Mat 10
10
Jesû kûthuura atûmwa îkûmi na baîrî
(Mar 3.13-19; Luk 16.12-16)
1Jesû nî eetîre aritwa baawe îkûmi na baîrî na arabaa inya ya kwînga roho inthûûku na inya ya kworia mîrimo na woonje bwa mîthemba yonthe. 2Mariîtwa ja atûmwa bau îkûmi na baîrî nîjo jaja: Wa mbere nî Simioni ûrîa weetagwa Peterû, na mûtaana wa ng'ina Anderea. Bangî nî Jakubu wa Zebedii na mûtaana wa ng'ina wa Johana, 3na Filipû na Batholomeo, na Toma na Mathayo ûrîa waarî mûritithia ûgotî; na Jakubu mûtaana wa Alifayo, na Thadeû; 4na Simioni wa kuuma Kanaani na Judasi Iskarioti ûrîa waakunyanîîre Jesû.
Jesû gûtûma atûmwa îkûmi na baîrî
(Mar 6.7-13; Luk 9.1-6)
5Jesû agîtûma atûmwa bau îkûmi na baîrî nî aabeerîre ûjû, “Bûgeeteni kîrî antû barîa batî Ayahudi. Ningî bûkéeja gûkûrûka ntûûreene cia Asamaria. 6Îndî îteeni kîrî antû ba Israeli nîûntû bakari ta ng'ondu ciûrîte. 7#Luk 10.4-12 Bweeta tûmîriieni Nteto Injega bûkîugaga, ‘Ûnene bwa îgûrû bûrî akuî.’ 8Orieeni barîa baajîtue, na bûriûkie barîa bakuîte, na bwoorie barîa barî na mûtigiri, ningî bwînge roho inthûûku. Bweei bûtîkûrîua, kinya buî eejanageni bûtîkûrîia. 9Bûgákamata mbeecha cia thaabu kana cia fetha kana cia îturutia mîbukoone yeenu. 10#1Ako 9.14; 1Tim 5.18 Ningî bûgákamata rîîgu kana kabuuti kana îratû, kana rûturo. Nîkwîthîrwa mûriti ngûgî nî aagîrîte kûewa îtuui rîaawe. 11O ntûûra kana mûciî jûrîa bûgakûrûka, cweeni muntû ûrîa ûrîngîenda kûbûgwata ûgeni. Kareeni nawe mwanka rîrîa bûkauma kûu. 12Bûgîkûrûka nyomba keethagieni barîa barî ku. 13Ningî këethîra eene nyomba bakabûgwata ûgeni, nkeethi cieenu cia thîîrî nî ikare kîrî bo. Îndî bakëeja kûrega kûbûgwata ûgeni, nkeethi cieenu cia thîîrî nî icoke kîrî buî. 14#Maj 13.51 Ningî antû barîa batîbûgwata ûgeni kana babûthikîîra, bwatua kuuma ku, ringaringeeni tîîri îrîa îrî magûrûûne jeenu. 15#Mat 11.24; Kîam 19.24-28 Ndîbwîra na mma atîrî, ntukû ya îgamba yakinya, ntûûra îîu îgakanûkua bûbûnene nkûrûki ya ûrîa Sodomu na Gomora ciakanûkîrue.
Kûthangîkua kûrîa gûkeeja
(Mar 13.9-13; Luk 21.12-17)
16 #
Luk 10.3
“Thikîreeni, ni ndibûtûma bûkari ta ng'ondu gatîgatî ka mbawa. Tontû bûû, îthîrweni bûrî na ûûme ta njoka na ûkiri ta kîjea. 17#Mar 13.9-11; Luk 12.11-12; 21.12-15 Imenyagîreeni nîkwîthîrwa antû bakabûgwata na babwikie kotini na babûûre ibooko bûrî kîromberoone ciaao. 18Bûgaikua mbere ya athani na anene nîûntû bwa riîtwa rîaakwa îndî bûgakûûjîîra Nteto Injega kîrî bo na kîrî barîa batî Ayahudi. 19Rîrîa bakabwikia bûgambithua, bûkamaka bûgîciûragia ûrîa bûkabeera kana ûrîa bûkabacokeria, nîkwîthîrwa îgiita rîu rîakinya, bûkaewa nteto irîa bûkabeera. 20Tontû tî buî bûkeethîrwa bûkîaragia, îndî nî Roho wa Abaagu ûkaaria arî ndeene yeenu. 21#Mar 13.12; Luk 21.16 Muntû agaikia mûtaana wa ng'ina akooragwe, na mûkûrû aikie mwana waawe akooragwe; nabo aana bakarega kwathîkîra aciari baao na baboragithie. 22#Mat 24.9,13; Mar 13.13; Luk 21.17 Antû bonthe bakabûthûûra nîûntû bwa riîtwa rîaakwa. Îndî ûrîa ûkoomîîria mwanka mûthia, akoonokua.
