Matyu 10
10
Di Twɛlv Man dɛn we Jizɔs Pik fɔ Bi Apɔsul
(Mak 3:13-19; Lyuk 6:12-16)
1Jizɔs kɔl in twɛlv lanin bɔy dɛn wan ples ɛn gi dɛn pawa fɔ drɛb dɛbul ɛn mɛn ɔl kayn sik. 2Di twɛlv man dɛn we Jizɔs sɛn na dɛn nem dɛn wan ya: Fɔs, yu gɛt Saymɔn we dɛn de kɔl Pita, ɛn in brɔda Andru; Jems, ɛn in brɔda Jɔn, dɛn tu na bin Zɛbidi in pikin dɛn; 3Filip ɛn Batalomyu; Matyu we bin de gɛda taks, ɛn Tɔmɔs; Jems we na bin Alfiɔs in pikin, ɛn Tadiɔs; 4Saymɔn we bin de fɛt fɔ fri in pipul dɛn, ɛn Judas Iskariɔt, we bin fɔ sɛl Jizɔs.
Jizɔs Tɛl di Twɛlv Man dɛn Wetin dɛn fɔ Du
(Mak 6:7-13; Lyuk 9:1-6)
5Jizɔs sɛn di twɛlv man dɛn go ɔda say. Bifo dɛn go, i tɛl dɛn se, “Una nɔ go ɛni say na di kɔntri we dɛn pipul we nɔto Ju, de, ɛn una nɔ go na ɛni tɔŋ we na dɛn Sameria pipul dɛn yon. 6Bɔt una go to dɛn pipul na Izrɛl, we tan lɛkɛ ship we dɔn lɔs. 7Una go tɛl pipul se, di tɛm we Gɔd go rul dɔn kam klos! 8Una fɔ mɛn dɛn sik pipul, una fɔ mek dɛn pipul we dɔn day gɛt layf bak, una fɔ mɛn dɛn pipul we gɛt dɛn bad sik na dɛn skin ɛn una fɔ drɛb dɛbul. Una nɔ pe fɔ wetin una gɛt, so una nɔ fɔ mek pipul pe una fɔ wetin una de gi dɛn. 9Una nɔ fɔ kɛr ɛni mɔni we una de go; 10una nɔ fɔ kɛr bag, una nɔ fɔ kɛr ɔda klos ɛn sus pas di wan we una wɛr, una nɔ fɔ kɛr wɔkin stik. Di pipul dɛn we una de wok fɔ, fɔ gi una ɔl wetin una fɔ gɛt fɔ liv.
11“Wɛn una go na ɛni tɔŋ ɔ vilej, una fɔ fɛn pɔsin we go gri fɔ mek una tap nain os, ɛn una nɔ fɔ muf go na ɔda os sote una lɛf da ples de. 12Ɛn ɛni os we una go, una fɔ se, ‘Mek Gɔd blɛs una.’ 13If di pipul dɛn na di os gladi fɔ una, di wɔd dɛn we una blɛs dɛn wit, go tap na di os; bɔt if dɛn nɔ gladi fɔ una, di blɛsin we una gi dɛn go kam bak to una. 14Ɛn if una go na ɛni tɔŋ ɔ vilej, di pipul dɛn nɔ gri fɔ mek una tap to dɛn, ɔ dɛn nɔ want yɛri di wɔd we una de tɛl dɛn, wɛn una de kɔmɔt de, una fɔ shek di dɔti kɔmɔt ɔnda una fut, fɔ sho se dɛn dɔn du bad. 15A de tɛl una fɔ tru se, di tɛm we Gɔd go jɔj di pipul dɛn na di wɔl, i go bad fɔ da ples de pas aw i bin bad fɔ dɛn pipul na Sɔdɔm ɛn Gomɔra.
Jizɔs Tɛl di Twɛlv Lanin Bɔy Se dɛn Go Sɔfa
(Mak 13:9-13; Lyuk 21:12-17)
16“Una lisin, a de sɛn una go lɛkɛ ship midul wulf; una fɔ go kɛlɛkɛlɛ lɛkɛ aw snek de go kɛlɛkɛlɛ, una nɔ du ɛnibɔdi bad lɛkɛ aw dɔv nɔ de du ɛnibɔdi bad. 17Una go kɛlɛkɛlɛ, bikɔs di Ju pipul dɛn go ol una ɛn kɛr una go kot, ɛn dɛn go bit una na dɛn Ju mitin os. 18Dɛn pipul we nɔto Ju go kɛr una go bifo di bigman dɛn we de rul na di kɔntri, bikɔs una de du wetin a tɛl una fɔ du, ɛn una go tɛl dɛn ɛn dɛn yon pipul di Gud Nyuz. 19Wɛn dɛn kɛr una go fɔ go jɔj una, una nɔ wɔri bɔt wetin una go tɔk, ɛn aw una go tɔk. Wɛn di tɛm rich Gɔd go tɛl una wetin fɔ tɔk. 20Nɔto una go de tɔk da tɛm de, na Gɔd we na una Papa in Spirit go put di wɔd dɛn na una mɔt.
21“Brɔda go mek dɛn kil in brɔda, dadi go mek dɛn kil in pikin, ɛn pikin go mek dɛn kil in mami ɛn dadi. 22Nɔbɔdi nɔ go lɛk una bikɔs una de du wetin a tɛl una fɔ du, bɔt ɛnibɔdi we bia sote ɔl di trɔbul dɔn, a go sev da pɔsin de. 23Wɛn dɛn mek una sɔfa na wan tɔŋ, una fɔ rɔn go na di ɔda tɔŋ. A de tɛl una fɔ tru se, una nɔ go du ɔl di wok na di tɔŋ dɛn na Izrɛl dɔn bifo Mɔtalman Pikin go tɔn bak kam na wɔl.
24“Pɔsin we de lan nɔ pas di wan we de lan am, ɛn slev nɔ pas in masta. 25Pɔsin we de lan fɔ no se wetin go bi to di wan we lan am, nain go bi to insɛf; ɛn slev fɔ no se wetin go bi to in masta, nain go bi to insɛf. If pipul dɔn kɔl di edman na os Biɛlzibɔb, dɛn go gi di ɔda pipul dɛn na di os nem we bad pas dat.
Una Nɔ Fred Mɔtalman, Una Fred Gɔd
(Lyuk 12:2-7)
26“So una nɔ fred mɔtalman, natin nɔ de we ayd, we pipul nɔ go si, ɛn natin nɔ de we na sikrit, we pipul nɔ go no. 27Ɛni tin we a tɛl una na kɔna, una fɔ tɔk am usay ɔlman de, ɛn ɛnitin we a tɔk saful, una fɔ tɔk am lawd wan mek ɔlman yɛri. 28Una nɔ fred di wan dɛn we ebul kil pɔsin, bɔt dɛn nɔ ebul kil in sol; bɔt una fred Gɔd we kin pwɛl bɔdi ɛn sol na ɛl. 29Dɛn nɔ de sɛl tu smɔl bɔd fɔ wan sɛnt? Bɔt dɛn nɔn nɔ de fɔdɔm na grɔn if Gɔd we na una Papa nɔ gri fɔ mek dɛn fɔdɔm na grɔn. 30Gɔd insɛf no ɔmɔs ia de na una ed, 31so una nɔ fred; una layf bɛtɛ pas dɛn smɔl bɔd dɛn layf na Gɔd yay.
Una De Fɔ Krays ɔ Una Nɔ De Fɔ Am
(Lyuk 12:8-9)
32“If ɛnibɔdi tɔk mek ɔlman yɛri se in blant mi, misɛf go tɛl Gɔd we na mi Papa we de na ɛvin se insɛf blant mi. 33Bɔt ɛnibɔdi we dinay mi bifo pipul, misɛf go dinay da pɔsin de bifo Gɔd we na mi Papa we de na ɛvin.
Nɔto Kol At, na Wa
(Lyuk 12:51-53; 14:26-27)
34“Una nɔ mɛmba se a briŋ kol at kam na wɔl, a nɔ briŋ kol at kam, a briŋ wa. 35A kam fɔ skata dɛn bɔy pikin ɛn dɛn papa, dɛn gyal pikin ɛn dɛn mama, dɛn dɔtɛnlɔ ɛn dɛn mɔdɛnlɔ; 36yu yon fambul go bi di wan we et yu pas ɔl.
37“Ɛnibɔdi we lɛk in papa ɔ mama pas mi, nɔ fit fɔ bi mi lanin bɔy, ɛn ɛnibɔdi we lɛk in pikin dɛn pas mi, nɔ fit fɔ bi mi lanin bɔy. 38Ɛnibɔdi we nɔ rɛdi fɔ tot in yon krɔs, dat na fɔ sɔfa ɛn day lɛkɛ aw a go day ɛn du ɔl wetin a de du, da pɔsin de nɔ fit fɔ bi mi lanin bɔy. 39Ɛnibɔdi we de tray fɔ sev in layf, go lɔs am; bɔt ɛnibɔdi we lɔs in layf fɔseka mi, go gɛt di tru layf.
Di Pe we Pipul we Gladi Fɔ Una fɔ Gɛt
(Mak 9:41)
40“Ɛnibɔdi we tɛl una fɔ kam nain os, na mi di pɔsin de tɛl fɔ kam nain os; ɛn ɛnibɔdi we tɛl mi fɔ kam nain os, na di wan we sɛn mi, di pɔsin dɔn tɛl fɔ kam nain os. 41Ɛnibɔdi we tɛl prɔfɛt fɔ kam nain os, bikɔs na prɔfɛt, go gɛt di sem pe we prɔfɛt de gɛt. Ɛn ɛnibɔdi we tɛl pɔsin we de du wetin Gɔd want fɔ kam nain os, bikɔs i de du wetin Gɔd want, go gɛt di sem pe we pɔsin we de du wetin Gɔd want de gɛt. 42Ɛnibɔdi we gi ɛni wan pan mi lanin bɔy dɛn kol wata bikɔs i no se na mi lanin bɔy, go gɛt in pe.”
Currently Selected:
Matyu 10: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.