LUKA 5
5
Yesu Yalaanga Veechi Veve Vukhuraanga Vamulonde
(Mat 4:18-22; Mk 1:16-20)
1Litukhu lindi, Yesu yali nasinjile khuluchinga lwi Inyanza ya Genesareti; khandi vandu vaminakana vatushi khuye vahulishitsi likhuva lia Nyasaye. 2Yesu yalola maaro kavili khundulu khwa matsi; navutswa valuvi vali varuli muko, khandi vali nivochitsanga tsineti tsiavo. 3Yesu yinjila mu liaro lilala khu maaro kali nikaliho, nilili lia Simoni, namureeva alisuundiikhu hatititi khurula khuluchinga. Yesu yikhala niyechitsa shituma shia vandu nali mu liaro lienelo.
4Lwa Yesu yali namali khulomoloma, yavoolela Simoni, “Sunda liaro khutukha mu luliiva lwa matsi, mulakhuli tsineti tsienyu mu matsi khu muluvi tsisutsi.”
5Simoni yavoola, “Muruchi, khuhinzili ni tsingulu tsinyishi vutukhu vwosi; nu khuvula khunyolakhu shindu shiosi. Navutswa nuvoolakhu shindu, nalakhula mu matsi tsineti yitsi.” 6Lwa vali nivakholi ndio, valuva tsisutsi tsinyishi, khali tsineti tsiavo nitsiranga khukutuukha. 7Valaanga valina vavo khurula mu liaro lindi, khwitsa khuvakhonya. Vitsa nivitsulitsa tsisutsi mu maaro kavili kenako, khali maaro kenako, khali nikava himbi khwiyinikha mu matsi. 8Navutswa lwa Simoni Petro yalola ndio, yakwa hasi hi vilenje via Yesu; navoola, “Yivi mwami, rula handi hanu; shichila ndi mundu mwoni.”
9Petro halala na vandi voosi vali nivali naye vali nilichenya, shichila vunyishi vwi tsisutsi tsia vali nivaluvi. 10Malala mele kikholekha khu valina va Simoni, nivali Yakobo nende Yohana, nivali vaana va Zebedayo. Yesu yavoolela Simoni, “Lekha khuria; khuraanjila nunundi, niitsa khukhwechitsa khuli uliitsa khulera vandu khwinzi.”
11Lwa vali nivakhasuunda maaro kavo khuluchinga, valekha shia shindu shiosi havundu henaho, nivalonda Yesu.
Yesu Yahonyinya Mundu Walwala Vuchele
(Mat 8:1-4; Mk 1:40-45)
12Lwa Yesu yali nali mu litaala lilala khu mataala kenako, mundu yitsaho niyalwala vuchele. Lwa mundu mwenoyo yalola Yesu, yasikama imbeli wewe namusaya nayaanza, “Mwami, niiva wenyanga, unyala khukhola khuva munihu.”
13Yesu yanyiila mukhono kwekwe khuye, manatiila khu mundu mwenoyo. Yesu yavoola, “Mbuchilile! Va munihu!” Vuchele vwarula mu mundu mwenoyo vwangu.
14Nalwo lwa Yesu yamuvoolela, “Uvuli khuvoolelakhu mundu wosi; navutswa simukha utsi vulunji khu musalisi akhukole; khandi uhaane shihanwa shiu khukholela musango kwa Musa yalaaka, khuli shimanyilu, khu vandu voosi ndi umali khuhona.”
15Navutswa makhuva khulondokhana khu Yesu katsililila khulanda shia havundu hosi, ma vituma via vandu vanyishi nivivunjelitsa halala khumuhulila nu khuhonyinywa khurula mu vulwale vwavo. 16Navutswa Yesu yarulaho natsia havundu ha vandu vavula khusaala.
Yesu Yahonyinya Mundu Wafwokoya
(Mat 9:1-8; Mk 2:1-12)
17Litukhu lindi, lwa Yesu yali ni yechitsanga, Vafarisayo nende veechitsi va Malako vali nivaruli mu michitsi chili mu lusomo lwa Galilaya, khandi khurula mu lusomo lwa Yudeya nende Yerusalemi vali nivikhaleho. Tsingulu tsiu Mwami Nyasaye tsiali na Yesu khuhonyinya vandu vali nivalwala. 18Vandu valala vitsaho, nivachinjili khu shitali mundu wafwokoya; vachelitsa khumwinjilitsa munzu khutsia khumuvikha imbeli wa Yesu.
