Matayo 24
24
Yeso ogokwana igoro y’ogotagorwa gwe Hekalu
(Mar 13:1-2; Luk 21:5-6)
1Yeso agatiga Hekalu, akaba nkogenda are, na aborokigwa baye bakamochiera komworokia amaagacho ye Hekalu. 2Korende akabairaneria, “Inee! Mwarorire aya onsi? Nekeene nabateebirie: Tirigotigara rigena erimo aiga igoro ase erinde, eritatagorwe.”
Amabe agochi‐gocha
(Mar 13:3-23; Luk 21:7-24)
3Gaikaransire ase egetunwa ki’Emezeituni, aborokigwa baye bakamochiera bobisi, bakamoboria, “Toteebie, aya indiriri arabe? Naende ninki ekemanyererio ki’ogocha kwao, na ay’omoerio bw’ense?” 4Yeso akabairaneria, Mwerende, monto onde tabang’aina. 5Inaki abange inabaache ase erieta riane, babore: Inche ninche Kristo; baraae abange na kobasiria. 6Na inwe inamoigwe esegi, ne chinkuma, chi’esegi; rigereria timoichanigwa, ekiagera ekeene, aya onsi nabe; korende omoerio toracha. 7Inaki egesaku nakeimoke korwana negesaku kende, na oborwoti inaborwane noborwoti bonde; enchara na emetengecho y’ense inabibe ase chinsemo ne chinsemo. 8Ayio onsi naro omochakano bw’obororo.
Yeso ogokwana igoro y’ogochandwa
9 #
Mat 10:22
Erio inabaabarue monyare gochandwa na goitwa, na inwe inamwangwe nebisaku bionsi ase engencho y’erieta riane. 10Na ekero ekio abanto abange inabagwe korwa ase okwegena kwabo, inabasigaanane na kobeekana ase ababisa babo, naende nabagechane, 11na ababani b’oborimo abange mbaimoke, baraae abange na kobasiria. 12Nase engencho y’okomenteka kw’ebibe, obwanchani bw’abange ’nabokende. 13#Mat 10:22Korende oy’oraaremererie goika omoerio, oyio natooreke. 14Naende, amang’ana aya amaya y’oborwoti narandigwe ase ense yonsi koba kirori ase ebisaku bionsi; erio omoerio ochiche.
Okogechia kw’ogosaria
15 #
Dan 9:27; 11:31; 12:11 Gaki, naboigo kamogocha korora okogechia kw’ogosaria gwatebetwe nomobani Danieli, kogotenena Aase Aachenu (oy’ogosoma amanye), 16erio abare Boyahudi batame gochia ase ebitunwa. 17#Luk 17:31Ere oyore kerama igoro taika kogenda kobogoria gento ekere nyomba mwaye, 18na ere oyore mogondo tairana nyomba kobogoria eyanga yaye. 19Korende nebe aakong’u ase abare morito na abakogonkia ase amatuko aria. 20Korende saba ng’a ogotama kwaino tikoba ekero gi’etoigo, gose ase rituko ri’Esabato, 21#Dan 12:1; Okom 7:14ekiagera agwo n’ebe emechando emenene, etana koba korwa omochakano bw’ense goika bono, gose tekoba bo naende nonya ng’ake. 22Naende onye amatuko ayio atanachetwe, anga monto onde bwensi tatooregete; korende ase engencho y’abachore amatuko ayio nanachwe. 23Na ekero ekio omonto karabateebie: Rora, Kristo naa are! Gose: Ooria! Timwancha. 24Inaki nabaoroke abakristo b’oborimo, na ababani b’oborimo, nabaorokie ebikone ebinene na amakumia, goika keranyarekane, nabang’aine nonya nabachore. 25Rora, nabateebirie aya ritang’ani. 26#Luk 17:23,24Gaki, kobarabateebie: Rora, oyo ore ase erooro, timosoka isiko; kobarabateebie: Oyo ore ebinunchi bia bobisi, timwancha. 27Inaki buna okomesa gokorwa moocha kwabara gochia bosongo, naboigo ogocha kw’Omwana-o-Mwanyabaanto korache koba. 28#Luk 17:37Inaki aase ribego rire, nao chinsoti chigosangererekana.
