräpȩ a̧rȩmȩ oa, ejaro cjiamȩ oa ta̧rëa̧dejȩ. 18Jabechji̧ jävä. Na̧ ja pio ju̧i̧ mu̧i̧ cjitëpea̧ oa jävä. Ëba mu̧i̧ jäjo̧ȩ. Damȩ, pio cüdë tänȩa̧ oa na̧ ja pio judiri ja̧ji̧ri̧ pio judiro̧ no̧i̧dë tjamo̧padirȩ. O judiro̧ boadärärea̧mi̧dëri̧ cjo̧ro̧padirȩ —yo̧mȩrȩ yo̧rëremȩdejȩ Aga ji̧ a̧dërimȩ mu̧i̧tjoi̧ pio judi.
19Ja̧dëa ji̧ Ütë tjamo̧ judi chjadëri̧ da tänȩmȩrȩ ui chiamȩ tade puë oa darëreyi̧nȩjȩ. Ado jäeno̧a̧nȩ jarapea̧ oa. Ado tjuri cjiari̧ cjareno̧a̧nȩjȩ i maeara̧ cara̧mȩ joërä. Ado Ichamae oa jara tänȩa̧nȩjȩ, joja pio ju̧i̧. 20Ado Ütë tjamo̧ judi, jabechji̧ chjadëri̧ jidarëremȩdejȩ Aga ja̧ joja pio ju̧i̧. Jabechji̧ judi ütëchjai̧pea̧rä yuro chjadëri̧ jidarëremȩdejȩ. Ado üi̧padärä ëte, jabechji̧ chiri tjoräpȩ cjo̧ro̧mȩpea̧de. Ado tjibato aramȩrȩ cho̧mȩ tjamo̧pea̧de peaja̧di. 21Ado jënȩ cjo̧ro̧rërea̧ chiri üdë Para̧ quȩmȩde. Chiri tjoräpȩde. Ado jibëa̧ ai̧ pio jini̧ goë cjo̧dë yürüa̧ oaiä, jabechji̧ Ejito chiririyi̧ i̧a ëbamȩpea̧de Ichamae judi.
Currently Selected:
Taruparea̧ Ma̧ȩ 21: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved