Matayo 6
6
Imbata Yesuni afa feza ma e’yosiri
1 #
Mat 23:5
Emi te emi agei emi ma ’ye e’yo kililiru emini ’ba ma milia, ma ndre ani emi beni ku; emi ka ’ye ’dini, emi ngani oya isu Ati emini ovupi ’buari vu ku. 2Mi vu guka mi milia mini afa awaria ’ba alioru dri ku, ekile ’ba lokiri be ’diyini ’yele pari ’bani yi okuzuria azini geria, ’ba nde ma inzi yi ani benirile. Ma ’yo emi tia ndi, yi bi oya yini ’bo 3#Mat 25:37-40; Rum 12:8Te mini afa awaria ’ba alioru dri, dri eji mini ma ni e’yo dri ndi minirini ’yeleri ku, 4feta mini ’ba alioru driri ma ovu ani ndindiru; te mi Ati mi ndrepi pari ndindiruriari nga mi ofe ra.
Imbata Yesuni Mungu ziza ma e’yosiri
5 #
Luk 18:10-14; Mat 23:5, 6 Emi ka Mungu zi, emi ma ovu ’ba lokiri be ’diyile ku; yini lele pa sozu Mungu zizu pari ’bani yi okuzuria azini geri aritia, yi ma e’da ani ’ba ma milia benirisi. Ma’yo emi tia ndi, yi bi oya yini ’bo 6#2 Opi 4:33Te mini ziria, mi fi jo aliza mini ma alia, mi opi jotile mini ci, mi zi mi Ati ovupi pari ndindiru riari ma tia, te mi Ati mi ndrepi pari ndindiruriari nga mi ofe ra.
7 #
Isa 1:15
Te emini ziria emi ma ’yo e’yo toko ’ba jururu ’diyini ’yelerile ku; yini osule yi nga ovu erizaru e’yo ’yoza yini kakausirisi. 8#Mat 6:32E’yo ’disi emi si ’ba ’diyile ku, te Ati emini ni e’yo emini leleri de nga emi zini eri tia ku. 9#Luk 11:2-4; Yoh 17:6Emi zi ’dini:
Ata amani ovupi ’buari, Ru mini ma ovu inzizaru.
10 #
Mat 7:21; Luk 22:42 Suru mini ma emu, E’yo mini leleri ma ’ye i Nyakua ekile ’buarile.
11Mi fe andru ama dri nyaka dri fupi etu andrusiri;
12 #
Mat 14:15; 18:21-35 Mi ku mari amani, Amani mari ’ba afa amani nyapi ’diyini kule ’borile;
13 #
1 Sur 29:11-13; Yoh 17:11, 15 Mi ji ama obeta alia ku, Te mi pa ama ’ba onzi dri.
14 #
Mar 11:25-26
Emi ka ’ba ma ezata ku ra, Ata emini ’buari nga ezata emini ku indi; 15te emi ka ’ba ma ezata ku, Ata emini ngani vini ezata emini ku indi.
Imbata Yesuni nyaka ’dazuri ma e’yosiri
16 #
Isa 58:5-9
Emi ka nyaka ’da, emi ma ovu’ba lokiri be mile onyupi candisi ’diyile ku, a’disiku yi oja yi ma andreti onzi, yi ma e’da ’ba nyaka ’dapiriru ’ba ma milia ani beni. Ma ’yo emi tia ndi, yi bi oya yini ’boo 17Te mi ka nyaka ’da, mi efi mi dri odusi, mi oji mi mile, 18’dini mi ma e’da ’ba nyaka ’dapirile ’ba ma milia ku, te Ata mini ovupi pari ndindiruari dri a’dule; Ata mi ndrepi pari ndindiruari nga mi ofe ra.
E’yo lonyi ta mbazu ’buari
19 #
Yak 5:2-3
Emi mba afa emini lonyiru ma ta nyakua, pari oduduni afa mbezu, afani urizu uriria, pari oguouni jo ma eti luzu afa oguzuria ku, 20#Mat 19:21; Luk 12:33, 34; Kol 3:1, 2te emi mba afa emini lonyiru ma ta ’bua, pari oduduni afa mbezu, afani urizu kuria, oguouni jo ma eti luzu afa oguzu kuria. 21Te asi mini nga ovu pari mi lonyini ovuzuria ’daa.
Tala rua vileri
22 #
Luk 11:34-36
Tala ruaari eri mileni, E’yo ’disi mile mini ka ovu alaru, mi rua driani nga ovu diza be; 23#Mat 20:15te mi mile ka ovu onzi, angu bizani nga ga mi ruaa tre. Diza ovupi mi aliari ka ovu iniru, ini nde nga ovu amboru ngopi ya!
Candi asiari pi asi otiza be
24 #
Luk 16:9, 13 ’Ba econi azi ngazaru opi iri dri ku; te eri nga aluri ngu onzi, nga aziniri le’i, kani eri nga i ebi aluri be, nga aziniri ’ba aparakaru. Econi emini azi ngazaru Mungu dri indi, afa nyakuari dri indi, ’dini ku.
25 #
Luk 12:22-31
#
Fil 4:6; 1 Pet 5:7; 1 Tim 6:6; Ebra 13:5 E’yo ’disi ma ’yo emi tia, emi ma asi ma oti idri emini ma e’yosi, kini emi nga a’di nya ya, emi nga a’di mvu ya, ’dini ku; kani rua emini ma e’yosi, emi nga a’di su ya ku. Te idri agani nyaka ku ya? Rua agari bongo ku ya? 26#Mat 10:29-31Emi lu aria ’bua ’diyi: yi rini ori ku, loni ku, okuni ero alia ku, te Ata emini ’buari eri yi esu nyakasini. Emi, agani yi onyisini ku ya? 27A’di’i emi eselia eco i ma zota erezaru wuale alusi asi otizasini ya?
28Emi ovu asi otizasi bongo suzasi a’di e’yosi ya? Emi ega ojo asea ’diyi ma zota; yi ngani azi ku, pini baka ku indi; 29#1 Opi 10:4-7; 2 Sur 9:3-6te ma ’yo emi tia, Sulemani’i ti, diza eriniri be dria, suni i yi ma azile ku. 30Mungu ka afa suza fe afa idiza asea ovupi andru indi te yini ngale bele dru aciari dri ’dini, eri ngani emi osu tu aga ’diyi ra ku ya, emi ’ba a’ita be were ’diyi la?
31Emi asi ma oti ku, ’yozu kini, Ama nga a’di nya ya? Ama nga a’di mvu ya? Ama nga a’di su ya? 32#Mat 6:8’Diyi dria afa ’ba juruni ndale ’diyi; te Ata emini ovupi ’buari ni ra kini emi le afa ’diyi dria ra. 33#Rum 14:17; 1 Opi 3:13, 14; Zab 37:4, 25Emi nda oko suru Munguni pi e’yo kililiru erini be, te afa ’diyi dria nga ovu fezaru emi dri ereniru.
34 #
Efu 16:19
Emi asi ma oti e’yo drusirisi ku; dru ma asini nga oti i ma ngulupisi. O’du alu ma e’yo onzi ca erisi ra.
Currently Selected:
Matayo 6: LB66
Highlight
Share
Copy
Want to have your highlights saved across all your devices? Sign up or sign in
Bible in Lugbara © United Bible Societies, 1966.