19Navutswa lwa vanyola havulakhuho havundu ha vanyala khumwishitsila, shichila shituma shia vandu, vanina ikulu khushisechese, nivikula havundu wa vamuviritsila nali khu shitali shieshie khutukha hakari hi shituma shia vandu, ha Yesu yali nali. 20Lwa Yesu yalola lisuuvila lia vandu venavo vali nivali nalio, yavoola, “Mulina wanje, vwoni vwovwo vusemehelwi.”
21Vechitsi va Malako nende Vafarisayo varaanga khwireevana, “Uyu nu mundu shina unyekanga Nyasaye? Nyasaye wonyene neye uli nu vunyali vukhusemeha vandu khurula mu vwoni, navutswa wundi avulakhuho!”
22Lwa Yesu yamanya ka vali nivakanakananga, yavareeva, “Shichila shina mukanakananga murio mu mioyo chienyu? 23Nu vutoro khuvoolela mundu wafwokoya uyu, ‘Usemehwi khurula mu vwoni vwovwo,’ inoho khumuvoolela, ‘Sinjila uchende’? 24Navutswa namumanyinya ndi Mwana wu Mundu ali nu vunyali khulilova khusemeha vandu khurula mu vwoni.” Khulwa yako, Yesu yavoolela mundu wafwokoya mwenoyo, “Sinjila, vukula shitali shioshio, utsi ingo!”
25Nalwo lwa mundu mwenoyo yasinjila vwangu imbeli wavo voosi, navukula shitali shieshie shia yali nakonikhu, natsia ingo ni yitsominyanga Nyasaye. 26Vandu voosi vali nilichenya linyishi! Varia ni vitsominya Nyasaye nivavoola, “Khuloli nunundi vindu viu khuchenyinya!”
Yesu Yalaanga Levi Amulonde
(Mat 9:9-13; Mk 2:13-17)
27Yaka nikamali khwikholekha, Yesu yarulaho natsia ilwanyi, nalola musololi wu vushuru walaangwangwa Levi, niyikhale mu inzu ya vasololelamu vushuru. Yesu yamuvoolela, “Nonda.” 28Levi yasinjila, nalekha shia shindu shiosi, namulonda.
29Khulwa yako, Levi yalombela Yesu mulukha mukali kwi lilia munzu mwemwe; khandi khwalimu na vasololi vu vushuru vanyishi nende vandu vandi mu mulukha kwi lilia kwenoko. 30Valala khu Vafarisayo nende veechitsi va Malako vali nivali mu shituma shiavo, vang'ung'unila veechi va Yesu. Vareeva, “Shichila shina uliitsanga shiukhulia khandi nung'wa halala na vasololi vu vushuru nende vooni vandi?”
31Yesu yavachipa, “Vandu valamu shivanyala khwenya mushilishi tawe; navutswa yavo valwalanga vonyene vutswa. 32Shinayitsa khulaanga vandu vi likhola liu vulunji tawe, navutswa vandu vooni khwikanila.”
Lireevo khu Lihonga Vuchila Khulia
(Mat 9:14-17; Mk 2:18-22)
33Vandu valala vavoolela Yesu, “Veechi va Yohana vahonganga vuchila khulia shia khase khosi nivasaala, khandi veechi va Vafarisayo vakholanga ndio; navutswa veechi vovo valiitsanga shiukhulia nivang'wa.”
34Yesu yachipa, “Mukanakananga munyala khukhola vacheni khuhonga vuchila khulia shiukhulia, musatsa uselelanga mwiiha nali navo? 35Navutswa litukhu liliitsa khutukha lwa musatsa uselelanga mwiiha aliitsa khurulitswa khuvo; ma valihonga vuchila khulia mumatukhu kenako.”
36Yesu yavavoolela khandi lukanu yulu: “Mundu avulakhuho urandulanga shilaka shi inguvu impia khandi anavila khu inguvu ikhulu. Niiva aliitsa khukhola ndio, aliitsa khuva narunduli inguvu impia; khandi shilaka shi inguvu impia shishinyala khuva shilala ni shi inguvu ikhulu tawe. 37Mundu avulakhuho unyala khutsukha idivai impia mu maseelo makhulu ki idivai; niiva aliitsa khukhola ndio, idivai impia ilarulaka maseelo kenako idivai isuundushi; ma maseelo koneshe. 38Navutswa idivai impia itsukhwangwa mu maseelo mayia! 39Mundu avulakhuho wenyanga khung'wa idivai impia, namali khung'wa idivai ikhulu, shichila avoolanga, ‘Ikhulu nindahi muno.’ ”
Currently Selected:
LUKA 5: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013