Yamni Kulki Lawana 3
3
1Tihmia bani ra krikriki ra prawisna ba ra,
yang sulki latwan kaiki uplika ba plikri.
Witin ba plikri, sakuna sip sakras kapri.
2Bara mahka buri, tawan ba kir taukri;
yabal bîla nani ra,
bara utla latka bîla tara nani ra sin,
yang sulki latwan kaiki uplika ba plikri.
Witin ba plikri, sakuna sip sakras kapri.
3Aihwawakra nani tawan kir tauki ba,
aikuki prawri bara makabi walri:
“¿Man nani, yang sulki latwan kaiki uplika ba kaikras katma ki?”
4Witin nani wina lui laihura wari ba ra,
yang sulki latwan kaiki uplika ba wal prak prawri.
Bara mihta kat prak alkri, swiras ban alkri ba kat;
yang yaptiki watla ra bri sal dingkri.
Waitna ba
5Pramis ai muns,
Jerusalem mairka nani,
snapuka bara sula mairin nani twi ra ba nina mâki kira,
yang laitwankira ba tatukbi bukaia apia,
swis witin yapbia,
ani piua witin buaia lukbia ba kat.#Yam L 2.7; 8.4.
Lawana yumhpika ba
Aiwani nani ba
6¿Baha ba dîa ki,
upla iwras tasbaya wina taki aula ba,
impaki aula ba kiasma tara nani tilara,
sîka mâka kîa painkira kiasmika tilara
bara awas mâka kîa tilara sin
bara isint sâtka kîa pain nani sut kira?
7¡Baha ba Salaman brih twilki ba waginka sa!
Kaiks, Salaman aula,
ai suldiarka aiklaklabra nani,
Israel wina kau kupia karna nani ba tila wina,
waitna 60 ai kaina kir kutbi brih aula sa.
8Witin nani sut ba,
sord wal aiklabaia lan sa,
bara sin war aiklaklabra nani pali sa;
kumi bani ba ai sordka
ai maisa ra wilki brisa,
tihmia ra trabil kum kra takbia kaka
pat ridi kaia dukiara.
9King Salaman ba impakaia waginka tara kum dauki brin
Líbano dusa nani painkira wal.
10Playka nani ba lika silbar ni daukan,
nina kahbaika ba lika gul ni,
iwaika pali ba kwala balianta talia ni skahkan,
bîla tani ba, latwan lâka kwalka ba ni lalaubi prakan kan,
Jerusalem mairka nani bui daukan.
11Saion mairka nani,
¡king Salaman aula ba, taki kaiks!
Ai kraunka ai lal ra mangki aula,
baha lika ai yaptika mita dauki yan ba,
witin ai maya wal marit takan ba yua dukiara,
baha yua kau lilia ba, ai rayaka sut ra.
Currently Selected:
Yamni Kulki Lawana 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua