Matayo 4
4
Satanini Yesuni obezuri
1 #
Mar 1:12, 13; Luk 4:1-13 #
Ebra 2:18; 4:15 Etu ’dasi Orindi nga Yesuni enga ji roko dria obezu Satani dri. 2#Efu 34:28; 1 Opi 19:8Ka de o’du kali su etusi inisi dria nyaka kokoru, vilerisi abiri nga eri fu ra. 3#E’do 3:1-7’Ba ’ba obepiri nga eca eri vu, ’yo ra kini, Mi ka ovu Mungu ma Mvi’i, mi azi oni ’doyini ofuzu enyaru. 4#Azi 8:3Eri nga e’yo omvi ’yo ra, E’yo si i ’bo ’dini,
’Ba econi ovu idriru enyasi a’dule ku,
te e’yo dria efupi Mungu ma tiliarisi.
5 #
Mat 27:53
Satani nga di eri ji aku alatararia, nga eri ’ba hekalu ma karia dria uru, 6#Zab 91:11-12nga ’yo eri tia, Mi ka ovu Mungu Mvi’i, mi ’be mi va; te e’yo si i ’bo ’dini, kini,
Eri nga malaika erini azi e’yo minisi, azini
Yi nga mi ’du uru dri yinisi,
mi kazu mi pa sizu oni dria ku.
7 #
Azi 6:16
Yesu nga ’yo eri tia kini, E’yo si i’bo, dika, Mi obe Opi Mungu mini ku. 8Dika Satani nga eri ji oni izuru turi ma dria, nga eri dri opi nyaza wudrikurua ’diyi ece dria, diza yini be; 9nga ’yo tinia, ’Diyi dria ma nga fe mi dri, mi ka mi eco ma drilia ma inzizu. 10#Azi 6:13Yesu nga di ’yo eri tia, Mi da mi ’dale, Satani! te e’yo si i ’bo, kini,
Mi ma inzi Opi Mungu mini,
mi ma nga azi eri dri a’dule.
11 #
Yoh 1:51; Ebra 1:6, 14 Satani nga di eri ku ra; te mi ndre, malaika nga eca ayua ayuzu eri dri.
Yesuni azi ini e’dozuri
12 #
Mar 1:14, 15; Luk 4:14, 15 #
Mat 14:3; Mar 6:17; Luk 3:19-20 Te ka eri kini fe Yohanani aruru ’bo, eri nga mvi Gailia; 13#Yoh 2:12eri nga Nazaretini ku ra, nga emu ovu Kaperinaumua, aku nde miri tia, kala Zebuluni pini Nafutali beria; 14#Isa 8:23; 9:1e’yo ndra nabi Isayani ’yoleri ma ca i paria ’yeke ani, kini:
15 # Isa 8:23–9:1 Angu Zebulunini pi angu Nafutalini pie,
geri miria, Yoridania ’aa’dasiri pie,
Galili ’ba juruniri be-
16suru ripi angu inideiriari ndre diza amboru ra, ’ba ripi angu drani dra ma endrilendriari ma alia ’diyi dri diza efu ’bo.
17 #
Mat 3:2
Engazu 0’du ’dasi Yesu nga ’ba e’yo olu, nga ’yo kini, Emi oja emi asi; suru ’buari eca ogogo ’bo.
Yesuni ’ba ini imbale oko ’diyi omvezuri
18 #
Mar 1:16-20; Luk 5:1-11 #
Yoh 1:40
Erini aciria miri Galiliari ma tia, eri nga adripi ndre iri, Simoni omvele Peterori pi adripi erini Andarea be, yi ri emba ’be miria; yini ovule ’ba e’bi okupi ’diyirisi. 19#Mat 13:47; Eze 47:10Eri nga ’yo yi tia, Emi bi ma vuti, ma nga emi ’ba ’ba ’ba okupi ’diyiru. 20#Mat 19:27Yi nga emba yini ku coti, nga eri ma vuti bi. 21Engazu ’daarisi, eri nga mu drile, nga adripi iri azini ndre, Yakobo Zebedayo mvi pi adripi Yohana be, yi ovu oguru alia ati Zebedayo pie, emba yini ederia; eri nga yi omve. 22Yi nga oguru pi ku yi ati be coti, nga eri vuti bi.
Yesu olu e’yo, ati ’ba rua indi
23 #
Mat 9:35; Mar 1:39; Luk 4:15, 44; ’Yeta 10:38 Yesu nga aci Galili ma alesi dria, ’ba imbazu pari ’bani yi okuzu ’diyia, e’yo bari suruniri oluzu, azo pi dra be atizu ’ba ruaa dria. 24#Mar 6:55E’yo erini nga ku angu Suriania dria, yi nga ’ba dria azo be ’diyi eji vunia, ’ba ovupi azo ndu be ’diyi pie, ’ba drani inzale ’diyi pie, ’ba orindi onzi be ’diyi pie, ’ba ediani o’bele ’diyi pie, ’ba acozaru’diyi pie dria, eri nga yi ati ra. 25#Mar 3:7, 8; Luk 6:17-19’Ba ongulumuru engapi Galili pia Dekapoli pie, Yerusalemu pie, Yudia pie, Yoridania ’aa’dasiri pie ’diyi nga eri ma vuti bi.
Currently Selected:
Matayo 4: LB66
Highlight
Share
Copy
Want to have your highlights saved across all your devices? Sign up or sign in
Bible in Lugbara © United Bible Societies, 1966.