Ogocha kw’omwana Omwanyabaanto
(Mar 13:24-27; Luk 21:25-28)
29 #
Isaya 13:10; Yoel 2:10,31; 3:15; Okom 6:12;
Isaya 13:10; Ezek 32:7; Yoel 2:10; 3:15;
Isaya 34:4; Okom 6:13 Korende bwango magega y’emechando y’amatuko aria, erioba narionchoke ribe omosunte, na omotienyi tokobara, ne ching’enang’eni nachigwe korwa igoro, ne chinguru chia igoro nachitengechigwe. 30#Dan 7:13; Zak 12:10-14; Okom 1:7Erio nario ekemanyererio ki’Omwana-o-Mwanyabaanto kerache kororekana igoro, na ebisaku bionsi bi’ense nario biraarere; naende nabarore omwana‐o‐Mwanyabaanto ogocha ase amare a igoro ne chinguru, na obonene obonge. 31Erio natome abamalaika baye na egeturi ekenene ki’egetuureri, na barabwo mbasangererie abachoore baye korwa ase chinsinyo inye, korwa ensinyo eyemo ya igoro goika eyende.
Amorokererio korwa ase omoko
(Mar 13:28-37; Luk 21:29-36; 17:26-30)
32Eorokererie omobayeeno oyo korwa ase omoko: Orosagia rwaye korwachaakire koorokia amato aye, mwamanyire ng’a nekero ki’ogoseboka, egura gura ng’ang’e ere. 33Naboigo nainwe komokorora aya aorokire, momanye ng’a omoerio obeire ang’e na gesieri. 34Nekeene nabateebirie: Ekegori eke tikegoeta nonya ng’ake goika aya onsi anyare koba. 35Igoro na ense nabiete, korende amang’ana aane takonyara goeta nonya ng’ake.
Onde taiyo omanyete rituko nonya n’ensa
36Korende amang’ana ye rituko riria, na ensa eria onde tari omanyete, nonya nabamalaika ba igoro, nonya n’Omwana, otatiga Tata bweka. 37#Omoch 6:5-8Korende buna amatuko aria a Nuhu abeete, naboigo ogocha kw’Omwana-o-Mwanyabaanto korache koba. 38Inaki buna barenge ase amatuko aria etoigo etaracha, baare koria, bakonywa, bakonyuoma, bakonyuomerigwa, goika rituko riria Nuhu asoete ase obwato, 39#Omoch 7:6-24na barabwo tibamanya goika etoigo egaacha, ekabasiria bonsi; naboigo ogocha kw’Omwana-o-Mwanyabaanto koraache koba. 40Engaki eyio abanto babere inababe mogondo; oyomo nairwe, na oyomo natigwe. 41Abakungu babere inababe bagoseera orogena oromo; oyomo nairwe, na oyomo natigwe. 42Ase ayio, renda, ekiagera timomanyeti ituko ki Omonene oino agocha. 43#Luk 12:39,40Korende manya aya, onye omonyene enyomba namanyete nkero ki ase obotuko omoibi agocha, anga narendete taiberwa. 44Ase ayio nainwe, kabe ang’e; naki ase ensa eria motakagereti nario Omwana-o-Mwanyabaanto araache.
Abasomba abegenwa na abatari abegenwa
(Luk 12:42-46)
45Ning’o rende ore omosomba omwegenwa, naende ore omong’aini, obegetwe nomonene oye igoro ase enyomba yaye, ae abanto endagera ase ekero kegwenerete? 46Nasesenirie omosomba oria, ekero omonene oye arache amonyore ogokora bo. 47Nekeene nabateebirie ng’a namobeke igoro ase ebi abwate bionsi. 48Korende omosomba oria omobe, karateebe ase omoyo oye ime: Omonene one otebanire goocha, 49achaake goaka abasomba b’omonene oye, na koria na konywa amo nabagotinda, 50omonene bw’omosomba oria nigo araache rituko atakagereti, na ensa atamanyeti; 51ere namonachane abe ebing’ese namobeeke amo nabang’ainereria. Aroro abanto ’mbabe nekerero na okoriania amaino.
Currently Selected:
Matayo 24: EKGE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2021