Matayo 26
26
Yeso okoboerwa aitwe
(Mar 14:1-2; Luk 22:1-2)
1Ekero Yeso akoorire gokwana amang’ana aya onsi, agateebia aborokigwa baye, 2#Okong’ 12:1-27“Mwamanyire ng’a magega y’amatuko abere n’ebe Epasaka, na Omwana-o-Mwanyabaanto naruegwe kobambwa.”
3Erio abakuani abanene n’etureti y’ abanto bagasangererekana ase egoora y’Omokuani omonene oyore korokwa Kayafa; 4erio bakaigwana bagakora omoroberio banyare komobwata Yeso bobisi, na komoita. 5Korende bakaboora, “Taba ase rituko rinene, tiribaisa goocha koba rirorooche ase abanto.”
Yeso ogoakwa amaguta agwo Bethania
(Mar 14:3-9; Yoh 12:1-8)
6Na Yeso, ekero arenge Bethania ase enyomba ya Simioni, oyorenge noborwaire bwa ukoma, 7#Luk 7:37,38agaacherwa n’omokuungu orenge nechuba ye rigena rirabu ere namaguta ye rigori rinene ne rimisu rigiya; gaikaransete ase endagera, akamonyororokeria ase omotwe oye. 8Korende ekero aborokigwa baye bachia korora aya, bakagechigwa, bakaboora, “Nobwa ki obosiru obo: 9Inaki amaguta aya anga taonigwa ase chisiringi chinyinge na chiegwe abataka?” 10Yeso, konya omanyire aya, akabateebia, “Nase ki mokorosia omokungu oyo? Ere onkoreire emeremo emiya, 11#Okoir 15:11ekiagera amatuko onsi nigo more nabataka amo nainwe, korende timori nainche amatuko onsi. 12Buna anyororokeria amaguta aya ase omobere one, onkoreire aya ase okombeeka ang’e ase ogotindekwa kwane. 13Nekeene nabateebirie: Kera aase enchiri eye erarandigwe ase ense yonsi, neri akora oyo nariatorwe ase okomoinyora.”
Yudasi ogwancherana korwa Yeso
(Mar 14:10-11; Luk 22:3-6)
14Na ekero ekio oyomo bwa baria ikomi na babere, nere, oyokorokwa Yudasi Iskariota, agachiera abakuani abanene, 15#Zak 11:12akababoria, “Inki morang’e onye nkorua Yeso ase more?” Bakamoa chitaabu chi’echifeta emerongo etato. 16Korwa ekero ekio akaba nkorigia are ribaga ri’okomorua.
Yeso okoria Endagera y’omoerio y’Epasaka amo n’aborokigwa baye
(Mar 14:12-26; Luk 22:7-23; Yoh 13:21-30; 1 Abakr 11:23-25)
17Ase rituko rie ritang’ani ri’Emegati etabekiri memera aborokigwa bagachiera Yeso, bakamobooria, “Ng’ai origetie tokoroisie oriere Epasaka?” 18Akabairaneria, “Genda ase omochie ase omonto gete, momoteebie: Omworokia oteebire: Engaki y’ane yaikire ang’e; nyomba mwao nao ndariere Epasaka amo naborokigwa bane.” 19Aborokigwa bagakora buna bachiigetwe na Yeso, bakaarigania Epasaka.
20Riachia koba mogoroba, agaikaransa ase endagera, amo naborokigwa baria ikomi na babere. 21Kobaikaransire koragera, akabora, “Nekeene nabateebirie: oyomo oino nandue.” 22Bagaichana mono, bagachaaka kera oyomo komoboria, “Inee! Omonene, ninche?” 23#Zab 41:9Akairaneria, “Oyo ogotobeka okoboko kwaye amo nainche ase esani, oyio nere orandue. 24Omwana-o-Mwanyabaanto nkogenda are buna amariiko agoteeba, korende obobe nobwaye omonto oria, Omwana-o-Mwanyabaanto arurwe nere! Nigo ere buya kobua asare omonto oria, nonya ataiboretwe.” 25Yudasi, nere oyokomorua, akamobooria, “Inee! Omonene, ninche? Akamoiraneria: Naboigo. Aye gwateebire.”