23“Rîrîa antû bakabûthangîkia ntûûreene îmwe, matûkeeni ntûûreene îngî. Ndîbwîra na mma atîrî, bûtîtûngania ntûûra cionthe irîa irî Israeli mbere ya Mûtaana wa Muntû acoka.
24 #
Luk 6.40; Joh 13.16; 15.20 “Mûritwa tî ûmûnene nkûrûki ya mûritani waawe; ningî nkombo tî înene nkûrûki ya mwathi waayo. 25#Mat 9.34; 12.24; Mar 3.22; Luk 11.15 Bwabua mûritwa agakara ta mûritani waawe, na nkombo îgakara ta mwathi waayo. Këethîra antû nî beetîte mweene mûciî Beelizebuli, bageeta antû ba mûciî jûu mariîtwa jamathûûku nkûrûki.”
Ûrîa ûbuîrîte gûkîrwa
(Luk 12.2-7)
26 #
Mar 4.22; Luk 8.17 “Tontû bûû, bûgákîra antû bau. Nîkwîthîrwa gûtî gîntû kiithi gîtiithûrwa, na gûtî ûntû bûrî wiithoone bûtîmenyithanua. 27Mantû jarîa mbwîragîra muunduune, jaarieni werûûne, na jarîa bûkaigua jakîarua na kîoe jatûmîîrieni na kaajû gakanene. 28Bûgakîreni barîa boomba kûûraga mwîrî îndî batîûmba kûûraga mwoyo. Îndî kîrageni ûrîa ûûmba kûûraga mwîrî na akagera mwoyo mwankiine jwa kenya na kenya. 29Anga tûnyoni twîrî tûtîendagua ciringi îmwe. Îndî gûtî kinya kanyoni kamwe gaatu gakujaga Abaagu atîtîkîîrîtie. 30Ningî nî aijî wingî bwa nchiûri cia mîtwe yeenu. 31Tontû bûû, bûgakîreni, nîûntû bûrî gîtûmi nkûrûki ya nyoni inyingî.”
Gûkûjîîra na gûkaana Kristû
(Luk 12.8-9)
32“O muntû ûrîa ûgakûûjîîra mantû jambegiî kîrî antû, kinya ni ngakûjîîra mantû jamwegiî kîrî Baaba ûrîa ûrî îgûrû. 33#2Tim 2.12 Îndî o muntû ûrîa ûgankaana kîrî antû, kinya ni nkamûkaana kîrî Baaba ûrîa ûrî îgûrû.”
Jesû eejîre kûreeta ndwaa îndî tî thîîrî
(Luk 12.51-53; 14.26-27)
34“Bûkathûgaanieni atî ndeejîre kûreeta thîîrî nthîgûrûûne. Nteejîre kûreeta thîîrî îndî ndeejîre kûreeta ndwaa. 35#Mik 7.6 Nîkwîthîrwa mbîjîte gûtûma mûtaana arwaa na îthe, na mwarî arwaa na ng'ina, na mwekûrû wa Mûtaana arwaa na ng'ina wa mûkûrû waawe. 36Anthû ba muntû bakethagîrwa barî bakuuma nja yaawe yongwa. 37Muntû ûrîa weendaga îthe kana ng'ina nkûrûki yaakwa atîagîrîte kwaa mûritwa waakwa. Nawe ûrîa weendaga mûtaana kana mwarî waawe nkûrûki yaakwa atîagîrîte kwaa mûritwa waakwa. 38#Mat 16.24; Mar 8.34; Luk 9.23 Ningî muntû ûrîa ûtîjûkagia mûtharaba jwaawe na anthingata, atîagîrîte kwaa mûritwa waakwa. 39#Mat 16.25; Mar 8.35; Luk 9.24; 17.33; Joh 12.25 Muntû ûrîa ûmenyagîra ûtûûro bwaawe akaaga mwoyo, îndî ûrîa ûkairita nîûntû bwaakwa akoona mwoyo.”
Kûewa îtuuî
(Mar 9.41)
40 #
Mar 9.37; Luk 9.48; 10.16; Joh 13.20 “Muntû ûrîa ûkabûgwataga ûgeni, nî ni agwataga ûgeni na ûrîa ûngwataga ûgeni nî ûrîa wantûmîre agwataga ûgeni. 41Muntû ûrîa ûgwataga kîroria ûgeni, nîûntû nî kîroria, akaewa kîewa kîrîa kîroria kîejagwa. Ningî ûrîa ûgwataga muntû ûmwagîru ûgeni, nîûntû nî ûmwagîru, akaewa kîewa kîrîa muntû ûmwagîru aejagwa. 42Ningî muntû ûrîa ûgakundia ûmwe wa baba aniini rûûjî, nîûntû nî mûthingati waakwa, gankûbwîra na mma atî, muntû ûu atîaga îtuui rîaawe.”
Currently Selected:
Mat 10: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218