26Kobakoragera, Yeso akabogoria omogati, akayosesenia, akayosamunyora, akaa aborokigwa, akabora, “Bogoria, morie; oyo noro omobere one.” 27Akabogoria na egekombe, na ekero airaneirie ng’a mbuya mono, akabaa, akabora, “Kanywe aya inwe mwensi, 28#Okong’ 24:8; Yer 31:31-34naki aya naro amanyinga aane y’okobwatana okoyia, aitekire ase engencho y’abange ase okwaberwa kw’ebibe. 29Nabateebirie, tinkonywa naende okwama oko kw’emesabibu goika rituko riria ndache gokonywa oboyia amo nainwe ase oborwoti bwa Tata.” 30Kobakoorire goteera Ogoteera, bagasoka kogenda egetunwa ki’Emezeituni.
Yeso okobana buna Petero agocha komokana
(Mar 14:27-31; Luk 22:31-34; Yoh 13:36-38)
31 #
Zak 13:7
Erio Yeso akabateebia, “Ase obotuko bwa reero inwe mwensi inamogochwe ase engencho y’ane na gontiga; naki nariikire: Ning’ake omorisia, ne ching’ondi chie riicho inachiserebekane. 32#Mat 28:16Korende magega y’okobooka kwane nimbatang’anere kogenda Galili.” 33Petero akamoteebia, “Neba inabagochwe bonsi ase engencho yao na bagotige, inche tinkogochwa na kogotiga nonya ng’ake.” 34Yeso akamoteebia, “Ekeene nagoteebirie: Ase obotuko obo, ekero etuoni etarabuga, nonkane ara gatato.” 35Petero akamoteebia, “Nimba ngokwa amo naye, tinkogokana nonya ng’ake.” Na aborokigwa bonsi bagateeba boigo.
Yeso ogosaba Gethisemane
(Mar 14:32-42; Luk 22:39-46)
36Naende Yeso akagenda nabarabwo goika aase akorokwa Gethisemane, agateebia aborokigwa baye, “Ikaransa aa ekero nkogenda aria gosaba.” 37Akaira Petero na abana baria ba Zebedi babere, agachaaka goichana na gwechanda mono. 38Erio akabateebia, “Omoyo one nore nobororo obonge, nonya ngoika ogokwa; ikaransa aa, morende amo nainche.” 39Akagenderera ake, akagwa maumama, agasaba, “Tata one, onye ekonyarekana, tiga egekombe eke#26:39 Egekombe eke: engencho yaye emechando eye kerusigwe ase ’nde; korende taba buna nyanchete inche, korende buna bwanchete aye.” 40Agachiera aborokigwa baria, akabanyora bararire, agateebia Petero, “Inee! Iga timokonyara korenda amo nainche nonya nensa eyemo? 41Renda, mosabe, timobaisa gosoa ase ogoteemwa; omoika oro nore nogwancha, korende omobere tori ne chinguru.” 42Naende akagenda eria kabere, agasaba, “Tata one, onye tekonyarekana egekombe eke#26:42 Egekombe eke: engencho yaye emechando eye keng’etere ntakenywereti, abe buna bwanchete aye.” 43Agacha naende, akabanyora bararire; ekiagera amaiso abo abeire amarito. 44Erio Yeso akabatiga naende, akagenda, agasaba eria gatato agakwana amang’ana aria amatang’ani. 45Erio agachiera aborokigwa baria, akabateebia, “Nonya mbono nigo moraire na gotimoka? Rora ensa yaikire, na Omwana-o-Mwanyabaanto obekirwe ase amaboko y’abanyene ebibe. 46Imoka, togende, rora, ere oyokondua oikire ang’e.”
Okobwatwa kwa Yeso
(Mar 14:43-50; Luk 22:47-53; Yoh 18:2-11)
47Ekero arenge gokwana, Yudasi, oyomo bwa baria ikomi na babere, agacha, na omoganda omonene amo nere bare nemioro ne chinungu, bakorwa ase abakuani abanene n’etureti y’ abanto. 48Ere oyokomorua, konya obaeire ekemanyererio, agateeba, “Oyo ndanyunyunte, oyio nere, momobwate.” 49Erio kegima agachiera Yeso, agateeba, “omorembe obe naye, Omonene!” Akamonyunyunta. 50Yeso akamoteebia, “Mosani, kora bwango eki giakoreta aa?” Erio bagaacha, bakamobwata Yeso, bakamoira. 51Na rora, oyomo obo bw’abarenge amo na Yeso akarambora okoboko kwaye, akang’usa omoyio oye o birende, agaaka omosomba bw’Omokuani omonene, akamobutora ogoto. 52Erio Yeso akamoteebia, “Irania omoyio oo o birende aase aye, ekiagera bonsi abakoimokia omoyio o birende inabasire ase omoyio o birende. 53Gose tomanyeti ng’a ninyare gosaba Tata, na ere nantomere abamalaika kobua emeganda ikomi na ebere? 54Korende naki rende nanga amariiko aikeranigwa, ng’a nabo egwenerete koba?” 55#Luk 19:47; 21:37Ensa eria Yeso agateebia emeganda y’ abanto, “Inee! Igo mwachire buna abamokoumokera omouri nemioro ne chinungu gocha kong’ira? Kera rituko naikaransete amo nainwe ime ase Hekalu ase okworokereria, ko timwambwata. 56Korende aya onsi abeire, erinde amariiko y’ababani aikeranigwe.” Erio aborokigwa bonsi bakamotiga, bagatama.
Yeso bosio bw’etureti
(Mar 14:53-65; Luk 22:54-55,63-71; Yoh 18:12-14,19-24)
57Baria babwatete Yeso bakamoira ase enyomba ya Kayafa Omokuani omonene, aase aborokia b’amariiko na abagaaka basangererekanete. 58Na Petero akamotunyana korwa magega ore egeka, goika ase egoora y’Omokuani omonene, agasoa ime, agaikaransa amo nabarendi, erinde arore eki gekoba omoerio. 59Erio abakuani abanene na ab’ekegaambero bonsi bakarigia amang’ana y’oborimo y’ogosoera Yeso, banyare komoita; 60korende nonya abarori abange b’oborimo bachete, tibayanyora. Omoerio abarori babere bagaacha, 61#Yoh 2:19bakaboora, “Omonto oyo nigo ateebete: Ninyare gotagora Hekalu ya Nyasae, na koyeagaacha ase amatuko atato.” 62Erio Omokuani omonene agatenena akamobooria Yeso, “Tokoiraneria ing’ana? Inki aba bakogosoera?” 63Korende Yeso agakira. Na Omokuani omonene akamoteebia, “Nagotianirie ase Nyasae ore moyo, ototeebie gose naye Kristo, Omwana o Nyasae.” 64#Dan 7:13Yeso akamoteebia, “Naboigo aye gwateebire, korende nabateebirie inwe, korwa bono inamorore Omwana-o-Mwanyabaanto oikaransete ensemo y’okoboko gw’okorio kw’Oyore nokobua, ogocha ase amare a igoro.” 65#Abal 24:16Erio Omokuani omonene agatandora chianga chiaye, akabora, “Oramire Nyasae; abarori naba ki tokorigia? Mwaigure emerumi yaye akorama. 66Inaki morooche?” Bakairaneria, “Omonto oyo nigo agwenerete akwe.” 67#Isaya 50:6Erio agwo bakamotwera amate obosio, bakamoaka chinkundi; abande bakamoaka chindoe, 68bakobora, “Kristo, tobanere! Ning’o ogoaka?”
Petero okomokana Yeso
(Mar 14:66-72; Luk 22:56-62; Yoh 18:15-18,25-27)
69Bono Petero nigo aikaransete egoora isiko. Omoiseke oyomo omosomba bw’Omokuani omonene akamochiera, akabora, “Aye naye kwarenge amo na Yeso Omogalili.” 70Korende ere agakaana ase amasio abo bonsi, akabora “Timanyeti ayio ogokwana.” 71Ekero achia gosoka gesieri, omoiseke onde akamorora, agateebia abarengeo, “Omonto oyo nigo arenge amo na Yeso, Omonazareti.” 72Agakaana naende, na gotiana, “Inche timomanyeti omonto oyio.” 73Magega ase egeka egeke abateneine aroro bagaacha, bagateebia Petero, “Ekeene bori, naye noyomo obo ore, ekiagera ogokwana kwao gwakoorokirie.” 74Erio agachaaka kweragereria na gotiana, okobora, “Inche timomanyeti omonto oyio.” Agwo kegima etuoni ekabuga. 75Erio Petero akainyora ring’ana riria Yeso ateebete, “Ritang’ani etuoni etarabuga, nonkane ara gatato.” Agasoka isiko, akarera nobororo.
Currently Selected:
Matayo 26: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021